بنات المغرب عاونوني ضاروري راني تالفه
 

سلام عليكم ابنات بلادي انا حاملة بشهر سادس وعايشة بلبنان ومتزوجة بعراقي ومنبي جيت نسول في سفارة على تسجيل البيبي قالو ليا انه وخا نسجلو عندهم مغاديش ياخد الجنسية المغربية وفيما نبغي ناخدو معايا خاصني فيزا واد
ا بغيت الجنسية خاصني نمشي للمحكمة بالمغرب وانةتما عارفين التكرفيس بالمغرب فنصحوني نولد بالمغرب باش ياخدها تلقائي بصراحة انا مخربقة ومبقيت فاهمة والو وماحيلتي نخمم في الغربة والمرض ديال الحمل ولا نخمم في الوراق والجنسية تنتمى من اي مغربية متزوجة باجنبي وبحالي تنصحني اش ندير وتقول ليا هيا اش دارت مني ولدت واش نولد بالمغرب او نولد بلبنان واش الفرق وفي كل حالة اش الوراق الي تيطلبو مع العلم سولت بسفارة قالو ليا ادا تولد بلبنان ما ياخدش الجنسية المغربية ياخد غير جنسية باباه ومن بعد نكلبها من المحكمة نصحوني من تجاربكم الله يسهل عليكم

رد: بنات المغرب عاونوني ضاروري راني تالفه
 

شوفي يا الغاليه الله يسهل لك حملك وولادتك يارب ويعينك على الغربه
شوفي في تجمع ودردشه لحوامل المغرب وهذا الرابط دردشي معاهم وشوفي ممكن في احد يقدر يساعدك
http://forum.hwaml.com/t89471.html







تقبلي مروري سوسه

رد: بنات المغرب عاونوني ضاروري راني تالفه
 

صباح الخير الزين , مالكي الحبيبة هازة هاد الهم كامل , ولدي في الاول و تفكي على خير , و ان شاء الجنسية فوقاش ما نزلتي للمغرب راكي تاخذيها ليه , شوفي انتي فين يناسبك تولدي , انا مغتربة في السعودية وولادي بجوج ولدتهم في السعودية , وملي بغيت نسافر للمغرب كناخذ ليهم فيزا من السفارة و في المغرب خذيت لهم الجنسية , و لكن اللي خاصك تعرفيه هو ان الجنسية مدتها غير سنة , بحال عقد الازدياد اللي كنقولو عليه ثلاث شهور , و انا عانيت من المشكل هذا بعدما اخذت لولدي الكبير الجنسية , بيعد عامين بغينا نسافروا , قالو ليا لا , و عاود اخذت ليه فيزا اخرى , يعني ملي تاخذي الجنسية , و راها ما كتخذش وقت راه كتاخذيها في نفس النهار , ماشي تاخذيها تخزينها , كتصاوبي ليه عقد ازدياد مغربي و من بعد تقدري تعملي لو باسبور مغربي
انتي اذا بغيتي تولدي في لبنان راكي تقدري تطلبي الجنسية عن طريق السفارة , و تديري ليه كلشي اوراقو عن طريق السفارة واخة كيتعطلو شوية و لكن احسن من طلع هبط في المغرب
نتمنى نكون فدتك و اي سؤال انا حاضرة
الله يفكني و ايك و باقي الحوامل على خير

رد: بنات المغرب عاونوني ضاروري راني تالفه
 

مرحبا بك (بلادي الحبيبة)كنتمنى تفيكي على خير وتلقاي الأجوبة على سؤالك مع البنات وأنا للأسف معنديش دراية ،وكنظن الجواب hwaml23 لي عطاتلك أم عبودي وسيفو هو هداك والله يريح بالك وميكون غير الخير

رد: بنات المغرب عاونوني ضاروري راني تالفه
 

السلام عليكم
حبيبة الله يسر أمورك
لكن رأيي أحسن طفلك ياخد جنسية أبوه و من بعد نزلي المغرب و صاوبي ليه جواز مغربي
أنا مزوجة فسلطنة عمان من عماني و بنتي عندها جواز عماني مكنحتاجش فيزا باش تسافر للمغرب

رد: بنات المغرب عاونوني ضاروري راني تالفه
 

عندك الصح اختي ولاكن العراق ضاروري فيزا باش يدخلو المغرب ماشي بحال دول الخليج بدون فيزا على قبل هاكدا بغيت نصيب ليه باسبور مغربي باش بلا ما نتكرفس في السفارات و الاقامات وغيرها

رد: بنات المغرب عاونوني ضاروري راني تالفه
 

اختي ممكن تسمحي ليا مفهمت والو حسب علمي ان الي عندهم الجنسية السعودية وباسبور ساعودي يدخلو للمغرب بدون فيزا وهدا تينطبق على اي خليجي اما على مدة الجنسية سنتين انا سولت اختي وقالو ليا ما كاين حتى قانون تيحدد مدة للجنسية خصوصا للطفل الي امو مغربية وعندو جواز سفر مغربي قالو ليا اقامة للاجنبي هيا الي تتكون مدتها سنتين فارجو منك المعدرة لتدخلي ولكني لم افهم خصوصا بعد ان عرضت اجابتك على ناس عندهم معرفة

رد: بنات المغرب عاونوني ضاروري راني تالفه
 

شوفي اختي انا اولا مقيمة في السعودية و متزوجة من سبع سنين من سوري
و كوني على يقين اني نهار اخذت الجنسية لولدي ما سجلتها , يعني ما حصلتش على عقد ازدياد مغربي و من بعد ملي بغيت نسافر للمغرب كنت ولدت ولدي الصغير فرجعت أخذت ليهم فيزا بجوج لانهم قالو ليا راه غير عام و كتنتهي صلاحيتها و ملي مشيت للمغرب عاودت اخذتها ليهم بجوج , و مشيت للمحكمة ايوا ما نقولش ليك من مكنب لمكتب و يحددوا ليك جلسة و من بعد يبعثوا ليك على المقاطعة اللي تابعة لها و يسجلوهم في الحالة المدنية و تاخذي عقد الازدياد
انا بالنسبة للباسبورات باقي ما درتهم ليهم , ناوية ان شاء الله غير نولد و نقدم على الجنسية من السفارة , و نعمل جوازات سفر حتى من السفارة , هادشي اللي درت انا

رد: بنات المغرب عاونوني ضاروري راني تالفه
 

شفتي اختي هاد شي الي درت ليه لحساب وخفت منو على قبل هاكده قاعدة نسول وكف ما قالو في سافرة مني تولدي بالمغرب وتسجلي وطلعي عقد ازدياد متحتاجيش تمشي للمحكمة تطلبي الجنسية حنت مجرد ما يتقيد بحالى المدنية تيولي مغربي ويبقى الواحد يجمع الوراق ويدفع باش يطلع الباسبور حسب ما فهمت يعني انتي اخدتي ليبه الجنسية وماحصلتيش على عقد الازدياد ومطلعتيش البسبور هادشي الي خلا الورقة تسالي ولاكن الجنسية باقة عندو حنت متتسقطش بمجرد ان ورقة سلات المهم الله ييسر امرك وامري وامر كل مغربية متغربة وغارقة في هاد الحريرة هههههههههههههبصراحة والله حتى توحشت الحريرة ديال المغرب فينك الخويلة انتي وحريرتك الي كلها حمص وعضومة ههههههههههههههههههههه

رد: بنات المغرب عاونوني ضاروري راني تالفه
 

شوفي احبيبة انتي شوفي ظروفك فين تسمح ليك تولدي ,و حتى اذا ولدتي في لبنان , قدمي للسفارة و ريحي نفسك , انا الحمد لله دابة اولادي بجوج عندهم عقد ازدياد مغربي , و باقية ما بغيتش ندير ليهم الباسبورات و حتى نولد ان شاء الله , و كن شفتي حريرتي , شحال مخلطة و مجلطة و الحمد لله و صافي و انا دابة راني حاملة بتوام ووليداتي راكي شفتيهم في التوقيع باقين صغار و الغربة قتلتنا , الحمد لله و صافي و الله يفك وحايلي ووحايلك على خير
كن عرفتي انا فين كنفكر كنفكر في ابعد من هوكا و تشوفي الحريرة, الولد قرب لسن المدرسة ,و هنا عرفتي المنهاج مختلف تمام على مناهج المغرب و اول شيء رياضيات عربي و ارقام بالعربي غير الفرنسي ما فيه بس انجليزي , ايوا خليها على الله و صافي الله يصلح الاحوال