منتديات حوامل النسائية - دردشة بنات المدينه المنوره

مساء الخير ...

كيفكم كروشات لبى قلوبكم والله وحشتوني وااااايد واليوم جايه ومعاي الاكشن بتاع ولادتي رغم ماودي اتذكر شيء بس لعيونكم ...
يوم الجمعة الموافق 5/2 كانت اختي مواعدتني ببيت ماما ع اساس نروح العالية المهم انا رحت بيت اهلي بس اختي ماجات المهم عدا الوقت وانا انتظرها ولكن للاسف والافندي نزلني وراح قلت لو جاء بدري انا نزلت وحدي وكملت اغراضي الناقصة وفعلا الافندي ما جاء الا ع الساعة 11.30 ومافي وقت اروح السوق قلت اعوضها يوم السبت ورحت بيتي الساعة 12.30 بالتمام انا ببيتي وكنت وقتها مرهقة لاني صاحية قبل صلاة الجمعة وفييييني نوم مو طبيعي الا احس الام اسفل بطني وعظمة الحوض زاااااد مرة لانة من الثامن وهالالم معاي الا احاول انام مو قاااادرة لا ع ظهري ولا جنوبي وصرت احس برطوبة من اسفل واقوم الله يكرمكم اروح الحمام الا وش اشوف مويا تنزل مني مع شوية دم انا مو مصدقة المهم اغسل واخرج واقول ممكن انا يتهي لي الا وشوي زادت وزوجي قال وش فيك رايحة جاية ع الحمام قلت مدري شكلها ولادة قال انتي موسوسة الا يوم قلت دم قال بسسسسسسسسسسرعة البسي عباتك وع المستشفى واروح طواري الالماني وكان وقتها الساعة 1 بالليل وتجي الدكتورة ايمان دكتورة طواري نساء وكشفت علي وقالت 3 سانتي ونص بس ماراح تخرجي نكتب لك دخول قلت لا بروح وارجع قالت لازم نركب لك محلول ونعطيك مضاد عشان المويا اللي نزلت قالت طيب انتي تراجعي عند مين قلت الهام قالت يعني ما تبغيني اولدك قلت لا مو كذا بس دكتورتي فاهمة وضعي قالت اوكي انا اتصل ع الهام المهم هي راحت تتصل ع الهام وانا اتصل على جوالها وترد علي واقول يادكتورة انا بالطواري تعالي لي قالت خلاص دحين يعطوك مضاد ومحلول وانا اجيك لا تخافي واتوكل ع الله واطلع فوق يركبون لي محلول وتسوي لي الممرضة اختبار حساسية عشان المضاد وبعدين تاكدت وحطت المضاد بالمحلول وانا طول الوقت ادعي واستغفر ربي واقراء ايات وكل ماحسيت بشيء اتصلت ع الهام والالم كان معاي كل ربع ساعة الا شوي زاد كل عشر دقايق وشوي كل خمس دقايق والدكتورة ايمان الله يستر عليها كل بعد شوي تكشف وتكلم الهام الا ع الساعة 5 ونص الفجر قالت هيا حضرو الكشك للممرضات وتتصل ع الهام تعالي بسرعة فتح الرحم وانا بجوالي بسرعة يادكتورة تعالي قالت اوكي وادخل الكشك ومعاي الدكتورة ايمان وانا اصرخ من الالم وابكي انا بموت بموت من الالم قالت ايمان بعيد اشر عنك حبيبتي هيا ادعيلي معاك وادعي لكل اللي تحبين الا وجات الهام تركض هيا بسرعة نادو دكتور التخدير وانا اصرخ ابغى المسكن الالم موتني وتمسك يدي الهام وتقول اقري سورة الانشقاق قالت لها ايمان هي ماشاء الله عليها من اول تقراء الا الهام تكششف وتفتح المويا وانا احس الالم زاد الا وشوي احسهم حطو حاجة دافية ع المنطة من تحت مو عارفة ايش وبعدين خدرتني عشان شق العجان ومجرد ما حطت ابرة التخدير وانا اصرخ بكل مافيني والممرضة جابت المسكن وحطتة بيدي ودكتور التخدير فوق راسي ومجرد مفعول البنج والمسكن اشوفهم يدرون حولي وبعدها ما اذكر وش صار بس سمعت صوت البيبي يبكي واخذتة تحممة لكن ماحسيت بطلوع الراس ولا غيرة الحمدلله وكانت ولادتي ع اذان الفجر بالتمام يعني بداية يوم السبت 6/2 ونقلوني ع غرفة الافاقة ووقتها كنت ابكي من كل قلبي بس ما ادري ليش الا زوجي واخوي وامي والدكتورة ايمان حولي يقولون لي وش فيك تبكين قلت ما ادري وقالوا نجيب البيبي تشوفية قلت لا ما ابغا اشوفة وع 9 الصباح نقلوني غرفة خاصة والحمدلله ع كل حال .... وع فكرة ما اعطوني حقنة شرجية الحمدلله لاني اكرها..
الااختي تتصل علي لمن فقت وتقول الحمدلله اللي ما رحنا السوق الا كان وقتها ولدتي علينا ..
واول ما راجعت الدكتورة بعد اسبوع قلت دكتورة قبل اي شيء اكتبي حبوب الحمل لي بالاول وجلست تضحك علي ...
وع فكرة كروشات والله دعيت لكم كلكم وقت الولادة وبالذات سوما كنت مفتكرة حتى صورتها الرمزية مدري ليش ممكن عشان عند نفس الدكتورة ودعواتكم لي ولعيالي ربي يصلحهم لي وعقبال ماتقوموا بالسلامة وتفرحوا بشوفة قرة عيونكم واسفة ع التاخير لاني كنت امر بظروف صعبة

لكم ودي وحبي