|
رد: تجمع حوامل سوريا-دردشة ورود سوريا-دردشة الغاليات
ام يويو الله يخليلك هل قمر ويحرسو انشالله علا طول ضحكان ماشالله ولا قوة الا بالله انشالله بتكون كل حياتو ضحك خليلي عينو علا هل دمات ما احلاهن الله يحميه
|
رد: تجمع حوامل سوريا-دردشة ورود سوريا-دردشة الغاليات
مرحبا كيفكون اشتقنالكون انا ورنوشة
جوري تسلمي لقلبي على ردك كلك زوء والله كنت خيفانة انو بس انا هيك عبصير معي ان شاء الله تقوم امك بالسلامة ويارب يطعمكون مراد قلبكون وتفرحو باخ اذا مو بهالبطن بلكي ان شاء الله البطن يلي جاي |
رد: تجمع حوامل سوريا-دردشة ورود سوريا-دردشة الغاليات
يسعدلي مساكي هدوله شلونك اشتقتلك كتيير
بس بتعرفي هالظروف اللي بسوريا ووضع اهلنا هونيك ما عم يخلينا نفس لشي الله يفرجها انتي كيفك وكيف الحمل ان شاء الله مو حاسه بتقل الله يقومك بالسلامه |
رد: تجمع حوامل سوريا-دردشة ورود سوريا-دردشة الغاليات
يبعتلك الهنا هدوله
عم راسلك عالخاص بس بريدك البركه ملياااان وماعم يستقيل رسايل جديده |
رد: تجمع حوامل سوريا-دردشة ورود سوريا-دردشة الغاليات
السلام عليكم كيفكن ياورود سوريا الحبيبات انا جديدي بيناتكن وكتير فرحت واتفائلت لما شفت هالتجمع
وحابي كون معكن دائما كلكن دخلتوا لقلبي الله يحمي اهالينا بسوريا ويبعد عنهن الشبيحة الظالمين ويحمينا ويجمعنا باهلينا عن قريب آميين يارب رح عرفكن على حالي احم احم اسمي منار من ريف ادلب عمري ٢٤ متزوجي من سنة وثلاث شهور عم ادرس سنة تالتي حقوق بحلب ساكني بامريكا والحمدلله حامل بالشهر الاول هاد تاني حمل الي الله يثبتو ويرزقني ولد بخلقة سليمي وتامي امنو معي آميين لاني حملي الاول سقط بئى ياريت ياحلوين تأبلوني بيناتكن ونصير باذن الله اخوات |
رد: تجمع حوامل سوريا-دردشة ورود سوريا-دردشة الغاليات
اقتباس:
ههههههههههههههههههههههههه تسلمي لقلبي ياعسولة والله حتى لو نسيتي مستحيل اعتب عليكي أو على أي وحدة فيكون نحن هون خوات ومستحيل فكر أني أزعل منكم ياقلبي والله يبارك فيكي يارب آمين الله يسمع منك الله يخليلك كرومة يارب وتشوفيه عريس وتفرحي فيه ويكون من الصالحين يارب سؤال كيف كانت ولادتك ؟؟ إن شاء الله كانت سهلة ياقلبي وطهرتي كرومة ولا لسا ؟؟ وشو من شآن سرتوا طبت ولا لسا ؟؟ كونوا بخير بوساتي لكرومة وإلك |
رد: تجمع حوامل سوريا-دردشة ورود سوريا-دردشة الغاليات
اقتباس:
ماشاء الله تبارك الرحمن الله يحميها يارب لاحول ولا قوة إلا بالله العلي العظيم اسم الله عليها الله يخليلك ياها يارب ويحفظها ويحرسها من العين بسم الله عليها آمانة حصنيها كل يوم حبيبتي كيف فيني اتواصل معك بتحبي ع الهوتميل ، سكاي بي ، الواتس آب ، الجوال كيف مابدك طبعا" إذا بتحبي وماعندك مانع بوساتي للاميرة جود ولام جود |
رد: تجمع حوامل سوريا-دردشة ورود سوريا-دردشة الغاليات
السلام عليكم
أصبحنا وأصبح الملك لله كيفكم ياعسولات ؟؟ وكيف الاولاد ؟؟ يارب تكونوا بخير وبوساتي إلكم وللأولاد اشتقتلكم كتير كتير وملاك ومالك بيسلموا عليكم آآآآآآخر أخباري:هههههه حسيت حالي حدا مهم بهل جملة عسولات أمبارح رحت ع الدكتورة من شآن الله يكرمكم (البواسير) وع اساس كانت راح تحدد إذا راح أعمل عملية جراحية إلهم ولا ممكن نعالجهم بالكوي المهم ياعسولات صدمتني وقالتلي لازم أستمر ع العلاج(10أيام كمان) لحتى يبين لاني الوضع بعدو متأزم كتير وبصراحة عم موت موت من آلمهم والله ماعم ارتاح لا بقعدتي ولا بنومتي ولا شي وصرت خاف من كتر ما اخدت ابر وادوية من وقت ولادتي لهلق وعم اضغط ع حالي واتحمل الالم من شآن ما أخد الابر شو اعمل مالي عرفانة الحمدلله ع كل حال آمانة اذا اي وحدة بتعرف اي شي ممكن يخفف من الالم تقلي وتنصحني أي واليوم ع الاغلب عندي عزيمة جايين بيت رفيق أبو مالك من مصر كانوا بزيارة فقرر يجيبهم يغديهم عنا وبعدين يوصلهم ع بيتهم وبدوا يجيب الغدا جاهز بس هلق بدي اشطف البيت ورتبوا وامسح الغبرا وحتى عم فكر أخد أبرة مسكن وقت صلاة الظهر شآن قوم قدامهم عادي وماحسسهم أني موجوعة شو رايكم |
رد: تجمع حوامل سوريا-دردشة ورود سوريا-دردشة الغاليات
طريقة الشاورما لعيون ام ملوكة الغاااااااالية ان شاء الله تعجبك
الطريقة صحن صدور دجاج مقطع شرائح طويلة ورفيعة علبة زبادي وشوية خل ابيض او تفاح اختياري بس انا حطيت ابيض فلفل اسود وملح وليمونة وشوية فلفل احمر ناعم و2فص ثوم مدقوق وزيت زيتون وكزبرة يابسة وبصلة مخلوطة مع التوم ناعم جدا جدا يعني خلي يطلع منها الماي وضيفي كل التوابل وانقعي فيهن الجاج وخليها اقل شي ساعتين ولو سويتيها من الليل والصبح طبختيها احسن هلئ جيبي مقلة وحطي شوية زيت مع شوية زبدة واحمسي الشاورما فيها يعني كبي الجاج مع الصلصة المنقوع فيها فوق الزيت بعدين غطي وخلي لحد مايشرب المي تبعه طبعا مع التقليب المستمر بين فترة وفترة وماحياخد وقت تقريبا 10او15دقيقة بس ينشف طفي علية الغاز وطبعا بنكون محضرين عجينة الخبز الي هي 3كاسات دقيق وملعقة ونص سكر وبيضة ورشة ملح وملعقة كبيرة خميرة ونص كوب زيت وكوب ماي دافي حسب الحاجة يمكن تحتاجي اقل من كوب اخلطي جميع المقادير بيديك او بالعجانة لحد ماتتماسك وتصير ناعمة وغطيها وخمريها لمدة ربع ساعة بعدين قطعيها كور بحجم البيضة وافرديها بنشابة بشكل دائري واخبزيه بمقلة تيفال او صاج سوي الخبز وكل ماتخلصي وحدة حطيها بحافظة الحرارة مشان تبقى طرية هلئ طريقة الصلصة التومية بتحطي بالخلاط بيضة وفص توم وربع كاسة الشاي خل ورشة ملح وشغلي عليهم الخلاط وخلي يخلطو منيح منيح وانتي مشغلة الخلاط لاتطفيه جيبي كاسة زيت وكبي عليهن متل الخيط ياريت اكون وصلت المعلومة صح لاتطفي الخلاط خلي سرسوب الزيت فوق الخلاط رح تلاحظي انو صار نفس الكريم رح تحتاجي تقريبا تلات ارباع كاسة الزيت اوكي وبس يصير كريمة التوم جاهزة حطي شوية بصحن وضيفيلهن شوية طحينية وجهزي بندورة شرايح وخس شرايح ومخلل خيار شرايح وجيبي الخبز حطي الصوص والجاج والسلطة ولفي بقصدير وسوي جنبه بطاط شيبس عليكم بالعافية اي سؤال انا حاضرة ونسيت اقولك ضيفي لصوص التومية بشر ليمونة تطعي نكهة خطيرة |
رد: تجمع حوامل سوريا-دردشة ورود سوريا-دردشة الغاليات
بسبوسة اهلا وسهلا فيكي
نورتي وانت متل اخواتنا كلنا مغتربين انا اسراء من ريف الشام عمري 23 متزوجة من سنتين وشوي عندي بنوتة عمرا 4 شهور ونص متغربة بالسعودية واهلي الله يحمين كلن بالشام اهلا وسهلا فيكي والله يثبت حملك يارب اهلك معك باميركا ولا لحالك مافي حدا هنيك |
| الساعة الآن 09:40 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .