منتديات حوامل النسائية - تجمع الحوامل اللاتي سيلدن بشهر رجب 1432

بحاول احكي لكم عن يوم ولادتي قبل لا يجلس ولدي

يوم الجمعة كانت الأمور جدا طبيعية مافي الم ولا شي وليلة السبت كنت اقول لزوجي في احتمال اولد بكرة << كل اسبوع من دخلت التاسع وانا اعيد نفس الجملة لأن نفسي اولد في ويك اند و زوجي يكون جنبي

نمت وعلى الساعة 3 جاني مغص خفيف بدا يروح ويجي كملت نومي قلت اكيد طلوق كاذبة و ما اهتميت لكن بعد نص ساعة بدا الألم يزيد شوي هنا قلت يمكن انها ولادة خل اسوي اللي يزيد الطلق لو كان حقيقي ، قمت واكلت تمر وشربت زنجبيل بالحليب و بعدها اخذت دش دااااافي و طولت شوي بعدها صليت الفجر و كان الألم اخف من قبل

رجعت انام وقلت شكله ما عندي سالفة إلا بذاك المغص اللي مسكني شوي وراح و من وقتها ما تركتني الآلآم تروووح و تجي ولما صارت 5 ونص جلست زوجي وقلت له انا تعبانه ابي اروح المستشفى ، قال يمكن مو ولادة !
قلت معليش بس ابي اتطمن و سبحان الله كان حاسني قلبي اني خلاص اذا رحت المستشفى راح اولد .

المهم قام زوجي تجهز واتصل على المستشفى ، قالت له الطبيبة خلها تنتظر لين تقرب الآلآم و تكون التغلصات طويلة و انتظرت والألم يقوى ويقوى وكل ما جاتني طلقة اوقف ما اقدر اسوي شي وطول الوقت نفسي اروح الحمام وانتم بكرامة لكن ما كان في شي لما صارت الساعة 7 رحت الحمام ثانية و شفت دم في الكلوت هنا خلاص عرفت انها ولادة طلعت لزوجي وقلت يلا على المستشفى ما راح اصبر اكثر وفعلا رحنا على 8 دخلوني غرفة و حطوا علي تخطيط النبض للبيبي لمدة ساعة كاملة وكان في طلق قالوا انه طلق ولادة
وجات الطبيبة تكشف علي من تحت وقالت مفتوح 3 سم انا رغم الألم طرت من الفرح قلت اخيرا بولد مليت

قالوا لي كل ساعة راح يفتح 1 سم زيادة عطاني زوجي قرآن وقرأت سورة مريم وسورة الزلزلة واستغفرت ربي ودعيت لكل اللي خطروا على بالي ودعيت لكل محرومةولا نسيت حبيباتي حوامل رجب بالخصوص

لما صارت الساعة 2 زادت الآلآم بقووووووة لأن الماي انفك وكان ينزل دفعات وكل ما نزل زاد الألم و عطوني جهاز وقالوا لي كل ما زاد الألم اشفطي و يخف كنت اسوي مثل ما يقولون في البداية كان يفيد و يخف الألم و احس بدوخة لما آخذه لكن لما زاد الألم ما عاد يسوي شي اهو وعدمه
وعلى فكرة زوجي دخل معاي غرفة الولادة لكن كان عند راسي امنته ما يشوف شي وكان عند كلمته والله انه شجعني و رفع معنوياتي لأن القابلة كانت قليلة صبر و كانت تعصب لما اصرخ من الألم صراحة صادقين روز و سموة ما قدرت اكون صبورة اذا جات الطلقة ابدأ اصرخ وبس تروح يغمى علي ما احس بشي

الساعة 3 قالوا لي مفتوح 9 سم ما شاء الله ما باقي شي هنا انا كل ما جاتني الطلقة من الألم صرت اهذي و وصيت زوجي على ولدي لأني توقعت اموت وكان متأثر بقوة ظل ماسك يدي ويقول لي انتي اللي بتربينه hwaml13

الساعة 4 إلا ثلث الرحم فتح 10 سم قالت لي كل ما جاك الم ادفعي تعذبت وانا ادفع وخلاص مافي طاقة كفاية بعد 3 دفعات قالت لي تبين تلمسين راسه hwaml03 قلت لها لاااااااا ابي اولد خلصيني الله يخليك
على فكرة كانت القابلة انغليزية وانا اشوي اقولها بالعربي واشوي بالأنغليز خخخ اقول لها بالعربي ابي اخلص ابي اخلص بليز الله يخليك خخخخ واهي تطالعني مستغربة بعد 3 دفعات ثانية قالت لي خلاص طلع hwaml7
هنا انا ما استوعبت اني ولدت الا لما شفته قمت ابكي واحمد الله و طالعت زوجي الا الدموع في عيونه <<< سوينا فلم هندي ههههههه والحمد لله لما حضنت ولدي راااااح كل التعب والألم وانولدت من جديد
بعدها جات الطبيبة و عطتني ابرة بنج من تحت وخيطتني وبعدها طلعوني فوق للجناح و معاي ولدي في حضني
ورب البيت احساس مو طبيعي حسيت فيه لما حضنت ولدي ربي يخليه ولا يحرمكم ضمة اولادكم ويرزقكم ولادة سسهلة ولا تشوفون اللي شفته ياااارب

انا عارفه مررررة طولت بس انتوا قلتوا تبونها بالتفصيل hwaml13
و توتة توتة خلصت الحتوتة وحمودي نايم في سلام بعد ما سويت له مساج لبى قلبه *