|
رد: ديوانية البحرين - دردشة حوامل البحرين - البحرينيات
صبااااااااااح الخير
قاعده من الصبح اقراء سوالفكم يا ريت ما شفتها بروحي من الليل قاعده احاتي والا اشوف فلونه كلش نفسيه خربانه على الرضاعة ترى فلونة عادي اني ملاك اذا اعطيها صدر تمص مصه وتشيل راسها وترد تقولين ميراند تشرب وتلوع جبدي ام امبارح بالليل من تشم ريحه صدر تصيح تقلع المكان واذا عطيتها مرضعة عادي تشرب واني نفسيتي هالأيام زفت وخصوصا لما عرفت ان نتيجة التحاليل بتطلع اليوم واني حدي خايفة ما ادري شنو الشعور اللي فيني وكل سرحانه واطالع ملاك على عمري تمللت اني شهرين من شي لشي وابو صفار مو راضي يروح استغفر الله ولا بطت الجبد الكل يقول اعطيها ماي حندباء اعطيها ما ادري ويش خل امها تشرب واني ما خليت شي الا سويته واكي الياهلة حتى حليب صدري كرهته ولا يجي لي زوجي يقول انا ما اشوف ملاك تركز بعيونها ما تطالع يبغي يجلطني اقول اليه بله تطالع يقول لا يقصد بعيد الشر عميه اخذت خرخشانه وقمت اخرخش وقامت تطالع اقول اكي تشوف لا ويش فيك تبغي تقتلني انته بروح ملاك تصيح |
رد: ديوانية البحرين - دردشة حوامل البحرين - البحرينيات
السلام عليكم
مساكم الله بالخير في اوادم لولا؟؟ |
رد: ديوانية البحرين - دردشة حوامل البحرين - البحرينيات
شموس اقري على بنتش المعوذات وقت الرضاعه وقلنا ليكم النفسيه مهمه وقت الارضاع كرري نادي عليا مظهر العجائب.. ولي خمسة اهل العبا وتوسلي بهم وبتشوفين الفرج بأذن الله
كلما خفتون وارتعبتون زادت الحاله ياربي تستر عليي من هالاشياء عقب الولاده وتلهمني الهدايه والسكينه بشوفة طفلتي الجميله واللطيفه |
رد: ديوانية البحرين - دردشة حوامل البحرين - البحرينيات
شمس الصباح
بشري حبيبتي ويش نتائج التحاليل ،اني متأكده تحاليل بنوتتش زينه ماتوقعت إنتين بعد ياشموس تضعفين وإنتين إللي كله تساندينه وتخففين علينه لين ضاقت بنه الدنيه ،كوني قويه وتوكلي على رب العالميين وننتظر منش أخر الأخبار طفطووفه يارب تكونين بعد الولادة قوية وماتضعفين وتوسوسين قدام دلاعة زينة البنات على العموم يارب تجربين الأمومة ونشوف غفصتش وياها وتكونين أقوى أم فينه |
رد: ديوانية البحرين - دردشة حوامل البحرين - البحرينيات
رجعت ما ادري افرح لو اشدخ راسي بالطوف طبعا التحاليل ما رحت المستشفى خليت تطلعها لي زوجة حمي (مرة اخو زوجي) ودخلتها على الدكتور يقولون ابو صفار نزل بس طبعا ما راح والمصيبة الجديده دم ملاك نازل وبيغون يعرفون ليش دمها نازل واليوم اني قلت بروح المركز بعد برد اطلع التحاليل لان تحليل نقص الخميرة مو موجود في السلمانية وفي نفس الوقت بناقش الدكتور تمللت والله اني من دريت راسي دار ودمعتي على طرف حتى زوجي قلت اليه ما بروح بروحي ما اقدر اسوق راسي يدور لا تروح الشغل العصر كل ما احاول اصبر نفسي اشوف ملاك على قلبي يعورني قلبي ما تهنيت بولادتي ولا ارتحت هداني بكمل الشهرين واني بعدي ومن يوم هي عمرها ثلاثة ايام وهي تغزز ابر فيها على عمري يا ريت فيني |
رد: ديوانية البحرين - دردشة حوامل البحرين - البحرينيات
شموسة
صلي على النبي ،يعني التحاليل زينه ماعدا أبو صفار وهذا شيء غريب إنه للحين فيها وهي تقريبا بتكمل شهرين بس الحمدلله هيكو نزل ،وإذا على دمها وإنه نازل من رأيي صدق تتناقشين مع دكتور أخصائي بروح قوية بعيد عن النفسية السيئة والدموع ،أحس إن بنتش يبى ليها حليب صناعي مدعم بالحديد علشان يعوض نقص الدم إللي فيها لازم تتحليين بالشجاعة وتتفائلين أبو صفار عاادي حبيبتي ومادام ينزل شيء زين ومثل ماقلتلش شوفي دكتور يدلش على حليب صناعي مدعم بالحديد بالإضافة لحليب صدرش ولاتخافين أني بولدي علي للحيين دمه ناقص وهو نفس بنتش سوينه له تحاليل وهو صغير ومافيه شيء ماعدا نقص الدم والشحوب للحيين فية ولافية نقص خميرة ودائما تعوره رجايله وماعنده شهية للأكل واللحوم بكل أنواعها أخر شيء قالوا فيه عنده نقص في الحديد إللي في العظم الحمدلله أحس بنتش صايدتنها عين وإنتين بعد بس لاتركنين للقنوط واليأس وتحلي بالقوة والأمل ومافيها إلا العافية والليلة إقري زيارة عاشوراء وتوسلي بالإمام الحسين يشفع ليش في حاجاتش عند رب العالميين |
رد: ديوانية البحرين - دردشة حوامل البحرين - البحرينيات
مساء الخير اخباركم؟؟؟اتمنى الجميع ابخير وشكراً على وقفتكم معاي والله اعتبركم مثل خواتي حتى كل ماصار فيي شي نطيت عليكم ههههه اقول في نفسي اخاف وجودي عدكم يزعجكم وكون ثقيله عليكم ان كنت ازعجتكم قول عادي ماراح ازعل؟؟؟؟؟ حبيت استشيركم افكر بعد كم يوم اروح اسوي اشعة لان لم طلعت من المستشفى ماسوو الي وقلت فرصه اعرف اني حامل ابشنو ؟؟ فهل اروح او اصبر موعدي 15-4عند الدكتوره اف مره محتاره صيره اخاف من كل شي ياالله ياكريم لاتحرم احد من الدريه يارب
دعواتكم |
رد: ديوانية البحرين - دردشة حوامل البحرين - البحرينيات
هلا ومرحبا أم حسين الدار
أستغفر الله ويش هالكلام إنتين إخت عزيزة وغالية ووقت ماحبيتي تكونين معانه حياش الله في أي وقت ولو كل حين حياش إحنه خوات بنظل نحتاج لمشورات بعض أفه عليش وإذا عندش أي سؤال لايردش إلا لسانش بالنسبة للأشعه (الألتراساوند ) المفروض يسوونه ليش بعد كم يوم العملية المفروض إنتين تطلبين علشان تطمنين فقط ألحيين لاتروحيين مكان ولاتتحركيين وايد علشان نجاح العملية والتثبيت ،موعدش بعيد شهر ونص تقريبا ،أني من رأيي لاتطلعيين ألحين ولاتروحين مكان إنتظري إسبوعين على الأقل وبعدين روحي لأنه موزين واايد تتحركين إنتين توش ماكملتين إسبوع على العملية وإنتين بعد ساكنه بالطابق الثاني فتعب عليش ويارب كل أمور الجنين بخير |
رد: ديوانية البحرين - دردشة حوامل البحرين - البحرينيات
تسلمين خيتوه والله يعطيك العافيه وتشوفي جنينك ابصحه وعافيه يارب لا موعدي ربيع2 15-4-1432يعني بعد اسبوعين فالو ماعطتني موعد الى الاشعه بروح في نفس اليوم وبسوي اشعه ولم طلعت من المستشفى قلت اليهم ابغا اسوي اشعه على البيبي قالت لم دخلت تتنومين سويت اشعه وكل شي ابخير بس خلتهم اسمعوني نبضات البيبي انشاالله يارب كل شي ابخير اني احس ابترفيسات البيبي ووقت نبض قوي وهذه امطمنني ولااتحاتي امريحه مره بس صلاه وحمام زوجي اخد اجازه وساعدني في طباخ اني اقطع واني قاعده وهوالي يطبخ وغسل ونظف فديته ههههههههههههه اقول اذا الله سهل وقمت بسلامه بطلع اشغل من عين هههههههههههههههههه بس مايصخي علي
دعواتكم وانتي خيتو اخبارك؟؟؟؟؟ |
رد: ديوانية البحرين - دردشة حوامل البحرين - البحرينيات
هلا ومرحبا أم حسين الدار
هههههه،تصدقين حسبت الموعد مالش تاريخ 15\4 \2011 يعني بالإنجليزي لأنه إحنه مانحسب بالهجري من جدية قلت ليش موعدش بعيد مادام جدية إنتظري موعدش على اليوم إللي عطوش إياه ولاتحاتين وإنشاء الله كل أمورك وأمور جنينك بخير الله يخلي ليش زوجك ويفرحش وياه بتمام حملك ووصول حسين بالسلامة بولادة ميسرة يارب والله يعوض تعبكم خيرويخليكم لبعض بحق محمد وآل محمد الحمدلله مادام تحسي بعوارض الحمل وسمعوش النبضات تطمني أني حبيبتي الحمدلله بس ولدي من رجع من المدرسة وهومريض ويرجع وماأدري ويش فيه من العصر وهذي 3 مرات يرجع عطيته أدول وأمي الغالية دهنته وسوت له مساج خفيف تقول يمكن ماخذ بردوألحين رجعت من عند أهلي ومازال يرجع وأبوه في الشغل |
رد: ديوانية البحرين - دردشة حوامل البحرين - البحرينيات
حوامل وأمهات وينكم اليوم محد يبين منكم
أم السادة يارب ولدت اليوم طفطووفه وينه غايصة اليوم باقي الربع وينكم أني ولدي مريض وضايقه بي الدنية كل حين يرجع تعالوا قولوا لي ويش أسوي له حتى مرقدوش عطيته |
رد: ديوانية البحرين - دردشة حوامل البحرين - البحرينيات
هلوووووووو شكله الليله ما فيه سهره
|
رد: ديوانية البحرين - دردشة حوامل البحرين - البحرينيات
سلااااااااام احلام ام اني مو قصدي اني اقنط ابدا ودائما احمد ربي على كل شي حتى لو مرض بعد الحمد لله بس مجرد تعبير واني تمللت وضاقت خلقي وما عندي الا انتو انفس عن نفسي وبخصوص الحليب اللي استخدمة مدعم بالحديد المهم اليوم جهزت نفسي علشان اروح المستشفى وجتني حماتي في الوقت الضايع وقامت تعطي نصايح واني ساكته ولا تبط جبدي تقول انتو ما تعرفون تربون يا ريت اني تحتش واني كل ساكته وطامه حلقى اقول هي ضيفه واكبر مني لازم احترمها وكل واحد يهدر بكيفه ما اطول عليش رحت المركز واستغربت الدكتورة من نتيجه التحاليل وللحين ما راح ابو صفار وطبعا طلع تحليل نقص الخميرة ضيعووه وبعدين اتصلت الي دكتور ثاني قررت مع الدكتور يحولوني على الطوارئ السلمانية وجيت البيت بس صليت وردينا رحنا السلمانية وخليت ملاك على السرير علشان ياخذون الدم الا الممرضه ما قبلت تاخذ دم من ملاك تقول ان الياهله نشيطة وما يحتاج وقامت راحت الي الدكتورة مع دكتور ثاني وبعد نقاش دار بينهم الا يقولون بنعطيش تحويل على اخصائي اطفال في الصبح وما بناخذ دم اليوم بس قبل الموعد باربعة ايام تعالو واخذو تحليل اليها واني نفسيتي كلش وقلت لزوجي لا تقول لي ان امك لو اخت لو اي احد يقول اعطيها ماي لو شي اكو انت سمعت ويش قالو مو كل واحد يفتي انتو ما تعطونها ماي يمكن حليب امها مو زين خل امها تشرب ماي حندباء وترضع وترد تقول خلها تشرب ماي الحيج كاني اني وبنتي معمل تجارب قلو اليهم اذا صدق يحبون ملاك خلهم بس يطلبون اليها طبعا اني كلامي هذا لان كل وحده تقول شي يعني اخته اليوم لما حت مع اني احبها الا تقول يمكن تعطونها بس ماي ما تعطونها ماي الحندبان قلت عطيتها ردت على النباته ونفس الشي قلت اعطيها قالت يمكن حليب صدرش ما يناسبها قلت اليها اكو اخوش قاعد اسئليه قدامه بنتي ما تبغي صدري تشرب صناعي اكثر من حليب صدري ردت يمكن ما تعطينها ماي مسكينه انتو ما تعرفون تربون يعني ويش اقول اني هذة مو اول طفل اربيه عندي ولدين الله يحفظهم بس سكت عنها قلت في نفسي الواحد ما يحس الا بالنار اللي تلسعه ما يحس بنار غيره اااااااااخ المهم طولت واايد عليكم وعورت راسكم سامحوني عورت راسكم وتمللتون مني بس ما عندي الا انتو افتح قلبي ليكم |
رد: ديوانية البحرين - دردشة حوامل البحرين - البحرينيات
حبيبتي شمس الصباح
أسفة حبيبتي بس شفت نفسيتش تعبانه الصبح قلت أحاول أخليش تتفائلين وإنتين صدق لازم تتفائلين بس شكل حمواتش وعمتش مضايقينش ومزيدين تعب نفسش أعرفهم حمواتش ماتقدرين تراددينهم وزين سويتين سكتين عنها قالت ويش ماتعرفين تربين تقهر لاكن ويش تسويين مالش إلا الصبر أشوه مو تحت بيتكم إنجان أعظم صبري مو كل يوم تروحيين يسحبوون منها دم وشكله تحليل الخميرة يتأخر في الظهور أكثر من باقي التحاليل وخلي كل شيء على رب العالميين ويارب مافيها إلا العافية فضفضي حبيبتي ترتاح نفسيتش ولاتقوليين إنش تضايقينه بكلامش |
رد: ديوانية البحرين - دردشة حوامل البحرين - البحرينيات
لا احلام ام لا تتأسفين اني ما زعلت منش ابدا
تعالي على سالفة ولدش يرجع وديه المستشفى بيعطونش اليه دواء افضل لان الترجيع يتعب الياهل |
رد: ديوانية البحرين - دردشة حوامل البحرين - البحرينيات
شمس
أني إختي لمن ولدت بأخر مولود عمره ألحيين 8 شهور ولدت في التخصصي البحرين وقالوا فيه أبو صفار تأذت كل يوم تروح يسحبون دم يجيكون وتالي مانزل راحت المستشفى الإمريكي وفحصوه ورقدوها وياه وخلوه في الحاضنه وياها وكله عليه الضوء إللي يكسر أبوصفار ويعابلونه يومين وقالوا راح منه أبو صفار مع إنه جابته يوم من التاسع صدقيني أبو صفار يروح بس لو مهتميين من قبل المستشفى بها ومتابعينها إنجان ماتعبتين جديه أمنى أشوفش بشوشة الصغيرة مافيها إلا العافية إنشاء الله |
رد: ديوانية البحرين - دردشة حوامل البحرين - البحرينيات
ويش أسوي حبيبتي
الولد من رجع من المدرسة وهو تعبان ويقول فيه نومه مع إنه ماينام الظهر وخليته ينام ومن قعد بعد لابانكة مشغلة ولامكيف وقف وراسه داير وماأسمع إلا يرجع بقوة وأشوه أرضية غرفتهم موزولية ويش لاعت جبدي ربطت خشمي بقطعه خلق معطره وأنظف المكان وأرد من المغرب رحت بيت أبويي ويإختي ويرد يرجع في السيارة وأمي على عمري قامت تمرخه وتذهنه وتقولي ماتعرفين له الياهل يبى له عناية ضحكتني وتقول خلاص مابيرجع ومن رجعت البيت رد يرجع وألحيين نام وبطنه خلي الله ويايي الليله عطيته أدول وماي مرقدوش ومن ياكل يرجع معور قلبي أبوه مو في البحرين في السعودية ومادري ليين رجع يقدر نوديه المستشفى أو لا |
رد: ديوانية البحرين - دردشة حوامل البحرين - البحرينيات
اي والله لو من البدايه مهتمين ما صار جدي بس وش تقولين هذا اهمال منهم حتى تحليل نقص الخميرة ضيعوه اختفى يعني لازم تحليل من يديد
|
رد: ديوانية البحرين - دردشة حوامل البحرين - البحرينيات
الله يساعدش اذكر اني لما مرض ولدي الصغير وقام يرجع لاعت جبدي وغير انه يكسر الخاطر
بس لا تعطينه ماي اذا رجع مو زين لانه بطنه فاضي |
رد: ديوانية البحرين - دردشة حوامل البحرين - البحرينيات
بعد شوي باوديه الطوارىء لأن أبوه رجع شوي وبيوصل
باقعده ماأقدر أخليه جدية صايرخلقه مرمية ولازم حمود بعد ناخذه لوإخته هنيه إنجان خليناه بس هاجرت الدراز وياخواتي من عصر |
رد: ديوانية البحرين - دردشة حوامل البحرين - البحرينيات
ما عليه شر طمنيني عليه
|
رد: ديوانية البحرين - دردشة حوامل البحرين - البحرينيات
المشكله هو من يصير شوي زين يقول جوعان ومن ياكل بعد ربع أونص ساعه يرجع بس إنشاء الله مانتأخر لأنه أبوه يعرف الدكاترة في الطوارىء
|
رد: ديوانية البحرين - دردشة حوامل البحرين - البحرينيات
إتشاء الله حبيبتي من نوصل باطمنش باقوم أستعد وألبسه
|
رد: ديوانية البحرين - دردشة حوامل البحرين - البحرينيات
الله وياش يحفظكم الله
برررررررب برضع ملاك |
رد: ديوانية البحرين - دردشة حوامل البحرين - البحرينيات
على قلبي اختي احلام مااشوف شر يمكن عنده جرثومه في المعده لان بنت اختي بعد من يومين نفس اشي وكل مااكلت تستفرغ قالو اليها عندها جرثومه في المعده عدوه جيتنها من المدرسه يارب ماعليه الاالعافيه
اختي شمس الصباح انشاالله البنوته ماعليها الاالعافيه اختي ولدت في صفر وجبت بنت وكان عنده ابو اصفار خفيف بس لان الانور حق بيتهم كلها صفره فزاد عليها ودتها المستشفى ونوموها يومين خلو اعيونها امغطيه والحين الحمدالله احسن وبنسب الى الحليب اختي ماعندها غير صدر وحد لان الثاني مشيول كان عندها سرطان الله يكفي الجميع الشر وبطلعو الروح ترضا تشرب وتبغا كل المرضعه بس اختي اتحط المرضعه اشوي في بوزها وبعدين اتشيلها على طول وتحط صدرها وتشرب بس مااتحب تسمع ضجه وهي ترضع يعني على طول اتصيح ولاترضى ترجع ترضع الله اطمنكم على اولدكم يارب ويرزق الله كل محرومه يارب دعواتكم |
رد: ديوانية البحرين - دردشة حوامل البحرين - البحرينيات
سلام بنات ديرتي شخباركم
|
رد: ديوانية البحرين - دردشة حوامل البحرين - البحرينيات
صبااح الخير على عيونكم
تسلموون حبيباتي شمس الصباح وأم حسين الدار شموسة توني راجعه من الطوارىء والحمدلله الولد عطوه أدوية عن الترجيع ومحاليل الجفاف والأدول وياارب يصير زين الدكتور قالي إشتري 4 قواطي سفن أب وحطي محلول الجفاف فيهم وعبيهم في غرشة وضلي شربيه منهم وقال هذا ناتج عن تغيرات الجووياارب يساعدني في علاجه ويتقبل يشرب الأدوية والمحلول على عمري طلعنه من الطوارىء ويقول يبى سندويشة كبدة ومن إشتريناه له حطها على بوزه وسيده قال ماأمبى فيي نومة ولاأكل شيء بس ماي وشوي من المحلول ويارب ينقطع عنه الترجيع أم حسين الدار ألف سلامة على إختك ماتشوف شر بحياتها وتربي أولادها بالصحة والعافية يارب وربي يهديهم ليها وإنتي بعد ربي يتمم لك فرحتك ياارب ويحفظكم بعيونه إللي ماتغفل ولاتنام عن إذنكم باقوم أطلع صدقات وأحاول أناام تصبحوون على خير |
رد: ديوانية البحرين - دردشة حوامل البحرين - البحرينيات
احلام ام شخبار الولد ما يجوف شر داومي على السفن اب والادويه وان شاء الله يخف الترجيع عليه وين البنات اليوم ما لهم حس شكلهم تعبانين او مشغولين
|
رد: ديوانية البحرين - دردشة حوامل البحرين - البحرينيات
اتصدقي والله فيي النوم بس مااقدرات انام قبل لااطمنيني على ابنك الحمدالله على سلامته وانشاالله اخر السوء يارب اشوفك اليليه على خير تصبحو على خير ياحلوين الله اسهل عليكم يارب
|
رد: ديوانية البحرين - دردشة حوامل البحرين - البحرينيات
صبااااح الخيرات
صعب تنساني مشكورة حبيبتي وإنشاء الله نداوم على المحلول والأدوية وهو بدون شيءيحب السفن أب بس هذا في دواء ولاكن بعد مقبول طعمه أم حسين الدار أسفة حبيبتي شغلت بالش ويايي ومشكورة على مشاعرك وقلقك على ولدي الحمدلله اليوم ماأشوف رجع يمكن لأنه ماأكل شيء يستحق يرجعه بس أتمنى خلاص مايرجع ويصير بطل يسمع الكلام مانمت زين للحين فيي النومة بس لازم أقوم أتابعه ،واليوم الجمعه لازم أروح بيت أبويي بس خلاص هناك مافي نوم كله إزعاج هههههه باقي الحوامل والأمهات ويش صاير الديوانية صايره ليي بروحي على العموم يارب أخباركم أحسن مايكون أشوفكم على خير |
رد: ديوانية البحرين - دردشة حوامل البحرين - البحرينيات
السلاااااااااااااااام
امبارح كل ما ادخل ابغي اطمئن علي ولدش احلام ام الاب توب يشير شكله يبغي اليه برمجة الحين استخدم كمبيوتر البيت لان محد قاعد عليه الشباب في الجامع يالله ان شاء يكون اليوم احسن ولا يرجع بس حاسبي عليه لان احتمال يرد يرجع مرة ثاني بعيد الشر مثل ما صار الي ولدي وحاولي تخلينه يشرب عصاير وشوربه لانها خفيفة على المعده وما عليه شر الله يساعدش اليوم ولا امس لا طف طووووف ولا غيرها ليهم حس اعتقد ام الساده ولدت لان كلش ما دخلت بس باقي البنات كلش ولا حتى سلاااام وخصوصا طف طووووف مع روز فلونة ويش اخبار البنوته ام حسين الدار مشكورة حبيبتي وربي يتمم عليش وتشوفين ضناش في حضنش |
رد: ديوانية البحرين - دردشة حوامل البحرين - البحرينيات
سلام.. جمعة مباركة على الجميع
بنات انا البارحة مارقدت ويا بنتي حدها مريضة ترجيع واسهال وصدرها يخرخر وكل ماحاول ارقدها تغط خمس دقايق وتفز من النوم تصيح من قمة راسها .. طلعت الساعة ثلاث بوديها العسكري ومادري شقول عن هالامة التعبانة ما رضو يدخلونه يقولون عندهم حالة طوارىء وناس وايد كانو هناك والجيش محاصر المكان.. وخفت اوديها مكان ثاني يلعبون فيها ومايعرفون لها احين ابي اوديها العصر حق عيادة ابي دكتور اخصائي اطفال مادري احلام ام او شمووس قلتو عن دكتور اسمه حسن في رويان ريلي حاول يسأل ويطلع رقمه علشان نعرف اوقات العيادة مالته خصوصا اليوم الجمعة ما يندرا يفتحون او لا بس مايرد اذا تعرفوون مكان زين اوديها لانه من البارحة واصلة حدها وانا اطالعها واصييح مادري شسوي لها :( |
رد: ديوانية البحرين - دردشة حوامل البحرين - البحرينيات
رجعت ادور في الردود وجفت شموس اهي الي ودت ملاك حق دكتور حسن وريلي من الصبح للحين يتصل على العيادة علشان ناخذ موعد محد يرد :(
مادري شسوي |
رد: ديوانية البحرين - دردشة حوامل البحرين - البحرينيات
السلام عليكم جمعة مباركه عليكن
احلام ام مايشوف شر وعليش بالسوائل لانه الترجيع يسبب جفاف اسم الله عليه علا طول سوائل وسوي له مضروبه علا طماط تيود بطنه شموسه هدي نفسيتش انتين الاقوى الصبر زين وان شاءالله بتصير ملوك زينه وماعليها شر فلونه دكتور محمد الساعي في العدليه وايد زين ادا تبين رقمه بشوفه لش عند امي لانه هدا جارنه وعلا طول البيبيات عدنه يتعالجون عنده* |
رد: ديوانية البحرين - دردشة حوامل البحرين - البحرينيات
هلا رووز،، الساعي بعد وايد اسمع عنه وامي تقول زين عطيني رقمه اذا ماحصلت دكتور حسن باوديها له بس المشكلة اليوم الجمعة ومادري امتى تفتح العيادات
|
رد: ديوانية البحرين - دردشة حوامل البحرين - البحرينيات
فلونة اسم الدكتور حسن علي زين الدين وهو استشاري امراض اطفال وجهاز الهضمي والكبد والتغدية
رقم العيادة 17593177 وهو ما يفتح الا العصر |
رد: ديوانية البحرين - دردشة حوامل البحرين - البحرينيات
وبعد فيه دكتور ثاني ويااه في العيادة وهو دكتور نادر محمد حسن دواني استشاري امراض اطفال وخدج ومواليد وربو نفس رقم العيادة بس حاط رقم تلفونه وهو 39626006
|
رد: ديوانية البحرين - دردشة حوامل البحرين - البحرينيات
فلونة اني كنت بقوم لان ملاك تصيح بس بقول ليش شي ترى السلمانية يهتمون بالياهل انتي الحين اذا ما حصلتين عيادة فاتحة روحي طوارئ السلمانيه هناك في عياده اطفال لا تخافين واذا ما عجبش كلامهم اطلعي وروحي الخاص ما عليش شر
برررررب ملاك تصيح |
رد: ديوانية البحرين - دردشة حوامل البحرين - البحرينيات
شموووس ..انا ماكملت لكم قصتي البارحة عقب ماطلعت من العسكري رحت السلمانية الطوارىء والدكتور جافها حرارتها مرتفعة وصدرها يخرخر حده ورجعت اهناك على دفتي وعفست المكان بالزوع ويقول لي مافيها شي كلشي طبيعي اقوله هالصوت من صدرها طبيعي والزوع الي مايخلص والاسهال ..قال خل نوزنها والميزان الانتيكة الي اهناك كل مرة احطها يطلع وزن غير وخلاني اتوتر زوود مرة يزيد وزنهاا ومرة ينزله في القااع وانا خفت ان وزنها قل من الولادة وبغيت استخف .. اللهم سوولها بخار وقال لنا مع السلامة
وللحين على حالتها.. بحاول اتصل في العيادة مع انه مايردون وريلي عنده رقم موبايل دكتور حسن دايركت بس مايرد.. وانا خايفة اليوم مايفتحون الجمعة وباجر السبت اجازة بعد دعووواتكم بناات محتاجة لكم |
رد: ديوانية البحرين - دردشة حوامل البحرين - البحرينيات
فلونة اني شفتش في السلمانية مفرش بنتش برتقالي لا
اني اللي قلت اليكم تعالو هالسرير افضل |
| الساعة الآن 08:01 AM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .