منتديات حوامل النسائية - ولدت والحمدلله " تعالو احكيلكم قصة ولادتي ....

منتديات حوامل النسائية (https://naqatube.com/index.php)

- إستفسارات مرحلة الولادة (https://naqatube.com/forumdisplay.php?f=96)

ولدت والحمدلله " تعالو احكيلكم قصة ولادتي ....

السلام عليكم يا غاليات
حبيت احكيلكم قصة ولادتي طبعا الاخوات هون بعضهم يعرفني من فترة وانا ادخل هذا المنتدى بالشهر السابع عملتلي الدكتورة تحليل الجليكوز وطلع عندي ارتفاع بنسبة السكر في الدم والحمد لله من خلال الحمية قدرت
سيطر على سكر الحمل واستمر حملي على
الحمية و ما عطوني لا ادوية ولا ابر انسولين
دكتورتي كانت محددة لي موعد الولادة 5/4/2015 يعني بشهر ابريل
بيوم 24 اذار فقت الصبح متل كل يوم اكلت فطوري كلعادة على الساعة 12 الظهر جاتني متل التشنجات بمنطقة الحوض
قلت لزوحي قاللي اتصلي على اختي بحكم هي دارسة قابلة قانونية اتصلت عليها قلتلها قال طبيعي هذه تقلصات تجي بالشهر التاسع لحتى تولدي لا تخافي
وانا اطمنت ورجعت اكمل شغل البيت لان من لما دخلت التاسع بلشت اعزل البيت المطبخ و الخزاين
كان الالم يروح ويجي وانا اشتغل
بعدها وانتو بكرامة دخلت الحمام و شفت نقطة دم صغيرة ولونها فاتح
اتصلت ع زوجي قلت له هيك صاير وبعتله صور علفايبر وانا ممسحة بمنديل مشان يشوف بعينه نقطة الدم هههههه
قال اتصلي ع اختي اتصلت قالتلي عادي شي طبيعي هيك يصير بالشهر التاسع قالت بس ليطمن قلبك
روحو المشفى
طبعا زوجي ما كان بالببت كان عند اخواته لان وحدة منهم كانت جاي زيارة من السويد
ونحن بسويسرا
قاللي زوجي بتقدري تجي لحالك ولا اجي اخدك قلت لا بقدر
ولو تشوفو حالتي وخزانتي مطالعة كل التياب وعم ارتب ع اساس قمت ضبضبت البيت عالسريع وفتت اخدت دوش
و جبت شنطة حطيت فيها بجامتين الي وتياب البيبي وخليتها بلبيت قلت ممكن مو ولادة وطلعت من للبيت بوجهي علمشفى
طبعا هون في شغلة كتير منيحة انو الوحدة مجرد ما تدخل الشهر الثامن المشفى بيرسل لها اوراق لازم تعبيهم
اسم البيبي معلومات عن الام والزوج مشان يجهزو الغرفة في حال ولادة
المهم وانا بالطريق والالم يروح ويجي وصلت المشفى وكان زوجي واصل فتنا اول شي ع قسم الطوارئ
بعد ما اخد الدكتور معلومات عن حالتي و من ايمت الوجع وهالحكي قال رح ابعتك ع قسم الولادة وهني بيشوفو حالتك
رحنا قالت الممرضى رح افحص مدخل بيت الرحم ازا نفتوح رح تضلي وازا مسكر منعطيكي دوا وبترحعي عالبيت فحصت قالت مفتوح شوي وكمان عندهم جهاز بيحطوه عالبطن بيبين عندهم شقد عم يفتح الرحم
طبعا لما رحنا كانت الساعة 6 ونص المسا
ضليت بغرفة للساعة 11 ونص بعدين اجت الممرضى واخدتني ع غرفة الولادة ة
اول الشي اتسطحت علتخت وحطتلي الجهاز لتراقب الرحم اديش بيفتح و كل كم دقيقة بيجي الطلق قالتلي بتقدري تتمشي شوي رحنا انا وزوجي تمشينا برا شوي طلعني ونزلني من الدرج بعدها رجعنا لغرفة الولادة طبعا عندهم بيسمحوا تدخلي زوجك او امك او صديقة مقربة
انا كان معي زوجي وشاف كل لحظات الولادة
بعدها رجعنا عالغرفة سألتني الممرضى سويسرية طبعا ��
شو رأيك تجربي البانيو قلتلها اوك
عبت البانيو مي وقاست درجة الحرارة و قعدت بلبانيو شغلة ساعةوشوي بس عنجد المي الدافية بتريح وانا حسيتها ساعدتني كتير
بس الطلق بيضل طلق لو بلبانيو او ع تخت
على الساعة 3 ونص بلش يقوى الطلق وحتى العفو استفرغت كل ما يجيني الطلق بلاخير قلت رح اطلع قالت اوك اتسطحي ع تخت الولادة بعدها جابت اسفنجة كبيرة خاصة بلولادة وجابت كرسي صغيرة كمان خاص بلولادة وقالت اقعدي وكل ما اجاكي طلق لازم تدفشي وطبعا ما بنسى التنفس لان عنجد بيساعد
كان كل ما يجي الطلق انا ادفش ولتشجعني جابت مرايا كبيرة قالت شوفي راس البيبي وفعلا شفنا انا وزوجي قالت لازم تدفشي مشان البيبي وضليت ادفش كل ما يجي الطلق لحتى سبحان ربي باللحظة طلع الراس والجسم وشفت بنوتتي بخير وسلامة وعطتنا المقص نقص لها الحبل السري وفعلا انا وزوجي قصينالها الحبل السري كانت لحظات حلوة
زوجي من المنظر بكى انا بهديك اللحظة ارتحت اني خلصت من وجع الطلق لان انا ما طلبت الابرة ولا اي مسكن لان كنت خايفة وخاصة انو معي سكر الحمل بس حطتلي مع السيروم مضاد بس
حسيتو كان يزيد الطلق
وبعدها فورا حطتها الممرضى ع صدري وزوجي حملها كانت لحظات حلوة ما بتتنسى الحمد لله على نعمه
ضليت اربع ايام بلمشفى وهلئ صارلي 13 يوم والدة والحمدلله بنتي اجت بصحة وعافية ومافيها شي ووزنها كان 2766 كيلو غرام
كتير صغيرة
الله يحفظها ويخليلي ياها روح وقلب امها وابوها
صحيح سميناها ( آرين ) نسبة للعرق الآري وايضا تعني العنفوان والقوة
من الاسماء الكردية
وانا فحص السكر عندي بعد ثلاث شهور مين من الاخوات السكري تبع الحمل راح عندها بعد الحمل
وبعتذرازا طولت بالكتابة
ربي يسهل عليكم جميعا مثل ما سهل عليي انا ولدت بلاسبوع 38 من الحمل بدون تحريض ولا شي ودكتورتي حطت الموعد بشهر الرابع بس سبحان ربي ولدت قبل الموعد