منتديات حوامل النسائية - قصة ولادتي بنور عيوني (( البراء ))حبيب ماما..

منتديات حوامل النسائية (https://naqatube.com/index.php)

- إستفسارات مرحلة الولادة (https://naqatube.com/forumdisplay.php?f=96)

قصة ولادتي بنور عيوني (( البراء ))حبيب ماما..

السلام عليكم ورحمة الله وبركاته
مرحبــا احلى كروشات واحلى امهــات

اليوم راح احكيكم فلم المرمطه والبهدله حق ولادتي hwaml85

بدات معاناتي يوم الثلاثاء 10/4/1432هـ الساعة 3 الفجر صحيت من النوم وانا احس بألم مو طبيعي كل بعد شوي يجي خفت وحسيت ان ساعة الصفر قربت اخذت اللاب وطلعت الصالة شغلت سورة البقرة وقمت امشي لحد الساعة 4 حسيت بتعب ورجعت الغرفة انسدحت اذن الفجر قمت صليت وصحيت ابو الشباب يصلي بعدين قلتله بروح المستشفى ومشينا على الساعة 7 تقريبا على مستشفى باشراحيل <<من كثر ماتمدح حبيبتي ثلجه عالدكتورة بسمه رحت ويااااليتني مارحت hwaml4مالقيت الدكتورة بسمه ودخلت على فطيمه قلتلها احس بألم يمكن ولادة اكشفي علي قالت مافي لازم اول تسوي سونار وتحاليل قلتلها طيب قالتلي اول تعالي نشوف نبض البيبي hwaml10اطمنت عليه الحمد لله تمام اعطتني اوراق التحاليل والسونار نزلت سويت اللي تبغاه بس من الغباء في تحليل ما يطلع الا بعد اسبوع ما ادري ايش فايدته وانا اقلها ولادة ولليوم ما اخذت نتيجته وشكلي ما راح اروح اخذها .. المهم طلعت للدكتورة لقيتها في العمليات عندها ولادة قيصريه وانا داخله الاستراحة في وحده برى على كرسي شكلها باكستانيه تصيح وتتوجع بقوووة قلبي وقف hwaml93 دخلت استنى الدكتورة وبالي مع اللي تصيح برى وكانت معايا اخت زوجي الله يسامحها راحت عند اهل البنت وقالتلهم لا تخلوها على الكرسي بعدين الجنين يطلع فوق ويسولها عمليه وهم ماصدقوا راحوا دخلوها على الاستراحة وسدحوها على الارض وهي تصيح ولمت رجولها قامت وحدة تفك رجولها وانا هنا دورولي ماغير نقزت من عندهم وجري عند زوجي قلتله يالله على البيت قال ليش قلتله مافيني وجع والدكتورة في العمليات ووحدة تولد في الاستراحة قال ما ارجعك ثاني مرة قلت امشي طار الوجع خلاص ورحت ناديت اخت زوجي من عند الباب وعلى البيت طلعت عند مامتي خلاص ما ابغى اجلس في بيتي خايفة وطول الوقت افكر اروح اي مستشفى كل واحد يطلع بمستشفى في النهايا ابويا الله يحفظه قال مستشفى ام القرى وانا اكرها احسها مجزرة مو مستشفى المهم دعيت دعاء الاستخارة ورحت العصر ام القرى دخلت على الدكتورة بتحاليل وسونار اللي سويته في باشراحيل وكشفتلي من تحت قالت الرحم مو فاتح وراح تولدي بعد 5 ايامhwaml85 وكتبتلي ادويه وقالتلي اشرب عصيرات كثير عشان البيبي صغير ..رجعت البيت وانا محبطه اخذت الدوا وكل شوي اشرب عصير وحالتي حالة والالم يجي ويروح نمت وصحيت قبل الفجر يوم الأربعاء 11/4/1432هـ الالم زااااااااااااااااد وصياااااااااح جات امي عندي وشوي جاء ابويا وانا اصيح زي الاطفال حاطه يدي على عيني وصياااااااااااح اتصل ابويا على زوجي صحاه من النوم وسي السيد ثقيييييييييييييل بقوووة وانا حالتي حالة اخذني ابويا على ام القرى وقاله لا تتاخر الحقنا المهم رحت انا وامي وابويا كشفت علي الدكتورة وقالت الرحم مو فاتح ولا سانتي واحد وشكلها مخيف وهي تكشف وتقول عمليه وشكلها قلقانه جابتلي الرعب قمت اسال فيه شي ماترد وماعندي غير الصياح اخذوني سويت سونار وتحاليل ومن غرفة لغرفة اخر شي دخلوني غرفة حطوا على بطني تخطيط نبضات البيبي شوي وجات الاستشاريه وانا مسكت فيها دخيلك فيه شي البيبي فيه شي تقلي لا كل شي تمام قلتلها طيب بسرعة سوي عمليه عشان البيبي لا يتعب ويصير فيه زي ولدي الاول قامت تهديني وقالت عندهم الجهاز مو كويس ما يوضح نبض الجنين تمام وما عندهم حضانه كويسه عشان البيبي وحولتني على مستشفى حراء بعد ما اعطتني مغذي ما ادري ايش هوا المهم الله يكرمكم استفرغت وانا باخذه خلصت وعلى مستشفى حراء وطول الطريق صياح والم وابويا كل ما صرحت يقول قولي يالله لا تصرخي وانا ساعتها مافيني لأحد المهم دخلت حراء عند الدكتورة باكستانيه حالها في خشمها انسدحت على السرير وجاني الم صحت قامت خاصمتني ايش هذا في رجال برى ما يصيح حقت عليها بس سكت لأني محتاجتها ولا كان نفسي ارد عليها جاتني وشفتها حامل من قهري قلت في نفسي ربي يذوقك اخس من اللي شفته استغفر الله ساعتها كنت مقهورة منها المهم قالت الرحم فاتح 2سانتي شوي قالت فين رجال جاء ابويا وزوجي قالتلهم مافي سرير كلها ملياااانه خرجنا من عندها راح ابويا كلم واحد ما ادري مين اكدله ان كل السرر مليااانه طلعنا من حراء قمة التعب والمرمطه من مستشفى لمستشفى المهم رسينا على بخش وعلى طول استقبلونا السسترات والدكتورة وكشف واستقبال حلوووو وهم مبتسمين سوتلي التلفزيون ونبضات البيبي قلتلها بسرعة سوي عمليه ما ادري هوا انا قادرة اولد طبيعي او لا المهم كان قلبي معلق بالطفل خايفة يرتفع الضغط ويتعب اللي ببطني زي عبودي وافقدة كان همي كله يطلع متعافي المهم بسررررعة على العملياتhwaml21 دخلت شفت كل شي بس مشوش الحمد لله لاني من غير نظارة :) وماحسيت الا شوي بعد العمليه الدكتورة حنان تصحيني وانا احس شوي واغيب شوي شفت زوجي وانا في غرفة الملاحظة سالته عن الولد قالي طيب بس شوي اختنق وحاطين عليه اكسجين قمت احلفة صدق طيب ولا فيه شي ..بعد ما قمت قالي اني كنت اتكلم وانادي على نفسي وعلى بنت اختي انواع الفضايح hwaml77 .. بعد العمليه ارتفع عندي الضغط كم ساعة بعدين استقر ونقلوني على التنويم وما خلوني اشوف حبيبي الا يوم الخميس في المغرب رحت شفته رجعت ابكي hwaml80 زوجي خاصمنيhwaml4 قالي مافيه شي بس انتي تدوري على المرض تبغي الضغظ يرتفع .. نمت وانا زعلانه بعدين في الليل نادوني على الحضانه عشان ارضعوا فرحت ورحت بسرعة والحمد لله الجمعة طلعوا من الحضانه وجابولي هوا الغرفة وطلعت السبت انا واحلى بيبي حبيب امه البراء من المستشفى hwaml60hwaml60

وهذا بروئي وهوا في الحضانه فديت قلبه
http://forum.hwaml.com/imgcache2/hwa...247001_382.jpg
اتمنى ما اكون طفشتكم وتكون قصتي خفيفة عليكم مع اني ماخليت شي الا كتبته :)