الدراسة بفي امريكا !
 

السلام عليكم يا بنات ويا امهات ..

حبيت اطرح موضوع .. انا ما اعتبره مشكلة بس اعتبره قرار صعب ومب عارفة اتخذ اي قرار .. وحابة تساعدوني وبالذات الامهات الي جربوا العيش في الغرب ..

زوجي قرر انه يدرس في امريكا .. لمدة سنة ونص عشان البكالريوس .. المشكلة انه ممكن يستقيل من عمله .. لان مكان عمله مايدعم الدراسة برع .. وراح يدرس على حسابه ..

وكان قراره انه يدرس لوحده بدوني وبدون ولده .. اسهل حل له .. وانا اشوف ان هذا مش حل الا مشكلة .. مستحيل اكون متطمنة انا في طرف وهو في اخر طرف من العالم .. وغير عيالي ما اقدر اتحمل مسؤوليتهم بنفسي وكيف انهم بيقضون فترة من عمرهم بدون ابوهم .. عندي ولد الله يحفظه والحين حامل وبربي بعد شهر باذن الله ..

وخايفة انه يمدد فترة دراسته بعدين .. ويكمل ماجستير ويمكن دكتوراه لانه مصمم على هاي الشي .. ما ابغي احبطه بالعكس انا اشجعه على الدراسة بس قراره مضايقني بشكل غير طبيعي ..

لاني ام عاملة .. صعب اطلع معاه بسهولة .. ولان اهوا راح يدرس على حسابه مب عارفة اذا راح يكفينا المال الي راح يجمعه او يحصله من بيتنا الي بنأجره. ومب اكيد يخلص قبل سفره للدراسة ،البيت حاليا تحت الانشاء .

انا فكرت في اكثر من حل بس كل واحد اصعب من الثاتي ,, احد الحلول اني اطلب بعثة وادرس بنفس المنطقة ماجستير .. على الاقل بيكون عندي راتب .. بس بيكون هاي الشي صعب لاني بكون مشغولة عن العيال .. وبين غرباء .. من راح يهتم فيهم .. والحل الثاني بعد صعب ومؤقت اني اطلب تفرغ من عملي ومب اكيد يعطوني .. واذا وافقت جهة عملي يمكن بس سنة بالكثير وبدون راتب ...والحل الثالث اني استقيل وبكون واثقة ماعندي اي التزامات غير اكون مع عيالي برع في الفترة الي بيكون فيها زوجي في الجامعة .. حتى فكرت اشتغل هناك اذا في مجال.. بس بعد فكرة المصاريف واذا بيكفينا المال الي عندنا حق حاجياتنا تقلقني.

والله مب عارفة خايفة اني اتخذ اي قرار واتحسف عليه .. وبالذات الاستقالة لان التوظيف صار شي صعب ومب بالسهولة نحصله ..

ياليت تساعدوني .. والي عندها خبره ودرست برع مع زوجها اتمنى تنصحني ..

رد: الدراسة بفي امريكا !
 

حبيبتي روحي ادرسي معاه لا تتركب زوجك

مدة سنة طويله و ممكن الا اكيد يمدد لأنه تعجبه الحياه هناك كثير اعرف ناس تمدد

بعدين الصراحه الصراحه هناك المثيرات كثيره مهمه وثقتي بزوجك يبقا قلب الزوجه مقروص ع زوجها

عن نفسي ما تتركي زوجك صعبه عليه كيف يتحمل فتره بدونك وو ولده و انت


شوفي انت قولي له ما اتحمل بدونك الحياه بدونك


والله يسهل امورك

رد: الدراسة بفي امريكا !
 

مشكورة فديتج على الرد ..

صارت لي فترة وانا احاول اقنعه اني اروح وياه .. بس مقتنع انه الاسهل له يسافر بنفسه .. ومثل ماقلتي فلبي مقروص من الحين .. مب بس اني خايفة يتغير علي .. خايفة بعد من المسؤلية بنفسي .. جربت فترة قضيتها في بيت أهلي يمكن شهرين .. وهو سافر لمدة عشر ايام بعد .. جربت كيف اني مسؤولة على ولدي بروحي .. وانا حامل وتعبانة .. كانت اصعب الايام ..ولما مريت بهاي التجربة تأكدت ان سنة ونص بتكون صعبة بدونه كزوج وكأب لعيالي ..

ما اقدر اعتمد على اي شخص ثاني لان امي عندها اخواني وهم صغار ومسؤولية ونفس الحالة ام زوجي ..

بس الدراسة في الخارج صعبة وخايفة اني اظلم عيالي هناك .. اقضي ساعات في الجامعة وبعدها لازم ارتاح واذاكر .. كيف راح يعيشون وامهم وابوهم طول اليوم مشغولين عنهم .. وهناك مافي لا خدم ولا اهل ممكن اخليهم عندهم .. غير مسؤولية البيت والطباخ والغسيل .. بنهار ...

رد: الدراسة بفي امريكا !
 

يا ختي الحياه هناااك غاااااااااليه جدا جدا
والدراسه على حسابه كمان غاليه
خليه يروح لحاله وانتي ضلي بشغلك ومكانك افضل
وولادك زغار باول عمرهم ابتقدري عليهم لحالك
والنت موجود بتسيروا تشوفوه يوم يوم صوت وصورة

اختي تركها جوزها سنتين وسافر على ايطاليا وكان عندها 3 زغار اكبرهم 3 سنين
وعادي ماشعرت بغيابه
اهلها موجودين ودار حماها موجودين

والحمدلله

رد: الدراسة بفي امريكا !
 

خليه يروح يشوف مستقبله واذا هو بيخون ولا أي تفكير يدور في بالك بيسوي اللي يبغاه وهو عندك الخاين خاين مايحتاج يسافر برا

رد: الدراسة بفي امريكا !
 

عزيزتى انا اعيش فى ميركا قولى لي اى ولاية هو رايح وانا قول لكى عن العيشة هناك
اذا كانت حالت زوجك المادية جيدة روحى عشان كمان اولادك يستفيدو وهم بهذا السن
واذا كانت حالتة ميسورة ما انصحك ان تروحى معه اذا فكر بس ياخد استديو يعنى صالة وحمام مع مطبخ مفتوح
يكلفة 500 دولاار وحسب المدينة فى مدن غالية وفى مدن شوية رخيصة
طبعا المتجنسين وابناء البلد يدفعو على السمستر الدى مدته اربع اشهر 400دولاار
ام الغير متجنسين والطلبة بيدفعو على الربع الشهر من 1,500 الى 2000

رد: الدراسة بفي امريكا !
 

حبيبتي بنت خالي مسافرا برا مع زوجها وعيالها
والحمد الله تيسرت امورهم

خليه يروح اول يرتب وضعه هناك ثم رحوا انتم له يشوف اهو الوضع كيف وكيف الحياة هناك
ثم سافري انتي وعيالك

ونصحتي استخيري وخلي زوجك برضوا يستخير

الله يكتب لكم الصالح

رد: الدراسة بفي امريكا !
 

حبيبتي..
اذا انتي سعوديه خليه اذا راح يسجل في السفاره السعوديه ضمن برنامج خادم الحرميين الشرفيين للابتعاث

وبعدة تقدري تروحي معه بعد اربع الي ست اشهر ...

هذا اخوي راح بالبدايه على حسابه وبعدو سجل بالبرنامج وكذلك ولد خالي وزوجتوه..

على فكره بيصرفون له راتب ولك كمان راتب وللاود راتب يعني محفوليين ومكفوليين

وانتي قدمي اجازه بدون راتب لعملك وروحي معه

رد: الدراسة بفي امريكا !
 

مادري والله .. احس صعبة الوحدة تترك زوجها ... الا في الحالات الصعبة جدا وانا اشوف حالتي ان باستطاعتي اروح معاه باذن الله .. بس الموضوع يبغيله تفكير واستشارة ..

مشكورة حبيبتي على المشاركة والنصح..

رد: الدراسة بفي امريكا !
 

انا ابغيه يكمل دراسته وكنت من اول المشجعين لهاذي الفكرة في بداية زواجنا .. ومثل ماقلتي الي يبغي يخون راح يخون وهو مع زوجته .. بس بعد الغربة والبعد عن اهله وزوجته وعياله تأثر وتعطيه وقت فراغ اكثر ..

وانا مب بس اخاف من هذا الشي .. لان الله سبحانه راح يعطي كل شخص وعلى نيته وماراح يخذل اي انسان يبذل مجهود .. مثل الزوجة المطيعة والي تبذل مجهود انها تلفت انتباه زوجها بدون ما تخنقه.

بس انا بعد ما اقدر ابتعد عنه .. والزوج يعتبر امان لزوجته وعياله ..

ومشكورة حبيبتي على المشاركة ..