|
رد: تجمع حوامل ليبيا
ليبيا قلبي ريحي روحك من القرايه هالمده لين تجيبي
وتنوضي بالسلامه وبعدين لاحقة اعليها انشاءالله بعد ما تتعيني معيده رسمي في الكليه يكون من حقك الايفاد وانك تسافري وينزل اسمك في قرار المعيدين للايفاد حتى انا نحب السفر مش للقرايه لا لا لا بعيد السوووووووو مع اني كان مستواي كويس وتخرجت بتقدير حتى هو كويس وحياتي كلها عمري مادرت دور تاني بس حاليا انا سعيدة جدا اني ربة بيت ومسئوله عن زوج واطفال وبيت نعمه من ربي الكريم ونتمنى نسافر مع زوجي هو يقرا مش انا واحتمال نهاية 2011 نمشوا لبريطانيا مدة سنه وحدة بس بعثة من شركة زوجي ويارب يسخر الحال |
رد: تجمع حوامل ليبيا
رح احكيلكم قصة سارة...
ونتمنى منكم كلكم شي واحد الدعاء لبنتي وخوها يكونوا من الذريه الصالحه انا لما حملت بسارة كنت متزوجة من 3شهووور واول مرة الدكتور خوفتني ان الحمل خارج الرحم ونفسيتي صارت زفت وبعدها مشت الامور تمام وانا في الثالت كنت راقده لين جت حماتي تعيط بقوة خفت وطلعت نجري من حوشي كانت حماتي التانية بتجيب وخلعتنا معاها صارلي نزيف وتوقعت اني رميت والحمدلله كان الجنين ثابت اعطوني مثبتات وقعد معاي النزيف 3شهور تامه وفي الشهر السابع خوفوني تاني انه معاي سكر حمل وفي النهايه طلع التحليل سلبي ومافيش سكر ولله الحمد وفي نهايه الثامن اخر اسبوع غسلت سجادة الصاله وفي ليلتها صار فيه لقاء مع زوجي ومن تحت هالسببين لانهم مع بعض تاني يوم الصبح انفتح كيس الجنين ونزلت الميه وانا راقدة قعدت في العيادة 9ايام والميه تنزل وعاشر يوم ولدوني اندكشن يعني بوجع صناعي اليوم الاول اعطوني 2 تحاميل للوجع تعبت وعانيت هلبه ونزل ضغطي عالاخر وماعادش قدرت انشووووووف وانعميت خلاص ووقفوا مفعول الوجع وتاني يوم اعطوني الوجع الساعه 6الصبح في الوريد ولله الحمد الساعه12 الظهر جبت سرورة بس كان وزنها 2كيلو بس ولونها ازرق لقله الميه والاكسجين قعدت في الحضانه 3ايام وطلعت تعبتني من العياااااااااط وكل الدكاترة يقولوا غازاااااات مش اكتر المهم بعد شهرين كانت ساره عندها مراجعه روتينيه في العيادة يلي ولدت فيها وكان في ليلتها اسبوع اختي جايبه وليد المهم الصبح مشينا للدكتور قال مش غازات بروا ديروا جهاز الترا ساوند وارجعوا قلنا اوكي لما رجعنا بالنتيجه صدمنا بالخبر قال انه ورم في الكبد ومش معروف ان كان حميد او خبيث تخيلوا صدمتي وعمر بنتي بكرتي شهرين ما قلتش لاهلي لانهم في سبوع اختي واسبلت ان ساره عندها حرارة وطول الليل وانا نبكي وندعي وعشنا انا وزوجي اطول واصعب يوم في عمرنا المهم تاني يوم من ال6 الصبح كنا في الطبي اتصلت بخوي لانه دكتور ومشينا دارلوها كانيولا في ايدها (ابرة) ومزرطوها كانت ضعيفه وزنها 3كيلو بس وعروقها رقاق قعدوا ساعه باش ركبوا الابرة وبنتي تعيط تقطع القلب ودارلوها صورة مقطعيه ورنين مغناطيسي ومشينا خدينا موعد مع طبيب اورام اسمه الزروق في الطبي نفسه واكدنا ان الورم خبيث يعني سرطان في هاللحظات اسودت الدنيا في عيني بنتي تعيط من الجوع لانها صايمه ومن نخص الابرة والتحاليل والممرضة شادتها بكل عنف ووحشيه وانا في عالم تاني خوي يصبر فيا وماعنداش كلام ايصبر كلام العالم كله مايصبرش ام مصدومه بابنها بنتي صغيرونه فرحه عمري بكرتي ويقولولي سرطان وزوجي شادني وحاطني في حضنه ودموعه زي المطر وساكت بلا كلام طلعت برا لقيت امي والعيله كلها ماتتخيلوش لحظة احضنت امي وتقولي شن فيها بنيتك وانا انقوليلها بنتي فيها سرطان يا ماما دموعي خلاص توا تعبوني ما عادش نقدر نكتب اذكرت هالايام الصعبه رح نرجع انكملكم........ |
رد: تجمع حوامل ليبيا
المهم كان هداك اليوم الخميس
واعطاني الدكتور موعد السبت باش يقولنا خطة العلاج واحكالنا مبدئيا انها تحتاج 6شهور كيماوي بعدين عمليه وبعدها شهرين كيماوي المهم عشنا الخميس والجمعه جثث لاننا خلاص طاقتنا للتحمل تمت خلاص بس اهلي كانوا سند احسن من اهل زوجي اهل زوجي يبكوا ويتحسروا زادوني على همي بس اهلي كانوا ملتزمين وعقيدتهم قويه كان كلامهم اني لازم استغفر وان الله يختبر عبده في المصايب وان هالساعه الدعاء فيها مستجاب كنت انوض انصلي وندعي لين ايجف حلقي السبت مشينا للطبي قالوا الدكتور واخد اجازت السنويه حاشاكم الحقير عارف روحه طالع اجازة لاش يعطي مواعيد للناس جانا واحد بلا خبرة ولا شي قال انا اناوب عنه رفضنا انا واخي بس زوجي كانت حاله بنته عاميه اعيونه يقولي خليه ايشوفها سكرت راسي وروحت الحوش كان الوقت الساعه12 المهم صلاة الظهر خش خوي الدكتور ومعاه زوز تذاكر و3الاف دولار قالي الوقت مش لصالحك الليله حجزتلك عالاردن سافري انتي وراجلك وبنتك ولو زوجك عملك يمنعه نمشي معاك انا وقفه اهلي كانت اكبر عزااء ليا الساعه 11في ليلتها كنت في الطيارة ودعت اهلي بالدموع وكاني بنموت قعدت في الاردن شهر تحاليل وصور وما يقولوا شي اخر شي طلبوا عمليه لاخد عينه للتاكيد وروحنا بعد شهر بلا نتيجه لان عينه العمليه بعتوها لاوروبا مش عارفه وين تحديدا والنتيجه تعطل رجعنا بعد اسبوعين للادرن وتخيلوا جتنا الممرضه وقالت الدكاترة طالبين موعد معاكم كان قلبي خلاص لانه قبلها الدكتور حكالي على اطفال فيهم سرطان وتوا عايشين كويس قلت خلاص يبي يهيئ حالي للنتيجه بس تعرفوا رحمة الله كانت النتجة مافيش ورم ابدا وبنتي سليمة معافه وخلعات الطبي والدكاترة الليبين كدب وقلة خبرة تخيلوا رحمه الله بعبده ام واب شهرين من الدموع والصدمه والبكاء والوسواس وبنتنا الابرة فيها وتحاليل صبح وعشيه وعمليه الخزعه بروحها اطيح الحيل بس بالدعاء بالصلاة بالاستغفار الله كدب قولهم كانت بنتي سليمة عشت احلى اسبوع في الاردن وانا طايرة من الفرحة روحنا وكان الاستقبال غير الوداع كاني مروحه من الحج تهاني ودموع فرح وكل العيله في المطار امي وخواتي وخوتي الكل يبكي ويهني من الفرحه ولله الحمد كانت دورة زوجي لالمانيا بعدها ب4 شهور واول ما وصلنا رفعت تقترير ليبيا والاردن لمستشفى فينوسبيرغ في المانيا ودارولها تحاليل تانيه وقعدت عندهم اسبوع والنتيجه ان بنتكم سليمة تقارير الاردن صح ولعب الليبين دكاترة الكدب كدب في كدب والحمدلله رب العالمين حمدا كثيرا مباركا فيه طمني على بنتي كل مانشوها تلعب ولا تجري مع صغار عمتها وتناديني ماما نتخيل هالايام الاولى من الصدمه الشهرين المريرين يلي مريت بيهم وقتها ماتوقعت بنتي تعيش اصلا حاليا هي اتجنن فرحة عمري يلي ربي اكرمني بيها وزاد ربي اكرمني على صبري ودعائي شفاء بنتي بعدها سفرة لالمانيا كانت من اجمل ايام حياتي تم حملي ووليدة حمودة الله كبير وعظيم ورحيم فأكثروا الدعاء والاستغفار |
رد: تجمع حوامل ليبيا
ادعولي بحسن الخاتمه والسعادة مع زوجي
وان الله يجعل سارة وخوها من الذرية الصالحه ويارب يكرمكم بكرمه ويعيكم من وسعه وويحقق امانيكم |
رد: تجمع حوامل ليبيا
الله
بكتيني معاك قدااااااااااش تحملتي ، موقف صعب والله ربي يجازيك على صبرك ويطول في عمر سارة ومحمد وتشوفيهم من احسن الناس يارب قلبي تقطع عليك والله اني حملت ورميت في شهر ، من غير مانعلم وكل ما نتفكر نموت وقلبي يوجعني فما بالك بنيتك قدام عينك .... نستنى باقي قصتك عيون . |
رد: تجمع حوامل ليبيا
سبحان الله وبحمده
سبحان الله وبحمده سبحان الله وبحمده الحمد لله الذي لا يحمد على مكروه سواه بصراحة قصتك اجمل عبرة ، وكلنا ايمانا بربي كبير بس الصبر والدعاء في المحن هو الفرج ربي يونسك بعويلتك وراجلك واماليك وصغارك وما تفقدي حد منهم .. ويطول عمرهم ويجعلهم من الذرية الصالحة وحفظة كتاب الله أمين يارب العالمين . |
رد: تجمع حوامل ليبيا
خلاص يا بنات
انمشوها قصص كل وحدة تخش تحكي قصه صايرة معاها سواء فالزواج او الحمل او الجياب واكيد كل قصة فيها عبرة نستفيدوا منها ها شنو رائيكم ؟؟ .. |
رد: تجمع حوامل ليبيا
عيون الحمد لله وربي كريم
والله بكيتينى معاك وربي يفرحك بيهم وتشوفيهم عرسان يارب |
رد: تجمع حوامل ليبيا
السلام عليكم كيف حالكم
عيون ربي يحفظلك صغارك وراجلك لولي شن حالك استحشتك نسرينا ربييعوضك الشهر الجاي انا دورتي قاعده مانزلتش ايه مغطسه لا الو ولا مسج غايبه عالشاشه ام اسيل هلا والله بالغلا معراج بارك الله فيك عالمعلومات واسفه اني ازعجتك |
رد: تجمع حوامل ليبيا
لولي...نسرينا
يا اعز اوخياات يارب ماتشوفوا شر... انا سعيدة اني كتبت قصة بنتي للعلم ان اهلي واهل زوجي بس يلي يعرفوا بيها حتى اعز صديقاتي لا عمرهم ماسمعوا بيها من البدايه جاني خوي وزوجي قالوا ان سارة بنت ولو ان المرض فعلا فيها ارح تشفى منه بالعلاج وتكبر وتتعقد من كلام الناس وتعاطفهم ويلي يشوفها يقول ياناري مريضة ولما بتتزوج خطيبها يفكر الف مرة قبل ما يتزوج وحدة كانت مريضة بطفولتها لان للاسف واحترامي ليكم مجتمعنا جاهل طبيا ولما طلع التشخيص غلط وكل شي كان وهم وامتحان من ربي العالمين انا اصريت اني ما نحكيش لحد مش لازم حد يعرف ونقعد في الناس واحد ماشي وواحد جاي والكل يسئل ولساني يجف من تكرار القصة ولانكم اهلي في التجمع وحبايبي حبيت نحكيها لسبب واحد عبرة وعظة كل وحدة فينا تتق بالله وتتاكد ان الله معها وان مشاكلها امتحان وباش تنجح فيه لازم من الصبر ثم الصبر والدعاء والاستغفار |
| الساعة الآن 07:35 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .