السلام عليكم ورحمة الله وبركاته



كيفكم كروشات ان شاءالله تكونون بخير
من جد مشتاقه لكم ..

قدر الله وولدت قيصريه نهاية الثامن بعد مارتفع عندي الضغط ..

كنت رايحه اراجع الخميس اللي راح عند دكتورتي وشافت ضغطي ١٦٠ وقاسته مره ثانيه طلع١٦٥
حولوني طواريء للمستشفى وكنت ميته خوف ومتوتره .. شافوا ضغطي مرتفع
وقالت ابي منك تحليل بول عشان يشوفون الزلال واخذوا بول مني ... وشوي قالوا
يببون مره ثانيه تحليل فركبولي قسطرره وسحبوا مني ..
وشافوا في زلال بالبول وضغطي لازال ١٦٠
دخلت عللي الدكتوره وقالت بندخلك اللحين نسوي عمليه قيصريه
والله يابنات مارحمتني قلت لها بوكرا طيب اصبروا علي شوي
قالت لا نخاف يصير لك شي بندخلك اللحين .. وبعد معاناه وافقنا وراحوا
يسوون لي اوراقي وشافوا وزن البيبي بالسونار طلع صغير .. وزنها كيلو ونص

جاتني الدكتوره قالت مانقبل طفلك عندنا روحي مستشفى ثاني .
وحوولوني لمستشفى ثانيه لان الطفل حجمه صغير..

ورحت للمستشفى وكان الوقت الفجر والشوارع فاضيه وانا ميته خوف
وابوي الله يطول في عمره ماتركتني وطول الوقت ضايق صدره ويبكي علي..
وانا احاتي حالتي وضغطي وبنتي اللي ببطني وش مصيرها

رحنا للمستشفى . وصرت تحت الملاحظه .ركبولي قسطره وسحبوا مني بول
وشافوا ضغطي مرتفع وقالوا تبقين معنا انتي ضغطك مرتفع ومافي مجال تطلعين
وماراح تطلعين من هنا الا وانتي والدده .. خلوني تحت الملاحظه وكانت مع قسم الولاده
انا منسدحه في السرير واسممع حريم تصرخ واقعد ارججف خوف ..
ركبولي جهاز ضغط الكتروني وكل دقيقه يشيك ..
عطوني دوا نزل لي الضغط ..
وقالولي لازم تججلسين عندنا ٢٤ ساعه نشوف تحليل الزلال عندك ..
ركبولي قسطرره للمره الثالثه وخلوها فيني لمدة ٢٤ ساعه
السبت الساعه ١٠ الصبح جاني الدكتور وقالي نتيجة البول فيك زلال كثيرر
الافضل ان احنا نولدك بطلق صناعي ..
استخرت وتوكلت على ربي ووافقنا

وجات الدكتوره تشيك وكل ماتدخل يدها اتقطع ألم ..
رحمي سميك ومافيني بوادر ولاده .. وسوت لي تحريض
وانا بكريه والله اني تعقددت من الحمل
شافت ان رحمي فاتح ١ سم بس وكل شوي تجي وحده تشيك
ركبولي تحميله طلق صناعي في المهبل ..
وبدى الألم يجيني ...
اشتغل مفعولها من اول تحميله ..
وقالت بنتركك ٢٤ ساعه لين ينفتح الرحم ونولدك طبيعي..
وتمرر الساعات وكل مره تدخل يدها يقيسون كم فاتح وولا فتح ويرجعون يركبون لي
تحميله طلق صناعي .. وكل ماتجيني طلققه اتعذبب
والله تعبت تعبت مع كل طلقه احاول امسكك نفسي واتنفس طريقة
شمي ورده وطفي شمعه واذكر ربي

كانت تفيدد والله الحمدلله ..

يوم الاحد الساعه ٧ ونص كذا نززلت مني السداده وموية الجنين
وجات تفحصني تحت وتقيس شافته فاتح بس ٣ سم ونززل مويه كثيرر
ركبولي اربع تحاميل طلق صناعي ..

وقالولي روحي امشي لغرفة الولاده ورحت امشي والممرضه ماسكتني
وانا دايخخه وميته .. هلكانه تعب .. وصايمه من يومين ماخلوني اكل شي ولا اشرب
كله عالمغذي .. واقولهم ارحموني نشف ريقي ابي ماي .. كانو يعطوني مع الدواء
ماي شوي ...
ورحت لغرفة الولاده وجات دكتورتي المسؤوله عني قالت مافي فايده الططفل بيختنق
وحنا تاركينك ٢٤ ساعه ولا فتح الا ٣ سم .. قالت نولدك قيصريه
وانا اقووولهم ابي ارتاح ريحوني وولدوني.

وقاموا الممرضات يلبسوني وحطوني بالسرير. والله يجزاها خير كانت خالتي معي طول الوقت
والله انها راحت تترجي الدكتوره تقول لهم بهذلتوها بالتحاميل ولدووها قيصريه البنت ماتتحمل
..
ودفوني لغرفة الولاده ..والغرفه باااررررده واقول لهم ابي بنج كامل قالولي لا انتي بحالتك
موضعي افضل .. وعطوني بنج واحسس برجليني بدت تنملل
وبدوا يشتغلون فيني .. وشوي الا يقولون لي مبروك وانا الف يمين يسار ابي اشوفها
واسمع صوتها ووروني ايااها وانا مومستوعبه اضحك ابكي ..
مبسووطه شفتها بخيرر ولله الحمد ..شعور الامومه شي جميلل..

قالت لي الدكتور انا ماسويت لك جرح كبير لان حجم بنوتك صغيره

ورحت للملاحظه مره ثانيه .. ولقيت زوجي وخالتي ينتظرون لي يباركون لي
ويهونون علي ...
وجلست هناك في الملاحظه لين توفر سرير في قسم التنويم .. كان المستشفى فلل
ومافي سرير ..
والممرضات ماقصروا معي متعاونات وطيبات مرره
يوم قدرت امشي قلت لهم ابي اشوف البنت ورحت شفتها
وكانت بالشيشه مركبين لها مغذي واكسجين ..

بعدها نقلوني للتنويم وكل اموري تمام
في المستشفى اللي تولد قيصريه تنام عندهم بس اربع ايام ..
انا ولدت صباح الاحد وراح اطلع الخميس..

كل اموري تمام وضغطي كان كويس مع الحبوب نازل .
بآخر ليله لي بالمستشفى يوم الاربعاء ارتفع الضغط فجأه بيوصل ٢٠٠
وكنت احسس بخفقان بقلبي بقوه..

جاو اسعفوني الممرضات والدكاتره وجابولي تخطيط قلب وتحاليل
ومع الادويه نزل ..
التحاليل وتخطيط القلب كل شي سليم
صباح الخميس كنت مبسوطه اني بطلع لكنهم فجعوني ورفضوا لان ضغطي مرتفع
واجلس عالأدويه وضغطي مو مستقر ينزل ويرتفع
زادوا جرعات الادويه اللي يعطوني وكل مره يجربون فيني دواء جديد لعل انه ينفع وينزل
الضغط ..
وظليت بحالت توتر ابيه ينزل .. يوم الجمعه قاسوه لي لقوه ١٤٠
هو ينزل لكن بطيء نزوله ..
وقالولي بنطلعك لكن تستمرين عالادويه والموالح ابتعدي عنها ..
قلت لهم ابشروا بس طلعوني اكتئبت من جو المستشفى وماانام
الا يادوب ساعتين او اقل .. كل شوي يجون يشيكون على الضغط
يديني وجععتني وللحين توجعني من كثر مايضغطون على يديني

وجهزت اغراضي على اني مستانسه بطلع بس جاووني مره ثانيه قالوا نبيك تجلسين
ليله بعدد بيجربون فيني دواء جديد وبيشوفون تأثيره علي ..
انصدممت وكتمتني العبره وقلت لهم مو متحمله بطلع
قالولي خلاص تطلعين على مسؤوليتك قلت عادي وعطوني اوقع

وقبل امشي رحت اشيك على بنتي وارضعها ..
توكلت على ربي وطلعت من المستشفى ..
بنتي رفضوا يطلعونها لانها كيلو ونص ..

وهذاني ماشيه عالأدويه وعندي مقياس الضغط ..
للحين مو مستقر ضغطي ..
احس اللي فيني شي نفسي .. تحاليلي كلها سليمه
ادعولي الله يشفيني يارب ويصرف عني المرض
وينزل ضغطي واشوف بنتي بين يديني قريبه ..


هذي تجربتي مع الولاده والله يسهل علليكم يارب ..