|
تقبلوني اخت بينكم؟
السلام عليكم خواتي. كيف حالكم ان شاء الله بخير .. هذا اول موضوع لي بالمنتدى و مدري اذا مكانه صحيح، و لكن سجلت فيه لاني احتاج جدا اني اكون بين ناس يحتووني و يسمعون لي و اقدر اتكلم معاهم و افضفض لهم بكل راحة، خصوصا اني بغربة و موضوعي كله ماحد يعرف فيه غير انا و زوجي و ثنتين من صديقاتي بالغربه .. راح اكتب قصتي ولو طولت عليكم اعذروني :) طبعا تزوجت زواج تقليدي من شاب لا اعرفه ولا يعرفني ولكنه من ذوي الاحتياجات الخاصة، مقعد بسبب اثر حادث مروري ، اصيب في فقرتين في نهاية الظهر ادى به الى شلل رباعي .حالته الصحيه جدا ممتازه الحمدالله و الشكر لله .. ولكن يتعبني في المحاتاه لانه قليل المناعه! اما انا فحالتي الصحية ممتازه لا اعاني من شيء و الحمدالله. من هنا تبدا قصتي .. اسمحو لي اذا كتبت شوي فصحة وشوي عامي :) بعد الزواج عرفت انه زوجي عنده مشكله والا هي عدم القدره على القذف و اسفه جدا علي صراحتي طبعا في بداية الامر كنت جاهله المشكله لصغر سني و قلة خبرتي و ثقافتي لكن بعد عدة اشهر استوعبت المشكله وبحكم انه تو متزوجين مااتجرى اكلمه بالموضوع خصوصا انه بعد اخاف اجرحه و اضايقه بالنسبه لحالته الصحيه و مرره ماابي اخسره لاني مرره احبه وهو شايلني علي عينه و راسه الله يخليه لي يارب بعدها اتجهت للنت ماخليت شيء ماقريته عن حالته و تبحثت كثير وطبعا سبحان الله صح فيه حالات مصابين رباعي ولكن تختلف الحالات من شخص لشخص و من جسم لجسم يعني صعب الاقي حل لزوجي عن طريق النت! ولكن توصلت لمعلومه مشتركه بين اغلبية المصابين . انه المصاب في النخاع الشوكي مايقدر يتحكم في القذف و للعلم كتبت هالمعلومه للافاده فقط المهم بعد سنه من الزواج صار بينا رابط قوي و كل ماجا له يقوى ولله الحمد وقدرت اتوصل لطريقة اقدر افاتح معاه الموضوع و قبل ماافتحه معاه كنت جالسه مع صديقتي وفاتحت معاها الموضوع حزتها كنت جد متضايقه مرره خصوصا انه توني كنت راجعه من البلد و الاهل و الاصدقاء يسآلوني ليش ماحملت و امي كل ماازورها تصر علي يلا احملي ابي اشوف اولادك وانا طبعا اتعب نفسيا لاني مابي اتكلم و غيرها بعد بحكم انه زوجي من ذوي الاحتياجات هنا الناس السيئة تبتدي عندهم الهدرة و السوالف الي مالها داعي مثل اكيد مافيه اولاد ووو... والله انه جاتني وحده تقول لي خالي يقول لي ليش ماحملتي اكيد زوجك مافيه اولاد !!! استغفرالله ربي واتوب اليه تكلمت مع صديقتي عن موضوعي وانا ابكي و انهرت تماما واعلمها كيف الناس بدون ذوق ولا ادب! ودلتني لدكتور الحقن المجهري و بعدها تكلمت مع زوجي لاول مره وقلت له على الانجاب وانه نفسي اصير ام مو لكلام الناس بس لاني جد ابي احس بشعور الامومه و اشوف بطني يكبر و اربي و اتعب، و قال لي هو بعد يبي يفتح معاي الموضوع و انه يبي يشوف ثمرة حبنا! و بصراحه سهل لي الموضوع كثييير و بكل حماس عطيته معلومات العياده و سوا موعد التقينا بالدكتور شهر 3/2014 وطبعا ماعرف شيء عن الحقن المجهري ابدا و من الموعد الاول الممرضات هناك شرحو لنا كل شيء عن الحقن المجهري لمدة 3-4 ساعات تقريبا و كل شيء حار بحار صراحه وسريعين مره و عطونا ورقتين لي و لزوجي تحاليل هرمونات لازم نسويها الموعد الثاني طبعا عطوني ابر منشطه وانا طبعا خفت مره قلت اكيد فيني شي ولا ليش يعطوني ابر وماكنت اعرف انها ابر منشطه ههههههه وبسبب انه انقليزيتي حزتها ماهي قويه فماافهم كل الي يقولونه و زوجي طبعا لما اساله ماايقول كل شي او نسى وش قالو و هذا احنا! طبعا مثل ماتعرفو خطة العلاج ابر منشطه و سحب وترجيع و بعد الشرح المطول قرر زوجي انه قبل كل شيء يبي يتآكد من الحيوانات المنويه عنده لما سآلته ليش قال اخاف اتعبك على الفاضي ابي اتاكد اول .. نتائج التحاليل والحمدالله طلعنا سليمين ولكن عندي نقص فيتامين d وكتب لي الدكتور حبوب الفوليك اسيد وفيتامين d بعد كذا تحدد موعد سحب السائل بالابره لزوجي و الحمدالله على كل حال طلعة النتيجة صفر للحيوانات المنويه عما انه الدكتور تفاجئ مرره يقول لانه جودة السائل المنوي جدا ممتازه وكان واثق انه النتيجه كويسه .. ولكن قدر الله وما شاء فعل و الحمدالله .. حزتها زوجي مرره تضايق وصار يبكي وانا احاول اهديه واصبره طلب الدكتور نسوي معاه موعد ورحنا وقال فيه تحليل جراحي ناخذ عيينه من داخل ***** ونتآكد اذا اصلا فيه انتاج للحيوانات المنويه او لا ومن ذاك الموعد و زوجي معتفس ويتماطل مايبي يسوي خايف من النتيجه وانا مابي اضغط عليه كثير يكفي الي هو فيه .. بس كنت افتح معاه الموضوع من فتره لفتره ويحط حجج الدراسه و اشياء ثانيه و صار عندنا نقل لشقة ثانيه ومسكها حجه طبعا و اخيرا سوينا موعد قبل شهرين وشوي تقريبا مع اخصائي مسالك بوليه عشان العملية الجراحيه و طبعا مارتاح له زوجي وطلب يغير الدكتور و ماطل وماطل و قبل اسبوع صار عنده عدة ايام اجازه ومسكتها فرصه واصرييت مرره وسوا موعد مع اخصائي ثاني و يوم الخميس الجاي الموعد ان شاء الله يارب خييير ياااربب هنا بالضبط ابي دعواتكم ووقفتكم معااي وتفهمكم لي.. ،مررررره مررره اسسسفه طولت معاكم كثير والله مرره اشكركم اعطيتوني من وقتكم ربي يرزق كل محروم يارب |
رد: تقبلوني اخت بينكم؟
حياكي الله بينا
والله يرزقك بالذرية الصالحة ويسهل لك وعليكي بالدعاء والاستغفار وانشاءالله تبشرينا قريب |
رد: تقبلوني اخت بينكم؟
الله يرزقك حبيبتي عن قريب
ربك كريم ياقلبي عليكي بالصدقة بنية الحمل حتى ولو بشيء بسيط بالإضافه اكثري من الاستغفار وعن تجربه طبعاً مع العلاج وثقي بالله انه راح يرزقك الله يبشرك ويجبر بخاطرك يااااااااارب موفقه |
رد: تقبلوني اخت بينكم؟
اهلا وسهلا فيك بيننا
الله يفرحك بالحمل السليم ويرزقكم الذريه الصالحه يارب |
رد: تقبلوني اخت بينكم؟
http://forum.hwaml.com/imgcache2/hwa...532735_571.gif
هلا وغلا والله منوووورة المنتدى ياقلبي مثل ما قالو لك الاخوات .. عليك بالاستغفار و الدعاء و الله كريم يالغلااا ... اسال الله العظيم .. ان يرزقك بالذرية الصالحة و كل منتظرة و يرزق اللي بخاطرهم يااااا رب الله يعطيك العافية يالغلااا ربي ييسر امورك و يوفقك لك ودي و تقديري ♥ http://forum.hwaml.com/imgcache2/hwa...532735_571.gif |
رد: تقبلوني اخت بينكم؟
|
رد: تقبلوني اخت بينكم؟
|
رد: تقبلوني اخت بينكم؟
الله ييسر أموركم يارب ،،،
|
رد: تقبلوني اخت بينكم؟
حياك الله اختي بينا بالمنتدى بين خواتككك وكلي امركك لله وﻻ تفقدي اﻻمل
وعليكك بالتصدق واﻻستغفار والله يرزقكك بالذريه الصالحه ويفرح قلبكك بالحمل♡ |
رد: تقبلوني اخت بينكم؟
ياميت اهلا وسهلا منورة
الله يفرحك بالحمل السليم ويرزقكم الذريه الصالحه يارب |
رد: تقبلوني اخت بينكم؟
هلا والله اختي حياك الله يالغالية
موضوع ضعف او انعدام الحيوانات المنوية له الف حل وحل اهم شي اقنعي زوجك يتابع مع الدكتور عشان يحسن العدد وان شالله بالاستمرار ثلاث او اربع شهور تتحسن ادري ان ودك تحملين هالشهر واليوم قبل بكرة لكن الصبر والاستمرار على العلاج هو اكبر وسيلة للاخذ بالاسباب مع الادوية العسل والحبة السودا والمكملان الغذائية مثل غذاء ملكات النحل او مايعرف برويال وخليه يتابع مع الدكتور مجرد مايعمل له خزعة من الخصية لانها مكان تكوين الحيوانات المنوية ممكن يجمدونها للاحتياط وبعدها تبدين برنامج الاعداد للحقن المجهري اهم شي يعرف ان هالمشكلة مو مرتبطة باعاقتة ابدا ان شالله ياكثر الرجال اللي طول وعرض وصحة ولياقة وسبحان الله ربي يكتب له نفس ماكتب لزوجك هالنفطة مهمة عشان يتشجع ويعرف انه مو لوحده وكثير كانت نسبة حيواناتهم زيرو وباذن الواحد الاحد مع الادوية ارتفعت ورزقهم الله انتي الان ادعي ربي يفتح على قلبه ويتشجع ويتحسن ولايضيع لكن تعب وحطي في بالك ممكن تجربون مرة واثنين وثلاثة لين باذن الله تضبط معكم ويرزقكم الله النونو اللي يقر عينكم يارب مبين انك في سنوات زواجك الاولى والله لو تقرين حالات الاخوات هنا بعضهم لها 16 سنة ماخلفت وحاولت سبع مرات انابيب وكلها تفشل وحدة ورا وحدة مع حسن الظن بالله لين تنجح ويرزقهم ربي النونو اللي ينسيهم كل لحظة حزن طريق طويل لكن مو صعب ولا مستحيل ويسهل لما تعلمين ان الله هو الخلاق ولايعجزه شي وهذا كله ابتلاء عشان يقوي ايمانك وصلتك فيه عشان كذا جددي العهد مع الله واسأليه وارجيه وربي مايخيب رجاك الاستغفار مجرب فيه همم يالغالية ناس تستغفر الى عشرة الاف مرة وشافت العجب والفرج في الولد والمال والصحة استعيني بالله ولايضيق صدرك كلنا بنفس الهم واخوات فاهمين احساسك زيييين الله يرزقكم من اول تجربة ولايشف بكم ياااارب |
رد: تقبلوني اخت بينكم؟
أهلا بيك حبيبتي بين أخواتك
ربي يسر و يسهل أمورك و يرزقك الحمل عن قرييييييب و يرزقك كل ما تتمنين |
رد: تقبلوني اخت بينكم؟
حبيبتي اهلا وسهلا بك بيننا والله كبرت في عيني لوقوفك القوي مع زوجك احتراماتي لاتخافي والله نيتك طيبة والله سبحانه وتعالى باذنه لن يخيبك هي مسالة وقت وصبر احساسي كبير انك راح تبشرينا بالحمل قريبا انشاااااااااااء الله واهلا بك صديقة لنا وبيننا نحن جميعا اخواتك
|
رد: تقبلوني اخت بينكم؟
الله يحييكم و يبقييكم خواتي..
و ان شاء الله من هاللحضه راح استغفر ربي و مرره شكرا لتعاونكم معي |
رد: تقبلوني اخت بينكم؟
اقتباس:
الله يحييك ويبقييك حبيبتي الحمدالله هو الحين اشوفه ماشي مع الموضوع وان شاء الله مايتغير وان شاء الله يارب بدعائكم لي ونصائحكم ربي يرزقني و تو امشي في السنه الثالثه من زواجي :).. والحمدالله ثقتي بالله كبيره بس التفكير متعبني مرره و ماخليت شي ماقريته تبحثت وقريت قصص لناس كثير وغير بعد معاي هنا بنتين يتعالجو بنفس العياده وحده منهم الي دلتني على العيادة والحمدالله هي سوت مره وحده ومالله كتب لهم اما الثانيه سوت عشر مرات ونفس الشي ولكن ماشاءالله عليها ايمانها وصبرها كبير.. لاتنسونهم من الدعاء .. وماقصرتي والله كلامك راح احطه في بالي وتسلمي |
رد: تقبلوني اخت بينكم؟
اقتباس:
والله انه انتي الطيبه يسسسلموو حبيبتي وان شاء الله يارب احساسك في محله .. اهليين فييك زوود حبيبتي والله :)) |
رد: تقبلوني اخت بينكم؟
الله يخلي ايامك كلها سعيدة حبيبتي
|
رد: تقبلوني اخت بينكم؟
اختى بارك الله فيكى لا تياس من رحمه الله وان شاء الله ربنا يكرمك ويرزقك الذريه الصالحه
وربنا يباركلك فى زوجك وحاولى ما تستعجلى الامور وان تضايق زوجك حاولى تراضيه وتشوفى وقت تانى يسمح انك تفاتحيه فى الموضوع وان شاء الله ربنا مطلع وما بترك احد |
رد: تقبلوني اخت بينكم؟
الله ييسر امورك ويفرح قلبكم ان شاءلله يارب
|
| الساعة الآن 08:24 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .