منتديات حوامل النسائية

منتديات حوامل النسائية (https://naqatube.com/index.php)
-   إستفسارات حوامل من الشهر السابع إلى الشهر التاسع (https://naqatube.com/forumdisplay.php?f=92)
-   -   ديوانية البحرين - دردشة حوامل البحرين - البحرينيات (https://naqatube.com/showthread.php?t=28574)

حروف عاشقة 12-26-2010 12:23 PM

رد: ديوانية البحرين - دردشة حوامل البحرين - البحرينيات
 
سلام كروشااات

:( عباس اليوم مريض صدره مو قادر منه وكحة ولا يقدر يتنفس على عمري لو زين المرض إلا فيه فيني ، ابو لعيال في الدواام وما يرد إلا الساعة 3 وماني عارفه اتصرف كلشي سويته ليه بخار وشفط وانتوا بكرامة الوصخ إلي في خشمة ومو فايد وياه عندكم حل على ما يرد زوجي ونوديه العيادة ؟؟

طفلي حياتي 12-26-2010 12:27 PM

رد: ديوانية البحرين - دردشة حوامل البحرين - البحرينيات
 
ماعليه شر ان شاء الله عباسنا القمر
لا والله معني استشارية القسم لكن ماعرف للي هالكبر شي ابدا
ماعليه شر حاولي تسوين الاشياء اللي تعرفينها على مايوصل زوجش وماعليه الا العافيه ان شاء الله

حروف عاشقة 12-26-2010 12:36 PM

رد: ديوانية البحرين - دردشة حوامل البحرين - البحرينيات
 
الشر ما يجيش خيوتي ،،

:( اني شوي بعد وبصيح لاني ما اقدر اشوف عيالي مرضه واني ما اقدر افيدهم على عمري

أحلام أم 12-26-2010 12:49 PM

رد: ديوانية البحرين - دردشة حوامل البحرين - البحرينيات
 
مساء الخير
الحمدلله رب العالميين تطمنت على زوجة خالي في الأردن تويي متصله بهم وتكلمت ويخالي وزوجته زوجته إللي تعورت في حادث باص الحملة في الأردن وللحيين مرقدة في المستشفى هناك لأنه إصابتها جسيمه الله يفرج عنها وترد البحرين بالسلامه
شلوونكم ماليي فاد أدخل أسولف والقلب مشغول بخالي وزوجته
بنت الأياويد
الحمدلله على السلامه وتتربى في عزكم البنةته الحلوة
أم خليل
أخيرا شفناش وشفنه كتاباتش الحلوة لاتقطعينه عااد توحشينه حبيبتي ،ماعليش شر ووجع الأسنان يمكن يبى لش تاخذيين حبوب كالسيوم لأنه يمكن الكالسيوم قاعد ينقص في جسمش
الله يتمم لش على خير وتولديين بالسلامه
حنين للماضي وشمس الصباح
الفال ليكم نسمع بخبر ولادتكم بالسلامه
طفلي حياتي
تحملي بروحش وشربي حبوب الحديد علشان فرحتش وعلشان تصير عندش طاقه للولادة وللنونو بعديين ويارب يطمنونش في السونار على البيبي وسلامته وتبشرينه بنوعه
حرووف عاشقة
ماعليه شر عباس القمر وديه العيادة وتحملي به عن الهوى والبروده لأنه صغير ماعدنه له وصفه تنفع إللي في عمره بعد عمري وإنتين سويتين كل شي بخار وشفطين الوسخ من خشمه بعد ماعندي لش وصفه بالسلامة حبيبتي

شمس الصباح 12-26-2010 01:16 PM

رد: ديوانية البحرين - دردشة حوامل البحرين - البحرينيات
 
سلام بنات

اليوم تعبانه حدي جسمي متكسر وظهري والنفسيه كلش ابغي اولد تعبت والله العظيم اليوم رحت الموعد الا يقولون وزني نزل زين بالغصب جودت دمعتي وطلبت من ربي ان الدكتورة الله يعميها عن وزني لان دمعتي كانت كلش بتطيح وصدق ما شافت الوزن بس سمعت النبض وما اخذت حتى خمس دقايق الا طلعت من عندها تمللت من أكل شي استفرغه في الليل امس الساعه وحده الناس نايمة واني في الحمام استفرغ احس بنار تولع في جوفي والنومه كلش معدومه

بقوم اروح اغسل وجهي لا يجون اليهال ويشوفوني جدي

فلونة 12-26-2010 01:40 PM

رد: ديوانية البحرين - دردشة حوامل البحرين - البحرينيات
 
مرحبااا

طفلوو ،، اكلي زين علشان يرتفع دمج واصلي على الحبوب ،، شنو اسم الحبوب الي عطووج اياه ؟؟ جان سألتيهم عن الحبوب الي قالت عنه بنت الاياويد اليفيت انا باجر لي موعد اذا ما نسيت باسألهم
وشنو هالاكل المفييد ومنكم نستفيد لا hwaml02

حرووف ،، ماعليه شر .. بس المفروض في هالجو تغطينه زين وتلبسينه ثياب شتووية وما تشتغلين لا بانكة ولا ايسي وخليه على صوب علشان اذا في وصخ في صدره يطلع بسهولة

أحلام ام ،، الحمدلله على سلامتهم وان شاء الله يردون لكم بالسلامة والحمدللهه طمنتينا كنا نحاتييج

شموووس ،، لا تسوين في روحج جذي وانا اختي شهرين ما زاد وزنها كلش كان ثابت بس الحمدلله ولدت وكان ولدها وزنه زين ،، لا تحاتين وكلي امرج لله واذا عن الحموضة وحرارة المعدة تخليج ترجعين اخذي لج لبن اكتيفيا واااايد مفيد وشربي عقب كل وجبة قلاص ولا تعكرين مزاجج ترى مب زين للياهل

طفلي حياتي 12-26-2010 02:00 PM

رد: ديوانية البحرين - دردشة حوامل البحرين - البحرينيات
 
السلام عليكم
احلام يسلموا على الكلام البلسم يابلسم
طمنيني على مرت خالش وشخبار اييدها عالجوها لو انبترت خلاص؟ يارب تفرج ان شاء الله
شموسه صلي على النبي محمد وآله واقري على روحش واشربي اي شي ينفع المعده ولا يهيجها في نفس الوقت
فلونتي اني بخير الحمدلله بس الدم قاصر والظاهر الحاله اللي صادتني من قصور الدم تتوقعون؟؟
يصيدني الم في الراس ونظري يختل ماشوف وحالتي حاله حتى كلام ماعرف اتكلم
الاكل قالت اكلي عدل مشويات حليب وبقدونس وجبده قالت ركزي ع الجبده
وتفاح تقول لازم يرتفع وبيسوون لي تحليل دم الشهر الياي مادري مال شنو عاد
الله يسهل لنا كلنا
الحبوب حديد اعتقد لونهم احمر قبل كل وجبه بنص ساعه اخذ حبه+فوليك اسيد مره وحده يوميا

طفلي حياتي 12-26-2010 02:05 PM

رد: ديوانية البحرين - دردشة حوامل البحرين - البحرينيات
 
اكلي بقدونس بعد نسيت قلت معروف سوالف نقص الدم

بنت الأياويد 12-26-2010 02:10 PM

رد: ديوانية البحرين - دردشة حوامل البحرين - البحرينيات
 
مشكورين حق كل الي باركولي والله اني مستانسه على وناستكم لي وعقبال ماابارك لكم وحدة وحدة بولادتكم بالسلامة يارب ، باكمل لكم القصة حطولي الطلق الصناعي وكان اييني الم كلش خفيف وفليل بدى وياي الالم على الساعه تسع واستمر وياي لي الصبح بس الالم كان كلش فضيع ماكنت اقدر اتحمل وتقولي الدكتورة رقدي قلت لها مايصير ارقد الالم مو مخليني ارقد قامت طقتني ابرة في العظم ورى قالت لي بتحسين راسج يصير ثقيل وبدوخين وحطت لي اكسجين على خشمي وفعلا رحت في نومة حده وناسة جني سكرانه يقعدوني مابطل عيوني عدل تقول دايخه اقولها اي بس عجيب كان والساعه تسع الصبح قعدت من النوم على الالم كنت من قوة الالم اقوم من مكاني وارجع ماكنت اقدر اتحمل ويات جيكتني تقولي 3 سانتي بطلت عيني اقولها كل هالالم بس 3 عيل لي يوصل 10 شبصير فيني اقولها بس بموت ماتحمل شقوا بطني قالت لي لا مابنسوي لج قيصري حاولي تتحملين ومادري شنو وعقب يابت شي طويل وبطت الجيس مال الماي واهني زاد الالم وتميت لي 12 الظهر اتألم ماقدر كلش وجيكتني عقب الا تقول ماشاء الله انفتحتي 10 خلاص ولادة وتمت تقولي بنخليج الحين شوي وكل ماييج الم تعصري وتميت اتعصر ولا احد يدري عني وعليه علي وعقب يات اكشفت الا تقولي البيبي بيطلع لاتعصرين تمت تصرخ ويابوا المعدات والاغراض وعصرت جم مرة وعقب قالت لي وقفي اخذي نفس لان كان الحبل السري ملتف على راسها وهذي الغلط مني لان لين انام فليل ماكنت اقوم اقعد واعدل رقدتي كنت وانا منبطحه اغير رقدتي وهذي غلط حاولوا ماتسوون هالحركة وشوي الا حطوا على صدري جيس ازرق مال العملية وطلعت بنتي ربي يحفظها وبعدين بدوا يخيطوني لان جرحت روحي من داخل وايد واهمه شقوني بس شوي بس انا من التعصر شقيت روحي بس الحمدلله على النعمة واهم شي ان بنتي بصحة وعافيه ، بنتي اول مايبتها كانت تشابهني بس الحين انقلبت على ابوها ، اما عن شعور الامومة للحين ماحس بشي ههههههههههههه بس السهر فليل مأساة بصراحة مافي شي اسمه نوم وانا احاتي الجامعه امتحانات عقب يومين ومايعطون اجازة الا اسبوع وانا باجر بصير لي اسبوع من ولدت وهذي قصتي بالتفصيل وسامحوني امس مشيت لان قامت تصيح شيخة وعقبالكم يارب تفتكون من الثقل وتنتقلون حق مرحلة ثانية لانوم بعد اليوم هههههههه

طفلي حياتي 12-26-2010 02:18 PM

رد: ديوانية البحرين - دردشة حوامل البحرين - البحرينيات
 
اهلا بنت توني تنفست يوم كملت القصه الحمدلله على سلامتكم ثنتيناتكم
المشكله يابنت الاياويد اذا خلونه بروحنا حزة الولاده هذا شي خطأ مثل ما صار لش شلون تقول لش كلمة عصري وتروح عنش اكيد بتمين تعصرين كل الوقت وهذا الغلط اف ياري منهم
انزين اني تصدقين من كثر مانقلب وانيمكاني من جم يوم ياني الم في بطني قوووووووي قلت ياربي رحمتك وعفووك استر علي وعلى جنيني جان مو صار له شي لان توني سمعت هالشي مو زين بس هو تلقائيا يصير اذا نايمين شلون نحسونقوم ننقلب؟؟
الحافظ الله يختش
بس خبريني عن مستشفى المحرق وشرايش فيه اروح لولا؟؟

بنت الأياويد 12-26-2010 02:22 PM

رد: ديوانية البحرين - دردشة حوامل البحرين - البحرينيات
 
بصراحة صج مستشفى قديم لكن كل الي اهناك حليوين وعندهم سعة صبر يعني حزة الطلق كنت انادي السستر اقولها سستر ماقدر اتحمل تقولي ادري أمي يألمج تحملي يعني يهونون عليج بأسلوب والي يشتغلون اهناك الهنود كلش حليوين بس الكريه الي فيهم مايدخلون زوجج انا زوجي وايد تغربل كنت اتألم ماكنت اقدر اطلع له برع لان لازم امشي له مسافة شوي وتلفون مافي يعني تأذى بس اانا لو افكر عقب جم سنة اني احمل الصراحة عادي اولد عندهم كنت مرتاحة من كل النواحي وخذيت غرفة خاصة صغيرة بس عادي يعني عشرة دينار الليلة بس ياخذون تأمين خمسين ويرجعون لج الخردة عقب

فلونة 12-26-2010 02:22 PM

رد: ديوانية البحرين - دردشة حوامل البحرين - البحرينيات
 
طفلوو ،، اذا دمج ناقص لازم هالاعراض اتييج الدوخة والم الراس علشان جذي تحملي في روحج واكلي زين حتى التمر مفيد انا ماخذة لي كارتون معمول وكل يوم اكل منه

بنت الاياوويد ،، انا اقرى قصتج واتخيل روحي مكانج .. امتى ناوية تسوينها مرة ثانية ؟؟ hwaml02
الحمدلله ولدتي وارتحتي و عجييبة هالابرة سمعت عنها وايد،، والياهل كل يوم له ويه واهم شي الصحة والسلامة .. وانتي بعد تحملي في اكلج هالفترة والامتحانات ان شاء الله تتسهل عليج .. امتى بتداومين ؟؟
انزين ما قلتي لنا في اي مستشفى كانت ولادتج وتحملو فيج؟؟
و عن السهر تكبرين وتنسين خل تسليج ،، واحين اريح لج او في البطن

طفلي حياتي 12-26-2010 02:26 PM

رد: ديوانية البحرين - دردشة حوامل البحرين - البحرينيات
 
اي نسيت عندي تمر ولا لمسته تصدقين يبغي لي اكل منه

فلونة 12-26-2010 02:27 PM

رد: ديوانية البحرين - دردشة حوامل البحرين - البحرينيات
 
توني قريت ردج ،، يلا تتربى في عزج وعز ابوها ان شاء الله
وانا من احين احاتي الولادة وكله خايفة من سوالف هالحبل اسري .. وزين تحملو فيج خيرة لج افتكيتي من السلماانية

بنت الأياويد 12-26-2010 02:28 PM

رد: ديوانية البحرين - دردشة حوامل البحرين - البحرينيات
 
الصراحة عقب الي شفته مافكر حاليا ولا ابي افكر هههههههههههه ، الثلاثا امتحاني تخيلي حالتي ماقدر اقعد اصلا من الجرح
ولدت في مستشفى المحرق ، اي وايد يهتمون
انا احس صج سهر وغربال بس اريح من البطن والثقل

فلونة 12-26-2010 02:29 PM

رد: ديوانية البحرين - دردشة حوامل البحرين - البحرينيات
 
طفلوو بتروحين محرق .. انا وايد بعيد عن بيتنا .. افكر في جدحفص بس سي السيد يبي العسكري وانا خايفة ان ما عندهم خبرة

فلونة 12-26-2010 02:31 PM

رد: ديوانية البحرين - دردشة حوامل البحرين - البحرينيات
 
بنتوو ،، غيري توقيعج خلاص شيخة البنات شرفت وشيلي هالتيكر علشان ما يذكرج في الحمل والثقل و الفال لناا ان شاء الله

طفلي حياتي 12-26-2010 02:32 PM

رد: ديوانية البحرين - دردشة حوامل البحرين - البحرينيات
 
اما زوجي ولا يتدخل في شي هههههههههههههههههه لو اقوله بولد ي كندا يقول اي اي اي خخخخخ
اني اذا زين المحرق بروح لانه حذفة حصى قريب من بيت زوجي
وجدحفص قريب بيت ابوي
يعني عندي خيارين واللي الله كاتب لي اولد فيه بولد
الشي الزين ان اهلي هناك وكلهم بينورون المستشفى يصير عجيب كلهم بجوني
بس هنا قريب لكن محد بيي متاكده مابيوني :(

بنت الأياويد 12-26-2010 02:33 PM

رد: ديوانية البحرين - دردشة حوامل البحرين - البحرينيات
 
هههههههههههههههههههه توني اشوفه اقول بشيله ، آبي توقيع حق البيبي في احد عنده اللنك؟

طفلي حياتي 12-26-2010 02:34 PM

رد: ديوانية البحرين - دردشة حوامل البحرين - البحرينيات
 
اتكلم بالياء والجيم وانتو اختارو خخخخخخخ كله اخاف الكلمه تصير عويصه وماتفهمون واقوم اقحم الجيم

فلونة 12-26-2010 02:39 PM

رد: ديوانية البحرين - دردشة حوامل البحرين - البحرينيات
 
طفلوو ،، حزة الولادة انتي بتقررين وين تبين والله من الالم بتركبين السيارة وعلى كيف زوجج المستشفى الي بيوديج اياه ولا بتحركين ساكن المهم تفتكين من الالم وتولدين

بنتو،، صبري بادوره لج ,, ويوم الثلاثة طلعي لج سيكليف ولا تروحين امتى بتدرسين ومافيج شدة على روحة الجامعة ،، ريحي روحج ولاحقة على الامتحان وان شاء الله الدكتور بيقدمه لج مرة ثانية ،، شخبارج ويا العصيدة والجلاب طرررشي لنا :p

فلونة 12-26-2010 02:45 PM

رد: ديوانية البحرين - دردشة حوامل البحرين - البحرينيات
 
http://www.ticker.7910.org/eng

دشي هالموقع بنتوو واختاري لج على ذوقج

طفلي حياتي 12-26-2010 02:46 PM

رد: ديوانية البحرين - دردشة حوامل البحرين - البحرينيات
 
ابي ابغي اعرف هالجلاب ويش؟
اني خبري اكل الوالده عندنا رشوفه وفي شي ماعرف اسمه بس مكوناته حلبه منقوعه ومفيوحه يضيفيون ليها بيض ويطبخونه وياه واكل عادي بس دسم يقوي الوالده
لكن هالجلاب ويش؟؟
اشوف عمتي ساعات تييب شي تقول مال والدين طعمه حلو ومو حلو فيه مكسرات ومادري شنو تسويه عجميه مكوناته فيها حلبه بعد ويقولون زين

بنت الأياويد 12-26-2010 02:48 PM

رد: ديوانية البحرين - دردشة حوامل البحرين - البحرينيات
 
العصيدة بس احب اكلها سوولي حسو ماحبيته امي تعيز وياي مفيد بس انا مامني فايدة ، افا عليج حياج اخذي لج صحن ، مشكورة على اللنك فديتج ، كنت ابي احط لكم صورة بنتي بس مو عارفه شلون لاني اساسا ماعرف حق الكمبيوتر

فلونة 12-26-2010 02:50 PM

رد: ديوانية البحرين - دردشة حوامل البحرين - البحرينيات
 
طفلوو اي هاي نفسه الي فيه مكسرات على قولتج نفسه الجلاب ،، انا وايد احبه بس مب زين كثرته فترة الحمل .. اذا ولدتي طرشي لي عنوان بيتكم باييب لج شرايج :p
انتو شنو تسوون حق فترة النفاس غير العصيدة ؟

بنت الأياويد 12-26-2010 02:53 PM

رد: ديوانية البحرين - دردشة حوامل البحرين - البحرينيات
 
بقوم اريح الحين انشوفكم وقت ثاني سلموا على كل من يسأل عني

فلونة 12-26-2010 02:54 PM

رد: ديوانية البحرين - دردشة حوامل البحرين - البحرينيات
 
بنتوو اذا عندج الصورة في الكمبيوتر ترى وايد سهل بس سوي لها تحميل من اهني من ادراج صورة ،، او حطيها لج في الصورة الرمزية علشان نجووووووووفهاا :d

طفلي حياتي 12-26-2010 02:55 PM

رد: ديوانية البحرين - دردشة حوامل البحرين - البحرينيات
 
العصيده ماتنفع الوالده اصلا لانها طحين وشكر ودهن بس الجلاب مفيد حددددددده لازم تاكلينه بنت الاياويد حده مفيد

طفلي حياتي 12-26-2010 02:59 PM

رد: ديوانية البحرين - دردشة حوامل البحرين - البحرينيات
 
مع السلامه بنت وبوسي شيخه لو ممنوع البوس مثل ام حماني هههههههه اما اني بصراحه ببوس ولدي مادري بنتي اما الا استحمل اشوف فرحه في حظني مابوسها خخخخخخخ

فلونة 12-26-2010 03:00 PM

رد: ديوانية البحرين - دردشة حوامل البحرين - البحرينيات
 
ابتدت في استشارات الولادة لحووووول :p
طفلوو قاعدة اكل التمر مال المدينة الي على كافي وفانيلا ومحشي بلووز تبين ،، حتى لو تبين ما باطرش لج
الا انتي تغديتي؟؟؟

طفلي حياتي 12-26-2010 03:08 PM

رد: ديوانية البحرين - دردشة حوامل البحرين - البحرينيات
 
لا والله توني انتبهت اني ماتغذيت اكو رحت اقلي نجست باكله والتمر الابيض احبه اكثر من الكاكو عندي تمر عادي ويى هرده اقدر اكل بس اتملل اطلع تمر خخخخخخ
عمتي تقول اكلي طماط ضحكتني مال اول يشوفون لونه احمر عبالهم اييب الدم ههههههههههههه
ويمكن معلومه صح واني مادري

طفلي حياتي 12-26-2010 03:09 PM

رد: ديوانية البحرين - دردشة حوامل البحرين - البحرينيات
 
انتين وشتغديتين؟
مشكلتي اذا ريلي هنا اتعب من الطبخ واذا في شغله ما اسوي شي واكلي كله هرار

طفلي حياتي 12-26-2010 03:14 PM

رد: ديوانية البحرين - دردشة حوامل البحرين - البحرينيات
 
هالالم اذا يصيدني لازم ياخذ له اسبوع هو يلعب فيني تنميل في ويهي والم في عيوني وكريه اعتقد هذا الصداع النصفي
امس اخذت البندول الازرق وحسيت اني باقي شوي وانشل وابغي اخذ غفوه واخاف يصيدني شي بروحي وكل شوي افز من مكاني وقمت اهلوس ماعرف انطق الحروف
بلالالالالالالالالالالالالالالالاوي

فلونة 12-26-2010 03:18 PM

رد: ديوانية البحرين - دردشة حوامل البحرين - البحرينيات
 
تمللت وانا انطرج وظهري عورني باروح عنج
نجوفكم على خير

طفلي حياتي 12-26-2010 03:20 PM

رد: ديوانية البحرين - دردشة حوامل البحرين - البحرينيات
 
تمللتين واني كاتبه سبعة الاف رد وانتين ساكته
قومي ريحي تبغين حجه
اني توني بلعت الحبه ولازم عقب نص ساعه اكل طريتين التمر رحت كليت تمرتين واني توني بالعه الحبه خخخخخ مادري عادي لولا

فلونة 12-26-2010 03:24 PM

رد: ديوانية البحرين - دردشة حوامل البحرين - البحرينيات
 
وي توني اجوف ردج ،، انا الي مفتر راسي خاطري ارقد
سوي لج عالاقل شوربة اذا عندج شوفان وبشري لج فيه خضرة آلو وجزر وكوسا وفلفل بارد وطماط
وحطي مكعب ماجي سريعة ومفييدة..

ههههههههههههههههه ضحكتيني على سالفة عمتج ،،ايي حريم قبل كله جذي حتى خالتي كله تقول لي شربي عصير طماط مال اول الاحمرر...
يلا روحي سوي غداج وتغدي وتركي عنج هالخرابيط واذا راسج يعورج لا اطبخين طلبي لج شي جااهز من اي مطعم .. وانا باخليج باروح اخذ لي شوور سريع علشان مارقد

شمس الصباح 12-26-2010 03:25 PM

رد: ديوانية البحرين - دردشة حوامل البحرين - البحرينيات
 
شخباركم رجعت لكم بنفسيه أفضل hwaml03 ومشكوره فلونة وطف طوووووف
اني ما يفيد معاي لبن اكتفيا جربته وعندي حبوب عن الترجيع بس ما يفيد ولا ابغي ابلع منه وايد اخاف منه

بنت الأياويد مبروك حبيبتي وعقبالي يا رب

حروف ما تشوفين شر

ام خليل بلا نحاسه وقولي لينا وش فيش hwaml4 لا افلصش في دبتش

احلام ام الحمد لله على سلامتهم خليتيني احاتيش لاني اسمع في الدراز اخبار مو زينه وحاله وفاة قلت لا يكووووون بس الحمد الله اشوه انش طمنتينا

طف طف اكلي عدل وابلعي حبوب الحديد لا تطوفين اي حبه وبتشوفين دمش ارتفع

فلونة 12-26-2010 03:25 PM

رد: ديوانية البحرين - دردشة حوامل البحرين - البحرينيات
 
ههههههههههههههههههههه شاسوي مفهية يختج
انا طبخت اليووم معكرونة بالبشميل اذا تبين تعالي اخذي لج :p
يلا برزي غداج وانا بارووح عنج

طفلي حياتي 12-26-2010 03:26 PM

رد: ديوانية البحرين - دردشة حوامل البحرين - البحرينيات
 
اوكى تحملي بروحش
خوش فكره للشوربه بسويها لعشاي لان كسوله حدي وابغي الصحه شلون مادري الحين باكل النجست والعشا بسوي اللي قلتين عنها
يلا باااي

طفلي حياتي 12-26-2010 03:28 PM

رد: ديوانية البحرين - دردشة حوامل البحرين - البحرينيات
 
اهلين شموسه الحمدلله ربي فرج لش
فلووه بالعافيه على قلبش البشميل اني خلاص باكل هذا وباجر طرشي من غداكم على الدي اتش ال لان بيتنا وين وانتين وين


الساعة الآن 08:29 AM.

Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)

Privacy Policy - copyright

لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .