منتديات حوامل النسائية - شوفوا قصتي ومعناتي والحمد لله على كل حال

اقتباس:

المشاركة الأصلية كتبت بواسطة لمى** (المشاركة 428813)

اخواتي انا لي سنه وشهر تقريبا متزوجه ومن اول يووم اتزوجت كنت اقول انشاء الله ما احمل بسرعه عشان اتهنى بالزواج دورتي قبل الزواج كانت مو منتظمه وحتى بعد ما اتزوجت كانت هيك وهيك يعني اول اسبوع بعد الزواج جتني الدوره زي النزيف وانتوا بكرامه وبعدين رحت عند دكتوره في جده مرره كويسه قالتلي طبيعي هذا مع الزواج رغم اني كنت خايفه من الشهور الجايه مرعليا كم شهر والحمد لله ما صار الحمل لكن لقيت زوجي زعلان اني ماحملت بسرعه لان اخوانه زوجاتهم حملوا ما شاء الله بليلتهم وهوا كان متضايق مررره لدرجة عانيت معاه في مشاكل مالها آخر وبعدين صرت اروح من دكتوره لدكتوره جتني التهابات فظيعه في بداية زواجي لما رحت للدكتوره حق جده قالتلي عمر الالتهابات او عدم انتظام الدوره ما يأثر على الحمل لانه سبحان الله الرحم متقلب المزاج وكل وحده وعلى حسب وضعها المهم انتقلت للرياض ومعاناتي انتقلت معي وحلمي في الحمل صار هم وحلم في نفس الوقت تابعت عند دكتووره وكانت تعطيني ادويه على حسب التحليل الي تسويه لي والحمد لله كنت مهتمه في العلاج ومنتظمه عليه بس لو تدرون انه مافي اعراض حمل قريتها في المنتديات او جت عند وحده الا جتني واعطي نفسي امل وفي النهايه تجيني الدوره كنت ما اقول الا الحمد لله على كل حال لدرجة انه في شهر من الشهور اتخرت علي الدوره وكنت احس بالم في ظهري وبطين وجنبي اليمين ودوخه وعثيان واشم روايح معفنه وكنت اتوحم على الجبن+الشطه +الليمون وقلت اكيد اني حامل وكان زوجي متفائل معايا فقلت خليني اسوي تحليل حمل منزلي سويت الاول طلع خطين واحد ثقيل وواحد خفيف ما صدقت وسويت الثاني ونفس النتيجه وهذا كله باقي ما قلت لزوجي
لما جا زوجي خبرته ما قدرت اتحمل وجابلي تحليل وسويت التحليل ههههههههههه وللاسف طلعت سالب ما صدقت وريته التحليل الاول الي سويته وما صدق وراح جبلي تحليل رابع وطلع خطين واحد ثقيل والثاني خفيف وجبلي الخامس وما طلع فيه شي اتجننت واصريت اني اسوي تحليل حمل دم وطلعت النتيجه سالب
ما فقدت الامل وتأخرت علي اسبوعين وكنت اقوول اني حامل لان اعراض الحمل عندي زادت وثقل صدري واحس بطني متحجر من تحت وفجأه من دون منبه نزلت الدوره حسيت بالتحطيم لدرجة ان زوجي وداني عند اهلي وماكان عندي غير الصبر والدعاء ولما رحت للدكتوره وحكيتلها بالي صا رلي قالتلي احتمال وجود الالتهاب او الدم في البول الله يكرمكم هو الي بين خطين واععطتني فيتامين عشان كثرة الدم الي نزلت مني والحمد لله على كل حال
مرت شهور وانا والدوره في معناه مرة تتأخر يومين وتجي مرره تنتظم ثلاث شهور والشهر الرابع تلخبط ومررهكذا ومرره كذا على حسب النفسيه المهم كنت عارفه انه السبب في كذا النفسيه والحمدلله اتعلجت من الالتهابات وصار الوضع تمام
في الصيفيه الي راحت رحت مصر وقلت راح اروح لدكاتره عشان اتابع حالتي رحت لدكتوره مصريه وحكيتلها عن حالتي وقالتلي اول شي بسويه معاك انظملك الدوره وعطتني حبوب وبعدين اعطيكي حبوب منشطه تاخذيها ثاني يوم في الدوره لمدة خمس ايام وعطتني فيتامي ومقويات وادتني موعد اجامع فيه زوجي وسوتلي اشاعه داخليه وخارجيه وقالت ان التبويض عندي ضعيف المهم استمريت معاها لمدة شهر تجهزني فيه عشان البويضه تنضج كويس عشان اليوم الموعود مع زوجي
وفي آخر يومين قبل ماا رجع جده واقابل زوجي كنت ابي اروحلها تسويلي اشعه داخليه عشان تشوف حجم البويضه لكن ما حصل نصيب قلت في نفسي خلاص اسوي الي علي والباقي على رب العالمين
قبل ما اسافر بليله كنت قاعده مع وحده حامل متابعه عند دكتور اخصائي في مصر قالتلي تعالي معايا عنده وهوا راح يفيدك رحت عنده وكشف عليا وقالي عندك تكيس اوالرحم عندك فيه قلبه انا بصراخه انصدمت وزعلت في نفسي لكن الحمد لله على كل حال عطاني خمس ابر استخدمهم لمدة خمس ايام عشان تفجر التكيس وبعدها اجامع زوجي .................يتبع

التقيت انا وزوجي وكان موصيني الدكتوور مرره على الابر وعلى اني اجامع زوجي اخذت ثلاث ابر والابرتين الباقيه اتخرت فيهم لكن الدكتور طمني وقالي عادي جامعني زوجي في الايام الي وصاني فيها الدكتور وقالي انتظري الين موعد الدوره الاخيره وكان الكلام هذا في شهر شعبان وتخيلوا شوقي قد ايه اني احمل واشوف ذريتي وتخيلو الكل كان يقولي ان شاء الله راح تحملي حتى الحريم الكبار كانوا جدا معشميني ولكن انا املي في الله اكبر من اي شي المهم خلص شهر شعبان ودخل علينا رمضان وكانت فرحتي ما تنوصف بالشهر الكريم لاني اتفاءلت بالخير وانه ان شاء الله راح احمل والله يا بنات بطني انتفخ جميع اعراض الحمل جتني وتأخرت الدوره علي شهر وتسع ايام وكان زوجي متحمس مرره وكل يووم يبيني احلل بس كنت ارفض ما ودي انصدم الين ما كلمت الدكتور لاني متابعه معاه قالي ايش تنتظري لازم تسوي تحليل دم لان الابر مفعولها قوي مرره سمعت كلامه ورحت سويت تحليل دم وكانت النتيجه والحمد لله >>>>>>>>>>سالب
في الحقيقه كلت في خاطري وزعلت في نفسي تدرون حسيت بتحطيم لاني ما خليت علاج الا اخذته ولا تمريخ الا اتمرخت ولكن هذا حكم الله والحمد لله
اتصلت على الدكتور وخبرته بلي صار قالي انتظري كمان اسبوع وحليلي وفجأه ومن دون انظار نزلت علي الدوره ما يأست وقلت ان شاء الله خيره وراح الله يرزقني الشهر الجاي مر علي الحين سنه وشهر على زواجي بعد عيد زواجي بكم يووم بدات اسمع المعايره من زوجي والي حولي اني ما انجب حتى زوجي كمان ما قصر يدق بالكلام وانه راح يتزوج علي ويحم حلمي في الاموومه قلت في نفسي مالي الا الدعاء والصبر والترجي لله انه يرزقني بالذريه الصالحه
وفي شهر شوال جتني اعراض غريبه لدرجة انه الوهم قتلني وكل ايووم افكر اني حامل الين خلص شهر شوال ولا جت الدوره وزوجي صاير حتى هو متوهم ولا راضي يشيل فكرة الحمل من راسه وكل ما تتأخر الدوره جبلي تحاليل منزلي اسوي الاول ما يظهر اسوي الثاني ما يظهر اسوي الثالث يظهرلي خط غامق وخط فاتح مررره حسيت اني تعبت من الاحلام الورديه صبرت ثلاث ايام واليوم الثالث في الليل ومن دون انظار جتني الدوره وكنت في الشهر نفسه متابعه عند دكتووره وسويت تحاليل شامله وطمنتني الحمدلله انه كل شي كويس عندي وسويت اشعه وقالت انه التبويض عندي كويس وان البويضه جاهزه ان شاء الله للتخصيب لكن ماقدر الله وما شاء فعل وهذي حكمته وانا راضيه بنصيبي
بنات انا عشت معاناة سنه كامله مع زوجي بسبب الحمل ولاحظت اغلب البنات في المنتدى مثلي وكل وحده ومعاناتها
بنات نصيحتي ما لنا الا الصبر والدعاء واللجوء الى الله ونسأله يهب لنا الذريه الصالحه والله العظيم اني لما اقرى مشاكلكم ومعاناتكم احزن وادعيلكم من قلبي وودي اساعدكم بي ماالقى غير دعواتي والنصيحه وابيكم تعرفوا شي الي يشوف مصيبة غيره تهون عليه مصيبته وانا انصحكم يا اخواتي انه التوهم بالحمل يجيب نفسيه والوحده ما توهم نفسها الا اذا حست من داخلها وقلبها انها حامل ومرت على دورتها اكثر من شهر وسبحان الله الحمل له مييزه وعلامه غيير الدوره تلقيها مميزه فيك وفي علامات الدوره وطبعا تختلف من وحده لاخرى وان شاء الله ربنا كريم وقادر يهبلنا الطفل الصالح المعافاه كامل الخلقه من دون نقصان وان يجعله بار بوالديه
هذي قصتي والي قاعد يصير معي اتمنى ما اكون طولت عليكم اني حسيت اني قريبه منكم فلا تبخلوا علي بالدعاء وربنا يحفظكم من كل شر
ربي لا تذرني فردا وانت خير الوارثين >>اللهم آمين