|
رد: ديوانية البحرين - دردشة حوامل البحرين - البحرينيات
اقروا موضوعي الي في الهامش تحت الصورة
|
رد: ديوانية البحرين - دردشة حوامل البحرين - البحرينيات
صباح الخير حنوون ليش لا يمكن تولدين قبلي لو ما تبغين تولدين هااااااااااااااه تخافين شكلش خخخخخخ بس اسمعي اني بنتي ما ابغيها تنتظر وايد لان من دخلت التاسع واكو معتفسه حالتي امبارح قعدت ارجع حدي يطلع كانه شلال ولا أحد معاي في البيت وراسي يدور زين ما طحت ما رجع زوجي الا اني كلش مخلصه قوتي واكو اليوم من الصبح بعد نفس الشي احس نفسي تقلب حتى الريوق ما أكلت شي أخاف أكل وبعدين ارد ارجع الناس تتنسى في بدايه الحمل اني بدايه ونهاية الحمل حتى لحبوب ما تفيد hwaml15 بنت الأياويد ما قلت ليش بتولدين هالسبوع بأذن الله اني قلت لبنتش انها تطلع خلال هالسبوع وهي لانها حلوه راح تطاوع كلامي يالله هانت اي اقول بنات اني جهزت شنطتي بس احس ان ناقصنيي كم قماط قماش خفيف لاني عندي ثقيل بس اذا ولدت بهالجو بعد احتاج تحت خفيف وين احصل جاهز سوق واقف عندهم وشنو اسم المحلات ممممممم اي واحمل معاي في الشنطة مناديل بيبي جونسن او لا hwaml5 طف طف عادي ان ينزل ماي لان انتين تتعبين وايد حاولي تقللين الحركة مو زين ليش علشان لا تنزل البشيمه حاسبي اني من يومين نزل ماي اخضر قطعة بس ما اهتميت لان موعدي يوم السبت في الخاص وما بقول اليها لا تقعد تحاوس فيني خليها على السونار من البطن احسن وان شاء الله كل شي زين تقول |
رد: ديوانية البحرين - دردشة حوامل البحرين - البحرينيات
مأجوريين وصبحكم الله بالخير والنور
البارحة مارحت أتسمع ولا شي ،رحت المستشفى الخاص لأني ماأقدر أتحمل من الغازات وكأنه صولات وجولات في بطني من الغازات وألم حااد منها وماقدر أقوم ولا أتحرك ولاأنقلب على السرير ،وزاد الطين بله هالزكام والكحه وإلتهاب الحلق ناااااقصة الدكتورة إستغربت من غازاتي إللي ذابحتني وعطتني حبوب مصاص عن الغازات حبتين كل 8 ساعات ومن جنوني قمت البارحة وشربتهم بالماي بدل ماأمصهم وقمت أوسوس أقول بل شربتهم دفعه وحدة بدل ماأمصهم مع إن طعمهم سكري وقاموا خواتي يضحكون ،وعطتني حق الزكام فيتامين سي الفوار بعد 3 مرات في اليوم وأكياس مسحوق للإمساك لمدة شهر مابشربهم وبعد مضاد الهستامين مرة وحدة في اليوم مابشربهم مكتوب عليهم ممنوع تاخذه الحامل إلا بستشارة يعني يخوف شوي وبعد كالترات (كالسيوم )وملتي بيتامين والله وحده الشافي المعافي تعالوا ،ويش هالبرد والغبار الكل يكحكح من أولادي وإللي حلقه يعورة واليوم عزاء بوقوة لازم يروحون |
رد: ديوانية البحرين - دردشة حوامل البحرين - البحرينيات
مافيي شده أدور على ردودكم
شمس الصباح هانت قربت ساعة الصفر وبتجي ريحانة بيتكم وبتاخذ الدلاعه كلها منش ولا بتخلي لش شي وبتاخذ قلب أبوها ربي يجيبها بالسلامه على طاري المرسم الحسيني فرشة القاسم (ع) اليوم بيشيلونها لأنه خلاص يوم الثامن إنقضى وبتجي المأساة الكبيرة فهم يقولون موعدله يخلون الفرشة والزينه ومادري ويش بيسوون يمكن يحطون عليها سواد أو شي وشوفي صورتها في منتدى الديرة صور المرسم على طاري القماطات الخفيفه روحي سوق واقف (أحلى الأطفال) فيه أشياء واايد من خياطتهم أو( جنة الرياحين) في الديه وبالتوفيق وزيين حطي في الشنطه مناديل جونسون مهم لتنظيف الطفلة بعد الحفاظات وهي مكانها يعني بتصيرين توش والده وتعبانه شوي وهي صغيرة على شيلها للحمام حنين الماضي إنتين أولدي ولين جه الولد الحلو ،تعالي بيتنه بعلمش الخطابه هههههه إسم علي حلو على إسم ولدي الكبير وميثم حلو مو مكرر واايد طفلي حياتي ريحي روحش خيوو ،ولا تتحركيين وايد يمكن عندش إلتهاب راجعي الدكتورة ورفعي رجايلش وإذا رطوبة شوي عاادية بس دائما ريحي وإنبطحي ربي يتمم لش بنت الأياويد ربي يقومش بالسلامه فلونة والفتاة الذهبيه وحبيبة حسوني وأم أمل وأم السادة وروز سول وأم خليل ومن بعد يارب كلكم بخير بسألكم عن التصوير الرباعي من أحسن وحدة تعرف تسوي وبكم يسوونه وأي إسبوع ودكتورة حكيمه إللي في رويان زينه لأنها قريبه يارب تتيسر جميع أمورنه يارب |
رد: ديوانية البحرين - دردشة حوامل البحرين - البحرينيات
مشكورة شموسة حبيبتي على ردج ، مسوية لي دلة دارسين اشرب منها حاليا فيني الم تحت بطني وريولي واحس بطني صاير يابس متشطن يعورني الله ايسر لي ولكم يارب
|
رد: ديوانية البحرين - دردشة حوامل البحرين - البحرينيات
شمس اعتقد انج ضروري تروحين المستشفى اذا نزل منج ماي اخضر روحي تطمني احسن لان انا جنه سمعت من قبل ان خطر على البيبي وان شاء الله مافيج الا العافيه بس الافضل تطمنين واطمنينا وياج
|
رد: ديوانية البحرين - دردشة حوامل البحرين - البحرينيات
مررحباا.. مأجوورين
بنت الاياويد .. الله يسهلها عليج وتولدين في هالاجازة علشان ترتاحين مع شيوخ جمن يوم زود... سوي لج زعفران مع عسل غليهم في ماي وشربيه ولا تكثرين من الدارسين وايد .. لانه اختي يوم فيها الطلق وصت علينا الدكتورة ما نعطيها دارسين وايد لانه خطير شوي مابي اخرعج بس ما يندرى كلام هالدكاترة وين يوصلنا .. امي تقول احنا من زمان نشرب دارسين ونولد مافينا شي طفلووو.. عن الدلع عاددhwaml02 كلنا نحس برطوبة ونجوف افرازات انواع واشكال وحاقرين الموضوع .. انتي ويا تقدم الشهور بتجوفين اشياء وايد لا تحطين دوبج ودوب ادنات الشي بتعبين وايد والافرازات نهاية الاشهر طبيعية .. ماعليج شر حبوبة شمووس .. شخبار تجهيزاتج حق الولادة؟؟ برزتي توزيعاتج والله لسه .. نبي نجوف عاد علشان نبوق فكرتج وما اتعب روحي وايد وانا ادور شرايج فيني :P انا باقيلي وايد اشياء بس عقب شهر محرم ان شاء الله اذا الله يسر لي .. للحين ما وصيت على مهادات ولا شنطة وسلة بعد وانا ماخذيت لي شي غير الملابس الداخلية حنوون .. شلون تقولون ميثم سمعيني يلا hwaml02 انا وسي السيد للحين ماتفقنا على اسم كل يوم يغير رايه ولا ادري للحين شفيني ,, شكله حزة الولادة بيختار على كيفه وانا ياغافلين لكم الله احلاام ام .. نحن هناا بس روحة الماتم وشغل البيت يضيع اليووم كله وما ايي الليل من التعب اقط روحي ولا احس بشي.. واليوم يا كافي الشر جفت حادث يم مدرسة السياقة وكان وايد خطير.. الصبي مسكين كانو ينعشونه وصورته للحين في بالي وراسي يعورني الله يكتب له عمر ان شاء الله والباقي الي سقط سهوا سامحووني |
رد: ديوانية البحرين - دردشة حوامل البحرين - البحرينيات
مسكين توفى الصبي .. قلبي عوررني .. بحثت عن الخبر في الوسط اونلاين وجفته
الله يررحمه ويغفر الله .. |
رد: ديوانية البحرين - دردشة حوامل البحرين - البحرينيات
لا تنسوا يا بنات للى تقدر صيام بكرة الاربعاء تاسوعاء 9 محرم والخميس عاشوراء 10 محرم
|
رد: ديوانية البحرين - دردشة حوامل البحرين - البحرينيات
السلاااااااام
توني جايه من الماتم قلت ادخل ما دام صحتي تمام احلام ام ما تشوفين شر وحاولي ان تبتعدين عن الأشياء اللي تسبب الغازات والله يسر ليش والشهور تطوف وتقر عينش بفرحان او فرحانه ..اي تعالي ما قلتين ما قالو ليش وش فيش بنت لو صبي hwaml03 وعلى طاري السفرة اسمع ولدي يقول انهم وزعو الحلاوة بس بشوف الصورة في منتدي بعد العشرة بروح بشوف القماطات باخذ لي كم واحد واكو حطيت في الشنطة مناديل جونسون بنت الأياويد اني نزل علي ماي اخضر بس كلش قليل من جدي ما اهتميت ويوم السبت عندي موعدي بشوف شنو تقول الدكتورة لا تحاتيني لاني اني بروحي احاتيش جننت اليوم زوجي اقول اليه وحده بتولد من ربعي في المنتدى ما ادري شنو اخبارها يقول روحي شوفي قلت اليه تعبانه ما اقدر اتحرك اي على طاري الم البطن والريول اني اليوم جدي بطني واريولي وراسي وظهري بس رحت نقعت جسمي في بانيو ماي ساخن واختفت الألم الحمد لله فلونة التوزيعات جهرتها من زمان سويتها بروحي بقول ليش الفكرة اخذت علب قلوب وحطيت فيها ورد مجفف وشريت بعد عطور وسويت بطاقات بأسم ملاك ولصقتها على العطور وحطيتها داخل القلب وسويت بعد شعر خاص باسمي واسم الأب واخوانها وملاك وطبعتهم على ورق فضي وربطتهم بشريط فضي ولصقته على القلب وبخصوص الأستاند كان عندي صندوق قديم مبيت قمت وغلفته بقماش وورد ودبدوب بس حاليا بحاول اشتغل على استاند ثاني بسوي شجرة اكو حطيتها من يومين في الشمس وبعدين بصبغها بالفضي وبعلق عليها القلوب ان شاء الله تنجح الفكرة بحاول انزل صور للصندوق |
| الساعة الآن 09:55 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .