|
رد: ديوانية البحرين - دردشة حوامل البحرين - البحرينيات
مساكم خير وسرور محفوف بالصحه والعافية
أم خليل إللي يسمعش يقول فيش توأم يتهاوشون ،بس شكله هالكتكوت حركي بزيادة بيصير حتى نومة تالي قليل ماعليه شره صبي أني بحمود صرت جدية واايد يتحرك ويشدخ طول الوقت وتالي نومه قليل كلللللش وحركي بزياادة مايهدأ في الأرض الصلاة على النبي وللحيين من جبته ماإنعدل نومي أنام على نومته وأصحى على قعدته فيي خير أنام وهو قاعد أول أمس فيي نومة الظهر عدل وأسحبة وياايي ينام مارضى وقمت هيئته علشان يتخذر حطيت في راسة زيت وااايد وقالي قولي قصص جدية على عدد أصابعه وكلحين أشلخ علية قصة قصيرة وأني مغمضة وراسي مفتر ويوم خلصت قلتله يالله ناام قال ألحين دوري فر راسي وتالي الحمدلله ورى بيتنه زراعه ويش كبرها فيها شحنة كلاااب مهجورة تابعه للأوقاف وينابحون ويصخ مرة وحدة بس مودايما هالكلللاب يخاف من صوتهم هههه شمس الصباح هلا وغلا ،صاادقه حبيبتي كأنش تعرفين حالي على قولتهم (ورية إنجم ) من شي لشي يصيدني والبيبي خله لبعديين الكل بيعرف ويش في هالدبه وأهم شي أكمل وأولد بالسلامة هذا مناي حبيبتي ملاك لاتحاتينها عوذيها على طول حاسه فيش ،دامش مثلي الله يعينش والعين على هاليهال الناس تطالع على كل شي حتى لو عصايه ملبسة ثيااب شكله عاادتش بتصير مثلي لين أولد نقطتين وشوي يعني مثل الإستحاضة وهذا راجع للرضاعة لاتخافين وإذا هالمرة نزلتينها بشي مرة ثانية بتأخرش بعد وبتصير جدية من هرمونات الحليب والرضاعه إلا إذا تعطين بنتش حليب صناعي أكثر من الطبيعي تالي بتنتظم ليش وصبري يمكن تنزل عدل ولو تروحين المستشفى بيقولون ليش من الرضاعه تحياتي ليكم |
رد: ديوانية البحرين - دردشة حوامل البحرين - البحرينيات
السلام عليكم
حبيبة حسوني قصة ولادتش خلتني اذكر تفاصيل ولادتي لأن نفسش عملية بس عاد اني رحت في عالم ثاني يوم كانوا يسوون العملية من قعدت كانوا مكملين ويوم سألتهم عن علاوي قالوا ينظفونه ونفسش ضرب الوسواس وقلت اكيد صاده شيء بس الحمدلله عدت على خير الله يخليها لكم وتتربى في عزكم ام السادة امس مادشيتي واني قلت خلاص ولدت ولله الحمد بس يلا ربي يقومش بالسلامة ان شاءالله وتبشرينا عاد طرشي مسج لطفطوفة كأنه عندش رقمها عشان تبشرنا روز سول اله يصيدش طبيعي اول اسبوع الوحدة يصيدها التهاب في الصدر بسبب تكون الحليب وتضخم الغدد الحليبية وهذا شيء طبيعي تحسين بألم وتحجر اني قالت لي الدكتورة طبيعي ويروح بعد مرور ايام وصدق ماطول صار صدري طبيعي اني ماستخدمت شفاطة ولا شيء ولا ابي استخدم اله اذا اشتغلت لأن بكون مضطرة لحظتها لأن بيني وبينش بنت عمتي وصديقتي كانوا يشفطون الحليب وتالي نشف صدرهم يقولون الشفاطة ماتناسب اي صدر والله العالم واني مابي اجازف في هالشيء لو تبين نصيحتي تحملي الالم جم من يوم احسن من اجازفين في حليبش وانتي بنوتش توها صغيرة صبري عليها اسبوعين بالكثير بجوفينها بتقعد ليش اكثر عشان ترضع منش اني جربت جم مرة اقعد علاوي من نومته وارضعه وفعلاً يشرب بس عقب يرد يرجعه كامل لأن ما كان جوعان من الاساس واني اغصبه هم اذا جوعانين بيقعدون وبيشربون عدل اذا حسيتي الالم كلش زايد عليش شفطي بيدش عادي شموس ايي اني بعد علاوي كل يوم شكل يوم ابيض يوم اسمر يوم في خدود يوم لا يقولون من عقب الاربعين يثبت الشكل ومايندرى اني مالبس علاوي قحفية حرور حده وبسرعة يعرق والحين الجو حليو بعد بنت الاياويد وينش حبيبتي؟؟ قلت دخلاتش عسى ماشر شخبار شيوخة شنو صار موضوعش في الجامعة والله وربي الشاهد احاتيش على طول بس انسى اسألش اقول في قلبي الله يعينها دوام وتريننق يلا ربي يسر امورش وتتخرجين على خير ان شاءالله باقي الشعب شخباركم حبايبي |
رد: ديوانية البحرين - دردشة حوامل البحرين - البحرينيات
السلام عليكم
هلا حبيبتي ام علاوي ماشاءالله عليه كبر علاوي شحلوه صار ربي يحفظه ، ماشاء الله شيخه ماتخليني اتفرغ حق شي تبي كله مجابلتها وماتنام عدل وغيرالله يعزكم الزواع تشرب مني وتزوع مني غيرنا لها الحليب وشوي قل الزواع، وعن الجامعه خبرج التظلم نفس الجواب ماطلع لج درجات ومن تاريخ 1 بصير ترينينغ وجامعه يعني الله يعيني والحين بتقل عدل دخلاتي الديوانية والسبب الدوام برجع كلش دايخه الله يعينا ويسر امورنا يارب العالمين والباقي شخباركم ؟. روز ام بشورة شلونج وشلون بشورة بالنسبة حق الحليب ترى عادي اول الايام بس حاولي ترضعينها من تشرب بتحسين براحه ومانصحج بالشفاطه تشقق الحلمات وتنشف الحليب تحملي ، اما عن السيم انا تم وياي اسبوعين واخر الايام كانت تصيدنا حكه وايد مكان السيم واااي كلش تعبتني بس عقب صرت اوكي ميبو استخدمته مرة بس ريحته خايسه جنه سمسم محروق والريحة تنشم حتى حق الي يقعد يمج ومشكلة ان سعره غالي انا استخدمته 3 ايام وخلص لان قالولي حطي وايد على القطن عشان يلمس السيم فقمت استخدم بالاد ماشاء الله شفته زين واي استفسار فديتج حاضرين لج وحق باقي البنات ، طف طف شخبارج؟ وشلون فلونه مارديتوا علي ولدت ولالا؟ |
رد: ديوانية البحرين - دردشة حوامل البحرين - البحرينيات
بنوته :الله يسهل عليش يارب وتكون ولادتش سهله ^_^
شموس :الله يسلمش حبيبتي الا انتي ولدتي طبيعي ولا عمليه ؟؟ حنون :اي والله انتين مثلي عمليه تحسين فيني حمدلله الله فرحنا بشوفة كتاكيتنا القمران hwaml03 |
رد: ديوانية البحرين - دردشة حوامل البحرين - البحرينيات
سلام عليكم
هلا والله ام شيوخة على طاري فلونة للحين مادشت والله وخبرتنا الكل يحاتيها ياااااااااااارب تكون بخير وقامت بالسلامة شكلهم كلهم متفقين يطلعون دلاليع هالجيل اني بعد علاوي متعود على الايادي ومن تحطينه في سريره يقوم يصيح اشوه اليوم الصبح نام شوي وقدرت اغسل الثياب واخم البيت وارتبه شوي الله هداهم لين قاعدين مايعطون مجال الواحد يسوي شيء ماعليه حبيبتي تحملي وان شاءالله ربي يوفقش وتتخرجين على خير التريننق كله شهرين ان شاءالله تعدي بسرعة وتفتكين حبيبة حسوني ها شكلها فطومة نايمه عشان جدي دخلتي شخبار الجرح الحين؟.؟ حركتش ان شاءالله احسن؟؟؟ تعالي شخبار الالتهاب اله كان وياش انشاءالله راح |
رد: ديوانية البحرين - دردشة حوامل البحرين - البحرينيات
هلا حنون اي والله يختش توها نايمه عقب مادبحتني علما نامت
جرحي اشوه حمد لله بس هالسيم للحين مو راضي يطيح ملوع جبدي عدلhwaml4 احط عليه كريم ميبو يوميا ولا طاح وتجيني مثل الحكه والتنميل فوق الجرح وحركتي اشوه حمد لله بس ظهري واجد يالمني يمكن من الرضاعه بعد تكسر الظهر:( والالتهاب حمد لله راح مو ناقصه بعد هههههههه من فوقنا لتحتنا متنتفينhwaml02 الا انتين شخبارش ويش اخبارجرحش بعد وحركتش وعلواني الجميل عسى بس مومسهرنشhwaml9 |
رد: ديوانية البحرين - دردشة حوامل البحرين - البحرينيات
يالله بقوم اخذ ليي قيلوله دام الورده نايمه
لاني من امس مو نايمه بررررررررب |
رد: ديوانية البحرين - دردشة حوامل البحرين - البحرينيات
ايي قومي ارتاحي الله يساعدش
وعلى طاري السهر علاوي ليلة اجوفينه اوكي وليلة ادق عليه ويصير لي مصحصح مايرضى ينام يازعم ليلة الجمعة زوجي كان من المفترض بيتكفل فيه واني انام نص ساعة وماجفته اله جابه لي قال لي ماعرف له قلت هاي اله كنت ابي اوصل له عشان تعرف انت نص ساعة وتعبت الله يساعدني اني السيم اني ماحس فيه وصدقيتي ممرضة تقول هو بروحه يطيح حركتي اشوه الحين بواجد بس بعد ساعات احس بألم اذا اقعد مع علاوي مدة طويلة واشتغل شوي اشوهراح الالتهاب وافتكيتي ايي والله مو ناقصه من فوق وتحت وش خليتي بعد |
رد: ديوانية البحرين - دردشة حوامل البحرين - البحرينيات
السلااااااااااااااااااااااااااااااااااااااااااام وشحوالكم
للحين ننتظر فرج الله علينا شخباركم كلكم من زمان ما هدرت وياكم ادخل اسلم واطلع ان شا الله الليله السهرة وياكم لانه رجلي بيهيت ويه ربعه ما بيجي ال باجر |
رد: ديوانية البحرين - دردشة حوامل البحرين - البحرينيات
سلامن عليكم
اخباركم يبنات فلونه ماحطت خبر ولاشي?? وايد طولت |
| الساعة الآن 07:17 AM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .