منتديات حوامل النسائية - تجمع حوامل المدينة المنورة

صباح الخير أخواتي جزاكم الله الف خير وأسأل الله عزوجل في هذه الايام الفضيلة أن يتمم لكم حملكم على خير ويرزقكم ساعة ولادة سهلة ويحقق مبتغى كل وحده فيكم يااااااااارب ويخليلنا ازواجنا واولادنا ويجعلهم قرة عين لنا ياااااارب
( قصة ولادتي )
طبعا انا ساكنة بالجبيل وكنت اراجع بمستشفى الهيئة الملكية هنا عند استشاري وبنهاية الشهر الثامن قررت انزل المدينة عشان اختار المستشفى والدكتوره اللي ح اولد عندها وكان اكبر هم شايلتو هوا فيييين وعند مين وكنت خايفة قرأت التجمع من أول صفحة وقصة كل عضوة وتجربتها مع دكاترة ومستشفيات المدينة احترت استخرت واخترت
مستشفى المدينة للولادة رحت طبعا من الطوارئ لأن ماعندي ملف واول مادخلت زحمة والحريم ع الكراسي جالسين ينتتظرو وهم على الآخر واللي تصرخ واللي نزيف والدكتورة بس وحدة ومعصبة ولمن دخلت عندها سألتني في بوادر ولادة قلتلها لأ بس بفتح ملف وقالولي لازم اول امر ع الطوارئ قالتلي وهيا تتريق جاية ليه تبغيني اولدك غصب بعدها قالتلي استني وراح اناديكي نادوني جلست ع السرير شوية جات بنوته سعوديه صغيره عمرها يجي 18 سنة مكياج وبنطلون جينز واكسسوارات ومناكير ولابسة بالطو ابيض قلتلها انتي بتكشفي عليا قالت ايوا شوية دخلت الدكتورة كشفت عليا لقت الرحم مقفول وقالت للبنت تعالي شوفي دي رحمها مسكر جات البنت دخلت يدها عورتني والله يابنات جرحتني انا هنا صرخت عليها وقلتلها عورتيني شوية اشوف يدها فيها دم قلتلها جرحتيني وشوية اسمع صوت الدكتورة نفسها تنادي البنت اللي كشفت عليا دخلوا على اللي جنبي وتقولها دي رحمها مفتوح حسي الراس والشعر........
اتاري البنت تدريب من كلية الطب وجايين يتعلمو فينا انا هنا وصلت معايا قمت لبست عبايتي وانا معصبةhwaml4 وصرت ابكي وخرجت من غير مااكلم احد ولاملف ولاغيرو صارو ينادوني الممرضات وانا ماارد على احد واقول بنفسي ماعاد افكر بالحكومي..
الخاص افضل لي ..
هذا مركز تدريب طبي مو مستشفى..
على اللي يجيهم مرة تانية ...الخ
رحت البيت جلست استشير واستخير نصحوني بالمطبقاني اللي هيا المدينة الوطني عند دكتوره اسمها نجمة باكستانية لمن رحت كان زحمة عندها اول ماجا دوري ودخلت لقيتها كبيرة في السن ومعصبة واول ماشافتني هبت فيا وقالت (بالانجليزي طبعا) انا خلاص بستقيل انا تعبت قلتلها أنا حالة عندك مطلوب منك تكشفي عليها اذا عندك مشكلة بالعمل مو تعصبي وتنفعلي عليا روحي لمديرالمستشفى وقوليلو هادا الكلام انا بكرية وقيدي خايفة ولاتعقديني( بالانجليزي طبعا) أشوى نفعني الانجليزي المتواضع اللي عندي hwaml23
انا عصبتhwaml4 وقلتلها خلاص لاتكشفي عليا انا دحين خارجة اقول للمدير اللي صار
خافت وصارت تقوللي خلاص انا آسفة بس ضغط العمل ومن دا الكلام كشفت عليا بيدها بس ومن فوق بطني بس !!
تخيلوا يابنات لاسمعت النبض ولاطلبت تحاليل ولاشي؟ شوية راحت جلست ع المكتب انا لبست ورحتلها ؟؟؟ قالتلي البيبي راسه لسا مانزل يبغالك اشعة رحت سويت اشعة ورجعتلها بالاسبوع الثاني بالتاسع وكانت بتنزل علي مويه قولتلها مااهتمت و قالتلي البيبي راسو لسا مانزل بالحوض بعرضك عل استشاري اسمه هشام بنفس المستشفى ورحنا انا وزوجي للاستشاري شاف الاشعه اكد كلام الدكتوره وقاللي لازم عمليه قيصرية ؟؟؟؟
خفت وصرت ابكي قال روحو امشو ولين بكره زي هادا الوقت لو ماجاكي الم ولادة تعاليلي على طول عملية ؟؟
رحت مشيت مع زوجي وانا خايفة وابكي صاريهديني ويقوللي سيبها على ربنا اكيد ربي راح يسهللك ويكتبلك اللي فيه الخير لكي ولبنتنا؟ رحت البيت الساعة 12 مساء تقريبا والموية تنزل شوية شويه امي الله يرحمها لمن شافتني كدا اعطتني كف مريم وصرت اشربه وامشي بالبيت الساعة اربعة الفجر قالتلي امي خلاص طالما الموية بتنزل اكيد الرحم انفتح روحي المستشفى واتصلت على زوجي ورحنا مستشفى الولاده أكيد استغربتوا لييييييييييه ؟؟؟
لأن خالي دكتور كان بمستشفى الولادة ونقل الرياض اتصل على زوجي بساعتها وقاله روحو مستشفى الولادة المستشفى على مستوى عالي من الاجهزة والخبرات الطبية اللي فيها وللبكرية أفضل يستنو عليها ومجهزة بأفضل الاجهزة ودائما الحالات الصعبة اللي بالخاص يحولوها للولادة للتقنيات والدكاترة الخبرة اللي فيها .

توكلنا على الله ورحنا الطوارئ وانا ابكي وخايفة وخصوصا بعد اللي حصل المرة الاولى وصرت ادعي الله عزوجل ان تكون مو نفس الدكتورة اللي اول ولمن رحت لقيت بالطوارئ دكتورة اسمها سمر مصرية زي العسل
طبعا لمن الدكتورة قلتلها الموية بتنزل ليها يومين اتفاجأت وقالتلي ايش اللي مأخرك لآن معناه ان الرحم مفتوح ومش كويس عشان البيبي وهادي فيها تنويم على طول ونومونيhwaml21 وراح زوجي جاب أمي الله يرحمها وجلست معايا بغرفة التحضير للولادة لين الساعة 12 الظهر الرحم مفتوح 2سم بس مافي طلق ولا اي الم طلعوني التنويم بالدور الثالث بعدها صار ينزل شوية دم بس مافي طللللق ابدا ولا كنت عارفة كيف الم الطلق؟
صرت امشي بممرات المستشفى واشرب كف مريم الساعة 6 المغرب انفتح الرحم 5 سم وحسيت بألم فظيع مايخليني اقدر اجلس وعرفت انو هوا هادا الطلق؟
وكنت اتأللللللم نزلوني بسرعة لكشك الولادة والحمدلله مافي ساعة الا والرحم انفتح والبنوته نزلت على طووول وبدون اي تعب ولله الحمد طبعا وربي سخرلي دكتوره هندية طيبة (مااتذكر اسمها والله) وخياطتها كانت رووووووووووووووووعة
طبعا بنوتتي الحلوة خلوها بالحضانة تحت الملاحظة ثلاث ايام ماتخرج منها ابدا عشان الموية اللي نزلت فترة قبل الولادة قالو احتمال عملتلها التهابات سوولها مزرعة وكانو يعطوها مضاد حيوي كل سته ساعات عبر الوريد والابره كانت بكف يدها الصغيره
والله حزنتني
انا كتبولي خروج تاني يوم بس عشان بنتي ماقدرت اسيبها واخرج قلبي ماطاوعني ولازم ترضع كل ثلاث ساعات حجزلي زوجي بالجناح الخاص فوووق عشان خاطر نوااارة حياتي
فعلاً يابنات ( انت تريد وانا اريد والله يفعل مايريد)
الحمدلله هو ارحم الراحمين

بس كلمة حق تقال المعاملة بالمستشفى راااائعة والتمريض بنات سعوديات زي العسل والنظافة فوق الوصف والحضانة ممتازة وشي مريح للنفس والله

شفتو الخاص وعمايلهم فجعوني وقالولي البنت راسها مانزل ولا اهتمو بالموية اللي نزلت وقررولي عمليه قيصرية ......
سامحوني طولت عليكم بس هادي قصتي بالتفصيل و اترك لكم الرأي والتعليق