|
شوفي قصتي وقولي رايك
السلام عليكم...كيفكم ..
يقول لكم قصة اللي انا مريحه نفسي ولا ملقيتها اي اهتمام انا تزوجت قبل 5شهور وخخذيت واحد اللي عرفته انه مطوع وموظف واكبر مني بسنتين لان انا عمري 22 المهم اول اسبوع رحنا شهر العسل واتمشينا وبعد مارجعنا رحت لاهله وبعدين خلصت الاجازه وسافرنا للمدينه اللي دوامه فيها وبعد اسبوع جونا اهله وزوج اخته وقعدو عندنا اسبوع وانا لي اسبوعبن متزوجه وخخدمتهم واحترمتهم .. ولا وتروها خخذت بعض اغراضي بدون ما اعرف بس سكت ....مأحب اسوي مشاكل .... ومر شهر... وبعدين حللت طلعت حامل طبعا هو شجعني اني ما اكل حبوب منع حمل لانه يبي يصير اب ..المهم وطول هالايام يطلعني وكل ماتدق اخته العجوزه مسميتها كذا لان حركاتها حركات عجاييز اول .. المهم تدق لما نكون طالعين تقعد تكلم معه ساعه وتقول لا تطلعها حامل تتعب والرجال يصدق صار مايطلعني وتقعد تمدح نفسها انا سويت لرجلي كذا واعطيته فلوسي حقات حافز ...يهالحافز ... بس زوجي معلمني انهم بينهم مشاكل هي وزوجها ودايم تراضيه هي .... بعدين عرفت ان زوجي هو اللي يصرف ع اهله وهم ماشاءالله قبيله وعرفت ان طلباتي راح تكون مو دايم مجابه صرت اصرف من فلوس عندي قلت مره بشتري لاحوي الصغير هديه قال انا اولى وفلوسك هذي بصلح سيارتي فيهم هذا وانا لي شهرين متزوجه مفروض هو يعطيني فلوس ...قلت انا بشتري من فلوسي حتى المستوصف ياناس اذا بغيته مايدفع لان طلعت حالتهم ع الحديده .. هو ما كان كذا بس من اخته العجوزه اللي تقول زوجي اعطيه واعطيه ...خربت اخوها علي ... مع اني متنازله عن فلوسه ... لها ولاهلها .... المهم مرت ايام وصار يطلع مشاكل واسخف مشكله كنت مسويه عمليه سحب اعصاب بضرسي بفلوسي طبعا وانا حامل ولي اربع ايام ما اكل شي ... وبنفس اليوم اللي سويت العمليه قال اختي عازمتك قلت اليوم ما اقدر قال ماتحترمين خواتي طيب جهزي شنطتك ....تصدقون اني فرحت ورحت اجهزها بسرعه ابي بيت امي وابوي خخخخخ ...المهم لي شهرين عند اهلي )مرتاحه والله يديم راحتي قولو ماشاء الله ع راحة بالي( جاء بيرجعني مرتين ورفضت ودق علي وقفلت شريحتي للابد الرجال اللي مايصرف ويسمع كلام اخته اللي تخرب بينه وبين زوجته مأبيه ....هو يبيني مثل خةاته بدون كرامه وحده ثانيه من خواته باعت ذهبها عشيان تشتري لزوجها سياره ويوم اشترى رماها ع اهلها اسبوع وبطلعة الروح جاها لانه رخصها عنده وصارت ماعندها كرامه ودايم يرميها وكل خواته كذا يراضون ازواجهم بفلوس ودايم الاقيهم زعلانات عند اهلهم يعني احمد ربي برجعتي لاهلي عقبال ورقة طلاقي ان شاء الله... اللي عندي يقولون انتي مو صاحيه بس انا اقول رجال صبرت وماشكيت عليه احد ولا شكيته.. لاني اكره الحريم اللي يتشكون .ويكفي اني متنازله عن حقوقي عشان ظروفه ... بس يوم رجعني لاهلي الله يخلي لي بيت اهلي... ماعاد ابي اطلع منه ههههه |
رد: شوفي قصتي وقولي رايك
عاد لا تصيرون قاسيات علي بردودكم اذا قريتو هالقصه اللي كنها نكته طويله هههه.....
|
رد: شوفي قصتي وقولي رايك
طيب وش ذنب الطفل الي ببطنك
انا اشوف انك تصبري على زوجك وتدعي له بالهداية والصلاح وعودية انك منتظره منه مصروف مو تصرفي من فلوسك الله يصلحه لك يارب بس انا اشوف الطلاق اخر الحلول بما انه بينكم حمل ربي يفتح لك بقلبة يارب ويصلح اموركم |
رد: شوفي قصتي وقولي رايك
الطفل لو عاش مع عائله مثل عائلة ابوه بكون ظلمته .... غير كذا هو كلامه كلام واحد موصاحي يحب.صديقة اخته قبل يخطبني خطبها ورفضه ابوها يقول لو اروح لها ونهرب مع بعص واخته تجيب اخبارها له .... انا اذكر اني اخذت واحد مطوع ...طلع واحد الله يهديه يفكر يهرب مع بنات ... انا خايفه ع طفلي منه ... وخواته ازعجنه يبنه يصرف عليهن وهن متزوجات يعني كيف راح نعيش انا ولدي اذا بياخخذن راتبه ... لما قلت له ان بيجنا طفل شلون تصرف ع متزوجات ...سكتني ... مع هذا سكت وماقلت شي انا طبعي ما احب اسوي مشاكل مع احد ... حتى لو كلمته بهدؤء بيقلبها خنقه ... هو عصبي بسبة ظروف اهله اللي ازعجوه انا ادري انه فيه طيبه بس خواته يأثرن عليه
|
رد: شوفي قصتي وقولي رايك
وقبل مايودين لاهلي قال لي بروح شوي وارجع القاك مسقطه ولدك يحسب الولد منديل ولا شي سهل ينرمي مادرى ان بكلمته هذي كسب ذنب كبير
|
رد: شوفي قصتي وقولي رايك
الله يكتبلك مافيه الخير وكويس اهلك واقفين معاك
|
رد: شوفي قصتي وقولي رايك
بصراحه يقهر ليش متزوجنج إذا ما يصرف عليج والله ما أداني هالنوعيه من الرياييل وزين سويتي فيه وشكلهم ناس غريبه يعني ما أدري وين قاطين عقولهم صح إنه الطلاق مؤلم بس إلي تعيشيه يعور بزياده وهو لازم يتأدب و إذا طلب منج ريال واحد بس لا تعطيه لإنه ما يستاهل و أحسن شي بالقصه إنج مرتاحه فبيت هلج, ما أعرف بشو انصحج بالضبط بس الحل إلي يريحج فعلا وتحسين بالراحه التامه فيه هو إلي لازم تسويه والياهل بطلاق أو بغير طلاق غصبن على أبوه بيصرف عليه... و أتمنى التوفيق بحياتج...
|
رد: شوفي قصتي وقولي رايك
مشكورات ع دعواتكم ... انا عارفه ان هروبي عنهم والفكه منهم هو الصح لانهم ناس مايستاهلون حتى التفكير فيهم
|
رد: شوفي قصتي وقولي رايك
ع فكره الرجال اللي انا اخخذته للاسف خالي رجع من سفر ولما سمع اللي سواه سال اصحابه عنه اللحين يستفسر عن حالته النفسيه اصحابه قالو انه هم يجارونه عقله عقل طفل قهر مفروض قبل الزواج سالنا اصحابه مو قرايبه اللي مثله ومثل اهله .... بس ماينفع هالشي اللحين... خليه عايش مع حواته العجايز لان عقله عقل عجوزه مثلهم مو عقل رجال هههه...
|
رد: شوفي قصتي وقولي رايك
ههههههههههههههههه
|
رد: شوفي قصتي وقولي رايك
مشكوره ع الضحكه .هههه.. ;p
|
رد: شوفي قصتي وقولي رايك
الله يكتبلك مافيه الخير وكويس اهلك واقفين معاك غيرك الاهل يصيرون ضدها الين ماتصير حياتها جحيم
|
رد: شوفي قصتي وقولي رايك
الله يكتب لك للي في الخير
|
رد: شوفي قصتي وقولي رايك
الله يفرج همك (( بينكم طفل ))) حاولي تخذي فتره راحه عند اهلك
وتفكري في الموضوع الطلاق زيين لنو مو حل ابد ابد مهما كان يعني يجي الله لايهينه عنداهلك وتقولين كل شي تبينه منه من مصروف((يعني يخصص مبلغ)) __ ومن عدم تدخل اهله ___ الاحترام المتبادل والله يصلح مابينكم ((((((( اما سالفه مريحه راسي منه وهو يقول سقطي قويه )))))))))) كلكم ماخذين الزواج لعبه او عدم اهتمام (((بينكم طفل واهلك اذا استحملو الحين بكره ماتدرين وش يصير )))) خليه هو يصرف عليه غصب عنه ........................... اعذريني بس قهرني اسلوبه ورده فعلك ((موفقه يارب)) |
رد: شوفي قصتي وقولي رايك
دانه وسيدة الغرام مشكورات ع المرور
مصرقه مشكوره ع النصيحه ... الرجال هذا ماينفع معه شروط ...حتى شروط العقد مانفذها...وابوي يبيني اروح لمحكمه....انا كلمت محامي وقاضي قال اذا هالشروط اللي مانفذها مكتوبه بالعقد ورفض تنفيذها يفسخ العقدويبتم الخلع بدون مايرجع له مهر ... الطفل مايحتاج له ابو مثل هذا الاب لان الاب كنه طفل ...حتى العقد معانده..:( |
رد: شوفي قصتي وقولي رايك
وبعدين انا تركته لانه مايعرف يتصرف ومو وجه زواج وبيت ... وابوه وامه واخوانه وخواته كلهم يطلبون منه هو يصرف عليهم ... الرجال تزوج وللحين اهله يعاملونه معاملة صرافة بنك :-(
|
رد: شوفي قصتي وقولي رايك
الله يكون في عونك ويكتبلك الي فيه خير
|
رد: شوفي قصتي وقولي رايك
الله يكون في عونك ويسهل امرك ويزرق لك احسن منه ياارب
|
رد: شوفي قصتي وقولي رايك
هههههههه بصراحه انتي اسم على مسماء مريحه نفسك بصراحه عجبتيني بتصرفك الصبرعلى شي ميئوس منه ماله داعي وطالما اهلك بيستقبلونك وبيوقفون معاك بيت اهلك اولى ومنت مجبوره تصبري عليه الحده تتزوج عشان تعيش حياه سعيده موتنتقل من سعاده الى تعاسه
الله يوفقك ويعوضك الي يقدر ويعرف قيمتك |
رد: شوفي قصتي وقولي رايك
انا وبس و عاشقة الجنان واحلى من العسل مشكورات ع دعواتكم والله فرحت فيها ..اللحين كل اللي ابيه من الدنيا البيبي يجي بالسلامه لامه ...فديته
|
رد: شوفي قصتي وقولي رايك
للاسف مو كل رجال ملتزم يكون من جوه ملتزم والله اعرف ناااس لحيه و صلاه و دين لاكن قلبه اسود حقود زوجته اذا بغت مشوار ادفعي لي و اوديك ولا عيونه زاااايغه استغفر الله هم يضحكون على ربهم او على ميييين
حبيبتي انا مايد الطلاق خاصة وان في طفل بطريق و بنفس الوقت لاتكلميه طنشيه اعطيه درس ان حاول يرجعك اولا بشرووووووط اختي زوجهاااا طلقهااا قبل لايدخل عليهاااا و كانت تجهز بعدهااا بيومين جاء لابوي يتعذر اختي رفظت الرجوع مع انهااا تحبه لاكن تبي تعطيه درس والله ام زوجهاااا جات تبكي تقول ولدي بيضيع ارجعي له و ريحيه و ماعطتهم الرد الا قبل الزواج بشهر طبعااا قفلت جوالهااا يكلم اخوي ويبيكي الحين عندهااا ولد ولو تطلب لبن العصفور يجيبه لهااا |
رد: شوفي قصتي وقولي رايك
بصراحه الله يعينك والحل الي سويتيه صيحيح ويابختك في اهللك الي واقفين معك
انا اعرف وحده قصتها مشابهه لك زوجها معقد جداا ويمثل الالتزام لدرجه حارمها تطلع اوتقابل الناس وجابت مع اطفال وانهبلت ماتغير الاماصار يقوم بعياله وتطلقت والان عايشه مرتاحه عند اهلها وتوضفت وتصرف على نفسها وعيالها |
رد: شوفي قصتي وقولي رايك
حلو انك رجعتي لاهلك
بس المشكله الحين البيبي وين بيروح وراح تكبر عليك المسؤليه |
رد: شوفي قصتي وقولي رايك
ياحياتي انا اشوف الي سويته مو صحيح دامك رحتي عند اهلك وجاء يراضيكي ارجعيله لكن بشروط انه يكون لك مصروف مبلغ محدد
واحمدي ربك ان اهلك واقفين معاك .. وانك بمنطقه بعيده عن اهله ودامك عرفتي ان عقله عقل طفل فيه اسلوب للتعامل معع الزوج الطفل تكلم عنها الدكتور طارق الحبيب وصحيح قال هذا النمط من الشخصيه يحب ياخذ وما يحب يعطي بس انتي ارجعي وخليكي قووووويه لاتلينين له ابد حرام تتطلقي وانتي حامل وتوك عروس اصبري وبكيفه لو صرف على اهله لكن اهم شي لك مصرووف خاص وانتي حدديه بالقدر الي تعرفي انه يكفيك ويكفي ولدك لان بعدين والله تندمي يمكن اخواته يغاروا منك انتي طنشيهم وخذي من زوجك الي تبين اهم شي تسدي حاجياتك انتي وطفلك واجمعي منها بس نصيحه الطلاق لالالالالالالالا احس مشكلتك ماتوصل لطلاق لاتقولي اجلل انتضر الي ماتكبر المشكله لاحياتي احتوي زوجك وخليكي قويه |
رد: شوفي قصتي وقولي رايك
انا لما شفت بداية المشكلة حسيت كنت باقولج املي عليه شروطك وارجعي وحطي قوانين بس لما عرفت بطلبه عن التسقيط ترددت ما اعرف ايش اقول عن نفسي اللي ما يبي مني عيال يعني ما يبي ايكون بيني وبينه رابط اذا كان يقصد هالكلام لما قاله فهو انسان ايمثل الدين وانا ماخذه واحد مطوع وهذا كذب
|
رد: شوفي قصتي وقولي رايك
لو اليوم اصرفي على نفسك بكره ايش يقولك اصرفي على بيت
هيه في مشكله وحد ادا تطلقتي ممكن تجكي بنت وهيا من حق الاب وادا جاكي ولد من حقك واداكان البيبي بيتربى معاكي طز فيه عندك ضمان الاجتماعي او حافز سجلي واصرفي على نفسك وعلى ولدك |
رد: شوفي قصتي وقولي رايك
انا من رائي وتجربتي الشخصيه ولوكنت مكانك لو يشرحني تشريح ابصبر وانا ابغيره بالاسلوب وحسن المعامله ولاتخلين خواته ينتصرن عليك ويفرن راسك انا عشت مع مره اب لان من حق الابو ياخذ ابنه ولاتقولين مايقدر بيقدر مجتمعنا متخلف امي تزوجت وعاشت حياتها وهو تزوج وعاش حياته انا قضيت عمري وطفولتي اتمنى اشوف امي وابوي سواء المهم ماطولها عليك لاتضيعين الي ببطنك حسي بالمسووليه انتي الحين ام ولا تخلين ولدك يعيش مع زوج ام او زوجه اب وهو اذا جاء ولده بيتعلق فيك وهو عمره صغير ترى اربع وعشرين يتعبر مراهق عند الشباب مو مثل البنات عشرين خلاص
|
رد: شوفي قصتي وقولي رايك
صح لسااانك ياا قرعوطه هووو هااااد الكلاااام |
رد: شوفي قصتي وقولي رايك
مشكورات ع النصايح بس فيه اشياء ثانيه ...مستحيل اقولها...لو عرفتوها مستحيل تنصحوني اني ارجع له ... هي سبب وقفت اهلي معاي .انا ذكرت بس الهين من اللي سواه .. وصلت فيه اخر مره برساله يسب ابوي قبل اسبوعين تقريبا ..طيب ابوي وش ذنبه ...انا اللي تركته مو ابوي.... انا اقول الحمدلله ع كل حال بعدي عنه هو واهله هو الخير ....هو متربي مع الحريم عشان كذا فيه طبع الحسد و الحقد...اول اسبوع تركني يرسل رسايل مره يقول تريني ملكت ع.وحده ثانيه .مره يقول عرسي يوم كذا وككذا ..وقبل اسبوع مكلم ابوي يقول ابي زوجتي ...هالانسان نفسيه :-(
|
رد: شوفي قصتي وقولي رايك
انا ابي رجال مثل اخوي و خوالي وابي ام زوج مثل جدتي وابي خوات زوج مثل خالاتي وخواتي ....الرجال هو يصرف .... وام الزوج تترك.ولدها يعيش حياته خلاص لانه تزوج جدتي اذا شافت حريم عيالها ترحب فيهم و تبتسم بوجيههم مو ام زوجي ما ادري وش هالكره اللي حاملته علي.. وجهها اذا شافتني يصير اسود.... مع اني بحياتي ماقلت شي بحقها اوسويت شي يضرها ...واخواته ابيهم مثل خالاتي وخواتي مايتدخلون باخوانهم متزوجين وتاركينهم ع راحتهم مع زوجاتهم ...انا الوحيده بالعايله اللي الله بلاني بهالعائله الغريبه ... عشان كذا ماراح اتحمل اعيش معهم ...
|
رد: شوفي قصتي وقولي رايك
بصراحة انا معك اذا انتي مقتنعة بالطلاق لان انتي عشتي الحالة و حاسة قطعا انك مستحيل تعيشي معاه و اخواته
لان اذا رجعتي له و انتي مش مقتنعة ابدا ما رح ترتاحي معاه مهما حاولتي مع ان كمان انك ضلي ببيت اهلك و تطلقي بطفل مو هينة لكن اظنها اخف الضررين و ترى ابنك يعيش معك في جو هادي و مريح احسن من انه يعيش مع امه و ابوه لكن في جو مكهرب و مشاااكل الطفل يتعقد ان ابواه مش متفاهمين و الله اعلم |
رد: شوفي قصتي وقولي رايك
اذا ترفضين لانك تبين مثل اهلك بتضيع حياتك مطلقه وابنك متشرد لاب واعمام ولا عايله اصابع يدك مو سوا ارجعي وصلحي وضعك بنفسك ترى اذا ماصلحتيه بنفسك بيزيد الوضع سوء وبتكبر بين ابوك وزوجك اسمعي النصيحه
|
رد: شوفي قصتي وقولي رايك
قرعوطه انا بلاي اني ...ما ابي ولدي يطلع ع عمامه وعماته...عائلة متخلفه ..وانتي تقولي عيشه بدون عمام مو زين له ...حتى اخوه الكبير زوجته اللي هي بنت عمه هربت...وتلوميني...ابوها جاب فلوسهم ورماه عليهم .... واخذ طلاق بنته.... عقبال مايسويها ابوي...الرجال اللي يرخص زوجته ما ابيه..انا اكثر شي كارهته عشانه انه بدا يتمشكل بعد ما عرفت اني حامل باسبوع اللي هو اسبوع الغثيان والتعب مفروض بهالايام يرحمني ويرميني بعدها ع طول..ع فكره بقول شي هو قبل اخر مشكله باسبوع..وداني عند اهلي وقال اللي بيننا انتهى وبعدين جا اعتذر واخذني وبعد اربع ايام رجع رجعني لاهلي ..وبعدين يعتذر.انا خايفه انه فيه مرض نفسي...خايفه ع ولدي و ع نفسي منه..جدتي حكيمتنا تقول لو انا بمكانك ما ارجع...واقفه معي وبقوه ههههه
|
رد: شوفي قصتي وقولي رايك
بأسلوبك تغييره ببكرة يجئ المولد وب يأخذه عناد فيك وش ذنب الولد يحرم من امه تحملي ويغريه وبعدين عن أهله شوي. الرجال مثل الطفل بكلمه حلوه تكسبينه سالفة الطلاق أنا ضدها لاتصيري أنانيه وتفكير لحالك فكري للي فبطنك بكرى لو انححرمتي منه
|
رد: شوفي قصتي وقولي رايك
مريحه تكفين ااااااااااااااااااااادبيه خليه يعررررررررررررررررررررررررف قيمتك ماتوووووووووصل للطلاق بس طنشي قووووووووووووووووولي اذ عرفت قيمتي ذيك الساعه تعال انا مو حمااااااااااااااار عندك ولاتقاااااااااااااااارني بخواتك والله الرجال يتعدل ماينفع معه الا العين الحمراء اذ شافووووووووووا الي طيبه بزياده وتحذف عليهم الفلوس تماااااااااااااااادوووووووووا الي سويتيه عين الصووووووووووووووووووواب خلك عند اهلك لما يعرف قيمتك وانك بنت ناس قولي انا عشت معززه عند اهلي انت رجال بتحشمني وتحرتمني وتخلي منك القيل والقال وكلام فلانه وعلانه ولا لا
|
رد: شوفي قصتي وقولي رايك
دامج مرتاحة خليج عند اهلج وشوفي شراح يصير بالمستقبل اهم شي ابنج حبيبتي وانتظري يمكن يتعدل ويبتعد عن خواتة وترتاحين منهن الله يعينج
|
رد: شوفي قصتي وقولي رايك
واضح انك ياختي ماتعرفين فن السياسه وماعندك حل اوسسط
والدليل انك مو متاثره عندك كل شي بسيط هذا زوجك وتحملين منه طفل انا لو اقول لك سوالف زوجي والله يشيب راسك قسم بالله بعد سنتين من الزواج توه متعدل وتغير ببعض الامور وانا لو مستهتره مثلك كان من زمان متطلقه بس هو عاش معه اهله 24 سنه في كم شهر بغيره مثلا لازم وقت ياحياتي انتي طلعي زوجك من البيئه اللي كان عايش فيها وشكليه على اسلوووبك بعدين ياقلبي اذا تطلقتي وربي راح يجيك والله متزوج ولا مطلق ومعه عيال وتعررررفين الحياه معه صح |
رد: شوفي قصتي وقولي رايك
على فكره يوم اتزوج زوجي كان عمري 16 الكل كان واقف ضده اهلي واهله
يقولون له ذي بنت صغيره والله ان حلست تعاملها كذا نوريك شغلك مع ذلك كنت اتحدى نفسي واقول بغيره رغم ان الحمممد لله والشكر مافي شي ناقصني ابدددا بس الحياه علمتني اكون صبوره عشان اطلع بنتيجه افضل ارجعي لزوجك ياغاليتي وتحلي بصفات الزوجه الصبورة |
رد: شوفي قصتي وقولي رايك
بسومه هو هالانسان يحسب بنات الناس لعبه ... يعني يغصبني اترك درسي بعد الزواج وطاوعته وبعدين يسوي ومشاكل مالها داعي ويرميني ع اهلي هذا ماينرجع له الله ياخذ حقي منه هو عائلته والله هالعائله مايعرفون ربهم ومايعرفون احترام.. ان شاء الله الولد مايطلع مثلهم ... اللي يبي يضيع حياة طفلي ويبيني اسقطه ويبي اضيع حياتي بتفاهاته ويضيع مستقبل دراستي الله ان شاء الله يضيع حياته .... انا طعته بكل شي ... والاخ قال لابوي اني ما اطبخ وانه تعب من المطاعم ...هو انت تصرف عشان تجيب من مطعم والله حاله ههه ..ويبيني اجلس مع ازواج خواته اللي ياخخذون فلوس من حريم ...انا الحمدالله عمري ما جلست مع ازواج خواتي..بس هالعائله رايحه فيها
|
رد: شوفي قصتي وقولي رايك
الله يعينك ياقلبي بس حاااااولي انك توقفيه حده
خلي ابوك يروح يحط له حد لتصرفاته لعل وعسى عشان الللي ببطنك وانتي بعدد توك صغيره والله حرررام تتطلقي يعني لاتفكرين بطلاق الا في حاله وحده انه يرفض التغيرر ، خلاص هنا كل واحد بطريقه افضل |
| الساعة الآن 03:23 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .