منتديات حوامل النسائية - ألم الأسنان في الحمل

السلام عليكم ورحمة الله وبركاته :

كيفكم يا امهات المستقبل , يا أمورات أنا انضميت جديد للمنتدى مع اني كنت نتابعة من زمان لكل كتاباتكم الممتعة والمفيدة , ومشان ما أطول عليكم رح أخبركم إنو أنا طبيبة أسنان وحابة أعطيكم شوية معلومات وممكن نصائح مشان العناية بلأسنانكم بشكل عام خلال الحمل بشكل خاص , وكمان أنا على استعداد للاجابة عن تساؤلاتكم بخصوص الأسنان لحد 20/4/2011 لأنني بعدها نازلة على أهلي وحكون دخلت التاسع الله يهون على الجميع خلينا نبدأ:

أولا : أهم نصيحة سواء كنتي حامل أو لا عارفينها كلكم طبعا , لازم تفشي أسنانك مرتين كل يوم وبالأخص قبل النوم طبعا السبب قبل النوم علشان افراز اللعاب بقل عند النوم وسبحان الله اللعاب مهم جدا لتنظيف الفم من بقايا الطعام وكمان فيه مادة بتعمل على معادلة حموضة الافرازات اللي بتنتجها البكتيريا المسببة للتسوس (السوسة يعنيhwaml86) .
والطريقة الصحيحة لتفريش الأسنان هي كالتالي (انتبهو مزبوط ) بتحطي كمية قليلة من معجون الأسنان يا دوب قد حبة البازيلاء على الفرشاة وبعدين بتحطي الفرشاة على جنب الأسنان بحيث يكونو شعراتها عاملين زاوية 45ْ مع السن (يعني إذا عم تفرشي الأسنان العلوية بتحطي الفرشاة وشعراتها لفوق بحيث يكون طرف شعراتها داخل بالجيب الي بين السن واللثة) لا تستغربو أبدا صدقوني هادي هي الطريقة الصح واسألو أي طبيب أسنان ... هلا بعد هيك بتبلشي تعملي حركات دائرية خفيفة على الأسنان تقريبا كل 3 أسنان مع بعض وإاكم تكون الحركات أفقية لأنها تسبب انحسار اللثة عن السن وهاي ما الها حل ... بعدين لازم تكون فرشاة الأسنان ناعمة(soft) من الصيدلية ولا تكون حركاتكم الدائرة دفشة علشان ما تؤذو اللثة ... وبتمشو على الأسنان بالترتيب وأولا الأسطح الخارجية ثم الداخلية (يعني اللي من جهة الحلق أو اللسان) مهم كتير تفرشوها بنفس الطريقة خصوصا الأسطح الداخلية للأسنان الأمامي السفلية لأنو هديك المنطقة أكتر اشي بتجمع بقايا طعام و الي ممكن تتحول إلى تكلسات تؤذي اللثة والأنسجة المحيطة بالسن وممكن تنتهي بخسارة السن لا سمح الله بعدين آخر اشي بتفرشو الأسطح اللي بتمضغ الطعام... ونصيحة مهمة كل أكم يوم اعملو بين الأسنان بخيوط الأسنان لأن الفرشاة لا تصل إلى هاي الأماكن إلي ممكن تجمع بقايا طعام وتسبب تسوس بين الأسنان أو التهاب لثة والاثنين مؤلمين... آخر نصيحة بالتفريش حاولو لا تمضمضو كتير بعد ما تخلصو يعني مرة وحدة بتكفي لحتي ما تشيلو كل الفلورايد الي جاي من معجون الأسنان الي هو كتير مفيد للسن...

ثانيا : لو مكسلة بعد الوجبة تفرشي أسنانك كلي أي نوع جبنة آخر وجبتك لأنو ثبت علميا أنو يقلل حموضة افرازات البكتيريا وبقلل حدوث التسوس بس طبعا لازم تفرشي قبل النوم وما بنفع هاد الحل قبل النوم...

ثالثا : كتير بسمع افركي أسنانك بليمون أو عنبر أو فحم أو أو أو ... بس للعلم هاد كلو غلط كبير كتير لأنو ممكن يبيض الأسنان لفترة بس بتعرفو كيف ؟ أنا رح أخبركم ... السن مكون من 3 طبقات الخارجية تسمى المينا وهي بيضاء والتانية صفراء وهي العاج والتالتة هي تجويف يحتوي على الـعصاب والأوعية الدموية المغذية للسن ... هلأ لو استعملتو الليمون رح تذوبو جزء من المينا إلي بتكون عليها صبغات أو تراكمات أو أي شي وفعلا ببيض السن لكن بنفس الوقت انتي شلتي طبقة من المينا الي هي خط الدفاع الأول عن السن وبالتالي رح يصير السن معرض أكتر للتسوس وأكتر حساسية للأشياء الباردة , إذا عملتي هالشغلة أكتر من مرة حتلاقي إنو السن صار يتحول للأصفر بدل ما يصير أبيض لأنو المينا ضلت تقل لحد ما صارت شفافة تقريبا وصارت طبقة العاج الصفراء تبين من وراها وساعتها ما في طريقة أبدا لترجعي المينا وبياض السن ... مشان هيك لا تستعملو هاي الأشياء أبدا ... لأ وكمان رح أقلكم إذا كنتي شاربة شي حمضي يعني ليمون أو برتقال أو أي مشروب غازي لا تفرشي أسنانك بعدها مباشرة لأنك بتكوني دوبتي المينا وجبتي الفرشاي بعد هيك علان تكشطيها بالمرة .... وكمان لا تفرشي بعد ما تستفرغي (إلي عندها وحام ) لأنو عصارة المعدة إلي راجعة للفم كمان تأثيرها حمضي وبتعمل نفس التأثير...

ثالثا : بشكل عام خففي كتير من شرب أي مشروبات غازية أو حمضية لأنها كتير مؤذية للأسنان وحاولي تتمضمضي بعد شربها أو بعد الاستفراغ...

رابعا : ممكن كتير منكم لاحظ نزول دم من اللثة أثناء تفريش الأسنان ويمكن هاد زاد كتير بعد الحمل ... هلأ أولا قبل الحمل حتى لو نزل دم عادي كملي تفريش ولا تخافي ورح تلاحظي إنو بعد يومين أو تلات رح يبطل ينزل دم بالمرة ,,, هاد االدم ناتج عن انو اللثة ملتهبة لأنك ما عم تفرشي أو بتفرشي بطريقة خطأ ... أما الحامل فالسبب نفس الاشي انو اللثة ملتهبة لنفس السبب السابق لكن الدم النازل بكون أكتر لأنو هرمونات الحمل بتخلي جدران الأوعية الدموية باللثة رقيقة أكتر وبالتالي النزف أكتر لمن نفس الشي إذا فرشيتي أكم يوم ورا بعض بالطريقة الصحيحة رد تشوفي انو الدم زال نهائيا لأنو شلتي كل بقايا الطعام وبالتالي الالتهاب رح يزول...

خامسا: ألم الأسنان ... هلأ في اعتقاد خطأ إنو الحمل بضعف الأسنان أو بخربهم أو بسبب الم وهاد حبيباتي غلط مية بالمية لأنو الحمل بحد ذاتو ما إلو هاد التأثير على الأسنان لكن المشاكل الموجودة أصلا في الأسنان الحدة بتصير تحس فيها أكتر مع الحمل يعني زي ما بحكولك إنو الجلد بصير حساس أكتر مع الحمل كمان الأسنان بتصير حساسة أكتر وبقصد بحساسة أكتر يعني انتي بتصيري تحسي فيها أكتر مش يعني غنو السن بصير عرضة للمشاكل أكتر ...
-هلأ معظم آلام الأسنان ناتجة عن التسوس : إذا كان عندك تسوس بسيط حاولي تعالجي قبل الحمل وإذا اكتشفتي وانتي حامل فما في اشي بمنع انك تعملي وانتي حامل لأنو على الأغلب ما رح يحتاج بنج... أما إذا التسوس أكبر يفضل إنك تأجلي عملو للثلث الثاني من الحمل لو كنتني لسا بالثلث الأول أو لبعد الولادة إذا كنتي بالثلث الثالث طبعا مش عشان البنج بوصل للجنين زي ما بعض الناس بتحكي السبب إنو في مع البنج بيجي مادة قابضة للأوعية الدموية وهاي المادة ممكن تسبب انقباضات بسيطة بالرحم (يعني ما بتزيد عن الانقباضات إلي بعد الجماع ) يعني ما بتخوف لكن معظم الأطباء بحاولو مايتحملو مسؤولية مشان هيك ما بقبلو يشتغلو للحوامل وعلى كل حال عشان ترتاحو لو الحالة كتير مؤلمة وما بتقدرو تستننو لا تخافو بتقدري تروحي لعيادة دكتور تكون بمستشفى مشان إذا لا سمح الله صار مضاعفات وكمان مشان أطمنكم أكتر في بنج بيجي بدون هاي المادة وممكن تطلبو من الدكتور المعالج ولو انو معظم الدكاترة ما بحبو لأنو تأثيره ما بطول متل البنج الأول و بضطرو يعطو أكتر من مرة للمريض خلال الشغل
-هلا كمان ممكن يكون الوجع جاي من التهاب اللثة الي بتغطي طاحونة العقل ومشان هيك أي وحدة تجاوزت العشرين ولسا ما طلعت طاحونة العقل الها تروح تصورها وتسأل الدكتور إذا في أمل تطلع ولا لأ لأنو إذا ما رح تطلع رح تغلبها وكل أكم شهر رح تلتهب وخصوصي بالحمل فتخلعها من البداية أحسن لأنها مش رح تطلع ( لكن إذا انتي حامل إياكي تتصوري صورة أشعة لأنها ممكن تؤذي البيبي لا سمح الله ديرو بالكم) وفي حال كنتي حامل واتلتهبت ما في حل الها أحسن من المي والملح والأفضل تجبي سرنجة وتضخي المي والملح في الجيب بين الطااحونة وبين اللثة الي مغطيتها (بس لا تعوري حالكhwaml86 ) وأجلي خلعها لبعد الولادة لأن معظم حالت خلع طواحين العقل بتكون صعبة شوي ولازمها صورة وانتي ما بتقدري تتصوري وانتي حامل ... بس فس ملاحظة مهمة كتير لو في عندك سن معورك كتير وبدو علاج عصب أو خلع إياك إنك تستني لبعد الولادة زي ما قلتلكم روحي على أخصائي جراحة فم وأسنان في مستشفى وأستشيري لأنو إذا استنيتي عليه أو رحتي لدكتورأسنان عام وخاف يخلعلك إياه وضل يعطيكي أدوية رح تبطل الأدوية تجاوب معك ورح تلتهب ال،سجة تحت السن وتسببلك مشاكل كتيرة وأهمها ورم وانتفاخ واحمرار في الوجه ... وبسمع كتير ناس بقولو حطي قرنفل ... القرنفل تأثيره مسكن بس يعني ممكن يخف عليك الوجع والالتهاب عم ينتشر عندك

بتمنى أكون فدتكم تحياتي للجميع والله يبعد عنكم ألم الأسنان وجاهزة لأي استفسار بس مع العلم انو الطبيب ما بقدر يشخص أي حالي بدون ما يشوفها مشان هيك أي كروشة عندها استفسار وبتقدر تبعت صورة للسن (أشعة أو هي تصور سنها بالموبايل) يا ريت بكون أدق الجوابhwaml7hwaml10

سلام يا حلوات ...
أتمنى إنو يكون في متابعين للموضوع لأن عندي أكم معلومة إضافية سألوني عنهم بعض البنات برسائل خاصة وحبيت الفائدة تكون للجميع فحبيت أذكر هادي الموضوعات بدون ذكر أصحابها:

أولا جاني سؤال عن بنج الحوامل... هلأ معظم أنواع البنج المستخدمة في طب الأسنان بتحتوي على مادة البنج وإلي هي عادة lidocaine و مادة قابضة للأوعية الدموية وهي epinephrine غالبا بالإضاف لمواد تانية مو مهم نحكي عنها وبنج الحوامل هو إلي بكون بدون هاي المادة القابضة وبالتالي فترة البنج بتكون أقصر لكن برضو الطبيب بضمن ما يصير في انقباضلت بالرحم كمان... بتمنى تكون الصورة اتوضحت...

ثانيا: الحمو أو التهاب اللثة أو ما بعرف ايش بتسمو في السعودية لكن رح أوضح إنو هو انسلاخ في الجدار الخارجي الي مغطي للفم وأكتر ما بنتج من عض الخد أو جرح غير مقصود بطعام جاف أو حرق نتيجة تناول شي ساخن (عرفتو ايش هو ممكن تخبروني ايش بتسمونه) ... متل ما حكيت بالأول هاد الشي أهم أسبابه المذكورة قبل شوي لكن في أسباب أخرى ممكن تأثر أهمها الوراثة يعني الي عندهم بالعيلة هالشغلة موجودة احتمال كبير يكون سببها وراثي وللأسف ما الها حل ... وممكن سبب كتير مهم بالحمل لو لاحظتي إنو متل هاد الاشي عم بصير معك بدون سبب يعني بدون ما تعضي خدك مثلا وقبل الحمل ما كان يصير معك هيك فالأفضل دائما إنك تفحصي الحديد و B12 و الفولك أسيد لأن أي نقص بأي واحد منهم ممكن يخلي الست عرضة للحمو خصوصي على الزوايا الداخلية للشفايف وإذا كان هاد السبب اطلبي من دكتورتك توصفلك ما يسد النقص ... والسبب الأخير إلي حابة أحكيه هو النفسية لأنو كل ما ساءت النفسية بتزيد احتمالية حدوثه خصوصي إذا كان من النوع الوراثي وبتقدرو تشوفو هاد الشي في طلاب المدارس لأنكم بتلاقوهم وقت الامتحانت الواحد مش قادر ياكل ولا يحكي من كتر الحمو الي بالفم عندو... هلأ صار وقت نيجي لعلاجو للأسف هو ما الو علاج لكن في أشياء ممكن نعملها وبتخفف منو وهي:
- لا تأكلي الأشياء الحمضية (متل البندورة , الليمون , البرتقال ....)
-ضروري المضمضة بموي وملح أكتر من مرة باليوم حتى لو كان بوجع
- احذري استخدام أي نوع مضمضة موجود بالأسواق وموجود في كحول في فترة وجود الحمو لأنو الكحول بخلي الوضع أسوأ وبطول مدة الشفاء وكيف تعرفي الكحول أطلعي على المكونات وأي مادة آخرها (ول) مثل الايثانول أو بروبانول أو ميثانول هي كحول
- مهم جدا كتير من الأطباء و أطباء الأسنان للأسف لحتى المريض ما يحكي عنو ما بيفهم أو ما عندو علاج بروح بوصف مراهم للمريض وهو ما بحتاجها وأهمها مضادات الفطريات وحبيباتي بأكدلكم الفط ريات ما الها علاقة بهاي الحالة أصلا معظم أشكال الفطريات بالفم بتكون زي وبر أبيض ومشان هيك بترجاكم اذا حد وصفلكم مضاد فطريات لمتل هاي الحالة لا تستخدمو لأنو رب العالمين جعل بعض أنواع الفطريات تعيش في الفم بصورة طبيعية وبستفيد منها الإنسان فإذا استخدمتو هالمرهم رح تقتلوهم وتخسرو مكون مهم ربنا جعل في فايدة النا وما رح يخف الحمو يعني عالفاضي
- في بع أنواع المراهم بتكون بس مسكنة يعني بس علشان تقدري تاكلي وهاي ما في منها مشكلة بتقدري تحطي طبقة من المرهم على الحمو قبل الأكل وبخفف الألم لكن للأسف ما بساعد على العلاج...
آخر نقطة بهاد الموضوع هي إنو معظم أنواع الحمو بتضل بالفم مدة 7-14 يوم بس لو زادت المدة عن 14 يوم ضروري تراجعي طبيب لأنو ممكن يكون في سبب تاني متل نقص عناصر في الجسم متل ما حكينا ولإنو الله يعافينا ويعافيكم في بعض أنواع سرطانات الفم تبدأ على شكل حمو وغالبا يكون غير مؤلم في البداية ..عافاكم الله

ثالثا: مان في سؤال عن انو الكالسيوم بالأسنان يقل عند الحامل لأنوالجنين بمتص من امو الكالسيوم ... حبيباتي هاد معتقد خاطئ جدا لأن السن مجرد ما تكون في الإنسان بتثبت في كمية الكاليوم وخلص لا يمكن تقل في تركيبة السن لكن ياحلوات في نقطة مهمة للي حست انو أسنانها صارو أضعف أو حساسين أكتر فهاد ممكن ياحبيباتي يكون ناتج عن الوحام وكثرة الاستفراغ( الترجيع) أجلكم الله ... لأن هادي الي عم ترجع للفم عصارة المعدة وكلنا بنعرف انو عصارة المعدة حمضية وبتعمل على تدويب أجزاء من الطبقات الخارجية للسن لو ضل تأثيرها عليها لمدة طويلة مشان هيك الحل كتير بسيط لهادي المشكلة ... أي وحدة بعد ما تستفرغ تمضمض بموي بس بعد الاستفراغ مباشرة وتمضمض كويس مشان ما يضل شي من أثر الحموض على الأسنان لكن برجع وبأكد اياكم تفرشو بالفرشاة بعد الاستفراغ لحتى ما تكشطو الطبقة الي صارت طرية نتيجة الحموض تمضمضي بس وبعدها بترجع هالطبقة لوضعها لأن اللعاب في مواد جعلها لنا الله لحتى تعادل الحموضة البسيطة في الفم

أتمنى أكون أفدت ودعواتكم وجاهزة لأي أسئلة أخرى