قصة ولادتي المؤلمة ..
 

السلام عليكم ورحمة وبركاتة

اول شي يوم الاحد العصر نزلت علي افرازات مع دم وقبلها الم خفيف زي الدورة يجي ويروح
بس يتحمل الالم بقووة
المغرب خفت اتصلت على زوجي وهو في العمل وقلت له الي صاير معاي جاء وجلس عندي والالم كل شوي يجي ويروح مع شويات افرازات بني صارت الساعه 12 الليل والالم زاد علي
يجي ويروح وصلت الساعه 4 الفجر خلاص صارت تزيد علي صحيت زوجي وقلت له بروح بيت اهلي وقام حبيبي مسكين وداني وصلت بيت اهلي
شافتني امي قالت لي على المستشفى شكلك ولادة ...

الساعه 6 الفجر يوم الاثنين وصلت مستشفى هاله بن لادن عند الدكتورة خلود رستم كانت موجودة عندها ولادة طلعت على قسم الولادة اول مادخلت جناح الولادات الا واسمع وحده تصرررخ ومبين انها تدفع وقت ولادة وانا انصدممممت بما اني بكرية وماقد سمعت شي زي كذا جلست اببببببببكي وانفجعععت الا ودخلت اختي علي الغرفة وتقولي لاتخافي اقولها طلعيني من هنا وصوت الي تولد يززززيد بس المهم بعدهاا طار كل شي جاني ولا صار فيني لاطلق ولا غيرة
جاتني الدكتورة خلود كشفت علي وقالت لي مافي طلق ولا شي والرحم مفتوح ربع سم ارجعي البيت واذا صار الطلق كل بعد خمس دقايق تعالي ..
رجعت البيت ولا صار فيني شي
يوم الثلاثاء
الالم يجي ويروح وتحملت ونزلت امشي بالشارع على المغرب ورجعت اكلت ونمت..

يوم الاربعاء الصباح
جاتني نفس الالم حق يوم الاحد وصار يزيد الين الظهر الساعه 1 ماتحملت صار قوي يجي ويروح
رحت على المستشفى مرة ثانية
كشفت على الممرضة وقالت لي مفتوح 2 سانتي وكانت حايسة رايحه جاية كلمت الدكتورة تليفون قالت لها اعطيها مسكن وترجع البيت

... يتبع

رد: قصة ولادتي المؤلمة ..
 

رجعت البيت وجلست للساعة 4 العصر وخلاص وقتها صرت اصرخ وابكي كل ماجاني الألم الكل في بيت اهلي رحمني ويقولي روحي المستشفى اتصلت على زوجي واخوي ورحنا على المستشفى مرة ثانية .. كشفت علي اللممرضة وقالت مفتوح 3 سانتي طلعوها الغرفة حق انتظار الولادة

طلعت وسوت لي حق نبض الجنين وقياس الطلق بس وانا بموت من الالم ومعاي اختي ولا في دكتورة ولا شي كانت الساعه 5 المغرب تقريبا اقولها اعطيني مسكن اعطيني اي شي قالت ننتظر الدكتورة واحس في حوووسة بعيونهم رايحين جاين كل شوي
شوي وجات الممرضة مصرية وقفلت الجهاز وقالت لي روحي عند الدكتورة ....؟؟؟؟؟!!!!!
قلت لها انا اروح عند الدكتورة ولا الدكتورة تجيني قالت معليش عشان لازم تمشي .. حسيتها تصررفني وسويت انها مشيت على راسي واختي تقومني وبالموت امشي
والعيادات مبنى ثاني يعني لازم امشي بالشارع

المهم نزلت الا وزوجي يشوفني مع اخوي انصدموووا وين رايحه قلت رايحه عند الدكتورة تقول لازم اروح لها
المهم وصلت عند الدكتورة وانا بالموت امشششي قدام الناس حسبي الله عليها بس دخلت عندها ونيمتني على السرير كشفت علي
تقولي مفتوح 2 سم بس وانا اقولها مستحيل انا بموووت من الالم الله يخليك مو قادرة
راحت وجلست على المكتب تقولي لازم ترجعي البيت وبعدين اذا صار الالم كل خمس دقايق تعالي واحتمال مو انا اولدك
يمكن يولدك دكتوور لاني انا مرهقة وتعبانة ابغى ( ويك اند ) يعني( اجازة ) عشان من اسبوع وانا ماسكه ولادات ووممكن كمان تروحي مستشفى ثاني اذا حابة .. تخيلوا وانا اراجع عندها طول فترة حملي ....!!! الله ينتقم منها دنيا واخرة انا اشوف الموت واهي تقولي ماعندك ولادة ..

نزلت من عندها شفت زوجي قدامي بكييييييييت اقوله خلاااص مو قادرة تعبااااااانة جلسنا بالانتظار وراح اهو واخوي عند المدير وقاله الي قالته الدكتورة قال المدير اكيد ماعندها ولادة الدكتورة ماراح تخرط كلام ..

يتبع

رد: قصة ولادتي المؤلمة ..
 

حمدلله ع سلامتك

ومبروك ماجاكي

وهذا قدر الله على كل النساء
مافي حد مرتاح الا الرجال

رد: قصة ولادتي المؤلمة ..
 

رجع زوجي واخوي وقالوا نروح مستشفى ثاني نشوف فيه ولادة ولالا
رحنا مسشتفى الحمراء يبعد عن هاله بن لادة شارع واحد يعني حق دقيقتن بالظبط
طلعت على فوق وصلت يمكن ربع ساعة وصلت عند الممرضة وكان كل شي سريع لانه شكلي لايحتمل
كشفت علي الممرضة وقالت لي مفتوح 5 سم ... هذا ولادة خلاااص

وزوجي واخوي برا منتظرين بس يشوفون فيه ولادة ولالا
طلب تقرير من المستشفى وراح على هاله بن لادن عند المدير وعطاه التقرير وقاله هذا الي تقول مافي ولادة ...
طلب المدير الدكتورة خلود رستم وقامت تقول انه احنا رشيناها بالف ريال وطالبن رقمها الخاص وكلام ماصار حسبي الله عليهااا دنيا واخرة
المهم المدير طلب منها تحقيق وقالها بكرة تنزلي على المكتب ولا تطلعي على العيادة ...

وانا نزلت من مستشفى الحمراء وعلى طول رحت على مستشفى بقشان عند الدكتورة عائشة
صراحه قمة بالاخلااااااق اول ماشافتني استقبلتني على طول بعد وصاية اختي لانها ولدت عندها
وعلى طول طلعوني على الولادة وانا حالتي حااالة تعب والألم وقهررر وطول فترة طلقي وانا اتحسب على خلود رستم حسبي الله عليها

يتبع.

رد: قصة ولادتي المؤلمة ..
 

ياااحبية قلبي


الف الف الحمدلله ع السسسسسسلامه

الله يكتبلك الاجر

رد: قصة ولادتي المؤلمة ..
 

وصلت على الساعه 7 تقريبا واعطوني الكمامة
وجلست اتألم وجع يجي ويروح وكل ماله يزيد واختي الله يخليها يارب معاااي
والساعه 12 ونص بالليل سمعت صرخه حبيبي قلبي ونور عيني ولدي ونسيت كل الي صار لي
وكل الاألاااام والحمد الله على كل حاااال...

بس انصحكم ياخواتي ابعدوووا عن هالدكتورة والله انها لادكتورة مجرد تاجرة تتاجر ببشهادتها
والله يقوم كل حامل بالسلامة ويرزقها ولادة ميسرة

ادعولي ربي يحفظ لي ولدي ويخلي لي زوجي يارب

رد: قصة ولادتي المؤلمة ..
 

حمدلله على سلامتك حبيبتي

الله يحفظه لك ويقر عينك بصلاحه

رد: قصة ولادتي المؤلمة ..
 

رد: قصة ولادتي المؤلمة ..
 

رد: قصة ولادتي المؤلمة ..
 

الف مبروووووووك حبيبتي

ويتربى بعزك يا رب

والمهم انك قمتي بالسلامة