منتديات حوامل النسائية - دردشة بنات ليبيا , دردشة حوامل ليبيا , تجمع بنات ليبيا

اقتباس:

المشاركة الأصلية كتبت بواسطة عيون زوجي (المشاركة 2287160)

بـــــسم الله مــــاشاءالله تبـــــارك الله

تسلم ايدياتك ويحرمهم ربي من النار يااارب

اتهبل ما تقوليش انك ما ذقتيهاش لانها لاتقاوم اتشهي كاني توا خاطري في طريف منها

- شنو حشوتها؟؟

- بنات الدورة عربيات بس ولا نخلطات؟؟

- شنو تعلمتي من الدورة وريلنا اشغالك؟؟

- شنو صار في تحاليلك شغلتيني اعليك يارب تكوني كويسه ومافيك الا العافيه والدلع يا احلى رشيقه في الدنيا

طمنيني اعليك ياغاليه ولابأس طهور يارب
ويارب يفرح قليبك بشوفة احبابك على كليماتك يلي زي العسل ويفرح خاطري يبيلي يسر خاطركhwaml7

السلام عليكم ورحمة الله وبركاته

أهلين بأم سارة الغالية كيف حالك يا حبيبة وكيف حال سنافرك وبوهم ؟ إن شاء الله اموركم طيبة
بالنسبة للتورتة قصيت منها طرف كبير وحطيته في الصونية وكليت منه والله العظيم فمين بس لأن ما نقدرش ما ناكلش منها بكل واني جايبتها يتحسسوا ويقولوا علاش جايبتها وما تبيش تاكل منها وما بيتش انسبب فتنة بحركة مش حلوة عرفتي .

بالنسبة للحشوة حشيتها كريم الخفق السائل فرش وسكر مرحي وفواكه يلي هما : (( كمثرة مقطعة مربعات وخوخ مقطع مربعات شريتهم واتيات من المحل وكرز خديته عادي مش واتي فروتا قطعته ضغير صغير وحطيت عليه 2 ملاعق سكر مرحي وخليته ساعة وبعدها لقيته امطلع اميته ودابل وواتي للإستعمال في الحشوة )) خلطتهم مع بعض وحطيتهم في الكريمة وحشيت بيهم التورتة والكيكة كانت كيكة اسفنجية نفس مقادير كيكتي المعتمدة وكانت اربع طبقات والمفاجأة الكبيرة بعد ما كلينا وتمينا الابلة قالت عندي ليكم مفاجئة يلي هيا إن الادارة اعطتنا اسبوع زيادة لأن يلي معانا ما تموش الشغل امتاعهم كسولات هههه اني الوحيدة يلي تميت من الجمعة يلي فاتت لا اللي قبلها وهما قاعدين ينعسوا المهم اتفقوا ان فيه حفلة ثانية في اخر يوم وطلبت مني وحدة من يلي معاي انديرلها تورتة وتعطيني حقها فتحشمت وقلتلها لا انديرهالك مجاني لأنها مهدرزة عليا من قبل وقالت لي انحب المسلمين وعندها اشخاص في عايلتها دخلوا للإسلام فحسيتها من المؤلفة قلوبهم على الاسلام والمسلمين فقلت انديرها لله من غير فلوس ومعناها يا حنة فيه تورتة الاسبوع الجاي لا اللي بعده لأن الاسبوع الجاي عطلة رسمية لكل المدارس .

اما بالنسبة للي يقروا معايا كلللللللللللللللللللهم انجليزيات صافيات ههههه اني العربية الوحيدة والمسلمة الوحيدة بينهم لكن معاملتهم معاي ممتازة الحق والجهة يلي اني ساكنة فيها كلها انجليز صافيين ما فيهاش عرب بكل لكن جيهة راقية وهادية ومحترمة وتعتبر اقرب للريف من المدينة .

وبالنسبة لتحاليلي يا حنة الحق ياربي وعارفاتك بتعاركيني ههههههههههههههه ما مشيتش لموعدي يلي كان يوم الجمعة اول ااامس يعني لأني كنت مشغولة في هديك التورتة خخخخخخخخخخخخخخ وما فضيتش فاتصلت بالعيادة واجلته ودارولي موعد يوم 11 -6 الاثنين الجاي وتطلع نتيجة التحاليل بعد اسبوع إن شاء الله وربي ما يشغلك على غالي وعزيز اللهم ااامين

وبالنسبة لأشغالي في الدورة تو انوريهم لكم إن شاء الله ونحكيلكم بالتفصيل كيف كانت الدورة وشن يلي درناه فيها إن شاء الله .