منتديات حوامل النسائية - هذي موب قصة ولادتي..هذي قصة حملي كللله..هههه

منتديات حوامل النسائية (https://naqatube.com/index.php)

- إستفسارات مرحلة الولادة (https://naqatube.com/forumdisplay.php?f=96)

هذي موب قصة ولادتي..هذي قصة حملي كللله..هههه

السلام عليكم ورحمة الله وبركاته..

http://forum.hwaml.com/imgcache2/hwa...462512_603.gif

إييه الله يالدنيا أنا جيت احكي لكم قصة ولادتي!!
والله كان هذا آخر شي يجي ببالي.لأن كل تفكيري عن الولاده خوووف وقلق ودم وعمليات والم.....الخ.
كنت اتمنى اولد قيصري..عشان ما يفتحوني من تحت خخخخ.
وعشان ما اجرب الطلق..لأني خواااافه من جد..
بالذات من الولاده..بس يارب لك الحمد يسرها ربي..

يالله خل نبدا بالقصه...

أنا كانت آخر دوره عندي 2/3 بعديت تاخرت الدوره حللت منزلي طلع سالب!!
صبرت اسبوع حللت ثانيه برظو سالب!!
حللت دم ما فيه شي!!!
رحت سويت سونار..وقالت ما فيه حمل! بس احتياط راح اعطيك حبوب مثبته بعد اسبوع تجيني ثانيه ونتأكد.
((مع اني صراحه كنت احس بالوحم بس قلت يمكن ما عندي سالفه))
المهم جيت لها بعد اسبوع قالت مبروك حامل بس حملك متأخر يعني صار الحمل بعد الدوره بشهر..!!
أنا ما اعرف بالأمور هذي..قالت لي لاتقيسي على آخر دوره لأن الحمل صار بعدها بوقت طويل..
قلت طيب يا طويلة العمر ومتى الولاده؟؟((عاد هذي اهم شي من اول شهر وانا باديه انتفظ من الخوف))ههه.
قالت موعد ولادتك على حسب اللي اشوفه بالسونار 23/1 ..

أنتم معي؟؟

طيب انا خلاص اقتنعت بكلامها على اساس راح اولد بمحرم..

ومظت اشهر الحمل بطيئة متعبه ..وانا بين الخوف والقلق ..والفرح بالمولود الأول..((وه بث يا حبي له))..

الى ان جاء شهر 12 وانا على بالي باقي شهر كامل على ولادتي..
شريت اغراظي واغراظ النونو..بس ما كملتها..ع بالي لسى ومعاي وقت..

بصراحه كنت احس بثقل..وتعب ..وخواتي يقولون شكلك واصله وانا اظحك عليهم واقول لسى..عشان كلام الدكتوره..

حتى اني ما تركت شغل البيت ابدا وقلت لزوجي لما ادخل التاسع ماراح اشتغل ابدا ..ولازم تدلعني..ولا راح اطبخ اوغسل ملابس ولا شي..
يا روحي ما كنت ادري اني انا الحين بالتاسع وواصله بعد!!هههه

حتى قبل ما اولد بيوم طابخه لأهلي غدا محتررررم ..
يعني والله تعب علي بس انا اقول بنفسي يابنت كل الحوامل كذا كفايه دلع..

والله رحمت نفسي..

المهم الجمعه الماظيه كنت داخله هنا للمنتدى..اتصفح واتفرج واسأل عن افظل المستشفيات ((أنا ووجهي هههه))
وشفت فيه موظوع فديو كيف تتنفس اللي بتولد طبيعي ..قلت يا بنت قوي قلبك وشوفيه..والله ما اكذب عليكم جلست اكثر من ثلث ساعه اشوفه او لا..؟
بالأخير قررت اني اشوفه..وهذي اول مره بعمري اشوف ولاده وشي يتعلق فيها..
شفته وطقتني ام الركب..بعدين اصبر نفسي اقول يا بنت الحلال انتي راح تولدي عمليه يعني مالك وهالخرابيط!!
يا حياتي انا...

سهرت بالليل على المنتدى..وما كنت احس بشي ابدا..
قمت بكره الصباح..بتروش واسوي الفطور..بس لما جيت اتحرك!!
حسيت بشي نزل مني!!بيني وبينكم ظنيت انه بول وتفشلت مرره من زوجي..
بدين كل شوي يكثر يكثررر فظييييييييع ..قمت اصرخ وانادي زوجي من الصاله..جا شافني فهم على طول..
قال لي فيه الم؟؟ قلت لا.
قال اجل نصبر شوي!!
انا خلالالالاص باقصى حالات الرعب..والله كنت جالسه بالأرض على ركوبي وانتفظ..

ماااااااا توقت اولد الحين..ابدا ابدا..يارب ايش اسوي..
حتى شنطة الولاده اقسم بربي ما جهزتها!! والملابس كل شي بمكان..
هذا غير اني انا خااايفه ومنهاره..
المهم انا مابي اوتر امي معي بالذات انها يا حياتي تعبانه..قلت اكلم اختي الكبيره..
((انا كنت اقول لامي وخواتي انا ولادتي ما راح تعرفون الا لما يتصل زوجي ويبشركم..مسويه قويه وماراح احتاج لاحد..خخخ يوم جت الصدقيه زين اني ما قلت لشغالة خوالي بعد هههه))

هي ساكنه بمدينه ثانيه..كلمتها وقلت لها يا حبي لقلبها.على طول فهمتني وقالت خلي زوجك يجهز الشنطه ويالله روحي المستشفى..

والله يا بنات ما تتخيلون انا وشلون وقتها كنت متوتره..
رحت المستشفى والله الفشيله الدنيا تصب مع كل مكان!!
وجابو العربه ودخلوني الإسعاف..
أنا تعودت اروح الإسعاف جرحت يدي..
أو الدوره تألمني..
أو نباصه اروح مع امي تعبانه..
بس اروح اقول لهم ولاده!!!
هذي آخر شي جا ببالي,,

بعد ما خلصوا اجراآتهم وخرابيطهم..وانا كأني طفل متمسكه بيد زوجي..على بالي بيحميني منهم هههههه.

جت الدكتوره كشفت علي قالت: فاتح 1سم.. هذا الساعه 7ونص صباح قلت لها يا دكتوره انا بالثامن..على حسب كلام دكتورتي القديمه..
قالت لا اللي اشوفه انك بالتاسع والجنين راسه تحت وامورك زينه..
انا خلاص وقتها لاتدوروني..جت الصدقيه ابولد؟؟
قلت يا دكتوره ابغى عمليه؟؟!!!!!!
قالت راح نخليك 24 ساعه لو ما حصل شي وقتها طلق صناعي او عمليه..

ايه وبعدين دحدروني بغرفه كئيبه انتظر يزيد الطلق او يسوون عمليه..

وانا بس ادعي واستغفر.اوف يا ربي والله حتى وصيتي كتبتها بالجوال..
المهم جلست بدون اكل او شرب حتى ماي ما فيه عشان احتمال عمليه..
بعدين جتني الدكتوره الساعه2ونص وكشفت قالت:2 سم..
قالت قومي امشي بالأسياب..حتى يزيد الطلق..

عاد انا يحليلي مسنتره على هالسرير انتظر الدادا يطلع على بالي سهالي كذا..ههههه

+++
على فكره الكشف يا بنات والله ما يعور اذا انتي استرخيتي ..واخذتي نفس والله ما يعور بقوه..انا كنت خايفه منه مره الحين لا..
+++

المهم جلست اتلوى من بطني وشوي اقوم امشي شوي اجلس الى ان زاد علي مرره ..وصرت اذا جا الأم ادعي وابكي ولا اتحرك..
بعدين لما جت الساعه 7ونص باليل انا خلاص ذبحني الألم قلت انادي الدكتوره تكشف ..تخيلو لما كشفت ايش قالت..
قالت 3ونص سم او 4سم..

انا طارت عيوني !!
انهرررررررررررت من الظهر وانا اطلق بعدين 4 بس..
كلمت اختي وانا بكييييييييييي قلت لها والله العظيم اني بموت مراح اقدر اكثر من كيذا..وزياده ما فتح كثير..قالت ادعي وربك يفرجها وعادي وما تدرين بعد شوي يفتح مره وحده..((يا قلبي اختي كانت تكلمني كل 10 دقايق تتطمن))
بعدين كلمت زوجي وقمت ابكي قلت تعال عندي ما اقدر خلاص بموت..المهم زوجي صار اذكى مني كلم امي وقال لها!!
على طول جت عندي يا حبي لها يا عساني فدوة لتراب رجولها والله الحين بس عرفت قدرها!!
من دخلت علي امي وانا بس صراااخ ..ابس اتلوى..واذا جا الألم ومسكت يدينها..وظغطت عليها بقووووه..يا قلبي يا امي..
المهم امي بس تقرى علي وتدعي..وتصبرني ..معليش وان شاء الله شوي وتنفرج..
وانا كأني بحلم حتى امسك كرتون الفاين عندي واقطعه بيدي..احس كأني مجنونه..ههه
بعدين يمكن بعد ساعه من قدوم امي وانا خلاص الأم اكلني اكل حتى صرت ما اقدر اتنفس..
جت الممرضه سوت كشت قالت يلا ولاده..
انا كنت اتوقع لما اسمع هالكلمه اهرب..بس يوم جربت بغيت اركض قبلها لغرفة الولاده بس اهم شي اخلص..
شالوني غرفة الولاده وبدلو ملابسي اللي قطعتها من الأم..

وحطوني على هذا السرير المزيون..هههه يخوف صراحه بس انا ما عندي مشكله لو يحطوني بشبك غنم اهم شي اخلص..

وجلست على السرير يمكن 20 دقيقه ..وانا كل ما جت كربه اوقول ياااارب هذي اخر وحده..الى أن يسر ربي وفرجها على وسمعت صوت يقول واااء واااء..((ههه حلو واااء))
والله يا بنات كأني ما مريت بشي..كأني ما تألمت ابدا..كانه نزل علي من السماء..والله لو اكتب الى العيد ماوصفت لكم فرحة خروج النونو..وفرحة انك خلصتي وفرجها ربك..
عاد انا ما صبرت نطيت وشفته ..((وه يا دلبه يدننن))..

ايه خلاص طلع النونو..بس بقى ما ادري ايش اسمها هذي المشيمه..صراحه تعور طلعتها ..او يمكن انا ممرظتي قاسيه نوعا ما..بس ما هي شي عند انك خلصتي..

بعدين جا الدكتور يخيطني..انا الظاهر ما بقى يعقلي برج يشتغل الا واحد ويأشر بعد..
نسيت انه رجال اجنبي..
نسيت الحيا..
نسيت الأخلاق..
ههههه قمت ادبر واهوش..اقول للمرظه شوي شوي على النونو..
يوم جا يخيطني قلت له شف ترى لازم بنج وتحط كثير بعد..وهو بس ساكت ..بدين قلت له ابيك تظبطني زين ((والله فشله ما ادري شلون قلتها))
يوم بدأ ييخيط وانا اهوش هيه انت موب كذا بقوه!! اسحبه على خفيف..شوي شوي
واصارخ ((اتوقع انه يقول وش تحس فيه هذي)) هههه
..

اييييييييييييييييييييييه بعدين بدلو ملابسي وطلعوني لغرفتي..

واطلع والقى هذيك الحرمه لابسه شبشب الحمام وانتم بكرامه.وشكلها مرره ينرحم ودموعها بعينها..

تدرون من صارت؟؟
امي
يارب يرزقني برها..من الإستعجال جايه بجزم الحمام حتى لونها وردي يفشل..وجالسه تبكي وتدعي..يا قلبي انتي ا امي..

يوم شا فتني جت وظمتني وانا ابكي وابوسها مع كل مكان قلت الحين عرفت قدرك يا يمه..والله اني عااااقه وما عرفت حقك الا الحين..

ورحت انا وهي للغرفه ..آه يا الفرحه..

تعرفون فرحة العيد..
تعرفون فرحت قدوم اغلى حبيب على قلبك بعد غيااب..
تعرفون فرحت الإنجاز..
تعرفون فرحة انك صرتي ام..
تعرفون فرحت هم 9 شهور انزاح عنك..

وربي راح تحسي بأكثر من كذا..

يا حلو هالإحساس ..لو يقولون لي تولدين 5 مرات وتشوفين هالمحروس الصغيرون..وتعيشين هالفرحه..راح اقول موافقه..

عسى ربي لا يحرم احد منها...

ويرزق كل من تريد الذريه..

وييسر ويخفف على كل الكروشات يا قلبي عليهم..

وهذي قصة حملي من الف الى ياء..
وهذي قصة فرحة عمري..عسى ربي يحفظه لي..
والله اوقات اكون نايمه اصحى ابوس النونو وارجع انوم..ههه وحده فرحانه..

احب اقول لكل وحده وبالذات البكريات واللي ما جربو...
ارجوكم لا تتعبون نفسكم بالتفكير..والقلق..وربي ما يقدم ولا يأخر..
بهذاك الوقت ما تحسين بشي كثر قربك من ربك ..ربي اللي يخرج النفس من النفس..وما تحمل من أنثى ولا تضع الا بعلمه..
ارتاحي وبالعكس افرحي ينتظرك خبر حلو واحساس حلو..
واتفائلي وثقي ان الله عند ظن عبده به...

++++++++++

طولت عليكم بس حبيت اقول تجربتي كامله..
وانصحكم تتأكدون من موعد الولاده عشان لا يصير فيكم مثلي...ههههه

يالله سلالالام,.