|
أول موضوع لي فالمنتدى . . تزوجت من متزوج ولكن !!
الســلام عليكمـ ورحمـه الله وبركـاته اخواتي العزيزات . . . بمــا أنه أول موضوع لـــي فالمنتدى فحبيت أني أشرح مشكلتي و آخذ رايكمـ فيهـا . . . وبحكيلكمـ قصتي وان شاء الله ألقى عندكم الصدر اللي يونسني وأني ألقى ملاذي هنــا بالبــوح بمـا في خاطري لأن مثل هالمواضيـع ما ينفـع أكلم أهلي فيها أو أهله أو حتى هـو ذاتـــه أنـــا بنت صغيرة فالعمـر (23 سنـة) - موظفـــة تزوجت من 3 شهور بـــ شخص متزوج وعنده بنـت إنســان راقــي وقمـة في الطيبـة والحنـان والاحترام والاحتواء في بدايـة الخطبـة تـرى هـو أخو صديقتـي وكلمت أهلها عنــي و نلت إعجابهم بــس ما توقعت أنهم يريدونــي لـه وفـــي أسباب لزواجـه الثانــــي واللي هـو الإهمـال الكامـل وانشغالها التام عنـه !!! أنـا صعقت هـي بنت وحدة ودراسـة جامعيـة كل يوم 4 ساعات يعنــي لو الأمور تترتب مالـه داعي الزواج من أخرى المهم . . . كنت رافضـة مبدأ آخذ واحد متزوج أنـا مو نا قصني شيء عشـان آخذ متزوج وعنده بنت بعد يمكن لو هو مطلق أرحم نظرة أهل زوجتـه أني سرقت زوج بنتهم أرعبتني كثيـر غيـر حريم أخواني اللي ممكن يشوفوني بنظرة غريبـة آخذ متزوج والحمدلله استخرت أكثـر من مرة و كل مرة أحلم بأحلام طيبـة ونفسيتي مرتاحـة لـه لدرجـة قلت لصديقتي أريد أشوف شكلـه في صورة إذا سمحتي و راوتني إيـاه وما شاء الله ما كان يبين عليـه انـه 32 يعني عمره وشكلـه أصغر كأنـه من الـ 20 يــا رب ما يحرمنـي منـه والله إنـي أحسـه صار جزء منـــي وصار أهم جزء في حيــاتي المشكلـة اللي أريد أقولكم إياها اني أغار وبجنوون أنذبـــح كل ما يروح عندها مع أنـه أول ما يدخل البيت عندها يقولي أشتقتلج قسم بالله أحيانا يبكــــي !!! أستغرب أقولـه وينك ووينهــا عنك . . . يـــقولي أنـا فالصـالة لحالي طيب حبيبي تعشيت ؟ يرد علي : لا ما سوتلـــي شيء أقولــه تعال عندي مسوية عشــاء خفيف : يقولي خايـف إني ما أعدل يـــا فلانـة مهملـة فيـه لدرجـة أنـها ما تحضر لـه أكلـه ولا حتى توفر لـه أبسط حقوقـه كــزوج !!! تنام من الساعة 9 بالليل على أساس أنه عندها جامعـة بكرة يألمني تعاملها معاه مــا أقدر أجبره ييجي عندي و يقعد أخاف مووت والله غيرتي جنونيـة لو ما سوت لـه عشاء أو غداء أنا أتقطع من داخل أنهزم نفسيــاً أقعد ابكي لحالي وصلت حالـة فالحب إنــي أتألم إذا اشتكى لـــي من شيء هو ما يريدهـــا بـــس خايف على البنت تاخذها لأنها من جنسية خليجية مش إماراتيـة وممكن تاخذ معاها البنت وهو روحـه هالبنت لأنها جت بعد 8 سنين زواج وعمرها ألحين سنة ونص والشاهد الله إني آخذها معايـه واتسوق لها وأشوفها أكثر من بنتي و اتفدا فيهـا وهو يعرف إني أحن عليها من قلبي ومقدرنـــي وأعشق نظرة عيونـه لما يشوفني إني ضامـة أهلـه و ضامـة نفسي لـــه ... أفيدونــــي . . . كيف أخفف غيرتي الجنونيـة عليـه ؟ كيـــف أعوضـه عن كل اللي يصير فيـه من زوجتـه الأولى ؟ كيف أخفف عنـه إحساس أنـه ما يعدل لأن قلبـه كلـه رايـح ناحيتي ؟ يحلفلي بالعظيم أنها ما تحط لـه المـاي ولا تعطيـه وجـه ولا يمارس حقـه الشرعـي معاها يقول نفســـي واقفـة مهملتني ما أحس أنها تريدنـــي , يقول أمووت وأكون عندج بسس خايــف شـو تنصحونـــي أختكمـ / عاشقـة حتى الجنون |
رد: أول موضوع لي فالمنتدى . . تزوجت من متزوج ولكن !!
الله يكون في عونك ماقدر الومك ليش وافقتي عليه وادري بيجي بعدي اللي يلومك بس الشرع والدين اجازله هالشي ومدام مولاقي اهتمام من زوجته ورعايه ومايلاقي الا الاهمال هي ماحافظت على زوجها وشكله مو هامها غير مستقبلها
انتي حطي الله بين عيونك ولا تزيدينه عليها وتعوذي من الشيطان لاتسمحين له يوسوس لك بأنك احق منها او تكسبينه لك وحدك قومي بواجباتك كلها بالشكل اللي يرضيك وهي ربها يحاسبها ويمكن نفورها منه بسبب زواجه عليها ماتنلام بعد الرسول صلى الله عليه وسلم وهو اعدل الخلق عدل بين زوجاته في كل شي الا القلب كان مايل لعايشه رضي الله عنها والغيره طبيعيه بس تكون بحدود اقري عن قصص الرسول مع زوجاته بتفيدك اكيد الله يسعدك ويسهل دربك |
رد: أول موضوع لي فالمنتدى . . تزوجت من متزوج ولكن !!
الله يوفقكم ويسعدكم ويصرف عنكم كل سوء
إذآ إنتي قايمه بكل حقوقه وواجباته وماقصرتي بشي خلاص ماعليك بغيرك ولاتعطين نفسك مجال تفكرين فيها ودآيم أول مايطلع من عندك حاولي تشغلين نفسك عنه لأنه خلاص هذآك الوقت مالك حق فيه الحق لزوجته الثانيه حتى لو أهملته ومافكرت فيه لاتحرمينها من إهتمامه هو فيها لومالقى منك مسجات واتصالات أكيد بيلجأ لها لوكلمه تطيب قلوبهم لاتكونين حاجز بينهم ولاتشغلين نفسك فيه زياده عالازم والله تعورين قلبك وتتعبين عالفاضي الحيه ماتستاهل نتعلق فيها أو بأحد فيها لأن محد دآيم إلا الله أعطي بدون مبالغه وخذي إللي يرضيك وإذآ فعلاً تبين تخففين غيرتك الجنونيه نفذي إللي كتبته وبمجرد مايكون يومها وعندها أتركيه لها حتى لوبالبدآيه ماتعود منك ورفض انك ماترسلين انتي قولي له هذا يومها وحقها واعطيها عشان تعطيك والله ييسر لكم. |
رد: أول موضوع لي فالمنتدى . . تزوجت من متزوج ولكن !!
غريبة يعني زوجته الأولى ما درت عن زواجك؟ شلون تاخذين بنته معاك السوق؟ لأنها مستحيل تستمر كذا لو أنها دارية عنه
الشي الثاني انا ما أشوف في شي يخليك تغارين منه أو عليه أنت عارفة مسبقا إنه متزوج وراضية ومالك إلا حقوقك وهو عنده زوجتين ولازم يعدل حتى لو كانت مهملته لأن رب العالمين بحاسب كل واحد فيهم على حدة أما غيرتك وتعلقك الجنوني فانا أنصحك انك تخفيفها شوي حتى ما تصير غيرة وتعلق مرضي ولا تذبحين نفسك بالتفكير ( أكل - شرب- راج- جا) هو رجال ماله صغير أسهل شي عليه يشتريله سندويشة من أي مطعم صراحة امرأة ما تناظره من ايش تغارين كلامك جدا مطمئن بالعكس الفارق بينكم كبير وكل ما زاد إهمالها يزيد رصيدك عند زوجك وصراحة عجبني زوجك وتعلقه ببنته وما يبي يطلق زوجته لأن لو مافيه خير لهم مافيه خير لك وعجبني انه يخاف الله ويتقيه واللي يخاف من الله لا تخاف منه أبد كلشي مطمئن ومريح بس استعيذي من الشيطان وابعدي عن الوسوسة الله يهنيكم ويخليكم لبعض |
رد: أول موضوع لي فالمنتدى . . تزوجت من متزوج ولكن !!
مافهمت انتي زعلانه عليه لانها ماتهتم فيه ولا لانه يروح لزوجته
حبيبتي بختصر عليك الكلام انتو مو تغارين لانه مايكل ولاتهتم فيه انتي تغارين لانه يذهب لزوجته الاولى فقط لانه هو ماتزوج عليها الا لانه يريد ان تهتمي فيه وتسوي له اكل ويحس انه متزوج فليش الغيره اجل والشي الثاني يمكن اهمال زوجته له لانه تزوج عليها فهي كأنها تقول له دامك تزوجت خليها تهتم فيك وثالث شي احس من كلامك انك تبينه يجي عندك طول الوقت ويترك احساسه بعدم العدل وهذي النقطه الرئسيه في الموضوع حبيبتي لاتغترين بحبه لك فالدنيا دواره ولا تدرين وش الايام تكتبلك ولكن دامك اقتنعتي بزوج معاه امره قبلك وقد قبلت بك زوجه لزوجها فعليك ان ترضين بها وتحثين زوجك على العدل وفي اليوم اللي يجي عندك دلعيه مثل ما يحب اما في ايامها ان شاء الله يصوم كل اليوم فهذا لايهم لان زوجك رضي بهذا الشي وحابه اقولك كمان انك لا تصدقي زوجك انها لا تهتم فيه ومن هذا الكلام لانك لاتملكين الدليل على مصداقيه كلامه والا ليش صبر عليها لحد ما حملت وجابت له بنت كان استغل النقطه هذي لصالحه وطلقها نصيحتي لك ان تخافي الله في زوجت زوجك وان تقومي بواجباتك ناحيته ودامه هو قبل بتصرفات زوجته فهذا شي راجعله هو |
رد: أول موضوع لي فالمنتدى . . تزوجت من متزوج ولكن !!
البنات كفو و وافووو وانا بختصار راح اجااااوب هذي ضريبة الزواج من مزوج لعد شلون تخيلتي حياتج راح تكون معاه ولازم يعدل بينكم واللة يسعدكم
|
رد: أول موضوع لي فالمنتدى . . تزوجت من متزوج ولكن !!
البنات كفو ووفو وانا ماراح اقولك ليش اتزوجتيه وكذا لان هذا نصيب
والتعدد حلله رب العباد لاسباب عديده وحكم بالغه بس عندي ملاحظه واتمنى تاخذيها بصدر رحب ولا تعتبريها الا كلمة حق هو متزوج زوجته الاوله من 8 سنوات وعنده بنت وانتي لساتك من 3 شهور يعني لسا في بداية المشوار وطبيعي الان تبالغي في اهتمامك به وحبك المجنون الخ من الاشياء اللي ذكرتيها بس هي متزوجه من 8 سنين والله اعلم ايش سبب لها هالفتور وبصراحه عاذرتها ولو مكانها كلن سويت اكثر يعني طالبه وتدرس وعندها بنت وتعب ودوام وهم وحالة نفسيه ما يعلم بها الا الله وزوج يبي ويبي ويبي وفي الاخير راح تزوج وما صبر خلاص طز فيه اخذ حقوقي منه واعطيه المستطاع وترى حتى لو حرمته من الجنس بكيفهاهو عنده حرمه ثانيه كل اللي ابغى اقوله حبي زوجك وعيشي معه وحافظي عليه بس خليك من زوجته الاوله ولا تنتقديها ولا تشجعي زوجك على هجرانها بالعكس شجعيها على العدل ولا تغاري منها وخليها في حالها يكفيها ترى اللي هي فيه مسكينه انتي تظني انها بعد ال8 سنسن اللي بينهم رح تركض له ورا مطالبه واكله ووووو وهو متزوج علييها ترى حطي روحك مكانها الحرمه لاكسر خاطرها زوجها ماعاد يصلحه شي |
| الساعة الآن 06:53 AM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .