|
رد: تجمع حوامل ليبيا
اما بالنسبة لأخباري فأني والحمد لله جبت يوم 15 - 8 بعملية قيصرية قبل موعدي باسبوعين جبت وليد سميته فراس
|
رد: تجمع حوامل ليبيا
وقصة ولادتي كالتالي : يوم الاثنين 9-8 كانت عندي مراجعة عند دكتورتي في الطبي وبعد ما دارتلي الجهاز قالتلي بما ان البيبي قاعد فارسي وانتي خشيتي للاسبوع 37 لازم نحددلك موعد للعملية وراه عندك دخول للمستشفى يوم الخميس 12-8 يعني ثاني رمضان تخيلوااا
واني نفطر مع عزوزتي المسكينة عايشة بروحها مع ولد حماتي بس تخيلو فطرت معاها اليوم الاول بس وثاني يوم خليتها متغششة عليا لدرجة لنها تعبت بقلبها ودارولها قسطرة واني راقدة في المستشفى وما ندريش عليها.. قعدت في قسم رعاية الحوامل يوم الخميس والجمعة والمفروض يوم السبت عمليتي لكن شحطوني الله يسامحهم بحجة ان نبض البيبي عندي كويس وعمليتي مش طارئة وبجو ايدخلو في حالات طارئة وعاجلة واني فاتوني ملوحة في الملاحظة بهاذاكا البالطو متاع العمليات وطوبو البول حاشاكم راكب فيا وممنوعة من الاكل والشرب وعالحال هذا يومين |
رد: تجمع حوامل ليبيا
وراجلي امداير مشكلة برا المستشفى يبي ايطلعني اندير العملية في اي عيادة وهما ما بوش ايطلعوني خايفين من المسؤولية ..
لحد يوم الأحد الساعة 11 في الليل بدت فيا وجيعة جياب من كثر التنرفيز .. وراجلي المسكين بايت في جردينة الطبي يومين مشغول باله بيني وبين والدته وهو لا سحور لا فطور.. المهم يوم الاحد الساعة 11.30 دخلوني للعمليات بعد حرق اعصاب مش طبيعي ودارولي البنج النصفي واني في فمي دعاء بصوت عالي (يارب .. سبحانك ما أحلمك .. زبخالي ما أعلمك .. وعلى تفريج همي ما أقدرك .. أنت ثقتي ورجائي .. فإجعل حسن ظني فيك جزائي)والله يا بنات ما نحكيلكمش هالدعا قداش اعطاني راحة نفسية وحول مني رهبة العملية والجياب فعلا فعلا (ألا بذكر الله تطمئن القلوب) |
رد: تجمع حوامل ليبيا
يارب .. سبحانك ما أحلمك .. وبحالي ما أعلمك .. وعلى تفريج همي ما أقدرك .. أنت ثقتي ورجائي .. فإجعل حسن ظني فيك جزائي
|
رد: تجمع حوامل ليبيا
الساعة 11.55 دقيقة ليلا يعني قبل ما ايخش يوم 16-8 طلعو وليدي من بطني بقدرة المولى والحمد لله وسميته فراس لأنه قعد في بطني فارسي وما باش ينقلب
طلعت من المستشفى بعد 3 ايام وعزوزتي طلعت بعدي بيومين والحمد لله درت لمتين في شقتي بعد الولادة بعشرة ايام وحاليا نكتبلكم في هالكليمات وبنيتي سرورة راقدة يميني ووليدي فراس راقد يساري ومليون حمد وشكر لله على كل حاااال .... ولنا عودة انشاالله |
رد: تجمع حوامل ليبيا
الف الحمد الله على سلامتك يا ام روفيدة ويا سورنيام وان شا لله يتربو فى عزكم والعقبة الى عقبة الشلة هاتو وعيون راجالها اية ان شالله تجيبن وتريحن وانشالله ربى يفرج على وعلى ام اسيل وحبل الوصل وميمونة والمعراج ونحملو ونجيبو ونحكولكم على قصة اجيابنا قولنا امييييييييييينo |
رد: تجمع حوامل ليبيا
سمااااااااااااااح وينك
الهندية ايش فيه من جديد ايش صار فى الحمل احملتى ولا مازال ام لقمان ايش اخبارك ياشيختنا نبى اخر موعد لدورتك انتى وساجدة ههههههه ميمونة وين وين ياصقع نورتى المطبخ فى شهر رمضان ايش تقربلك منال العالم |
رد: تجمع حوامل ليبيا
اللهم امييييييييييييييين
|
رد: تجمع حوامل ليبيا
سورينام الحمد لله على سلامتك
وربي يحفضلك عزوزتك ولله نادر يكون فيه هكي بالله مانوصيكش عليها حطيها في عيونك والله حبيتها من حبها فيك ربي يحميها ويحمي زوجك ووالله اتاثرت بقصتك وعيوني دمعو اهم شئ انك جبتي على خير والبيبي حاله باهي اللهم لك الحمد والشكر حمدً كثيراً طيبً مباركً فيه |
رد: تجمع حوامل ليبيا
عقبال كل وحدة حامل تجيب وتنوض بسلامه
وعقبال كل من تتمنى |
| الساعة الآن 02:41 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .