فلوس ضايقتني و ودي ارجعها

[تحب زوجها]

سلام يا حلوين

قبل فترة حماي -اخو زوجي- تسلف من عندي مبلغ
ورجع لي النصف
و قال لي بعد فترة بيرتب اموره و بيدفع الباقي وانا ماقلت شي....
بعد فترة طالبته بالمبلغ لاني كنت محتاجة له
قام قال لي اني ما لي فلوس عنده و هو يذكر انه رجع المبلغ كله.....

انا كلمت زوجي و قال بيكلمه وانا ما رضيت....
و بعد فترة بسيطة وصلني ظرف من اخت زوجي الصغيرة قالت من عند اخوها
فتحته لقيت فيه المبلغ
فكتبت له رسالة... اقوله رحم الله والديك


بعذ اسبوع او سبوعين بالكثير.... كتب لي يتهمني اني ما خليت احد الا و خبرته عن موضوع السلف... يعني كانه معصب!!! وانا ما كلمت احد غير زوجي و محد يدري !!!
انا شكيت في زوجته لان علاقتنا مع بعض مو مستقرة ولكن استغفر الله .... ماعندي شي يثبت انها السبب!!

الان.... انا مابي هالفلوس.... نفسي ضايقة منها وماني مرتاحة لها
صح هي من حقي لكن واضح انه دفعها كأنه مغصوب و مو برضاه وانا ما ابيها خلاص
كلمت زوجي مرة ثانية قالي هذي فلوسچ وانتي حرة


الحين انا متحيرة شلون ارجعها....
هو لمن يشوفني بمكان يطلع و زوجته من صار هالموضوع ما شفتها
ابي ارجعهم بطريقة حلوة نافيها اهانة نفس ما سوو لي

شلون......

[أم رزاان]

حبيبتي الفلوس فلوسك .. وانتهى الموضوع !!!
خلية يزعل طالما زعلة مو على حق !!
هو كله في الأول والأخير اخو زوجك يعني أنت مو ملزمة
تلتمسي رضااااه !!!

احتفظي بفلوسك .. ولا تعطي الموضوع اكبر من حجمة
ولو شفتية هو او زوجتة سلمي عاااادي
ولا تفتحي الموضوع معهم .. وطنشي
أنت عملتي معرووووف معهم بس هما للأسف ماقدروا اللي عملتية !!!

[أم ميوري]

عن نفسي اقولك ان المفروض ماتتضايقين لان هذي فلوسك ومافي شي يزعل وانتي ماطلبتي الاحقك ليش تبين ترجعينها عشان بس هم متغيرين والله بكيفهم انتي ماسويتي شي يزعل

[Almasah]

:)
انتي مو غلطانه
وحماك ماعنده سالفه ورجع لفلوس منحرج منك ويمكن متغير عليك علشان منحرج
انتي سكري السالفه ولاتفتحينها واحتفظي بفلوسك بنفسك
واذا رجعتيها بتحرجين حماك وزوجك وبتحرجين نفسك
خلي لفلوس عندك وهم بالاول والاخير فلوسك

طنشي السالفه وانسيها واذا طلب يتسلف مره ثانيه سلفيه :)

[نبض قلبي]

بالعكس انتي مااغلطتي بشي

والفلووووس فلوسك

ماله داعي ترجعينها ووووومولازم ترااضينه

اهووووووحمااك موزوجك

[احلى من العسل]

حبيبتي انتي ماقصرتي معه ساعتيه يوم كان بضيقه ومافيها شي يوم احتجتي وطلبتي فلوسك المفروض يرجعها ومعها بطاقه شكر بس شكله من الناس الناكره للمعروف وهذي فلوسك ومافيه داعي ترجعينها ومانتي ملزومه برضاهم بكيفهم ان رضيوا اوزعلوا انتي ماغلطتي بشي اهم شي ان زوجك موزعلان منك واذا ماره ماتبغين الفلوس تصدقي فيها لااحد الجمعيات كفاله يتيم اورعايه اسره فقيره وجوه الخير كثيره احسن من انك ترجعينها لناس ماهم مستحقين لها والله يوفقك

[mounira]

من رأيي لا ترجي و لا فلس إذا هو أنكر انه عليه دين و ما خاف على زعلك أو زعل اخوه ... بس يمكن يكون فعلا متصور انه رجع الفلوس كاملة وكلنا بننسى ... اما اذا تصرفاته غير مريحة فهذا يعني انه انتهازي و بيستغل خوفك على التواصل الأسري ... يعني طنشي الموضوع ... وإذا الله فاتحها عليكي ما صرتي محتاجة المبلغ وكنتي راح تعطيه للي ما يستاهل و في نفس الوقت نفسك عففت عنه اتصدقي به واطلبي من الله يزيل سوء التفاهم و يصلح الاحوال بينكم

[مشاعل الدوسري]

حبيبتي يزعل ويرضى لوحده دامك ما غلطتي عليه

ينرفز الشي هذا الحين لما الواحد يطالب بحقه يقوم الثاني يزعل ..

و بس انتهينا خليه يطلع و لا يكلمك و لا زوجته مو محتاجتهم انتي بشي

[انثى من الخيال]

هذا الموضوع ما يحتاج نقااش فيه غاليتي......
......الفلوس فلوسك والساكت عن الحق شيطان اخرس
لا تهتمي فيه المهم هو زوجك وبس.....وريحي نفسك لانك ما سويتي شي غلط..........

[خُـرآفية آلعمق]

حبيبتي الافضل والمفروض ماترجعينها
ماغلطتي انتي وبعدين فتره وبتلقين الامور رجعت طبيعي
واذا ماتبينها تتصدقين فيها احسن

[سرووءة]

انت مانك غلطانة وهذي فلوسك
وخلاص اخدتي حقك كامل
وطنشي يلي يصير ..
من حقك هذول ..

[أسيرته]

وهل جزاء الإحسان إلا الإحسان ؟؟
لو انا منك ماااااافكر بالموضوع نهاااائي
واللي يزعل من ولا شي يرضى من ولا شي
انت خليك بأخلاقك وسلمي إذا شفتيهم واسألي عن احوالهم
ولاكأن شي صار انسي الموضوع تماما ..
موفقه حبيبتي

[تحب زوجها]

انا كلمت زوجي ثاني و هو مو راضي
و قال لي نفس كلامكم كلكم ... يا اني اتصدق فيها او اخليها بس ما ارجعها
و الله احترت ... اقول هذي حقي و مبلغ مو شوية ... بس بنفس الوقت احس انه شي احد راميه علي و كأني محتاجة له ... الله يسامحه فعلاً

انا لحد الان ماستخدمت من الفلوس شي و مخليتها على جنب ... و الي الله كاتبه بيصير






مشكورين و ما قصرتوا ... خليتوا نفسيتي تتحسن بوايد عن بداية الموضوع

[احلى من العسل]

اذا رجعتيها راح يكون موقفك بايخ وماراح يرضون وممكن يصير خلاف انتي بغنى عنه لاتحرجي نفسك وتحرجي زوجك خلاص المبلغ وصلك قفلي على الموضوع وانسي السالفه تصدقي بالمبغ او اكفلي يتيم او ساهمي ببنا مسجد اوشراء براده مويه وحطيها عند مسجد سوي شي ينفعك بالاخره احسن من اعاده الفلوس لغير مستحقيها

[*ام ثامر*]

اختي معليك فيه والفلوس فلوسك
الله ياخذحقك منهم