|
احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
السلام عليكم ورحمه الله وبركاته
اسعد الله اوقاتكم بكل خير راح اقولكم تجهيزاتي لشنطتي وشنطه البيبي وانتظر اقتراحاتكم إذا فيه شي ناقص شنطتي الخاصة بالإقامة ثلاثة أيام بيجامه واحده للنوم سؤالي هل احتاج أزيد بيجامه ثانية ؟ قيمصين لاستقبال الضيوف واحد أبيض ستان والثاني سماوي قطن وفيه دانتيل بيجامه استقبال وردية فوط صحيه من كوتكس وبالنت قريت إن فوط لوتس لما بعد الولادة ممتازة فيه احد جربها؟ ستيانات رضاعه وملابس داخليه اخذتها من فلور التابع لواحة الجلابية سليبر مريح بس احتاج سليبر دانتيل سكري ومدري وين احصله على العلم إني من سكان الخبر فيا بنات الخبر اللي عندها فكرة يا ليت تفيدني شبشب مضاد للمياة تحسبا لو كان حمام المستشفى ما فيه مشط للشعر توكات وتيجان للشعر مناسب للقمصان عطر بس لسى ما شريت مناشف منشفه للجسم والشعر والوجه ادوات استحمام صابون وشامبو وليفه فرشاة اسنان معجون كريم مرطب للوجه واليد والجسم مناديل ورقية مناديل ديتول لسى حابه اشتري استشوار عشان لو اخذت شور يكون معي مجفف مكياج بسيط مرطب شفاه مرآه لسى بسوي نسخه من الاوراق الرسمية بطاقتي وبطاقة زوجي اعواد قطن للأذن كريم لتشققات الصدر مزيل عرق مناديل مزيلة للمكياج المناديل المانعه لتسرب الحليب لسى بشتري جوارب عشان البرد وترنق عشان الخروج من المستشفى شنطة البيبي قطعتين من الملابس الداخلية قطعتين من الملابس الخارجية للمستشفى لبس للخروج والملابس الخارجية ولبس لخروج لحد الآن ما كملتهم بطاطين قطنية وعددها اثنين حفاضات للمولود كريم الحفاظ ولسى ما شريت الحفاظات والكريم كريم لجسم المولود وللحين ما شريته ما اعرف ايش الافضل جونسون والا نونو لفتين للطفل مفرش لحمل الطفل وقت الخروج وللحين ما شريته ما اعرف وين المفارش الافضل بمذركير والابسنتر بوينت غطاء الرأس مقص اظافر وللحين ما شريته اما باقي الاغراض فناقصني مفرش للسرير وما احري وين القى بالخبر مفرش دانتيل حلو مع سرير للبيبي ومدس دولاب في الغرفة اللي بجلس وقت النفاس اغراض البيبي لسى حوض الاستحمام والقاعده الرافعه للطفل مفرش عملي لسرير الطفل جهاز مراقبة الطفل وما اعرف ايش احسن نوعية ولسى ميزان الحرارة ومسخن الرضاعات ما اعرف ايش احسن نوع وبالنسبة لصابون غسيل ملابس الطفل ايش احسن نوع ومن خبرتكم ايش افضل نوع حليب صناعي بكرية واحتاج مساعدتكم بانتظاركم |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
كل هالمشاهدات حتى رد واحد ما شفت
|
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
حبيبتي وايد حاطتلج اغراض حق المستشفى ..
في اشياء مو ظرورية لا تثقلين على نفسج حسبي حساب الهدايا اللي بتييج و بوكيهات الورد و الحلويات .. !!!!!!! اخذي الظروريات .. جلابيات الاستقبال .. و بجامتين خفاف .. و ستيانات رضاعة و ملابس داخلية اذا حابة تلبسين من عندج مع فوطة للشور .. لأن خبري المستشفى يعطونج .. حتى الفوط الصحية ( هذا لو كنتي بتولدين في مستشفى خاص اما الحكومة ماعندي خبر ) بس الأكيد يوفرون لج الفوط الصحية اما عن العطور والمكياج .. ترى انتي توج والدة ماظن فيج شدة كل هذا و خافي من عين الناس تطير فيج عطري جلابياتج اول ماتبرزينهم و تكوينهم وخلاص .. اساسا العطر يضر البيبي ..و اقري عن هالشي في قوقل .. يسمى بـ ( الشمم ) و سليبر واحد كافي .. أكيد حمامهم فيه سليبر خاص .. خذي معاج شامبو و شور جل و ليفتج و فرشاة الاسنان مع المعجون و مشط و مشبك للشعر ناعم .. و اذا حابة تلبسين تاج على راحتج .. أحس كفاية كفاية ماظن له داعي الاستشوار .. تخيلي احد يزورج و يدش فجأة الا انتي تسوين شعرج !! مو حلوة و انتي كيفج .. اما عن البيبي .. فهو يحتاج اكثر من قطعيت من كل شي .. لأن الطفل اول ا ينولد يوصخ واااااااااايد .. فبتحتاجين تغيرينه اكثر من مره باليوم ! و مو غلط لو خذيتي زيادة و رجعتيهم احسن من ما تاخذين قاصر و بعدين تشرحين لزوجج شنو اييب و اييب لج غلط بعد خخخخخ و برزي كل بدلة من قطع داخلية و مشبوك خارجي و قبعة و مهاد في كيس .. أرتب و احسن لج عشا ن ما تدورين .. و يكون كل شي جاهز !! انا راح اعتمد هذي الطريقة .. و خذي معاج فوطتين او 3 و لحافين للبيبي .. و ماراح تحتاجين لا رضاعات و لا حفاظ للمستشفى لأن عندهم .. و رضعيه من صدرج ! و فراش للمستشفى اظن كفاية .. و اذا حابة تاخذين مدس على قولتكم للخروج .. و قبعة وحده او ثنتين كفاية لا تنسين تحطين الكاميرا في شنطتج .. عشان ما تنسونها و تروح عليج تصوير احلى لحظات بداية البيبي .. و اخذي قرآن صغير عشان تحطينه تحت راس البيبي في سريره ان شاء الله اكون فدتج .. بحكم ان عندي بيبي و الحين حامل بالثاني ! اي استفسار او سؤال حاظرين لج اختي |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
لا تنسين شاحن الموبايل ..
|
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
واااااااااااااااااو اغراضك كثييييره واحس اغلبيته ماله داعي ياحياتي انتي خففي على زوجك الي يبي ينقل الاغراض
أنا مفكره اخذ لي قيمصين قطنيه مع ملابس داخليه مع شنطه صغيره فيه اغراض الشور مثل الشامبو والشورجل وليفه صغيره ومزيل عرق وفوطه وشراب سراميك باخذ ثنتين وبسس واما اغراض البيبي للحين محتاره بس اتوقع باخذ له لبس لاجيت اخرجه بس ويعطيك العافيه ويقومك بسلامه |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
اختي من جدك!!!!
انتي رايحة تولدين ولا رايحة حفلة؟؟!!! وماله داعي مقص الاظافر في شنطة المستشفى ! البيبي مايقصون اظافره الا اذا كبر شوي انتبهي لاتقصينهم لاتجرحينه لان اظافره مره طرية ماينقصون! خففي شوي من اغراضج اللي راح تاخذينهم للمستشفى لاتخافين حتى اذا احد زارك ماراح ينتقدونك انك مو لابسه زين ولا مو حاطه مكياج لأن يدرون انك توك طالعة من ولاده والله يسهل عليك ويقومك بالسلامة |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
افضل جهاز لقياس الحراره من براون
|
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
اممممممم وانا رائي من رائي مخاوية الهم
انا عن نفسي باخذ لي 3 بجامات طويله للنوووم مع الشراب والشحاطه hwaml7 ولبس واحد للاستقبال وراح اخذ معاي واقي ومبيض بيزلين لانه روعه يعطي نظاره ع البشره وروج مررره هادي وماسكرا بس ( بحيث يكون وجهي فيه نظاره ومنور فقط ) طبعا منشفه وصابونة وجه والمعجون وشاور جل وشامبو بس كفايه توني طالعه من الولاده مافيني شده ع الاستحمام العميق المره الاولى مااستفدت من كثر اغراضي ومشط وعطر خفيف مررره من بودي شوب ومناديل جونسن طبعا ملابس الداخليه قد ماتقدرون يابنات كثرو مررره تتضايقين والافضل تغيرين باستمرار والبيبي باخذ 6 اكياس تبع الشنطه بس مدري فين بلاقيها وبحط في كل كيس عشان تسهل علي بربتوز داخلي + افرول+ لفة +قبعه وطقم كامل للخروج وسلامتكم |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
شكرا أخواتي على نصايحكم
جزاكم الله خير بالنسبه لشنطة المستشفى أنا خففت منها أخذت اغراض الحمام والمناشف وقميصين إستقبال وبيجامه نوم وفوط صحيه إحتياط في حاله أحتجت " المستشفى توفر بس افضل أخذ معي " بالنسبه للاستشوار ضروري اخذ لأني باخذ شور وأخاف ابرد فضروري انشف شعري بشكل سريع وبالنسبه للمكياج حلو احط بودره وقلوس عشان وجهي ما يطلع باهت وبعد لبس الخروج اما اغراض البيبي اخذت له ثلاث لباسات مع بطانيه وحده وثلاثه كوفلات وكريم للجسم بس شاكره لكم |
رد: احتاج مساعدتكم في تجهيز حقيبة المستشفى لي و للبيبي وتجهيز بقية الاغراض الناقصة
انا ياخيتي اشوف ان الشنطه حسب حاجتك انتي
حلو منك اخذتي سليبر وشبشب تكرمين انا خذيت سليبر بس وصار كلو مويه من الحمام الله يعزك وتوهقت ويعتمد انتي خاص ولاحكومي ولا ايش لان بعض المستشفيات ماشاء الله توفر كل شي انا ماحتجت لبنتي ولا شي كله يوفرونه الا يوم جيت اطلع بس احتجت ملابس وهم عطوني الحليب والحفاضات وبعد الولاده جاتني من المستشفى هديه كريمات وشغلات استحمام . بس احتجت لبسة الخروج من المستشفى مدس وكوفله وبربتوز وقبعه وفانيلا داخليه :) سشوار ما احسه مهم وعلى حسب انا خذيت لي مرطب شفايف ومره مره نفعني وبكله لشعري ومشط وكريم وكريم لجسمي وكلها نفعتني لاني نشفت بشرتي بقووووه والمنشفه من عندهم وماجابو لي شامبو شاحن الجوال لاتنسينه انا خذيت ملمع شفايف وكحل والله مالي خلق احط ههههههه خذيت ملابس بيجاما وروب وماكفوا وتوهقت لان لبس المستشفى مفتوح من ورى وانا مسويه عمليه قيصري وطولت عندهم :( شوفي حبيبتي الاشياء اللي ممكن تحتاجينها اخذيها احتياط تراها ماتضر اخذي معاك كيس فاضي لملابسك المستخدمه انا كنت حاطه شفاط الصدر وقالت وحده ماله داعي وشلته والله والله ان صدري تحجر والمستشفى ماعندهم شفاط وابتلشت ولا احد جاب لي :( طولت عليك بالهذره ربي يسهل عليك ويقومك بالسلامه |
| الساعة الآن 03:37 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .