|
عزيزتي..لو كنت بموقفي وش ردة فعلك؟؟
سلام الله عليكن جميعا اخواتي في الله
هذي اول مشاركه لي في هالمنتدى على الرغم من اني تعرفت عليه يوم كنت حامل قصتي باختصار تكمن في زوجي اللي تزوجته عن حب كان قبل الزواج شي وبعده شي مغاير تماما وعلى فكره ماحبيته من تحت لتحت بالعكس كان هالشي تحت انظار اهلي واهله كنا منجنين متى نلتقي مع بعض ويوم التقينا بصراحه انا ماكنت مصدقه نفسي كنت اسعد انسانه بالكون فجأة واثناء فترة الملكه لقيته يضربني بجنون يضربني ضرب خرافي طبعا هو كان عصبي من على ايام الحب لكنه خف كثير وصار متحكم باعصابه وهذا اللي صدمني منه ..انت تغيرت يابن الحلال ليه تسوي فيني كذا وانا حبيبتك؟! ومرت الايام وصرت حامل ولسا يضرب فيني ضرب مايخاف الله فيني ولا كأني رحمة في يد راحم انهاااااار انا من داخلي مو عشان الضرب وبس عشانه من انسان كان حلمي وصار كابوس في حياتي يقلي انت لسانك طويل ويبغى له قص وانا اصارحكم اني مثل كثير منكم اكيد اتناقش في المواضيع ما احب يفرض علي وبس وغير كذا اقوله تبي تضربني وانا اقلك تسلم يابعد عمري اكيد بغلط عليك لو مو من الاخلاق الخاربه لكن من الالم اللي اكون فيه وولدت وجبت له الولد وحتى فترة النفاس كان يضربني على اتفه الاسباب وفوق ضربه عليه لسان قذر كبر ولدي وصار عمره 7 شهور واللي مايخاف ربه لسا يضرب فيني قدامه اقوله حرام عليك لا تعقد الولد طقني اقتلني بس مو قدام عينه يقلي بالعكس خل يعرف هالاشكال اللي زيك كيف المفروض تتعامل على الرغم من كل الطق لكنه مستحيل يبخل علي بفلوس وانا وربي مابي فلوس ابي احترام ابي امان...تلاقيه راايق ويحبني ويموت فيني فجاه يقلب علي 180 درجه ظليت كل هالوقت ساكته واقول مابي اتكلم عليه يمكنه يتغير لكن مايعلم في اللي يصير فيني الا رب العالمين ماشكيت لحد ماطفح الكيل وانفجرت شكيته عند امه وابوه وتهرب من المواجهة ومع ذلك مازادته شكوتي الا كبرياء علي ولا انكسر خشمه الا زاد طق فيني عادي عنده وانا قاعده عند اهله يقلي هي انت كلي تبن وحطي نعال بحلقك على الرغم من ان اهله محترمين ويحبوني ويموتو في ولدي حييييل ضربني بالشارع بالبيت بكل مكان...تعبت منه وربي ساعات كثيره ادعي عليه بالموت واتمنى الطلاق لكن من اناظر عيون ولدي انهار مكاني واقول وش ذنبك ياعالم لما اقولكم يضربني يعني جسمي جرب كل انواع الضرب...حتى انه عادي عنده يقرب من وجهي الكواية وهي حاااااااااارة يقلي قولي اسفه على الرغم من ان هو الغلطان يحب يذلني لما يشبع بدني طق واكون في قمة الانهيار والتعب وجسمي الوان من الطق يقلي هي انت قومي وجيبي لي موية وياااويلي لو عاندت يقلي شفتي كيف اقدر اذلك قلتله خاف من ربي اللي بكن فيكون يقدر يخسفك وانت مستقوي على حرمه اشياء كثير متعبني فيها اخرها حتى البخل صار بخيل علي ندمانه عالزواج واتمنى لو يرجع وقتي كنت ماحبيته من اصلوو لكن الشكوى لمن لايرد الشكوى انا اللي عشقت تراب يدوسه برجلينه في يوم صرت ادعي عليه بالموت ليل ونهار من فعايله تكفووووووون احمدو ربكم على ازواج محترمينكم ولا تتدلعو لما يعصب زوج وحده فيكم عليها وتقوله قاسي اذا تبون تعرفون القساوة تعالو بس يوم وشوفو عيشتي المرة بليييز ادعولي من صميم القلب لان جسمي وقلبي وكل شي فيني تعبان |
رد: عزيزتي..لو كنت بموقفي وش ردة فعلك؟؟
يالله يااااااااااااا الله
والله قلبي معك يا اختي حسبي الله ونعم الوكيل...ما تسكتي ما تسكتي ان ما كبرت ما بتصغر وانا بقلك روحي لاهله وقوليلهم ما عاد اتحمل وبدي ادخل اهلي بالموضوع وانا بنصحك اختي حطي النقاط على الحروف وروحي بيت اهلك وقوليلهم واجلسي عندهم لحد ما يجي ويتعهد انه ما يمد ايده عليك وما تخافي من الطلاق لانه ما بعتقد رح يطلقك لكن رح يحس بقيمتك وقومي قبل صلاة الفجر وادعي ربك يارب يا حنان يا منان يفرج كربك وهمك. واكثري من قول –لا اله الا انت سبحانك اني كنت من الظالمين- |
رد: عزيزتي..لو كنت بموقفي وش ردة فعلك؟؟
والله قطعتي قلبي
حسبي الله ونعم الوكيل حبيبتي الله يااسعدج ويفرج همج بس نصيحتي لا تسكتين خبري اهلج لازم رياال يووقف ابويه هالاشكال ولاتستتضعفين جدامه وبعدين تقولين متحمله عشان ولدج لا والله الي قاعده تسوينه غلط اذا الولد من يوم اهوى صغير يشووف امه تنطق وكله هوااش بالبيت بيتعقد وبتصيده حاله نفسيه اسم الله عليه يارب لا والله حراام الطلاق ارحم لج ولولدج المفروض من اول الايام الي بدى يمد يده ماتقعدين معاه وتخبرين ابووج او اخووي الله يساعدج ويصبرج ويفرج همج ياارب ويهدي ريلج وتعيشون احلى عيشه يارب العاليمن والحمدالله والشكر ع ريلي تقبلي مروري |
رد: عزيزتي..لو كنت بموقفي وش ردة فعلك؟؟
حبه البرص
لو كان يفهم وش معنى الحب اذا انتي صابره فاصبري على ولدك وبس هو لالالالا وش راجيه منه بعد من لما تزوجتو الين حملتي والين ولدتي وابنك كبر وهو يضربك ضرب الاباء لااطفالهم يعني انسان مايستاهل اي ذره احترام او صبر عليه عيشي معاه عشان ابنك اهلك يعرفون ابوك واخوك وامك خلي يعرف انك بنت ناس ووراك ظهر والله يعينك :( |
رد: عزيزتي..لو كنت بموقفي وش ردة فعلك؟؟
الله يوريك فيه يوم
حسبي الله ونعم الوكيل فيه الى مايخاف الله والله لو انا مكانك تركته ماجلست معه دقيقه مو بس عشاني عشان الولد الى بيتعقد لان اغلب الى يشوفو ابوتهم كدا يصيرو مثلهم خافي على ولدك واتركيه خيرته بيندم والله بينتقم منه وبياخد بحقك بس يمكن انت الى عودتيه على كدا |
رد: عزيزتي..لو كنت بموقفي وش ردة فعلك؟؟
حبيبتي حالة زوجك مو طبيعيه فكرتي بالرقيه الشرعيه من كلامك إنكم تحبون بعض قبل الزواج يمكن وحدة حاسدتك عليه (بنفسها بتقول بيدلعها ويعيشها ملكه )
ك عطيه مويه مقرئ فيها وكثري من الدعاء والإستغفار الله يحنن قلبه عليك ويسخره لك يارب وإنشالله يرجع حبه لك مثل ماكان وأكثر |
رد: عزيزتي..لو كنت بموقفي وش ردة فعلك؟؟
بجد انا مش عارفه اقولك ايه قلبى عندك
على فكره جوزك ده مش طبيعى و الله يتعالج احسن ربنا معاكى و يقويكى |
رد: عزيزتي..لو كنت بموقفي وش ردة فعلك؟؟
لاحول ولا قوة الا بالله
واضح من كلامك عن زوجك يعاني من اضطراب نفسي وبشكل مخيف واحمدي ربك ان الموضوع ماوصل للقتل 0لازم اهله يعرضونة على طبيب نفسي 00 بس اللي مستغربته منك ليش صابرة عليه حبيبتي الا الكرامة اغلى مايملك الانسان وهو ماقصر في انواع الاهانة بينكم واحد مقدرك وانتي حامل ولا بعد الولادة ولا الحين ليش مستحملة لحد مايجيك درزن عيال وبعدين تطلبين الطلاق00 العلاج يالغالية 00 اولا -- الجي لله سبحانة وتعالى وحده القادر على تفريج كربك وتسخير زوجك لك ثانيا---- لازمي تروحي لاهلك وتخليهم يدخلون في الموضوع وحاولي تقعدي عندهم وخوفيه انك مو قادرة تعيشي معه وتغلي عليه ولاتردين على مكالماته او رسايلة خليه يحس بخطاه ويعرف ان كرامتك فوق كل اعتبار00 الله يسخره لك ويفرج كربك يارب ويهديه |
رد: عزيزتي..لو كنت بموقفي وش ردة فعلك؟؟
أول شي لازم انك تصلين وتدعين الله ان زوجك يسخره لك وعليــــــــــك بالصدقه والاستغفار ،،
وبعدها لازم تاخذي موووقف من الضربه لك بكره بيصير فيك عاهه ولا شي وبيرميك وياخذ ولدك / أنا لو مكانك وبصرااحه ،،وانا كنت احبه وهو يحبي ،،،وتزوجنا وعامليني كذا بروح أهلي واخلي خواني يشفون الضرب فيه ،، وبخلي خواني يتوطوونه ضرببببببببب الين يعرف ان الله حق،،ويحس بالام مثل ماأحس فيه ،،وبرجع بيتي واجلس على قلبه واي حركه منه ولا شي على طول لخواني ،،،الي مثل الأشكال هاذي جبااااااااان وقليل مروه وشهامه ــ لالقى الي اقوى منه خاف،، خذي خطووووة جريئه وكلي أمرك لله ،، ولدك لاعاش على هاذ الطريقه ،،بيصير شرس وبيسوي مثل ابوة مع العالم ،، وأنتي الي بتتعبين ،، الله يسر لك أمرك ويهدي زوجك ،، |
رد: عزيزتي..لو كنت بموقفي وش ردة فعلك؟؟
لاحول ولا قوة الابالله
|
رد: عزيزتي..لو كنت بموقفي وش ردة فعلك؟؟
الله يكون بعونك اختي
بس مافيه احد فالدنيا يستاهل انك تسمحين له بضربك وايهانتك روحي لاهلك واذا ماتعدل معك وغير اسلوبه اطلقي الطلاق احيان يكون ارحم من عيشه مع واحد زي كذا والطلاق مو نهايه العالم ولاعار يمكن تنتقدون كلامي بس ماحب الي تصبر على الظلم لمجرد انها ماتحمل لقب مطلقه |
رد: عزيزتي..لو كنت بموقفي وش ردة فعلك؟؟
الله يكون في عونك حبيبتي
|
رد: عزيزتي..لو كنت بموقفي وش ردة فعلك؟؟
حسبي الله ونعم الوكيل
والله لو كنت مكانك والله اروح الاهلي ليش استحمل الذل وضرب لازم اهلك يعرفو ويشوفو الضرب الي في جسمك وانتي ليش ساكته ماتقولي والله حتى لو احبو ماستحمل اذلو والله مايستاهلك دا انسان مريض الله يريح قلبك يااااارب ويفرجلك همك ياااارب |
رد: عزيزتي..لو كنت بموقفي وش ردة فعلك؟؟
يلعن الحب اللي يذل
شوفي انت الان لاتتحسفي عل الحب في شي بحياتك اهم حرررررررررررررام ابنك يتعرض لايذاء بمشاعره من هالسن بكر بيطلع مجرم وسفاح زي ابوه روحي لاهلك وربي ابنك من حقك واغسلي يدك من هالسفاح وصدقيني التعصيب والضرب طبببببببببع ببني ادم ماراح يتغير زي مال الكرم والبخل طباع اللي بزوجك طبع وماراح يتخلى عنه روحي لاهلك اكرملك ولولدك مليووووووووون مرة ودوسي ع الحب هذا برجولك انقذي ولدك حرام وربي |
رد: عزيزتي..لو كنت بموقفي وش ردة فعلك؟؟
والله حزنت عليك يالغلا المفروووض لو تصير كذااا مشكله ماايوصل للضرب في اسلووب
ارقى من كذا؟؟؟؟؟؟؟ الله يهديه لك ويسخره يااااااارب بس انا ابي انصحك نصيحه اجلسي مع نفسك فكري معاااي هل,,,هو يقووووم بجميع حقوقك الاخرى من الاكل والفلوس والمعاشره وغيرهاا اذا نعم ...حلووووو اذا كان تعامله طيب في غير الوقت اللي ماايكون معصب ؟؟؟؟ فالمووضوع سهل باذن الله يعني لما يكووون معصب اسكتي ولا تصااارخي في وجه احياانا اغلب الرجال طيبين ويحبوون زوجاتهم بس بعضهم لما يعصب يفقد اعصاابه ولما زوجته تصاارخ تزيد الطين بله ويحدد النقااااااش ويصل الامر لضرب وبكذا تكبرالسالفه يدخل الشيطان وتكبر المشكله فحااولي تجربين اللي قلتك عليه فلو سكتي مستحيل يمد يده الا اذا.....؟؟ الله يهون عليك ويصبرك عليه ويهديه لك يااااارب |
رد: عزيزتي..لو كنت بموقفي وش ردة فعلك؟؟
حبيبي انتي مشكلتك انك سكتي وسمحتي له بالتمادي معك وهو شاف هالشي حلى عنده بيستمر معاكي بنفس الاسلوب لو ماوقفتيه عند حده وحطتي للموضوع نهايه ليش تبرري لزوجك انه عصبي ومن هالقبيل الكل يعصب يعني لو على كذا نص حريم العالم ينضربوا والسبب ثوران ازواجهم عليهم بسبب ومن غير سبب قوي شخصيتك خليك قويه عشان ولدك ترى يتعقد اذا كل مره يشوفك تنضربين بعدين ولدك بيسوي مثل ابوه اول شي ماراح يحترمك وتربيتك تضيع حرام وربي حبيبتي ترى اذا شافك ساكته ترى بتستمر حياتك بالضرب وبيحط في باله انك متقبله هالشي بيقول تعود جسمهآ وخلاص لا حياتي هذا شي راح يآثر على نفسيتك ,,,,
في الاخير مااقول غير الله يسخر لك زوجك ويهديه وترجعو مثل قبل واحسن بعد... عليك بالدعآآآآآآآآآء وربي يفرج كربك |
رد: عزيزتي..لو كنت بموقفي وش ردة فعلك؟؟
الله يطيب خواطركم يالغاليات
احس كلام كثير منكم كان هو شعوري بالضبط...انا وربي مو سالفة دايسة على كرامتي عالفاضي لكن اقول يمكن ربي يهديه ويعتدل ومن قال مافكرت بالطلاق بشكل جدي لاني تعبت هو كويس وقت اللي هو مروق ويسوي لي كل شي اتمناه هذاك اول لكن بصراحه في الفترة الاخيره صار نحيييس مرررة كل شي اقوله ودي فيه يقولي خساره تخيلو اول مايتحرك خطوة الا يتصل يستأذن<<اي يستأذن مو يعطي خبر وبس لكنه الحين تععععععععب قلبي وتغير علي وهذا اللي كاسر ظهري انه كان شي وصار شي مغاااير تماما قلبي وعقلي مشغولين بينه وبين ولدي والجامعه قمت احس بالشتات وتعبت اتصنع الفرح والمثاليه قدام خلق الله وانا من داخلي اشلاء خواته واهله يقولو يابنت هذي عين صابتكم لا تطلبي الطلاق دعواتكم لي يالغاليات لان اتوقع انكم حاسين فيني ومافي بنت تتزوج وتتوقع ان هذي بتكون حياتها الله وحده المعين |
رد: عزيزتي..لو كنت بموقفي وش ردة فعلك؟؟
حبيبتي اللي يسسويه أمر صعب خاصه الضرب ...
فكري في نفسسك قبل تفكرين فيه .. يعني عاجبك وضعك .؟ روحي لآهلك وخليهم يعرفون بالسسالفه واجلسسي عندهم فترة رآحه وفكري في الموضوع بجديه .. وفكري كيف يعيش طفلك بينكم وحالتكم كذآ بيتعقد أنتي تضرينه .. بعدين الحقي عمرك تطلعين بطفل وآحد احسسن من يكون عندك كم طفل وتطلبين الطلآق.. واقري سورة البقره .. وادعي ربي .. الله يسسخر لك زوجك ويهديه ويصلحه .ز |
رد: عزيزتي..لو كنت بموقفي وش ردة فعلك؟؟
لـ الظالم يوم حسبي الله ونعم الوكيل عليه والله جالسه ابكي من قصتك الله يعينك وينصرك عليه تشوفين يوم فيه انشالله ويعرف قيمتك ماهب صاحي بس انتي اذا طلب منك مويه وش فيها والله عادي يطلب مني مويه وعشا وغدا ويقول انتي وش سويتي اكثر من الحريم عادي كلامه صح ويقول هذا واجبك وانتي مجبوره واجل ليش تزوجتي لو قعتي عند اهلك عادي ياقلبي ارد بكل برود اقول مو واجبي وانا امزح عادي ياقلبي اذا طلب اي شي منك بذل قولي انا افدي الارض اللي تمشي عليها أصلا أنا لوبيدي ماكان خليتك تشرب شربه بيدك عشان ماتتعب ...... ومن هذا الكلام وانتي شكلك عنيده لاوالله انا اذا شفت زوجي معصب امتص غضبه مااتناقش معاه الله يهديك حاولي انك ماتردين عليه وهو يهاوش وخليه يتذكره الايام الحلوه اللي قبل الزواج وقوليله تتذكر وقولي حبيبي انا رسمت لحياتنا شي يكون احسن من كذا توقعت انك بتعيشني عيشه الامراء وتخليني ملكه وانت فارس احلامي والى اخره عاد انتي واسلوبك وابدا لاتعانديه اقهري نفسك بسكاتك وروحي ابكي في الحمام بدون مايحس وتمكيجي واكشخي وخلي اسلوبك حلو ياقمر بإذن من خلق السماء انه مايزيد يرفع يده عليك ويضربك وانصحك لوجه لله اهلك لايدرون الا اذا تبغين الطلاق والطلاق مو هين يغير الله من حال الى حالي لاتستسلمي أدعي ربك واستغفري كثير لاحياة مع الياس ولايأس مع الحياه خلي ايمانك بربك قوي
|
رد: عزيزتي..لو كنت بموقفي وش ردة فعلك؟؟
حتى لو احبه مليووون
مستحيل ارضى بالمذله اللي معيشني فيها بيت اهلي احسن لي من العيشه معااه مليوون مره |
رد: عزيزتي..لو كنت بموقفي وش ردة فعلك؟؟
البنات قالو كل الحلول
بس سبب تغيره عليك ياعين ياسحر والله اعلم لانه كان يحبك شلون يتغير هالتغير كله |
رد: عزيزتي..لو كنت بموقفي وش ردة فعلك؟؟
خليه يتعالج نفسيااا
الله يساعدك ويعينك ع مابلاك .. |
رد: عزيزتي..لو كنت بموقفي وش ردة فعلك؟؟
لا حول ولا قوة الا بالله
الله يفرج لك همك ويسر امرك ويسخره لك ولولدك بس يا حبيبتي الغلط من البداية لو من اول مره مد يده و تكلم عليك كان وقفته عند حده بس الحين خبري ابوك او اخوك خليه اللي يوقف في وجهه رجال لا تقولين بكلم امه ما ينفع ويارب يهديه ويسخره لكم يارب |
رد: عزيزتي..لو كنت بموقفي وش ردة فعلك؟؟
حبيبتي الزوج بدايته كذا بس والله راح يتغير بإذن لله بسلوبك ودعائك لله...الله مجرد يبي يجرب مدى تحملك....
والله بدايه الزواج انه يذبح فيني...والله لاني ماسويت شاي..قام وجرني من شعري.... بس والله والله تحملت وصبرت قلت ان شااءالله بينصلح.... وفعلا ربي ماخيب دعائي له ورجاي....قلتله يارب يامنان اهديه اهديه لي وللمستقبل... والله والله وبعد شهور طويله انصلح حاله انه مايرفض لي بالمره طلبببب لو بااخر الليل.... حتى مايقصر بحنانه لي وعطفه علي <<<<...تقولين ليش لاني لجيت لله لااهلي ولا اهله الله هو الي بيحل مشاكلكم...علقي املك كله بالله ولاتدخلين احد بمشاكلك واصبري اصبري... ومجرد مايضربك رفعي يدينك للسما قولي قدام عينه يااااارب يصلحك لي وللولد الي ماله ذنب... وبتشوفين مع الايام بيتغير....ويااااااارب يفرج همك مثل مافرج همي ... |
رد: عزيزتي..لو كنت بموقفي وش ردة فعلك؟؟
لا حول ولا قوة إلا بالله ..حبيبتي شكلة ريلج مستقوي عليج لانج ساكته و صابرة و هو طبعا يعرف إنج بتسكتي عجان خاطر الولد عسب تجي قول حق اهلج و أهله و خليهم إوقفوه عند حدة ولو إستدعى الأمر روحي بيت أهلج كم يوم هاك الوقت بيفقدج و بيحس فيج.. و بيي يترجاج ترجعي له..
|
رد: عزيزتي..لو كنت بموقفي وش ردة فعلك؟؟
الحلول اللي قالو عليها البنات كثيرة ما شاءالله شوفي اللي يناسبك وسويه
الله يفرج همك ويسخره لك...... |
رد: عزيزتي..لو كنت بموقفي وش ردة فعلك؟؟
الله المستعان الله يهون عليك
ويفرج همك وييسر امرك ويسخر زوجك لك هو القادر على كل شي عليك بدعاء واذا عادي تدخلين اهلك واهله بلموضوع اذا فيه حكماء وتعرفين شخصياتهم وكيف بيتعاملو مع الموضوع وادعي ربك ليل ونهار ربي يفرج همك يارب وعليك برقيه وسورة البقره استغفر الله والحمد لله ولاحول ولاقوة الابالله الله اكبر ولااله الاالله |
رد: عزيزتي..لو كنت بموقفي وش ردة فعلك؟؟
حســــــــــــد أعوذ بالله
لأن هذا مستحيل تصرف واحد 1- عاقل 2- يحبك لااااااااااااازم تجمعين مويه من أقاربك وأقاربه ويغتسل بها خاصه ممن تشكين فيهم خليه يشرب موية زمزم وأقنعيه يرقي نفسه وأنتي إقري سورة البقره في البيت وشيء مـــــــــــــــهم جداااااا أستعملي حبوب منع الحمل وإدعي ربك إذا قمتي تصلين في الليل واذا عصب لا تردين عليه ابداً واذا ضربك انهاري قدامه بالبكاء وروحي لاهلك وهدديه بالطلاق إلين يوافق إنه يروح يرقي عند شيخ بس بسألك إذا هدأ يتحسف على إلي يسويه او لا؟؟ وسؤال ثاني قبل الزواج هو كان معروف بعصبيته وإنه ممكن يضرب؟؟ وجواب ع سؤالك .. ما أجلس عنده افضل لي ولولدي لأنها مستحيل تكون بيئه حلوه له ..والولد يخير بين أمه وأبوه إذا وصل لسن معين أما البنت لأبوها! |
رد: عزيزتي..لو كنت بموقفي وش ردة فعلك؟؟
حبيبتي اقرأي سورة البقرة يومياً
|
رد: عزيزتي..لو كنت بموقفي وش ردة فعلك؟؟
الله يصبرقلبك ياااعمري
طيب حياتي لايكووون مسحورررلاسمح الله اوفيه عين |
رد: عزيزتي..لو كنت بموقفي وش ردة فعلك؟؟
تسلمو عالردود اللي تطيب الخاطر ويارب ماتشوفو شر بحياتكم
وبالنسبة للاخت مهوية ...انا كنت عارفه انه عصبي قبل الملكه وقبل كل شي لكن الضرب ماعرفت عنه انه موجود بشخصيته الا بعد الزواج من اخواته وللندم كان اول يضربني من ثم يجي ويتطمن ويضم ويندم..لكن الحين وربي ولا هميته ولا حتى يبان عليه انه متحسف عالطق الا تحسيه متحسف ليه ماسوى فيني اعظم انا في ايامي الحاليه افكر جديا بالطلاق بلا ترااااجع لانه صار دمار شامل تخيلو الحين قلب السالفة على ذهبي يقول خل نبيعه واشتري لك ارض باسمك اقوله الا الذهب مستحيل بكره اتوظف واساعدك بالراتب وبس قلتله لا تعاااالو وشوفو عيشتي وربي يستخسر علي حتى كيس الخبز اقله قم نطلع نغير جو بمطعم او كافيه بدل التوتر اللي حنا فيه..يقلي خساااارة عليك تخرجت من الجامعه ولا حسيت بالفرحه بسببه حتى حفلة التخرج حرمني اروحها لانها شي يفرحني...بس مقعدني بين جدران الشقه حتى اهلي بالموووت يوديني لهم هذا ان وداني ماخلا حد من اخواني يجي ياخذني مليت وربي وكرهته من جد على قد ماكنت متيمه فييه... |
رد: عزيزتي..لو كنت بموقفي وش ردة فعلك؟؟
حبيبتي
ضروري تصارحين أهله وأهلك وتوقفيه عند حدة وماترجعين له إلا بشروووط بعد أولها أكيد عدم الضرب والمساس بكرامتك وقلبي يقول لي إن هالراجل فيه مرض نفسي خلي أهله يعالجوووه لو كانوا يحبونه الله يهدي سركم. |
| الساعة الآن 03:07 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .