|
رد: ديوانية البحرين - دردشة حوامل البحرين - البحرينيات
السلام
شخباركم بنات ويش الاوضاع في ديركم اليوم الجمعة والصلاة صوبنه الله يحفظ الشباب بنوته مبروك مع السلامة |
رد: ديوانية البحرين - دردشة حوامل البحرين - البحرينيات
كل من سأل عني أني الحمدلله أنتظر الفرج من عند الله مع المنتظريين
أم حسين وساهرة سألت عنكم العافية وياارب دووم الكل بحمد من الله ونعمه طفلي حياتي هلا حبيبتي ،ويش أخبارش أنتين ،أني الحمدلله زينه واليهال بعد ياارب أم خليل هلا حبيبتي ،ويش أخبار الأهل وأولادش الله يسمع منش ويكتب لينه التياسير في كل أمورنه سلمي على الأهل كلهم أمانه بنوته حلوة اللة يبارك لش في بنوتتك ويجعلها من أقدام السعد والذرية الصالحة ويحفظها لش ،أووووه ماتوقعنه تولدين بعملية قيصرية ،بس ألف حمد وشكر يااارب يوم قمتين بالسلامة مع زنووووب روز هلا ومرحبا ،ربي يحفظكم كلكم ويجعلكم في حصنه الجبار المنيع من كل شر ،صدقتي الصلاة هناك عندكم اليوم الله يحفظكم بنوتتي بعد في بيت الأهل هناك تحتكم ربي يحفظكم بحفظة في أمان الله وحفظه |
رد: ديوانية البحرين - دردشة حوامل البحرين - البحرينيات
مساء الخير اخباركم؟؟؟ بنوته الف مبروك ياعمري وتتربه في عزكم
ام خليل تسلمين واتمنى على طول اتكونو ابخير احلام ام الله افرج عنكم وقلوبنا معاكم |
رد: ديوانية البحرين - دردشة حوامل البحرين - البحرينيات
السلام عليكم
شخباركم يا اشرف الناس واطهر الناس شخباركم ياحبايبنا وحشتوني واتمنى تدخلون تطمنوني عنكم اشكر كلمن دخلت تواسينه وتساندنا بكلمات تطيب الجروح ربي يفرج عنا وعن كل مكروب ويخذل كل ظالم اتمنى ع الاقل تطرشون لي رساله كل وحده فيكم تطمني |
رد: ديوانية البحرين - دردشة حوامل البحرين - البحرينيات
سلااااااام على الجميع والله يعم السلام والامن عليناا بحق هذا اليوم الفضيل ،،داشة اطمن على خواتي واتمنى الكل يكون بصحة وسلامة وانا الحمدلله اموري ماشية وننطر الفرج من رب العالمين ..
اتمنى ترجع الديوانية نفس قبل وباقي البنات يدشون ونسمع عنهم اخبار طيبة وادري الاوضاع في الديرة تكدر بس ربكم كرررريم.. اللهم فرج هذه الغمة عن هذه الأمة و الله يرحم شهدائنا ويشافي جميع الجرحى بحق محمد وآله طفلوو،، مشكوورة على اهتمامج واخبار بنتي احين باكتبها لج.. تذكرتج اليوم وانا ابي احصل لي فجة علشان اصلي والله يحفظها ما رقدت الا من شوي .. الله اييب زنوبتج بالسلامة وتلهيج شووي بنووتة،، حمدلله على سلامتج يا ام زينب ووتتربى في عزكم :) ام خليل واحلام ام يمكن عندكم خبرة في اليهال اكثر مني وادري مو حزة هالاستفسارات بس خل ندش ونكمل الي بدينااه وكل وحدة تهون على الثانية ،، بنتي من يبتها لليوم وانا اعاني وياها اسهاال وترجيع والمفروض لها موعد ثاني ويا دكتور حسن زين الدين الاسبوع الياي بس ويا هالوضع المتأزم ماقدر اوديها المهم شاسوي ويا الاسهال والمغص والله تكسر خاطري ماجوف ويهها الا منقلب احمر واهي راقدة وتعصر حدهاا وتصرخ من قمة راسها والسبة هالبطن جربت معاها المقردووش وما تهدأ الا لين اخليها على بطنها ,,, وانا خايفة عليها :( الزوع قال لي فيها ارتخاء مريئي وانا اعطيها الادوية للحين بس الاسهال قال لي سوي تحليل حق الخروج الله يعزكم وسويته بس ماقدر اوديه وما يندرى متى الله يفرجها علينا ونقدر نطلع :( ،، شاسوي معاهاا وعندها مشكلة ثانية الغازات الي في بطنها .. انا احاسب في اكلي وااعطيها شراب وصفه لي الدكتور حق الغازات وماحسها تغيرت بطنها كله منفووخ وتصرخ منه سامحووني فتحت وياكم مواضيع مو حزتها بس ما عندي غيركم :) واتمنى باقي البنات يدشون ويطنونه لو بكلمة .. |
رد: ديوانية البحرين - دردشة حوامل البحرين - البحرينيات
ياهلا افلونه الحمدالله انك ابخير وانشاالله بنتك ماعليها العافيه وانشاالله اهل التجمع يدخلون وفيدونك
الله افرج عنكم يارب |
رد: ديوانية البحرين - دردشة حوامل البحرين - البحرينيات
الله يسهل عليكم
|
رد: ديوانية البحرين - دردشة حوامل البحرين - البحرينيات
هلا فلونة حبيبتي
الحمدلله طمنينه عليش كنه واايد نحاتيش ونحاتي باقي البنات ،حبيبتي لاتقطعيين تواصلش في الديوانية لو الكل يدخل ومايقطع إنجان تشجعوا باقي البنات ودخلوا وتصدقين تواصلنه يقوي نفسيتنه ويخفف الضغوط بكل أشكالها أتمنى تدخلوون قلوبنه تحاتيكم بالنسبة لبنتش الله يعينش وإنتين شكلش تعبانة وااايد وياها وهذا كله صدقيني بسبت الغازات أني كان ولدي يوم كان صغير تعبت وياه ماخليت عياادة الكل فتحت فايل عنده الأمريكي ويوسف أكبر وساهرة والعام بكل مكان ولا فاد متواصلة وياه وكل دكتور أروح يكنسل الأدوية القبلية ويكتب غيرها ولافاد عطوني حتى دوا أعطيه إياه قبل الرضعه بربع ساعة علشان المغص ولايسبب تقلصات ولا فااد وكل زيارة دكتور يشوف بطنه منتفخ ويدق على بطنه ويطلع مثل الطبل الصوت أدهنه زيت زيتون كامل وأعطيه ماي غريب والأدوية الشعبية ولأعطيه صناعي أبدا وتالي دكتور قالي من تشوفينه جدية عطية أدول 2,5 ملي كل أربع ساعات تعبت وياه توقعي حتى الفلوس إللي عطوني إياها الناس في ولادتي صرفتها لاينام وأني ماأنام حتى صرت ضعيفة من السهر والأرق وعدم الراحة كل 10 دقليق يوتعي ومعجزة ليين كمل ساعة حتى ساعات أوتعي إلا هو تحتي ويرضع وأقول لزوجي من يابة صوبي يقول ههههه أكيد إنتين وتالي قمت كله أخليه نايم على بطنه بس أخلي راسة على صوب عن لايختنق وصدق تطلع الغازات ويهدأ بس يرد يرجع عانيت وياه واايد للين كبر شوي إيه ذكرتيني ألحيين صار كبير وشيطون الله يخلية ويحفظة الغازات أطفال واايد تذبحهم وأطفال لا تصبري حبيبتي وإعطيها أدول 2,5 وشوفي وخليها على بطنها وربش كريم يفرجها على الكل إذا تقدرين روحي صيدلية وقولي للصيدلي يفيدش بشي وجربي ماي غريب وماعليها شر في أمان الله |
رد: ديوانية البحرين - دردشة حوامل البحرين - البحرينيات
ييت اطل عليكم قبل لا ارقد واتمنى البنات يرجعوون يتواصلون ويانا ..
ام حسين،، مشكووورة حبيبتي على دعائج والله يتمم لج حملج على خير ويرزق كل محرومة الذرية الصالحة.. احلام ام ،، اهلييين ام علي شخبارج وشخبار اعيالج وشخبار البطل مادري البطلة الي في بطنج .. اتصدقين عاد تتحجين عن ولدج الله يسلمه جنج تتحجين عن بنتي .. نفس معاناتي ما ترقد متواصل ربع ساعة كل شوي تصررخ من قمة راسها ويصير ويهها احمر احس ان صاددهاا مغص واشيلها والله وكيلج طول الليل اقعد معاها وحتى الخيااط احس مكانه صار خشن وخايفة وايد يألمني وقاعدة اوسوس مادري من زود القعدة صاير لي جذي وكله خايفة من البواسيرر :( ونفس ماقلتي صوت الطبل اول ماكشف عليها دكتور محمد زين الدين قال لي سمعي صوت بطنهاا متروووس غازااات وكتب لها قطرات اعطيها وانا كل ما يتحجى ميودة روحي مابي اصييح..والمفروووض هالاسبوع موعدنا الثااني بس على هالوضع شكلي باقعد مكاني .. الادوية الي كتبها حق اسبوعين بس وتالي بيقرر شنو العلاج الي اواصله معاها .. بالنسبة حق الادول اناا اخاف يختج تدرين تم يقنعني الدكتور اعطيها الادوية وانا خايفة يقول لي انتي شكلج عنيدة وما بتعطينها الادووية عندي خووف رهيييب من الادوية.. جربت معاها الادوية الشعبية المرقدوش وماي الحلوة بس ماي الغريب كللش ما ناسبها وسمعت خالتي تقول يخدر اليهاال وانا ماخليها مولية اخاف حتى اذا تغط عيني اتييني كوابيس:( والله يستااهلون التعب الظنى غالي بس انا امعورني قلبي عليهاا الله يمن عليها بالصحة والعافية ويشافي جميع مرضى المؤمنين والمؤمنات.:) مشكووورة ام علاوووي ريحتيني |
رد: ديوانية البحرين - دردشة حوامل البحرين - البحرينيات
ولو حبيبتي فلونة
إحنه خوات وأزيد ياارب وبنتش بنتي ،تصبري حبيبتي وهذي مهمتش وكلها كم يوم وتطلعيين من الأربعيين وتالي بطنها بيقوى وتقوى عضلاته وترى الوسواس يأثر على الياهل ليين الأم متنرفزة وتوسوس ونفسيتها تعبانه وتخلي الياهل كله منزعج ومتمرض ويصيح لأنه الياهل يحس بنفسية أمه لأنه متعود على ريحتها وصوت قلبها وأنفاسها وحتى إنفعالاتها وينتقل هي المؤثرات عن طريق الرضاعة أكثر شيء لأنه الجسم يفرز هرمونات في الحليب توصل للطفل فحاسبي وهدأي ولا توسوسين ووكلي أمرش لله ومثل ماقلت بعد الأربعيين وشهريين وشوي تخف الغازات تدريجين لمثل هالأطفال وربي يحفظ عروستنه وسمعي كلام الدكتور عاادي الأدوية أني أذكر كان عمره 10 أيام وأني أعطيه أدوية الغازات ولأنه هذا دكتور أطفال مختص وحاصل شهادة عليا ومهمته تشخيص أمراض الأطفال وإعطاؤهم أدوية خااصة مناسبة ذات جرعات محسوبة ومنخفضة وماتأثر وربي يشفيها طبيعي حبيبتي تخافين هذه أول هدية من رب العالميين ربي يحفظها لش وطول عمرها وتربى في عزكم مع أبوها وأحبابها ومثل ماقلتيين الضنا غالي ويستاهل نتعب علية علشان نستحق نعمة الجنه إنشاء الله في أمان الله مع إمنياتي بغد مشرق للجميع |
رد: ديوانية البحرين - دردشة حوامل البحرين - البحرينيات
السلام على اهل موطني الجريح. السلام عليكم حبيباتي. والله لم انساكم طوال المدة الماضية ولكن كما تعلمون الظروف حتمت علينا الحزن ولكن النصر والفرج يلوحان لنا تحت هتافات التكبير والنداء. بنوتة غاليتي الف الحمدلله على السلامة عسى ربي يحفظها من كل مكروه. فلونه حبيبتي كنت دائماً في ذهني تصبري غاليتي وارجو الرحمن ان يمن على طفلتك بالشفاء والراحة. طفطف أحلام ام ام خليل حبيبة حسوني الذهبية شموس ام امل ام حسين الدار ام السادة وحشتوني
|
رد: ديوانية البحرين - دردشة حوامل البحرين - البحرينيات
ياهلا عمري حنين الماضي الحمدالله يوم دخلتي وطمنتينا عليك
الله ينصركم وفرج عنكم يارب ياكريم عساكم دوم ابخير |
رد: ديوانية البحرين - دردشة حوامل البحرين - البحرينيات
السلام عليكم ورحمة الله وبركاته
من مثلث الصموود ابعث لكم الف تحية شخباركم كلكم وحشتوني بكل ما تعنية الكلمة مفتقدتنكم واتمنى اتكون اخباركم طيبة في ظل هل الظروف الرهيبة إلي انعيشها .. نسأل الله الفرج القريب والنصر وتفريج هذه الغمة عن هذه الأمة بحق محمد وآل بيته الطيبين الطاهرين .. عباس على عمري مريض ولااا حنا قادرين نودية المستشفى في ظل هل الظروف دخلت اطمن عليكم واتمنى ما نسيتوني واسألكم برائة الذمة .. ودعواتكم لولدي بشفاء العاجل .. تحياتي للجميع .. |
رد: ديوانية البحرين - دردشة حوامل البحرين - البحرينيات
السلام عليكم اخواتي
شخباركم والله انتون في بالي ولم انساكم لحظة ولكن ما ادري شنو اقول ليكم وعن شنو اتكلم غير ربي ينصرنا على الظالمين الله اكبر الله اكبر فلونة وحروف تحملو مرض اطفالكم ويش تسوون هداني اني بعدي مع ملاك ولما رحت المستشفى رد قالو احتمال تبديل دم بس لازم يشوفها اخصائي ويش اسوي اوديها السلمانيه علشان يقتلونها غير حملتها ورفعتها بيدي ودعيت ربي انت عطيتني اياها انت تكفل ابها وصدقوني ما احاول افكر في موضوع مرضها ولا عندي مجال للتفكير خليت كل شي على الله اهم شي اني اشوفها تضحك وتتحرك طبيعي الحمد لله وهي مو احسن من اللي استشهدو الحمد لله الحمد الله نفوسنا ابيه ترفض الذل والهوان وتستقبل الشهادة ربي ارزقني الشهادة |
رد: ديوانية البحرين - دردشة حوامل البحرين - البحرينيات
السلام عليكم
شخباركم؟؟ حروف عاشقه الحمدلله انش بخير وزين دخلتين تطمنينه.. ومنطقتكم كلش مافي مجال ولا لحظه تطلعون؟؟ ع الاقل مستشفى خاص من القريبين باقي البنات شخباركم ماقدر اعدد وحده وحده بس واحشيني ربي يفرج كربتنا ونرجع بعزه ونلتقي كل يوم بخير وسعاده |
رد: ديوانية البحرين - دردشة حوامل البحرين - البحرينيات
شمس الصباح ضيقتين خلقي ع الياهله ماتودينها الدولي؟؟ وديها شوفي ويش هالحاله مو راضي يروح ابو صفار
حسبي الله على من حسرنا على عيشتنا ودمرنا .. حتى علاج مانقدر نتعالج |
رد: ديوانية البحرين - دردشة حوامل البحرين - البحرينيات
السلام عليكم .. شخباركم شمسويين ؟؟
الاوضاع سيئة أدري .. بس الحمدلله على كل حال .. المفروض ندخل عشان نغير جوو ونشجع نفسيات بعض .. اني على قد ما اني اجوف الاخبار 24 ساعة بس على قنوات الاخبار في بيت ابووي لاعت جبدي اللي يخفف عني بتي الله يحفظها .. الحمدلله ان في اشياء بعد تشغلنا شووي جان نمووت .. وصدقوني الله موجود وببركة الصلاة على محمد وبالدعاء الفرج قريب .. بس ادعوا لصاحب العصر والزمان عليه السلام بالفرج والفرج قريب عاجل بإذن الله خلاص هادا كله من علامات آخر الزمان .. |
رد: ديوانية البحرين - دردشة حوامل البحرين - البحرينيات
بنوته ياخلف جبدي حتى مبارك ماباركت لش واي كلمه بقولها لكن مافي احلى من كلمة الحمدلله على سلامتش انتين وزنوب وربي يحفظها من كل مكروه والفال لي ولكل حامل بالفرج والولاده السهله
بتفرغ شوي بكلامي ...اني توقعت لش ولاده صعبه لان دكتورتش قالت بتخليش تولدين بدون شق تذكرين؟؟ يعني بتخليش تعانين عدل واخر شي سوتش عمليه طاح حظها من هنديه قولي قصة ولادتش |
رد: ديوانية البحرين - دردشة حوامل البحرين - البحرينيات
سلام شخباركم بنات ويهالاوضاع الرهيبه
اكو يشيعون شهيد الديه الحين ياعليييييييي فجيع الصوت ربي انصرنا على القوم الظالمين ربي اكشف هذه الغمه عن هذه الامه الهي عجل لوليك الفرج النصر قريب باذن الله |
رد: ديوانية البحرين - دردشة حوامل البحرين - البحرينيات
بنوته
حمد لله على سلامتش حبيبتي وسلامة زنوبه القمر حروف هلا حبيبتي وحشتينا من زمان مانشوفش ماعليه شر عباس ان شالله شموس ياهلا وغلا والله ان شالله ملوكه مافيها الا الخير اتطمني وخلي ايمانش بالله قوي ماضاقت الا لتفرج حنونه انتين بعد وحشتينا حببيبتي تحملي بروحش وعلاوي زين وكلكم بنات تحملو بروحكم وبالبيبيات وبدبيبكم بعد وان شالله الفرج قريب يارب طفطف ويش اخبارش ويش مسويه لاتنسونا من الدعاء |
رد: ديوانية البحرين - دردشة حوامل البحرين - البحرينيات
ويش أخباركم حبيباتي ربي يحفظكم ويفرج عنكم وعن مرضاكم
حروف عاشقة ربي يفرج عن عباس ولا يحتاج تودينه مستشفى شمس الصباح حبيبتي ضيقتين خلقي على ملاك وشكلة صدق يبى ليها دم تبديل ،تفائلي بالخير حبيبتي وماضاع من تمسك بحبل رب العالميين ،روحي مستشفى جدحفص للولادة وياش الفحوصات والتقارير وهناك أطباء أطفال في جناح الخدج وشوفس ياعمري ويش يقولون ليش وحاولي وياهم أذكر إختي ألحيين هي في الإعدادي لمن ولدتها أمي كانت 4 كيلو وشوي وقالوا دم الطفلة واصل 20 ويمكن تختنق وتالي لعبوا بهاوقاموا وهي توها مولوده يسحبون منها الدم للين صادها أبو صفار وترقدوا شهريين إلا للين قالوا دمها خلط أوشي وإنقلبت صفره كركم هذا في جدحفص وتالي أمي قامت تصيح لدكتور أطفال وأمر بتبديل دمها وتالي كم كيس دم وصارت زينه ورخصوها حاولي تروحيين يمكن يساعدونش وياارب أمورش ميسرة ببركة محمد وآل محمد |
رد: ديوانية البحرين - دردشة حوامل البحرين - البحرينيات
الله يفرج عنكم بحق محمد وآل محمد ..
:( |
رد: ديوانية البحرين - دردشة حوامل البحرين - البحرينيات
السلام
شحووالكم الحمدلله احنه بخيير فتحت المنتدا واشمأزيت من صورة هالمنتهي المهم اتحملو بروحكم وان شاءالله نتيمع مثل قبل في حال احسن من هالحاال |
رد: ديوانية البحرين - دردشة حوامل البحرين - البحرينيات
السلام عليكم شخباركم؟ حروف مابغيتي اطمنينا عليش مايجوف شر عباسي شموس جضرتيني عدل بس دام الله رزقش هالايمان القوي اكيد مابخيب ظنش. تعالي حروف انتي من الديه ؟. روز سول و روز سامحوني البارحة سقط اسمكم سهوا ما سألت عنكم. حبيبة شخبارش وشخبار فطومة صدرش صار زين ان شاءلله؟
|
رد: ديوانية البحرين - دردشة حوامل البحرين - البحرينيات
هلا بنات
روز انتين وينه الحين ؟؟ بيت ابوش لو شقتش؟؟ وحنين شكلش في وسط المعمعه |
رد: ديوانية البحرين - دردشة حوامل البحرين - البحرينيات
تحية لكل اهل البحرين الكرام
|
رد: ديوانية البحرين - دردشة حوامل البحرين - البحرينيات
صارلي سبوع في بيت ابوي ولا اشوف الشارع
محبوسه يطفطف هدا غير ليي موعد حمل ومطنشه من سبوع شقتي مقفله ولا رحت ليها وريلي في بيت ابوه ولا اشوفه |
رد: ديوانية البحرين - دردشة حوامل البحرين - البحرينيات
ويش بنات الحمل الي قربت مواعيدكم
وين ناوييين تولدون خوب مافي مستشفيات تستقبلنه |
رد: ديوانية البحرين - دردشة حوامل البحرين - البحرينيات
هلا حنون اني بخير حمد لله وفطومه بخير
بس صدري للحين ماخف التقق منه بمووت من الوجع :( صوت التكبيرات تعلو اللللللللللللللللله اكبر الللللللللللللله اكبر اللللللللللللللله اكبر على كل ظالم وجبار |
رد: ديوانية البحرين - دردشة حوامل البحرين - البحرينيات
اني محبوسه في بيتنا ويى ريلي وماقدر اروح ديرة الحب ولا اشوف اهلي وحشوني :(
وقاعدين وايدنا على قلبنا ماندري ويش ينتظرنا بس امرنا لله ورسوله واهل البيت سلام الله عليهم |
رد: ديوانية البحرين - دردشة حوامل البحرين - البحرينيات
تمساح من تقبلين في ويهش يطلع وييييييييييع والالوان بعد متناسقه ماشاء الله والخطوط ويلي ويلي يع يع يع
|
رد: ديوانية البحرين - دردشة حوامل البحرين - البحرينيات
السلااااااااااااااااااااااااااام وشحوالكم ويش اخباركم
ما اقدر اطول اكثر طمنوني عليكم اني بخير والسيد بخير والسيدة بعد بخير والحمد لله ادعوا يصلح الاب توب علشان اسهر وياكم |
رد: ديوانية البحرين - دردشة حوامل البحرين - البحرينيات
مساء الخير اخباركم؟؟؟ عسكم يارب ابخير وصحه والله افرج عن الجميع
ادري مو وقتها بس محتاره اسال من صار الي يومين احس حركة البيبي مرررزايده هل عادي؟؟؟؟معقوله لاني اشرب عصير مانجو واجد لان سمعت من اختي ان اذا شربت عصير مانجو البيبي يتحرك وبوضوح بكره مو عدي يارب خير دعواتكم وراح اسوي عمليه في عيني طالع الي كيس دهني ومره اقولو لحميه ومرررررررررررره خايفه اف وش اسوي |
رد: ديوانية البحرين - دردشة حوامل البحرين - البحرينيات
اهلا ام الساده وحشتينه وشخبارش وشخبار اهلش؟؟ وسيدون وشخباره؟
ام حسين عادي حركته لان الحلاوه تنشطه وانتين بس حلاوه ههههههه فتطمني عادي والكيس الدهني عادي بعد توها وحده مسويه هالعمليه مرت حميي عاديي جدا بسيطه |
رد: ديوانية البحرين - دردشة حوامل البحرين - البحرينيات
الله يفرج عنكم يااارب
والله عورني قلبي عليكم الفرج من عندك يااارب فرج عنهم في القريب العاجل يااارب العالمين بحق محمد واله الطيبين الطاهرين |
رد: ديوانية البحرين - دردشة حوامل البحرين - البحرينيات
ويليي عليك يسيد حسن نصرر الله
على راسي |
رد: ديوانية البحرين - دردشة حوامل البحرين - البحرينيات
تسلمي ياعمري طمنتيني الله يعطيك العافيه وجيك الفرج من كل مكان
ياررررررررررررررررررب ينصركم على كل من ظلمكم |
رد: ديوانية البحرين - دردشة حوامل البحرين - البحرينيات
على رااااااااااااااااااااااااسي وعيوني السيد
|
رد: ديوانية البحرين - دردشة حوامل البحرين - البحرينيات
*
السيّد حَسَنْ نَصْرُ اللّه ؛ ارَآكَ فَـ أسْمُو .. فِي قَدآسَةِ مـآ ارَى .. كأنَّ الليآلِيْ جَدّدَتْ فيكَ حيْدَرَة <3 ~ سَلآمَاً أبَـآ هَـآدي <3 |
رد: ديوانية البحرين - دردشة حوامل البحرين - البحرينيات
شلونكم اخباركم وحشتوني على طول كنتوا في بالي ما نسيتكم الله يفرج علينا يارب ويبعد الشر والسوء انه اختفيت كم يوم كنت عند اهلي وما قدرت اتواصل معاكم بنوته الحمد الله على سلامتج وسلامه زنووووووبه تتربى بعزج يا قلبي
|
| الساعة الآن 07:03 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .