منتديات حوامل النسائية - تجمع حوامل ليبيا

هي خلي انديرو زي عيوووون .. ماري ولا تكون حسووووووود ...
قصة ولادتي بسرورة .. هذا ياحنة انتي واياها عمتك سورينام وصلت للتاسع بلا مشاكل تذكر والوضع طبيعي وكل يوم مشي وماخليت وين مشيت عالبحر حفيانة .. في الفروسية .. عالرملة .. عالكورنيش .. في حوازة .. لمهم في كل مكان .. زعميتي فالحة .. وكان موعدي يوم 29-4-2009 وقبل ختى ميوصل الموعد والمحيطين بيا كلهم حسسوني اني معطلة .. والناس اللي يسلو مازال ما جبتييييييييش .. وعزوزتي اللي تاخذ وتكركرلي في لوصفات وترصلي .. وأمي تقوللي ابصر شن شايفة .. وجرتي جابتلي القديد والا ابصر شنو .. لمهم دارو حالة والموعد مازال ماجااااش تخيلو .. وجي الموغد وفات يوم و2 وقفي اليوم الثالث الصبح لقيت نقطة دم في الاندروير وكان عندي مراجعة في الأمل .. عند د.عبدالحكيم ودارلي جهاز وقاللي وضع البيبي كوبس ولمية تمام والراس نااااازل وقربتي وزيدي اتمشي .. وياحليلي من المشي عيييييت روحنا الساعة 1 الضهر لقيت جارتي قدام الباب تستنى فيا وهيا قصقاااصة احرف منكم هههههههههه لكن والله نحبها هيا في عمر امي وديما تسال عليا مسكينة .. قاتلي شن صار قتلها واحد نقز واحد طار ههههه المهم بعتتلي قديد قاتلي اينحي الشوفة .. خشيت جاعااااااااااااااااانة اتغدينا سندويتشاااات وطول عالنوم والقر قر على قولة عيوون .. الراجل قالوله ان الجنس ايساعد على الولادة ماصدق هههههههههههه بدي كل شوي وهو .....

سورينام

12-03-2010 02:35 AM

رد: تجمع حوامل ليبيا

المهم رقدنا للساعة 5 العصر جت عزوزتي جايبتلي عشبة كف مريم وقتلي نقعيها واشربيها تفتح الرحم .. نقعنا وشربنا .. والساعة 9 في الليل طلعنا اني وراجلي بنوصلو عزوزتي وعندي ورقة اجازة بنرفعها لصاحبتي للعمل .. وبعدين مشينا لطريق الشط ومشي مشي مشي لين ركابي انهدو .. وتعشينا كباب لين طلع من خشومي وروحنا وقعدت عالنت للساعة 2 ومرة مرة نحس في نخصة في ضهري ونقول لراجلي شكلي بنعملهالك الليلة هههههههه ويقولي يااااريت وبعدين خشيت للحمام اكرمكم الله لقيت نقطة دم ثانية في الاندروير وطلعت قلت لراجلي قاللي نقطة الصبح ونقطة توا معناها قربت هي خشي خلي نعاونك وهو قصده قر قر قر ههههههه على اساس يخدم فيا بس ماخاطراش هههههه وبعدها خلااااااص جيت بنرقد معاش قدرت زادت النخصة اللي في ضهري ومعاش قدرت نتحركوالساعة 3 في الليل اندور في لشقة وندعي ونبكي وحالتي حااالة والراجل وراي ويقوللي ماتخافيييييش ... ايه بالله اللي رجله في النار مش زي اللي رجله في المية ........

سورينام

12-03-2010 02:36 AM

رد: تجمع حوامل ليبيا

وبعدها لبس حوايجه وقاللي خللي نمشو للمستشفي ايشوفوك واني بكرة مانعرفش ان الولادة بادية ونقوله لا لا لا مانبيش نمشي مازال غير بمرمدوني وخلاص .. طلع بيولع السيارة معدلش عليا .. هو طلع من بحداي واني جتني نخصة قوووووووووية زي السم لين عيطت ونزل مني حاشاكم رجروجة دم وجي راجلي يجري ويقولي هيا نمشو واني انقوله لا لين اندوش كخخخخخ رايقة الاخت .. وقت دوش هو .. طلعلي قفطان من الدولاب ولبسهولي واني نعيط من الخوف لان الوجع مازال .. وجبنا طالعين واللية اتولي وووووووووووووووووك .. شديت فيه وانقوله نبي أميييييييييييييييي ياكبدي مانحساب روحي جبانة هكي معاش عرف كيف ايطلعني بدي ايقولي هي نرفعك لأمك وهو بيرفعني للمستشفى.. والله تو لما نهدرزو عا لموضوع ديما نقوله انشاالله تسامحني ياغالي والله رعشته.. المهم خشيت للمطبخ كليت 3تمرات وشربت من العشبة متاع عزوزتي وطلعت ..

سورينام

12-03-2010 02:38 AM

رد: تجمع حوامل ليبيا

والراجل شادها جري في الطريق وهيا فاضية الساعة 4 الفجر وصلت للطبي طبعا على غيييير العادة فااااااااضي الاسعاف لقيت مناوبة تتثاوب شبحتلي قاتلي :

- شني ولادة قتلها انشاالله دخلتني دارتلي كشف ووك عليا اصعب حاجة هي لتمرميد متاع تدخيل ايديهم زي السم- وقتلي نتي تخشي الصالة على طووول مفتوح 5 سانتي فرحت قريب طرت نحساب هذا حدها نخصتين تانيات وانجيب هههه واعطتني ملف قاتلي خلي راجلك ايعبيه وبعدين دخلوني للصالة طبعا سلموني لوحدة فلبينية عزوزة ماشناهم كرهتهم ول حاجة قتلي خشي للحمام اكرمكم الله وحاولي تفرغي امعاءك خشيت وحاشاكم رجعت لين قريب كبدي طلعت بدل مايطلع من لوطا طلع من فوق .... المهم حطوني عالسرير وحطولي جهاز النبض مااشناه تحسي روحك مكتفة ومربوطة في السرير .. ونسمع في وحدة اتعيط واتقول يا يما ياحليلي .. واشبح من قالها قولي يارب بدت تقول ياربي تعالالي .. ههههههه واله معذورة مسكينة فعلا معاش تعرفي شن تقولي ..

سورينام

12-03-2010 02:40 AM

رد: تجمع حوامل ليبيا

المهم قعدت بروحي في هاذاكه الفجر وشوي وبدت اللية ياكبدي تحسي حاجة تخشلك من رجليك لقبوعتك تنفضك نفض وبعدها تهدي شوي مفيش وجع لين تجيك اللي بعدها أحرف منها وتطول اكثر وبدت سورينا تصك على هاذك السرير وانادي تعالولي نحياب روحي بنجيب لين جت لفلبينية وكشفت وقاتلي ماما انتي فيه 6 سانتي بس مازاال ولادة ونقولها قداش مازال تقولي لين انت اوصل 9-10 سانتي غبااااااارة الوجع هذا كله و6 بس امالا لما نوصل لل 9 كيف شكله المهم شوي وخلتني ومشت الفلبينية وجت اللية تااااني وزي السم تقعد متاع 5 دقيق وتولي وكل وحدة احرف من للي قبلها واني نبي حد بحذاي من الخوف وماهناك حد .. لين جتني بنية ليبيىة شورها تتدرب متياز وقفت جنبي وتسأل فيا انتب بكرة موليد كم ومش عارفة شن المهم شديت في ايدها ونقولها ياوخيتي متخلينيش راني بنموت من لخوف مسطينة شدت فيا وتقولي ربي ايسهل عليك ولله موقف بسيط لكن مستحيل ننساه وديما ندعيلها ربي يفتح عليها وين ماهيا المهم زاد ليا الوجع والساعة قريب 6 خلااص هبلت وجميع انواع العياط عيطته .. ووك..وواك .. واي .. وماخليت مقلت .. تعالولي .. يايما .. يابوي .. بنموووت هههههههههه

سورينام

12-03-2010 02:43 AM

رد: تجمع حوامل ليبيا

وبعد هذا كله جو دكتورتين وممرضتين فلبنيات وكشفت الدكتورة وكلمت التانية بالانجليزي قاتلهامفتوح 7 سم لكن البيبي good size ولازم عملية .. واني نرقص على هاذاكا السرير والحق لما سمعت عملية فرحت قلت خلاص المعاناااة بتكمل المهم نطلع من هالوضع.. ناضت الدكتورة التانية يعطيها غبارة قالت لا نديرو محاولة أخيرة وبركو عليا الفلبينيات وايقولولي بش ماما ادفعي .. ياهمي واني خلاااص بنموووت لين قتلهم الدكتورة افتحو كيس البيبي ودخلوها عملية طارئة .. قاموني بسرعة على سرير ثاني وغيرولي ولبسولي بالطو العمليات وحشولي هاذاك طوبو البول حاشكم زي السم وطارو للعمليات ..

سورينام

12-03-2010 02:45 AM

رد: تجمع حوامل ليبيا

واللي ايضحك واحنى نجرو في الممر واني نقوللها يا دكتورة جت جت اتقولي شن هيا انقوللها اللية وهما يضكو واني عيااااااااااااط خشينا للعمليات وقعدو بتصلو بالتخدير حاالة شوره راقد والا شني شوفو العمليات الطارئة بالله!!واني نعيط ووحدة من الدكتورات تقوللي ياسر وجعتيلنا روسنا مش للدرجة هذي .. ياويلها من ربي قلتلها ياريتك في مكاني .. المهم جي فني التخدير وركبولي اليباري وجهاز الضغط وهو ايحطلي في الكمامة متع البنج واني نحذف فيها من الالم وبعدبن رحت في عاللللم تااااااااني ورقدت ومعاش نندري عليهم بدو ايجزرو فيا لين فقت في الملاحظة اول حاجة شفتها ساعة قدامي الساعة 8 وربع الصبح .. وعلى طوووول حسيت بجرح في بطني وتذكرت كل شي .. لله يابنات عمري مانحساب روحي اندير عملية الحمد لله على كل حاااااال ...ضربولي مسكن وجت ممرضة تقولي كان تيمعي فيا حركي راسك .. حركت راسي وقاتلي تمام الحمدالله على سلامتك شوية ويركبوك للقسم .. شفت جنبي مافيش بيبي قلت شن صار زعما جبت حي والا ميت اللطف .. جت وحدة تانية ونادت اسمي وقاتلي راجلك باعتلك تلبفونك وحاجاتك قتلها وين البيبي مشت جابتهولي وقاتلي جبتي بنية وزنها 4 كيلو ماشالله وقامتها ورتهااالي ... الله يابنت مانحكبلكمش عالشعوووور محلاااااه بديت نبكي ونقولها هذي مني اني متاعي اني شعووور حلوووو انشاءالله ربي مايحرم منه وحدة ياااارب .. والممرضة تضحك وحطتها جنبي ومشت ركبوني للقسم وقعدت 4 ايام وطلعت اني وبنيتي والحمد لله
وكان تبوني نحكيلكم قصة ولادة فراس قولو ماتتحشموش هههههههه وحدة ماصدقت .. لكن والله قصة فراس فيها عبرة كبييييرة كلكم حتستفيدو منها والله

الساعة الآن 11:01 AM.

صفحة 499 من 2135

499

عرض 40 مشاركات من هذا الموضوع لكل صفحة

Privacy Policy - copyright

لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .