منتديات حوامل النسائية

منتديات حوامل النسائية (https://naqatube.com/index.php)
-   ملتقى عضوات حوامل (https://naqatube.com/forumdisplay.php?f=69)
-   -   حبيباتى سيدات ليبيا تفضلو لأعرف ما حالكم (https://naqatube.com/showthread.php?t=262918)

أم أجنادين 80 11-05-2013 10:28 PM

رد: حبيباتى سيدات ليبيا تفضلو لأعرف ما حالكم
 
صباح الخير

ايه تفكرته بس مانديروش فيها في حشوش اهلي نهائي

بس في حوش خوالي مرة مرة لو خاطرهم فيها

بس في راس السنة مانتفكرش درناها


لااااا مش حلوة سوسو في حفلة تلبسي بنطلون


اوشي 11-05-2013 10:28 PM

رد: حبيباتى سيدات ليبيا تفضلو لأعرف ما حالكم
 
ســـــــــــــــــــــــــوما ليـــــــبــــــــــيـــــــــــا

آنستينا ونورتينا وينك ووين اراضيك ياحلوة

تعالي قولينا وين اختفيتي واحكيلنا علي اخبارك

يارب تكون امورك كلها تمام

تعالي ومااديريهاش زعلة

نستنى فيك

أم أجنادين 80 11-05-2013 10:29 PM

رد: حبيباتى سيدات ليبيا تفضلو لأعرف ما حالكم
 
الرد اللي فات كتبته قبل مانكلم ماما

وكان عندي هلبة ردود علي استفسارات البنات

بس توه معادش خاطري

مش عارفة كيف بنصبر في هالغربة

والله بدموعي وانا نكتب

اوشي 11-05-2013 10:30 PM

رد: حبيباتى سيدات ليبيا تفضلو لأعرف ما حالكم
 
هلا سوسو وجنودة اخباركم ياحلوات

توة بنحكيلكم عالعرس من اول ماجيت لحوش هلي

انتظروني بنكتب

أم أجنادين 80 11-05-2013 10:31 PM

رد: حبيباتى سيدات ليبيا تفضلو لأعرف ما حالكم
 
ادعـــــــــــــولي يابنات

ربي يرزقني ونحمل

كل مانحس روحي فرحت نتفكر الموضوع هدا نتنكد

والله معادش فيها العمر يجري والسنة اللي تفوت تفوت

مش حسد ولاشي والله مش حسد

بس عارفة انها نصيبات من ربي وامتحانات

حتي نتمني نكون ام

تتفكروا بنت عمتي اللي تزوجت في نهاية 9 حامل

والله ماحسدتها بس تفكرت روحي

أم أجنادين 80 11-05-2013 10:34 PM

رد: حبيباتى سيدات ليبيا تفضلو لأعرف ما حالكم
 
الدراسة لخبطتني وخدت وقتي كله

والكل يقول ماتنسيش روحي وتقعدي تقري بس خالاتي وماما

انا عارفة بس شن بندير اندير جوانح ونطير او شنووو

راجلي يقرا الصبح من 7 ونص يطلع وانا نمشي 12

ونروح 5 ونص وتوا مع تغييرة الوقت نروح في الظلام

امته بنمشي للدكتورة والله مش عارفة حتي وين نمشي

وزيادة اللي تحرق لما نكلم اي شخص غير خالاتي وامي اول مايسال علي حالي يقولوا

شني مشيتي عالجتي

انا ماعمري سالتهم اسئلة شخصية زي هدي ليش هما يفكروا فيا او شنوووو

أم أجنادين 80 11-05-2013 10:35 PM

رد: حبيباتى سيدات ليبيا تفضلو لأعرف ما حالكم
 
انا جاية للقراية مش للعلاج

جوهرة ليبيا 11-05-2013 10:38 PM

رد: حبيباتى سيدات ليبيا تفضلو لأعرف ما حالكم
 
جنوده ياغاليه ربي يرزقك الذريه الصالحه عااااااااااااجل غير آجل ياااااااارب العالمين

وشوفي دكاتره كويسين في امريكا لو حابه وربي يكتبلك اللي فيه الخير

اوشي 11-05-2013 10:57 PM

رد: حبيباتى سيدات ليبيا تفضلو لأعرف ما حالكم
 
مشيت لطبرق الثلاثاء الصبح

تغدينا في طبرق وبعد الغدا بدينا في تجهيز التطريفة

لبست الاولاد وجهزتهم

وجهزت نفسي لبست لبسة عادية قونة وسديري كحلي مع بدي بيج في بحري في كحلي

وبدو الصبايا يجن عالمغرب

بدينا بالتقديم مشروب راني عنب مع جواهر وبعدها كابتشينو مع معمول ايهبل ايهبل دايرته اختي

ومقروض صقوعي بكل دايرته اختي الثانية

وبعده قدمنا العشاء كسكسو بالتقلية وشربة وسلاطة عربية وامسير وشاورما دجااج وبيتزا ومشروب

وبعد الشاهي وطقوسه طلعنا الكسوة والذهب وريناهم للحضور مع رقيص وشطيح والجو كان ايهبل

والرجال كانو في المزرعة بنو فيها خيمة وخذو العشا امتاعهم غادي لانهم جايبين فرقة الفنان رمضان ونيس

يعني اللي في الحوش كان نساوين بس

وبهذا انتهي يوم التطريفة

اليوم الثاني الاربعاء كان السياق ..

اللي هو انودو فيه الحوالة والشبيزة لهل العروس

مشن خمس سيارات فجعة .. فجاعي هههههههههههه فجعناهم وجينا

مافيش حاجة اتسميها علي فمك الا وشلناها مع اربع ثنيان يعني الخرفان اللي قريب يقعدو كباش

ومشينا في السيارات انا وخواتي كلهم الا وحدة وعماتي 2 وبنت عمتي

ودرنا جو في حوش هل العروس وجينا

وذبح باتي ودرنا عشانا ارز

وجا يوم الخميس لبست الفستان الليليكي اللي قلت لكم عليه والمكياج والتسريحة كانو بسيطات لاني

كنت بنوري الكسوة لهل العروس

مشينا رمينا عليها وحنيناها وجبناها ... والعروس ماشاء الله تبارك الرحمن اية من خلق الرحمن اللهم بارك

وخذيناها لحوشنا وصفقنا ودربكنا عليها شوية بعدها خذها العريس لشقتهم

وجا يوم عزومتنا اللي هو يوم الجمعة

كان الرجال اكثر عدد من النساء وقدمنا للرجال نفس ما قدمنا للنساوين

نحكيلكم شن حطينا علي كل طاولة

ترمس شاهي وبيتزا وطبق كنافة وبكلاوة وعصير اورجنال وسيزر ومشروب واطباق كبيرة موز وتفاح فاخر

وقدمنا العشا رز الخلطة وكبة ونوع موالح طالع جديد مانعرفش مع لحم وعصبان

وبالنسبة للخلوط او كان القالب فضي مربع من تحت ومن فوق ضسق اشوية ومربوط بنسترو ابيض

ويحتوي على مكسرات وطرف شكلاطة مارس وباكوماستكة كبير مع منديل معطر وباكو عطر

وطبعا البنات دارو جو ورقصو وشطحو

وانا لبست العبروق كامل لونه نبيتي جا علي ايهبل

لما خشيت القاعة وبدون غرور الكل قعد ايبهت فيا زطلت عالعروس خخخخخ

والحمد لله تم العرس علي خير بدون اي خزعبلات

وتعبت تعب لين كرعي مازالو يوجعو فيا لتوة

وتوتة توتة خلصت الحدوتة

sosolibya 11-06-2013 12:02 AM

رد: حبيباتى سيدات ليبيا تفضلو لأعرف ما حالكم
 
كيف حالك أوشي غير عدلي علينا

عرسكم ماشاء الله حلوووو

ب أكيد فيه إستفسارات

....؟؟؟؟؟؟؟؟.......

ماهو العبروق؟؟

ماهو اللون النبيتي؟؟؟

لماذا العزومة بعد العرس ؟؟؟

كيف العروس حنتوها يوم الحفلةوجبتوها معاكم؟؟؟

هل العروس تحضر معاكم يوم العزومة وشن تلبس؟؟

أخيييييييرا كم عمر العروسة


ههههههههههههههههه سامحيني كثرت عليك ألأسئلة بس نحب نعرف عادات أهل بلادي..


الساعة الآن 12:57 AM.

Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)

Privacy Policy - copyright

لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .