|
رد: تجمع حوامل ليبيا
ام وسونه حلوات الظويفرات بس طويلات شوية
تقدري اديري ظوافرك شبيهات منهم لو عندك فرشه رقيقه هلبة مثلا متاع اي لاينر فاسد ترسمي بيها علي ظوافرك وفيه اكسسوارات خاصة بالظوافر يبيعوا فيهم حتي في تونس القيتهم وحتي هنايا موجودات ,,, عيـــــــون سهفتيني نشوف فستانك تلبسيه بالهناء ,, تمـــــورة وينك ,, سلمولي علي ميراس لو كلمتوها وقولولها الحمد لله علي السلامة ,, |
رد: تجمع حوامل ليبيا
السلااااااااااااااام عليكم
كيف حالكم اليووووووووووووم يا حلوااااااااااات ام قصي عاش من شافك حبيبي او سمع عنك خبر كيف حالك وحال راجلك وبنياتك واهلك ميمونه ربي يهنيكم بجيران كويسين انتم ساكنين جدد في عين زارة صح بعاد هلبه على جزيرة الفرناج ولا قريبين انا نسكن مش بعيدة على سيمافرو الفرناج متفائلة ربي يرزقك بالحمل السليم ويشفي زوجك انتي وام وسونه وكل متمنيه يارب ام وسونه ياسرك هياجة روحي فلستي بالراجل ام اجنادين شنو اخبار الزاويه اليوم ام ناريز كيف حالك يا ناشطة نايضة بكري مش بالعاده |
رد: تجمع حوامل ليبيا
سلامات دهشتونى وانا نقرا توبه معش نطول عليكم مره ثانيه ثرثارات
بس تموره قطعتينى بريحه الثوم ههههههههههههه الحمدلله انى مانتوحم هنديه الحمدلله على السلامه ومبروك وليدك يتربى فى عزكم شن احوالك واحوال بنيتك و اهلك فى درنه وكيف امورك مع اهل زوجك انشاء الله امورك بخير ام وسونه تسلمى على السؤال حبيبتى الله يبارك لك فى العلاج تفرحينا عن قريب ام محمد سامحينى حبيبتى انتى درناويه اهلاين والله العياده امتاع محمد شنيب تقصدى النجاح اذا هى راح نسالك عليها تبى تولدى فيها يعنى ما فهمتش سؤالك عيون عيد مبارك والله من النادر ماتلقى سلفه كيف اختك لذالك رسميات احسن شى ليبيا الله يهنيك بسلفتك مشاء الله الله لا يفرق بينكن والله يديم محبتكن ميراس مشاء الله على الصور والهدايا تعلمتى تحطى الصور خشيتى بالطول ووالعرض هههههههه |
رد: تجمع حوامل ليبيا
ام اجنادين وين تخدمي؟
ووين تسكني في الزاويه؟ ومواليد كم؟ ههههههههه قصقصة صح متفائلة انتي مواليد كم؟ ليبيا قلبي من وين تخرجتي؟ |
رد: تجمع حوامل ليبيا
ام قصي .... احكيلنا التفاصيل وين كنتي مغطسه؟
|
رد: تجمع حوامل ليبيا
انا نحساب روحي نسافر شهر 11 لالمانيا بس الدعوة تعطلت من غادي والطيران مازال مافيش رحلات لالمانيا
خايفة راجلي يكنسل المشيه ويخيب املي ادراج الرياح |
رد: تجمع حوامل ليبيا
يلي تخش تكتب شنو دارت غداها
انا ما طيبتش سخنت شويه قلايه لصغاري وراجلي متغدي برا وانتم شنووووووووووو؟؟؟؟؟؟؟ |
رد: تجمع حوامل ليبيا
انشاء الله تصير من سفرتكم
والله شن نحكيلك انا من الخميس الماضى اما سوق او الرابطه الجمعه مشيت للبيضاء شريت للبنات عيدهم والسبت درت حلويات العيد وبرمت على الشقه شويه اللاحد العيد عيدنا فى مزرعه خاله مع خوال راجلى الاثنين عند اهلى الثلاثاء فى الحوش مدقدقه مقدرت نرفع راسى ارهاق الاربعاء مشيت انا وراجلى والبنات راحله لسوسه الخميس جنى مرضت مرضه التهاب حنجره حشاكم اسهال وتفريغ الجمعه زرده مع هلى من الصبح لليل عصبان وشوايه مانسهفكم السبت فى الحوش مريضه نزله معويه وفى العشيه مشيت للرابطه كان عندى اجتماع اليوم مشيت للمدرسه عندى تصحيح وروحت درت غداى طبيخه فاصوليه بيضاء ومحشى فلفل حلو |
رد: تجمع حوامل ليبيا
قصة البنت الليبية في العيد هههههههههههhttp://forum.hwaml.com/imgcache2/hwa...190490_853.gifhttp://forum.hwaml.com/imgcache2/hwa...190490_853.gif الرجاء القراءة للنهاية http://forum.hwaml.com/imgcache2/hwa...190490_840.jpg عزيزي الشاب حين يقدم لك صحن العصبان او صحن القلاية في يوم العيد ..قبل ماتبدا ترحي قف قليلا وفكر هل تعلم كيف صنع ؟؟ ... تعالي معي في رحلة العذاب لتتعرف على يوم قاسي في حياة البنت الليبية .. يوم عيد الاضحي يوم مبارك ولكنه في حياة البنت الليبية من اصعب ايامات السنة..فالبنت في ليبيا تتعب ممكن اكتر من اللي في الحج..فلا احد في العالم الاسلامي يستعمل في كل اجزاء الخروف الا في ليبيا..فلا احد غيرنا يدير في القلاية والعصبان والشواء و القديد والروس واحيانا حتي الصوف في يوم واحد!! غالبا ماتستيقظ البنت الليبية يوم العيد حوالي الساعة التاسعة صباحا بالكتير على صراخ والدتها واحيانا على هبدة من بوها..المهم ينوضوها..مع انها غالبا ماتكون ساهرة تقرض في الخضرا ولا تضم في الحوش زي كل عام على امل بيجيهم حد يوم العيد ( وديمة مايجيهم حد) وتكون متوقعة انها ترقد وتفوتها الحوسة..ولكن امها واقفتلها بالمرصاد..تنوض البنت مخلوعة تحسابهم خلاص حايسين ويراجو فيها..تلقاهم قاعدين حتي الدبح مادبحوش ومش باين اصلا امتي بيدبحو حتي الخروف قاعد جوه مليح ويدور.. تسال البنت امها: خيركم نوضتوني شن بتديروا بيا على الصبح..وانتم ديمة هكي تكرهوا الواحد في حياته؟؟ ترد عليها الام بشبحة من اللي بالي بالك:مصح خليقتك..منوضينك الفجور..وانتي هذا فاش فالحة..نوضي ضمي ولا ديري حاجة فيها الفايدة؟؟؟ واهني تستغرب البنت !! شن بتضم يوم العيد الصبح وهو كل شي بيحوس!! المهم بعد ساعات تتم عملية الدبح وتبدا الام تصيح على البنت اول مايدبحو..صياح عشوائي..كل مرة تبي حاجة..والمشكلة مافيه شي يندار لان الخروف قاعد يسلخو فيه اصلا!! اول ماتتم عملية استئصال المعلاق..تستقبله البنت في قصعة تنفيذا لاوامر الام اللي مش حتنتهي بكل هذاكا اليوم..جيبي هذي حطي هاذي ..خوذي هاذي..قرضي بصل اخضر..قرضي معدنوس..بري للمخزن جيبي زيت وطماطم..شدي مع خوك الخروف يقطع فيه..ملحي القديد..تعالي ساعديني في تنظيف البطن( والله مفروض تنظفيها بروحك كيف بتديري في حوش راجلك بعدين) حطي لخوتك يتغدوا..ان شاء الله الاماعين قاعدات؟؟ شن كنتي اتديري من بكري..تعالي سيقي مكان الخروف..طيح سعدك هذا تسييق؟؟ تعالي لوحي وسخ البطن ..جيبي الليم القارص..تعاااااااااااااااااااااالي..بوك يبي امية... هذاكا اليوم للاسف البنت ماتلحقش حتي تصلي..وتوصل لمرحلة ان رجليها يتشققوا ويطلعولها دوالي من الوقوف..وبعد ماتنتهي مرحلة تنظيف العصبان والحشي ..ويبدا حتي الشواء تم ..ستعتقد ان التعب انتهي..اهني الشاب بيخش يدوش ويستني العصبان ..والبنت تقعد تندب في مكان الدبح والحوسة.. وبعد ماتوصلك انت صونية العصبان وتقوللها وين كنتي..البنت بتحصل في الماعين متاع العصبان كلهم..لان الام طبعا تعبانة ( من شني مش معروف) مايجي الليل لين تلقي البنت متلوحة على اقرب مندار رجليها منفوخات وشعرها مشفشف ومدهن وحوايجها صنتهم خرفان..ويديها لونهم اخضر ..وتحت عيونها ازرق..وحترقد في مكانها مرات حتي العصبان ماتلحقش تاكله.. ومع هذا كله مازال فيه تعب تاني يوم..لازم فيه لحم يبي التكييس..وقديد يبي التقليب..واحيانا تقوللها امها جاينا حوش عمك بيعيدوا نوضي بدلي وديري قلاية!!!! وتقعد البنت تعاني في حوسة العيد قداش يوم.. بينما البنت في الدول الثانية لا..فالخليجية عندها شغالة ..والمصرية يدبحو عند جزار واللحم يشووا شوية بس ..والتونسية مايديروش في عصبان..المعاناة كلها عند بنات ليبيا..وبعد العذاب هذا كله للبنت انت تجي بسهولة تاكل العصبان وتمنع وكان قاتلك اختك اشريلي شكلاطة تفوتها واتدير روحك نسيت!! كانت معكم .. مراسلتنا ( مهبودة وافتخر) من امام خروف مذبوح |
رد: تجمع حوامل ليبيا
ماشاءالله اسبوع حافل لاباس على جنى واعليك وكل سنه وانتي طيبه وعام داير ان شاءالله
|
| الساعة الآن 11:00 AM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .