منتديات حوامل النسائية - تدوير الجنين و مبالغات النساء !

منتديات حوامل النسائية (https://naqatube.com/index.php)

- إستفسارات مرحلة الولادة (https://naqatube.com/forumdisplay.php?f=96)

- - تدوير الجنين و مبالغات النساء ! (https://naqatube.com/showthread.php?t=102932)

تدوير الجنين و مبالغات النساء !

بسم الله الرحمن الرحيم

الحمد لله الذي بنعمته تتم الصالحات

هذي تجربتي مع تدوير الجنين حبيت أكتبها حتى يستفيدوا منها الأمهات
اللي أطفالهم في وضعية الجلوس
خاصة اللي تعبوا من الحبو وما اتجه الطفل ،،

أول شيء أنا بكرية وفي بداية الشهر التاسع حدد لي الدكتور موعد ( لف البيبي ) أو التدوير لأن بنتي كانت جالسه طبعا أنا طرت أبحث في النت عن موضوع التدوير وسألت هنا وهنا وماخليت أحد ما سألته إلين وصلت لقناعة تقول إنو التدوير خطير جدا جدا جاء الموعد ورفضت التدوير حاول الاستشاري يتفهم السبب وكنت أردد خلاص أنا فكرت ما أبغى تدوير وأنا كنت خايفه بجد موعدي اللي بعده باسبوع كنت عند دكتورة مصرية طبعا في المستشفى العسكري المهم فتحت معايا موضوع التدوير طبعا مكتوب في ملفي انو رفضت
الدكتورة قالت تقنعني قبل ما نحدد العملية
المهم سبحان الله كيف أقنعتني عن طريق انو خوفتني من العملية ومضاعفاتها وقالت انتي حكمتي على نفسك بالعملية وعندك الخيار موجود وفي احتمال تولدي طبيعي ليش ما تحاولي على الأقل ليش تستسلمي هنا حسيت اني ضعيفة فعلا
على طول قلت دكتورة خلاص راح اعمل التدوير
قالت أنا بسوي موعد وانتي استخيري الله اذا ارتحتي تعالي على
الموعد واذا مارتحتي بكيفك كان يوم أربعاء والموعد السبت اللي بعده قضيت خميس وجمعة تفكييييييييير واستخرت الله وقلت لزوجي لا تعلم أحد أنا قررت أعمل التدوير وأتوكل على الله
وفعلا رحت موعدي وكنت خايفه جدا من الأفكار اللي في رأسي عن التدوير رحت الصبح قالوا مافي سرير حاليا تعالي بعد الظهر قلت خيره
رحت بعد الظهر طبعا أكون صايمه من اليوم السابق
وأول مادخلت على كشك الولادة لأنو احتمال تصير ولادة أثناء تحريك البيبي
أعطوني لبس المستشفى وحطوا عليه التخطيط كانت الساعة 2 الظهر وأنتظر الدكتورة والممرضة كل شوية تجي تشوف التخطيط على الساعة 4 ونص جات الدكتورة قالت أعطوها ابرة مهدئة وأنا جايه
أدتني الممرضة الإبرة في كتفي وأنا طول الوقت من جيت وأنا أقرأ آيات التسهيل وسورة مريم و أذكار الكرب
جات الدكتورة 4 و 45 قالت يلا بسم الله نبدأ
استخرتي يا شهرة قلت ايوه الحمد لله
قالت مستعده قلت جدا
حطت بودرة على بطني وقالت خذي نفس عميق
وأنا آخذ نفس وهي تضغط باصبعين على جنبي اليمين

وتقول انتي على اسمك مشهورة وأنا أقول آه ايه

يعني أي أحد ممكن يتحمله وبعدين قالت خذي نفس تاني وضغطت تحت الصدر كمان باصبعين وشوي قالت هاتي السونار
فجأة وأنا أنتظر الألم القوي والحاله الخطيرة اللي الحريم خوفوني منها فجأة وأنا أنتظر الموت اللي قالوا عليه! !!!

قالت الدكتورة خلاص الحمد لله البيبي اتجه لتحت قسم بالله ماصدقتها أقول من جدك دكتورة و أحط ايدي على كتفها وأبوسها
وهي تضحك قالت خلاص ارتاحي كمان ساعة عشان نتطمن على التخطيط
وأنا اشوف الساعة قدامي 4 و 48
التدوير أخذ أقل من دقيقتين
وين كلام الحريم والنت والتخويف والتهويل

والله يا بنات دمعت عيوني وكلمت زوجي أبشره مو مصدق
بغمضة عين راح أولد طبيعي بعد ما تقررت العملية يارب لك الحمد
الخلاصة :
الألم المميت عند غيرك ممكن يكون عندك مثل وخزة الإبرة
التدوير نسبة نجاحه 60 % وهذي نسبة كبيرة

قريبا قصة ولادتي ب جمونة حبيبتي