![]() |
قصتي وكلما اشتد الكرب اقترب الفرج اسميتوها
بسم الله الرحمن الرحيم
السلام عليكم ورحمة الله وبركاته... يسعد لي مساكم 💕 اختكم maanoosh جديده سأروي لكم قصتي وكلي رجاء بأن ربي سيجعل بعد العسر يسرى تزوجت وانا بعمر 14سنه وجلست 9اشهر بعد زواجي لم يكتب لي ربي الحمل وكان زوجي يمازحني ويقول سأصبر 3سنوات ومن ثم سأتزوج عليك وانا كنت ابكي واخاف وبعدها كتب لي ربي وحملت وكنت قبل حملي استخدم كريم لتصفية البشره وانا الدم عندي مايتخلص من المواد اللي تدخل فيه بسهوله المهم كان حملي طبيعي وكل شي ماشي عال العال ولما جاء الشهر الخامس ماعاد حسيت بشي مع العلم اني دجه وبزر مااعرف اي شي المهم لما جاء الشهر السابع جاني الم فضيع واقول لامي وام زوجي ويقولون عادي سوالف الطلق الكاذب ولما رحت للمستشفى وقل ت لهم اللي احس به قالت بسوي لك تحاليل وبخش عليك ماعرفت ولا شي وانحشت وسألني زوجي قلت ماقالت شي المهم رحت لبيت وكنت ساكنه بالجبيل وجاء موعدي وقالت لي ماجاك الم او شيء خفت انا وقلت لا بعدها هدا كل شي وقعدت اجهز اغراضي ولما جاء ذاك اليوم بالليل مسكة معي وسويت بارتي صغير لي ولزوجي ولما جاني قال انا مستغرب من شي وهو من تحت عندك وسيع مرره وماجاء الفجر الا احس بألم فضيع ولما رحت للمستشفى قالت وينك فيه رحمك مفتوح من زمااان ولما فكة المويه عبيت وانتوا بكرامه 3مغاطس هذا غير اللي انكب بالارض المهم ولدت وعيوا يوروني طفلي ولادتي كانت قيصرية وكل ما قلت لهم صرفوني اهلي وزوجي والممرضات وكنت جايبه ولد المهم قبل مااكمل اسبوع قالوا بنوريك اياه بس من برا قلت مايخالف وكان بالليل وبعدها رجعت وانا ابكي وقلبي يتقطع المهم جاني نوم فضيع فضيع وبعدها صحيت منفجعه وبس اصرخ ابراهيم ابراهيم والا شويات الممرضات يخبرون امي ان البيبي توفى....اااه يارب لك الحمد على ما قضيت وقدرت وجلست 4اشهر بعدها كتب لي ربي وحملت......يتبع |
رد: قصتي وكلما اشتد الكرب اقترب الفرج اسميتوها
المهم قدر الله لي الحمل وكان على وقتها جيت لرياض عند امي لطلب منها
وزوجي كان مرابط لانه على ازمة العراق وكنت اراجع فالعسكري وكانت اموري ماشيه الين قرب التاسع وطلبوا مني يلفون الجنين وقال لي الدكتور اذا جلستي نص ساعة ماولدتي هذا رقم البيجر حقي خلهم يحولونك قيصرية المهم جلست وقت واوكسجيني ينقص واقول لهم وهم رافضين يوم قلت لامي دقي عليه جوال خذوا جوالي وطفوه وضغطوا على بطني بقوه الين طلع البيبي وكانت بنت بس مزرقه وانهبلوا مايدرون يصالوني والا البيبي لانه عندي من جوا الرحم صار مثل القطع ويبغاله خياطه من برا وجوا ومن عنق الرحم ونزيف ونقص بالاكسجين.... واما البيبي وكانت بنت ردت شوي وبعدها عطوني اياها وجلسنا بالغرفة وكانت باااااارده وكانوا يسبحونها بمويه بارده وانا وامي بننهبل بس كانوا زنجيات وياربي رحمتك وعيوا يعطوني حليب يقولون رضعيها وانا صدري ناااشف وقدر الله وطلعت اناوياها للبيت ولما جاء الفجر صارت تسوي حركات مثل النفضات وعيت ترضع ورجعتها للطوارئ وكان صفار شديد وجفاف وبعدها حولوني لشميسي وتنومت 2شهرين واخيراً قالوا معها زيادة كهرباء وبعدها رجعت للجبيل مع زوجي المهم جلست اسبوعين وكانت مع علاج التشنجات تنوم كثير وكانت مثل الملاك كل من شافها انهبل عليها وكان عليها شعر سبحان الله طويل المهم وديتها لطبيب اطفال قال بعطيك علاج بس اخف عشان يخف النوم ولو كانت نايمه عطيها علاجها قلت اوكيه المهم جلسنا اسبوع على هالحال بعدها كان زوجي معزوم عند صديقه ولبس وكل شيء يوم جاء يطلع قلت تكفى لا تخليني قال ليش قلت مدري قال اوكي فجاءه وانا اعطيها علاجها شرقت احسبه شرقه عاديه قمت اطقطق على ظهرها واقلبها لما رجعتها لوضعها لقيتها سوداء بعدين قلبت موف بعدين قامت تزبد واشواء ان زوجي فيه وطرنا طيران للمستشفى وتقطيع اشارات ويوم وصلت وكنت انا وزوجي مشهبين خذوها منا وعلى طول على الانعاش وانا اشوف ابر واشاعه وجهاز الانعاش وانا منهاره بشكل وخايفه مررره شوي الا تمسكني الدكتوره قالت رئتها مليانه مويه وهي وضعها جداً تعبان اطلبي الله الخيره لها مااذن الفجر الا تقول لي لله مااخذ ولله مااعطا عظم الله اجركم فيها وانا اللي جاني ثبات عجيب على ان زوجي منهار بشكل مروع......يتبع |
رد: قصتي وكلما اشتد الكرب اقترب الفرج اسميتوها
بعدها بثلاث سنوات وكنت خلال هالفتره اكره شي عندي الحمل وتعبت نفسيتي
من كلام العالم وكل شي بس على بداية السنه الرابعه حملت وكنت متابعة حملي وكل شي سبحان الله كان تمام صحيح انا نسيت اخبركم انا وزوجي ابناء عم وكانت ولادتي قيصرية ولدت وكان ولد لما طلع من بطني كان صاحي معهم واول ماقطعوا السر جاه ارتخاء فضيع لدرجة جفنه مايقدر يحركه انا جلست بالمستشفى قرابة العشر ايام ولكن ماكتب له ربي الشفاء فسافرت لبيت اهلي بالرياض وهو فالجبيل وكنا ندور له اخلاء طبي وفعلاً الحمدلله لقينا النقل وتنوم بالعسكري بالرياض وجلس قرابة 8اشهر دون اي تحسن يذكر وكانت تمر به ازمات واخر شي مسك الدكتور زوجي وقال له والله اني ارحمه وانتوا ارحموه اذا جته الازمه ماراح نساعده وراح نخلي رحمة ربي تتولاه لانه يقطع القلب ولا خبرني زوجي ووالله اني احياناً اجيه وقت الزياره ويكون توه فاك من الازمه تشوفين عيونه مليانه دموع 😢 😢 😢 وانا اقول وش فيه قالت الممرضة حطيه بحضنك ولما احطه بحضني سبحان الله يهدأوينام ولما جاء ذاك اليوم وكنت بالليل اتقلب ماعرفت انام وقلبي مقبوظ لما صحيت الفجر وصليت ورحت اجهز فطور زوجي الا يجيه اتصال من المستشفى انت ابو ابراهيم قال نعم قال ولدك توفى انا كنت واقفه لاني استغربت من الاتصال في وقت زي كذا وقال لي شوفي المؤمن مبتلئ والانسان مايدري وش مكتوب له في هالدنيا قلت وش السالفه حليت بطني تكلم قال ابراهيم توفى كانه صاب علي مويه حاره كيف قال استرجعي واحمدي الله ولك الحمد ياربي على كل حال |
رد: قصتي وكلما اشتد الكرب اقترب الفرج اسميتوها
فعلا المؤمن دائما مبتلى .. وأن الله اذا أحب عبدا ابتلاه : في ماله أو ولده أو نفسه .
وسبحان الله شوفي قد ايش ربنا يحبك وابتلاك وانتي على قد صبرك ربنا ح يؤجرك بإذنه .. عنجد تأثرت بقصتك .. وأسأل الله أن يجعلهم شفعاء لكي ولوالدهم يوم القيامه ,, دعواتي لكم بالذرية الصالحه .. والله يتمملك حملك على خير ويقر عينك فيه سليم معافى ي رب hwaml88 |
رد: قصتي وكلما اشتد الكرب اقترب الفرج اسميتوها
لاحول ولا قوة الا بالله
قصتك مؤثره وهذا ابتلاء عظيم من ربنا الكريم الله يفرج عليك ويرزقك الحمل السليم والجنين المعافي مأجوره بأذن الله الواحد الاحد |
رد: قصتي وكلما اشتد الكرب اقترب الفرج اسميتوها
في هذا الوقت قررت الانفصال عن زوجي وقلت انا لااستطيع ان اتحمل اكثر من ذلك وكان لا يرد علي قال لي نحن لانعرف ماهو السبب ......
اعذروني لا استطيع ان اكمل تقطع قلبي من البكاء اتمنى تدعون لي والله ان الهم ذبحني والشيطان بس رجائي واملي بالله كبير انه يخلي لي هاللي ببطني ولا يخيب تعبي ويفرح نظرتي وجميع الحوامل |
رد: قصتي وكلما اشتد الكرب اقترب الفرج اسميتوها
لا حول ولا قوه الا بالله
الله يصبرك ويأجرك ع الي مريتي فيه ويجعلهم شفعاء لك وسبب لدخولك الجنه والله يعوضك بطفل سليم كامل الخلقه من غير زياده ولا نقصان ويفرحك فيه يارب ويعوضك خير اللهم امين |
رد: قصتي وكلما اشتد الكرب اقترب الفرج اسميتوها
الله يصبرك ويزيدك ثبات
ويعوض عليك بالخلف الصالح والله يجعلهم شفعاء لك يوم القيامه الله يتمم لك حملك على خير وربي يرزقك ولاده ميسره ويقر عيونك بشوفة طفلك سليم معافى تام الخلقه من غير زياده او نقصان حبيبتي جدا تاثرت من قصتك ودمعت عيني انتي بس الي عليك استودعي جنينك لربي كل يوم واكثري من الاستغفار ودايم اقري على نفسك وان شاء الله بتلقين الي يسرك انتي وزوجك وراح يملى عليكم البيت فرح وسرور وتتغير حياتك للافضل وربي يعوووض صبرك بالفرج ان مع العسر يسرا |
رد: قصتي وكلما اشتد الكرب اقترب الفرج اسميتوها
السلام عليكم ورحمة الله وبركاته..
يسعد مساك يالغالين واشكر كل اللي مر ورد والي شاهد ولا رد ♥ ♥ المهم زوجي كلم ابوي وقاله هي تبي تنفصل قال ابوي فكروا مع بعض واهل زوجي كانوا محايدين لا كذا ولا كذا المهم قررت اصبر ومرت الايام وقال زوجي ماودك تحملين قلت خايفه قال لا توكلي على ربي وحملت وسقطت وسويت تنظيف رحت لمشايخه اللي قال عين واللي قال سحر مأكول واللي قال نفس المهم جلست حول السنه وحملت وطلبت اني اراجع بالتخصصي وفعلاً دخلت وشافو التحاليل والاشاعات وقالت الدكتوره المفروض انك ماتحملين المهم ولدت وكانت مثل القمر تجنن سميتها على اسم ام زوجي وكان وضعها شبه طبيعي لما كملت اسبوعين وطلعت تحاليلها وبدأت تطلع عليها علامات غريبه مثل الاشارات وتجلس وقت طويل ماترضع وتنام وقت طويل وفجاه تزرق المهم تنومت انا وياها 3اشهر وتحاليل واشاعات يوم كملت 6اشهر تعبت مرره وكنت اطلع اسبوع واتنوم اسبوعين الين جتها ازمه قويه وجاها احتباس سوائل فقالوا خلاص جسمها ماعاد يستجيب لشيء واحنا بدينا نكتشف السبب فوفتها رحمة الله وتوفت 😔 والحمدلله على كل حال وفي وقت الولاده نبهتني الدكتوره لاتحملين ابداً المهم جلست قرابة السنه وانا في حزن شديد ولا اروح ولا اجي ونفسيتي مرره تعبانه وانا اقول ياربي وش السبب 😢 😢 المهم اتصلوا علينا المستشفى ورحنا قالوا المرض اللي يصيب اطفالكم مرض وراثي وهو يصيب الخليه وهو يسبب خلل فالتمثيل الغذائي انصدمنا وخارت قواي وش تقولون وقالوا ماله علاج وأسبابه مو معروفه طيب والسوات قالوا هذا اللي عندكم بعدها جلسنا قلنا بنريح ونفكر وش نسوي امممم ربي يكتب لنا اللي فيه خير وصالح المهم جلست اقراء عند شيخ ولا تبين شيء بعدها قلت ميد زوجي خل نحج قال لا انا قد حجيت المهم حجزلي وكان اخوي معي وكان زوجي مستلمني بالرسايل اشتقت لك ومن هالحكي 😢 😢 المهم يوم رجعت كنت متحمسه له بس انصدمت صدمه الله لا يوريكم هو اللي جاء ياخذني انا واخوي من المطار لما طلعنا لشارع وشاف اخوي سلم على اخوي سلام حار حار حار وانا ولا كأنه يشوفني وقاله اخوي وراك نسيت تسلم على مرتك قال اووه ومد يده وكأنه مغصوب عديتها لما وصلت لبيت اهلي قال متى ما جيتك جيت عاد انا قبل مااروح للحج سويت عزيمه لاهله وحرصتهم عليه وجهزت اغراضه كلها ولما جاء العشا اتصلت عليه ويالله رد علي قلت بتجي والا مشغول قال لابجي يوم جيت لبيت اهله وكأني توني كنت عندهم ولا جهزوا شي والبنات انحاشوا عني انا انصدمت وهذي الصدمه الثانيه المشكله لما حجت بنتهم وجت تجي سويت كل شي ورتبت كل شي وشوي لا افرش الارض ورد لها يوم هذا قالوا الله يهديه رجلك ماعلمنا انك بتجين اقلها ولمنا القهوه والشاهي مشيتها وقلت صبر جميل وبعدها حطوا العشا ولو بالكذب قالوا عشانا عازمين فلان وفلان للعشا جايين من الحج انا في ذهول ربي اللي يعلم به المهم ان جدتي ام اميالله يشفيها عوضتني انا واللي حاجين من بنات خالاتي المهم وطول هالفتره وهو مايكلمني وبس يفكر لما رحنا للبيت قام اخذ له مفرش ومخده ونام بالصاله انا ماانتبهت لاني كنت بالحمام اخذ شور والبس يوم طلعت مالقيته واطلع لصاله والقاه نايم حاكيته مارد علي سكت قلت يمكن تعبان لما جاء الصباح واصحى ماحصلته اتصلت مارد علي لما جاء العصر جاء وقال بنام قلت اوكي صحيته على اذان المغرب يوم صحى الاويعصب علي ليه تتشخصين وتلبسين ليه كذا وش تبين مني انا اقول وش فيك وش صاير ليش تعاملني كذا قال بس قلت بعدين انا معزومه عند خالتي وبعد العشاء بروح تبي تتقهوى والا لا قال لا بطلع قلت بسلامتك بعد العشا جاء ووداني لبيت خالتي قال بعدين بسالك ليه هالشخصيه كلها لو انك بتروحين لعرس قلت والله انت شايف كذا انا احس عادي المهم لما جاء بالليل وجاء ياخذني ورحنا للبيت رجع ياخذ المفرش قلت سلامات وش صاير وش فيك 😕 وين رسايل ومكالمات الحج وين اللي ما اقدر اعيش من دونك وين هالخرابيط كلها سكت وعيونه متحجره قال شوفي امي وابوي يبون يشوفون عيالي قلت طيب لو اني ماحملت او من هالقبيل كان تقدر تقول لكن هذانا ماندري وش اللي بيصير قال لا المهم لا عاد تلبسين ولا تجين حولي وانا من بكره ببدا ادور لي بنت الحلال وانتي تبين تجلسين حياك والا بسلامتك انا هنا انجنيت ليه كذا وش وش انا مدري وش اقول هو اني ابكي والا اذبحه والا وش اسوي....... يتبع |
رد: قصتي وكلما اشتد الكرب اقترب الفرج اسميتوها
متابعه هذي المأساة بس يا اختي احسن شي الج الانفصال عن ابن عمج وله مو كل يوم حمل وفاة جسمج بعد ما يتحمل اكثر، ربي يصبر قلبج
|
رد: قصتي وكلما اشتد الكرب اقترب الفرج اسميتوها
وينك قطعتي قلبي الله يعوضك
منتزره باقي قصتك |
رد: قصتي وكلما اشتد الكرب اقترب الفرج اسميتوها
لاحول ولاقوة الا بالله
الله يعوضك خير والله يجعلهم شفعاء لك يوم القيامه وربي يصبرك ويجازيك الجنه بنتظار بقية القصه |
رد: قصتي وكلما اشتد الكرب اقترب الفرج اسميتوها
الله يصبرك حبيبتي
وانتي مو مسؤولة عن وفاة أبنائك ربنا له حكمة في ذلك وزوجك لو قرر يتخلى عنك بها السهولة الله الغني عن عشرته انتي فكري كويس قبل اي قرار تتخذيه |
رد: قصتي وكلما اشتد الكرب اقترب الفرج اسميتوها
الله يفرج همك
|
رد: قصتي وكلما اشتد الكرب اقترب الفرج اسميتوها
يا الله قصتك جدا حزينه و متعبه
الله يجبر كسر قلبك و يعوضك خير |
رد: قصتي وكلما اشتد الكرب اقترب الفرج اسميتوها
المهم اللي يقهر فالموضوع ويزيد الهم هم ان ابو الشباب كل عصريه يدق الزين وابوه وامه يمرونه ويروحون يخطبون له انا هنا استحقرته قلت لو انك بزر يدورون بك ورحت بيت اهلي وجلست قرابة الشهر بعدها كلمني وقال ارجعي قلت ياسلام عسى ماتكلفت قال الموضوع اللي انتي طلعتي عشانه انتهى المهم قلت كلم ابوي واثره اصلاً يكلم ابوي ويسال عني ابوي قعد يماطل به المهم اتصل علي وقال تولمي بجي اخذك المهم رحت للبيت وكنت مستائه منه وتصرفاته معي
اكذب عليكم اذا قلت ان حبه في قلبي مثل اول لا والله والثقه عندي انعدمت المهم قال اني خلاص هونت قلت لوسمحت ماابي اسمع ولا شيء مشت الايام وانا من النوع اللي اتناسى واسامح بس مو مرره الا اهله قلت اسمح لي على انها عمتي لكن مااقدر انسى لما كلمتها وقلت ياعمه شفتي ولدك وش يقول قالت انا مالي دخل في احد وسكرت انهبلت قلت وانا اعظم من بناتها لها وكذا تسوي فيني المهم صار عندي لخبطه بالهرمونات وصار صدري يصب حليب بشكل فضيع رحت لدكتوره وعطتني حبوب قالت هذي بتزين كل شي المهم مانزلت الدوره والحليب بدا يوقف يوم رحت لها قالت كم لك قلت 4اشهر قالت سوي تحليل يوم سويت لقيتني حامل وانهبل واجلس ابكي ليه كذا يادكتوره قالت كيف حملتي والهرمون عالي جداً عندك المهم رحت للجامعي قالت احسن لك ارجعي لتخصصي يوم رحت عصبت علي الدكتوره وقالت ليه واقولها قالت كذابه انتي اصلاً ماراح تنتبهين لنفسك الين يصير لك شي المهم رحت لشيخ قال لاتخبرون احد لو اهلكم وخبيت 7اشهر عن امي عقبها علمتها وجلست تدعي لي اما ابوي زعل مني قال ليه تحمل واااه والله ماكنت متوقعه الحمل ابد فلما جاء وقت الولاده جاتني الدكتوره تصارخ انتي غبيه تركضين وراء زوجك تبين ترضينه اهتمي بنفسك مابعد كملتي ال25 وهذا حالك ومن هالحكي 😢 😢 المهم ولدت وكنت تعبانه وجبت بنوته تجنن سبحان الله لما شافها طبيب اجنبي انهبل وكل من شافها جلست طبيعيه لمدة 3ساعات بعدها سوو تحليل ولقوا عندها ارتفاع في حمض الاكتيك اسيد المهم جلست 20يوم متنومه عندهم الين ركد وضعها وعلاجاتها وطلعنا للبيت وصرت كل مامر شهر اتنوم مره وبعض الاحيان اطلع اسبوع وارجع 3اسابيع والحمدلله على كل حال المهم انا ماكان عندي خبر بخطة المستشفى او بالاخص الدكتور وش كانت خطته لما اخذ من بنتي العينات ماعاد اهتم فيها طبعاً في نفس هالوقت رفعنا معروض لديوان عشان نطلع بها برا وكان الدكتور يقول لا وشوله تطلعون خلاص اخذنا العينات وقبل وفاتها بشهر كنا نجهز الاوراق وكان ابوي وابو زوجي الله يتسامح عنهم يعرفون واسطات بس رافضين يساعدونا المهم على اخر اسبوع ماعاد يهتمون في بنتي وشغلوا لمبه حمراء وحطوا رقم لما سألت الممرضه قالت هذي حاله خطره وميئوس منها وكنت اركض وادور الدكاتره يوم جاء ذاك اليوم ويمر الدكتور قال شوفي ولا اي مسكن ينفع معها ولا اي علاج ووصلت لحاله خلاص الجسم قفل مايستجيب وهي جسمها صغير وحالتها مرره وانا بس ابكي وخلاص والله كنت ادعي اموت انا وهي سوا ولما جاء من بكره جيتها زياره وطلعت على نهاية العصر واللي يقطع القلب اني لما امسك يدها تمسك يدي بقوه وانا بس ابكي وكانوا يقولون طول الوقت تبكي ولما اجي احطها بحضني رغم الاجهزه وتهدا وتنام 😢 😢 😢 😢 ياربي رحمتك ولما جاء العشا توفت وجاء زوجي ويخبرني قلت خلاص هذا اخر شي بيني وبينك علي وعليك ستر الله واجلس فتره عند اهلي ويجي لابوي قال انا ابيها وان شاء الله ربي بيكتب لنا الخير ومن هالحكي قال ابوي الرجال شاريك فتعوذي من ابليس وارجعي المهم رجعت ورحنا لمكه ومضت الايام الين اتصلوا علينا المستشفى وقالوا لقينا الطفره قلنا الحمدلله وفرحنا ورحنا نراجع وسويت اول مرره تجربه اطفال انابيب بس والله معاناة ابر وعلاجات وسبحان الله يالله زبطت وجلست احتري نتيجة التلقيح بس ربي ماكتب وسبحان الله بعدها سمنت بشكل فضيع ومروع قالت الدكتورة جسمك ماسك كل العلاجات هذي من جهه ومن جهه ثانيه نفسيتي تعبانه المهم مرت سنه وكانت ام زوجي تبي تغير صالتها وكنت متحمسه وارتب لها وازين ولما خلصت تزيين في هالفتره كنت امر بقلق فضيع الله لا يوريكم وكنت اطلب الله الثبات ولا ادري وش اللي راح يصير عندي سافرت مع اهلي لشرقيه وكان بدقيقه يتصل ويرسل بعد مارجعنا كملت اغراضها وكنت اشوفه يسرح ويهوجس بس ما ادري وش اللي عنده وكنت اقوله انت تعرف اننا روحين في جسد واللي يتعبك يتعبني وبعدها بفتره قال بنسافر احنا واهلي قلت ماتشوفون شر قال لا ابيك معنا واصر علي وانا وافقت وربي احس اني غبيه وقتها كان اخوه يقول لو تزوج عليك زوجك وش بتسوين وانا ارد عليه ومزح على طقاق اااه ياربي فرجك........يتبع |
رد: قصتي وكلما اشتد الكرب اقترب الفرج اسميتوها
يالله ،، بكتني قصتك
مأجورين حبيبتي ،، والله يكتبلك حمل بطفل سليم اكيد لان ربنا يحبك يبتليك خليك قويه وصابرة ،، |
رد: قصتي وكلما اشتد الكرب اقترب الفرج اسميتوها
الله يرزقك الطفل السليم المعافى يارب
ويصبرك ويعوضكك خييير يارب |
رد: قصتي وكلما اشتد الكرب اقترب الفرج اسميتوها
ربنا يعوضك خير فى انتظار ك تكملى
|
رد: قصتي وكلما اشتد الكرب اقترب الفرج اسميتوها
ياحيااااتي
لاحول ولا قوة الابالله ،، الله يعوض عليك ويجبر بخاطرك ياقلبي والله تقطع قلبي معك وستفرج باْذن الله ولكن حبيبتي بعد امر الله والاستخارة والرقيه الشرعيه والتوكل ع الله حق توكله ،، لابد من معرفه الأسباب الصحيه أكيد فيه شي ما بين معكم وكل شي عند الله لحكمه اصبري واحتسبي واسال الله القدير في هذه الساعه ساعه اذان الفجر ان يرزقك ويرزقني وجميع الأخوات في المنتدئ بالذريه الصالحه المعاااافاااااه |
رد: قصتي وكلما اشتد الكرب اقترب الفرج اسميتوها
بارك الله فيك أختي الكريمة ارجوك اكملي قصتك فهي بغاية الصبر والروعة والمعاني والذوق والاخلاق انشالله كل أمورك تكون خير في خير وربي يفرحك فرحة عمرك ماشفتيها بس اكملي منتظرين ردك بفارغ الصبرhwaml13
|
رد: قصتي وكلما اشتد الكرب اقترب الفرج اسميتوها
السلام عليكم ورحمة الله وبركاته
يسعد مساء الجميع واكمل لكم قصتي وياربي اجعل بعد العسر يسرا المهم رحنا لشرقيه وجلسنا فيها 4 ايام وكنت احس بشعور غريب جدا وبعد ماجينا لرياض قلت خلاص الحين نبدأ الجد ونخلص صالة عمتي قال مايخالف وكنت استغرب منه ومن تصرفاته دائما مسرح واللي ابيه يوفره وكنا نروح محلات الاثاث عشان بيت اهله وكان يشاورني على اشياء مثل ترتيب الوان وكنت استغرب ولين سألته قال عشان صديقي يبغى يأثث وانا الضعيفة اصدق 😢😢وكانت الثقه فيه توها باديه ترجع واللي يزيد الطين بله وقت نفاس بنت اخته كنت اقول خلك معهم وساعدهم على ان عندها عيال بس احس كان ينبسط لانه كان يروح يأثث مع اخته وكنت احسبه يأثث بيتها لانها توها مرممته المهم بعدها بشهر كثرت انتداباته ومناوباته وكثير يقول مناوب وانا الغبيه اصدق واتحمس 😣لما يجي ااااه ياقلبي المهم في هالفتره بعدني عن اهله كليا وكنت لما اقوله يقول ماخلصنا شغل امي عشان نروح قلت اللي يريحك المهم فضى نفسه اسبوع وشرينا بقية الاثاث وبعدها رحت لبيت اهله عشان اوريهم الاغراض وش اللي يقهرك لما تكونين لاهل زوجك حبيبه وفي خدمتهم ولا تخلين زوجك يتغير عليهم وتعدينهم مثل اهلك واكثر المهم بعد الاسبوع هذا اشتد علي التعب والهواجيس كأني بموت وقلق وعدم راحه وكنت ابي انحف ومسويه دايت والمشكله اسمن ماانحف المهم ومن طبعي انو بعد صلاة المغرب ازبط قهوتي وشاهيي والبس ونجلس نتقهوى بعد ما يصحى المهم ذاك اليوم جاني شعور وانا اغسل مواعيني وكنت اكلم نفسي واقول ياربي تخفف ذاالغلقه عني وتحفظ لي اهلي ولو كان بزواج زوجي علي مدري وش اللي خلاني اقول هالكلام المهم بعد المغرب صحى من النوم وجلسنا نتقهوى وكان طول الوقت وهو يهوجس ولما اسأله يقول ولا شي المهم اخته كانت تدق عليه كل نص ساعة يعني 4مرات اتصلت وانا اقول عساه خير يقول لا ابد تبيني اخلص لها بعض الاغراض قلت خلاص رح لها بعد العشاء قال لا مانيب فاضي قلت اللي يريحك المهم بعد صلاة العشاء دخل علي البيت وانا كنت على جوالي العب وكنت مدمنة العاب وتركيب صور المهم جاني وقرب مني وكان وجهه اسود التفت عليه قال من تسولفين معه قلت سلامتك قال طيب ممكن اكلمك بموضوع قلت لبيه تفضل اسمعك قال انا بصراحه منيب صغير وعمري بيصك 40بعد كم سنه وانا احبك واغليك ولا ابي ارميك لتهلكه قلت وبعدين وش السالفه قال بصراحه انا ابي اتزوج 😨😨😨😨😑😑😑😑انا بلمة صنمت انطرمت وغديت صفراء قال قولي اللهم اجرني في مصيبتي واخلفني خير منها المهم جاء يبي يمسك يدي او شي قلت لو سمحت لا تقرب ولا ابي اسمع صوتك واقوم اتصل على صديقه لي قديمه قلت لها انتي فاضيه قالت اية قلت اجل شويات واجيك المشكلة ابي ابكي ابي اسوي اي شيء ابداً مثل الجدار المهم رحت لبيت صديقتي وجلست عندها الين الساعة 12ولما جيت ووصلنا للبيت قدم لي طقم ذهب قمت انا ناظرته بنظرة تكذب على مين جاي تسكتني بطقم زي كذا 😬😬قال لا بس صدقيني انه موب ودي وتخيلي اني خاطب وحده اكبر منك ومطلقه وعندها ولد قلت مايهمني وجلست 3ايام ساكته وفي هاليومين جلست ارتب بيتي وناديت شغالتين ولما خلصت مسكني وقام يحلف ويحاول يبكي ومن هالحكي قلت شف انا خلاص سو اللي تبي وانا بروح لبيت اهلي قال ايه ابد خذي راحتك لوتبين شهر او اقل او اكثر سكت انا........ يتبع |
الساعة الآن 03:27 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .