|
رد: سيدات ليبيا الحبيبات ..تفضلووو
الــــــــسلام عليكم
الله يبارك فيك أم سعد هدية .. الله يبارك وصحيتي علي الدعوات شن حلمتي بيا بالضبط كيف شن داروا رمضان الماضي هيا مش مشكلة المنحة بس توه حتي التامين والدراسة ممكن نقصد من غير تامين والله صعبة وزيادة لو مافيش قراية ليش الوايقعد يصرف في فلوسه وقاعد في الغربة ومايقراش صعبة لو جت في المنحة بس قاعدة اهون والله نبكي بدموعي لما قريت رسائلكم الله يسلمكم كلكم يارب ماننحرم منكم بجد حسيت بفرحتكم من رسائلكم والله ياسوسو حتي انا خاطري نضم اي وحدة فيكم ونبكي ونبكي ونبكي لين يجفوا دمعي والله ماتصدقوا شن صاير فيا بس الحمـــــــــــــــــــــــــــــــــــــــد لله شي غير متوقع كله بفضل الله وأرادته اوشي الله يبارك فيك حبيبتي ومشكورة علي الدعوات ربي يفرحك بصغارك يارب ويحفظهملك كل شكري واحترامي ليكم والله معاد عرفت شن نعبر ولا شن نكتب ادعولي ربي يكمل فرحتي ويثبت حملي |
رد: سيدات ليبيا الحبيبات ..تفضلووو
خلي نكملكم القصة
طبعا فرحنا فرحة لاتوصف بس قعدت نقول لزوجي خلينا مانستعجلوش لازم ندير تحليل دم ثاني يوم قعدت نتصل ونشوف وين ممكن ندير تحليل دم اتصلت ب urgent care جنبنا قالوا عندنا بس يطلع بعد ثلاث ايام اتفكرت انه الجامعة فيها مركز صحي للطلبة اتصلت وخديت موعد ومشيت توقعته تحليل دم ههههه طلع تحليل بول ههههههه المهم انا درت عينة البول وطلعتها للمرضة قالتلي ارجعي في صندوق في الحيط حطيه فيه ولفيه طلع الصندوق هوا زي الاسطوانة لما ندوره في الحيط طبعا هوا تمشي العينة للحجرة االي جنبنا وشكلها المختبر عليك حالة هههههه بعدها رجعت للدكتورة قعدت تقولي انتي شن تبي تكوني حامل او لا قلتلها اكيد قالتي معظم اللي جونا مايبوش قلتلها انا متزوجة ونستني في الخبر من فترة قالتلي النتيجة موجب طلعنا روحنا ومن بعدها بدي فيا الترجيع والدوخة ودكتورتي اتصلت مافيش موعد والله لين كرهت روحي شني هدا نظام لين مفسد وانا بطني توجع فيا قلتلها انا حامل بعد فترة وبطني توجع فيا حتي حصلت موعد قريب ولما مشيت للدكتورة توقعتها اديرلي جهاز او شي طلبت تحليل دم وقالت ارجعي بعد اسبوعين وترتلي اعصابي يعني بنستي اسبوعين حتي نتاكد ماقدرتش نصبر اتصلت بماما وكانت في عرس ههههههههههههههههه تعرفوا في العرس وتقولي بنزغرط قلتها مش متاكدة غير اصبري بس وبعدها كلمت خالتي اتصلت بولدها ديمة يكلم فيا عالفايبر قالي ماما في الدار الثانية ومافيهاش تغطية وهيا ماتبيش تطلع منها قالي اهيا خالتي الثانية جنبي كلمتها وقولتلها شكلها سمعتها خالتي الاولي او ولدها مشي قاللها فجاة تغير الصوت شكلها خطفت منها التلفون وماتصدقوش الفرحة وحناي بدت تقوللهم قولولها متاكلش هديكا وهديكا وهلبة نصائح وكل يوم يتصلوا يسالوا شن صار بس اهل زوجي ماقتلش لا لما مشيت للدكتورة دارتلي جهاز مهبلي طبعا كان الاربعاء الماضية وقالتي كل شي كويس وتحاليل تمام بس الترجيع يابنات امتعبني روائح الأكل سواء في شقتنا او برا في الطريق نشمها بنرجع واللي ناكله طول ترجيع حتي التطيب مانطيبش واول امس مغص خف عليا شوية امس بس لما كليت البيتزا رجع ثاني معادش عرفت شن السبب |
رد: سيدات ليبيا الحبيبات ..تفضلووو
شن تنصحوني ناكل
انا كله فواكه توة ومرات ناكل حاجة طايبة بس علي طول نرجعها اعطتني فيتامينات راح نكتبلكم اسمهم وحتي حبوب للترجيع صح نقصوا عليا شوية بس قاعد مستمر وزيادة معادش متحملة المستكة خاطري في لوبان حلو او المُر عرفتوه زعمة عادي مايدير شي نبي نصويهم يبعثولي |
رد: سيدات ليبيا الحبيبات ..تفضلووو
هههههههههههه توا مش راح تخلصوا من أسألتي
كل وحدة تحكيلنا كيف كان وحمها وكيف تعاملت معاه انا حاليا نتمني اني في بلادي بجد بجد لاني شبه ماندير في شي الصبح نمشي للمدرسة وفي الفصل مافيش اي مشاركات الا لما نضطر نتكلم وكل شوية نشوف للساعة نروح نرقد وانوض نكتب الواجب ونرجع نرقد والله مشكلة معادش عندي رغبة اني نقرا قصدي قبل مانعتمدش علي المعهد بس نطلع ونقرا في قواعيد بروحي ونحفظ في كلمات وتوا يادوب الواجب الحمد لله علي كل حال ربي يفرحني ويفرح زوجي ويكمل علينا علي خير سبحان الله مش قلتلكم نبي نكمل فترة اللغة ومش راح نبدا في الماستر الصيف هدا وهكي صار فعلا اجلت قبولي للخريف بس الدكتورة قالت موعدك في شهر 11 وهداكا الوقت راح تكون الامتحانات النهائية هوا مش راح يصير الا اللي كاتبه ربي بس بديت نفكر كيف بندير شن تنصحوني يعني انا قبل الحمل بجد بجد جهد مش عادي رغم انها فترة اللغة اكيد اسهل من الاكاديمي بهلبة وفي ظرف 3 شهور ونصف درت الايلس وجبت درجة كويسة وحصلت القبول بس بعدين كيف بندير في نص السمستر مرات نتعب هل بيعاودولي الامتحان او كيف اكيد مش راح يعاودوه بس بنوضحلكم ان لو ربي سخرلي ولادتي بتكون في فترة الدراسة الاكاديمي سواء محاضرات عادية او نهائيات كله صعب الغياب وحدة من البنات قالتلي اطلبي تمديد ثلاث شهور بعد السنة وهوا يعطوا فيه التمديد هدا بس انا كنت مش مفكرة فيه لانه مانعرفش الماستر كم تاخد مني مرات نطلب تمديد في الماستر افضل والله راسي دايخ |
رد: سيدات ليبيا الحبيبات ..تفضلووو
سوسو شني زوجك روح من السفر
ههههه ولا قلتيله عليا وهوا مزال مسافر والله لو كنت في ليبيا تاخدوا احلي زردة مش خسارة فيكم |
رد: سيدات ليبيا الحبيبات ..تفضلووو
السلام عليكم وخياتي وكيف حالكم نفره نفره على قولت وخيتنا اوشي ربي يذكرها بالخير
حبيت نطمنكم عليا اني الحمدلله خلاص المدرسة قاربت على انتهاء وزهيوة حالها كويس وشكرا لكل من فقدني وسأل عليا وربي يحفظكم يااااااارب طبعا مبروووووووووك وخيتنا ام اجنادين الشاهد ربي انك من الفرحة بكيتيني ومعاش عرفت شن نكتب والله فرحتلك من وسط قلبي وعقبال وخيتنا ميمونة باللهي ادعولها وخياتي ربي يرزقها الذرية الصالحة توا ياحبيبة ردي بالك من حالك واستودعي جنينك عند الذي لاتضيع لديه الودائع وان شاءالله ربي يجعله حسن الخُلق والخلقة وربي يجعله من قسمك ونصيبك وان شاءالله تنوضي بالسلامة وتفرحي بيه بين ايدياتك وتشوفيه سليم معافى |
رد: سيدات ليبيا الحبيبات ..تفضلووو
الله يبارك فيه ام ونوسة
ربي مايحرمني منكم ومن دعواتكم الف لاباس علي زهيوة ربي يحفظلك بنياتك وتشوفيهم عرايس ان شاء الله ربي يسخر لي ميمونة زي ماسخرلي طمنينا عليها شن اخبارها انا في المدرسة والله صارت فيها حالة دخت في القطار وبنرجع فرحا نزلت علي اول برميل كناية حاشاكم المحطة بعيدة علي المعهد وانا شديت روحي في القطار دايخة وحايرة هدا في اللغة هكي بعدين في الولادة كيف بندير وانا عندي قراية رسمية بالله نصائحكم ورايكم يهمني هلبة |
رد: سيدات ليبيا الحبيبات ..تفضلووو
السلام عليكم ورحمة الله وبركاته
كيف حالكم اليوم كلكم ان شاء الله بخير hwaml12 مستعجلة ومش فاضية خشيت عالسريع منقول لجنودة عالفيتامينات كانا اسمهم ماتيرنا رديييييييي بالك تاخديهم فيهم جيلاتين وخيتك تزرط فيهم من اول الحمل لاخره بعديييييييييين اكتشفنا انه فيهم جيلاتين تلقيهم علبة بيضاء بالوردي ومرسوم عليها مراة وولد صغير عموما اني توا مستعجلة خشيت علي خاطر انبهك بس وتو بعدين ليا رجعة ان شاء الله مع بعض النصائح بما إني حملت في غربة زيك ربي يسهل عليك سلاااااااااااااااام توا |
رد: سيدات ليبيا الحبيبات ..تفضلووو
السلام عليكم كيف حالكم توا وينكم ماخش حد من بكري والا اليوم جمعة وموعد الزيارات للأهل ولأهل الزوج ؟
طبعا امس كمل عرس اختي علي خير الحمد لله وطلعت ماشاء الله رووووووعة ربي يهنيها اهلي وصلوها ورحوا ماعطلوش هوا حوش شيابينها في سوق الجمعة عيلة المدني بالك تعرفيهم يا جيجي ؟وهيا حوشها بروحها في وادي الربيع بعد تسقدوا اهلي وروحوا خداها راجلها طووووول وطار لحوشهم مستعجحل خخخخخخخخخخ لكن للاسف مازال لتوا ما صار شي ................فهمتوني اكيييييد؟؟؟؟مع العلم انه صارت عدة محاولات بس شكلهاهيا متوترة وهوا توتر معاها والله متنكددة من امبارح وحالتها حالة قلتلها ماتنكدوش علي ارواحكم في هالليلة بالشوي بالشوي تو يصير في هلبة نسمع بيهم مايصير شي حتي بعد اسبوع ديما اول ليلة ليها رهبتها ويصير الارتباك والتوتر بالله ادعولهم ربي يساعدهم واتم امورهم علي خير ولو وحدة تعرف حد مر بهالشي طمنوني وخلي نطمنها حتي هيا سامحوني علي طرح هالموضوع المحرج بس مضطرة ونخمم فيهم نبي نعرف ارائكم بالك وحدة فيكم اطمني إنه هالشي طبيعي ....... |
رد: سيدات ليبيا الحبيبات ..تفضلووو
السلام عليكم
كيف حالكم جميعا جنوده الف مبروك وربي يتمم حملك علي خير انشاء الله هدهد انشاء الله ربي يتمم لوخيتك علي خير وربي يهانيها |
| الساعة الآن 04:46 AM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .