تأخرت دورتي اكثر من شهر ونص ..

[الأموووره]

السلام عليكم ورحمة الله وبركاته
ربي لا تذرني فرداً وانت خير الوارثين ♡

اول موضوع لي ف المنتدى بعد متابعة سنه معاكم
الله يجعله بداية خير
حبيباتي بقولكم وش صار معي

انا متزوجه من سنه وثلاث شهور وماكتب لي ربي الحمل ولا اخذت موانع ابدا ولا كد تأخرت هالقد ابد دايما من خمس الى سبع ايام حدها
والحين اخر دورة جتني ب 5شوال والحين ذو الحجه وما شرفت :(
سويت اختبار الحمل كم مره وكله سالب ..
بعد ماكانت متأخره ثلاث اسابيع رحت للدكتوره وسويت تحليل هرمونات وحمل .. الحمل طلع سالب والهرمونات قالت لي طبيعيه حتى هرمون الحليب لاكن قالت فيه انخفاض بهرمون الغده الدرقيه ويمكن هو السبب وحاولت تعطيني حبوب تنزلها بس مدري وش اللي منعني سبحان الله
بعدها سوت لي اشعة قالت تمام لاكن فيه كيس صغيير مره ومايأثر وفيه بويضه حجمها 18 معناها ان التبويض متأخر عندك
بعد كلامها هذا توكلت على الله وقلت انتظر وبعد 3 ايام سافرت لأهلي ونسيت سالفة الدوره مع العيد والطلعات وكذا
لكن بعدتقريبا اسبوع من كلام الدكتوره نزل معي شوي دم وردي مخلوط بأفرازات شفافه فقط لما مسحت اول مره بعدها مافيه شي افرازات شفافه فقط واليوم الثاني نفس الشي نقطه لكن مو وردي صار بني فااااتح كنت على هالحاله خمس ايام لاكن ماتنزل الا مره بانهار واليوم الثاني مافيه شي ابد اولاحظت انه ينزل اذا اجهدت نفسي او ركبت سياره تهتز كثير
وبنفس هذي الايام اللي جتني شوية لخبطه كانت معي سخونه وزكام وتعب الله لايوريكم وكل اللي يشوفوني يقولون ان شاءالله سخونة حمل hwaml93
وباليوم الخامس رجعت لبيتي وكل شي تمام ووقفت اللخبطه هذي
والحين لي اسبوع من رجعت وكل شي طبيعي مجرد افرازات شفافه كثيير من تأخرت الدوره وهي معي
وسويت تحليل منزلي امس وطلع لي خط واحد :((
رايكم وش اسوي تعبت من الانتظار ومره متأمله خير
وتتوقعون اللخبطه اللي جتني تكون بسبب انغراس البويضه ومالها اسبوع علشان كذا مابين الحمل وانا من جتني اللخبطه نصحوني اشرب حلبه قالو اذا حمل خفيف ترفعه واذا دوره تنزل ومن شربتها وقفت اللخبطه اللي معي
وللحين مامعي اي اعراض حمل او دوره مجرد صدري يألمني خاصتن بعد النوم وبعض اللحظات يجيني مو دوخه لاكن افقد توازني شوي
تأيدوني اصبر اسبوع واحلل دم او وش اسوي تعبت والله :( وزوجي احس طفش
ومن صارلها مثلي ونزلت الدوره او صارت حامل

الله يسعدكم طمنوني .. واللله يرزقني وكل محرومه وكل من يبغى الحمل عاجلا غير آجل يارب..♡♡

[نوووشا]

هلافيك بينا ومنوووره
دورتك منتظمة ؟؟ اول مره تتاخر عليك كذا ؟؟
شوفي ياقلبي هي ماتتاخر الا لمانع لخبطت هرمونا اول حمل ودامك رحت اتطمنتي على هرموناتك ومانزلت الدوره فااحتمال كبير يكون حمل باذن الله وكمان اخذتي الحلبة ومانزلتها وفيه كثير يصير لهم كذا ومايبين الحمل الا بعد مرور شهرين او ثلاثة بعد نصيحتي لك روحي سوي تحليل الدم الرقمي وهو اللي راح يبين لك اذا فيه حمل ان شاءالله ووتها ارجعي لدكتورتك وهي تقولك واذا لاسمح الله مالع حمل قولي لها ابي شيء ينزلها لان تاخرها مو كويس

والله يطمنك على نفسكك يارب ويوفقك

[راجيه لله]

وعليكم السلام حبيبتي وهلا فيك

بقولك شي ي قلبي هرمون الغده الدقيه انا منخفض لكن ما اخر لي الدوره
بالعكس سبب لي نزيف ف اتوقع مالها دخل الغده بالدوره هي قالت لي بسبب هرمون الغده نزل لك نزيف وكمان واخذه منشطات زادته عليا
سوت لك تحاليل للغدد الباقيه ولا ؟

[الأموووره]

هلا عزيزتي الله يسعدك
ايوا دورتي تقريبا منتظمه كانت عالاغلب تتأخر خمس ايام او اسبوع اذا طولت
قالت لي الدكتوره تعتبر منتظمه كذا
كانت غالبا تجيني بتاريخ الطهاره يعني كل شهر تتأخر شوي بس مو شهر وثلاث اسابيع ><
ونسيت اكتب شي :$ الدوره الاخيره اللي جتني الدوره رحت لوحده تسوي علاج شعبي وعطتني اعشاب اشربها مع الشاهي وقت الدوره واعشاب ثانيه اشربهامع القهوه قالت استمري عليها الى الدوره الجايه وان شاءالله ماتجيك ولاجت للحين :/

[الأموووره]

لا حبيبتي ( راجية الله
ماسوت لي تحليل ثانيه بس للغده الدرقيه لاني قلت لها ان امي كان عندها مشاكل بالغده
قالت روحي لأخصائي غدد يضبط لك الهرمون
بس امي مرره ماتبغى اني اروح ومقتنعه تقول الغده مالها دخل
ممكن انه تسقط الوحده بسببها بس ماتمنع الحمل
وامي حملت بأخوي زمان قبل تشيلها وماأثرت الحمدالله

[احبك بلا حدود]

حبيبتي روحي حللي تحليل رقمي لدوره وغيري دكتورتك وان شالله تطلعي حامل يارب العالمين

وانتي وباقي البنات تطلعو حوامل

[ayato]

معقوله شهر ونص حليي تحليل رقمي الله يعينك

[الأموووره]

طيب التحليل الرقمي موجود بالمستوصف والا لازم بالمستشفى ..
الله يسعدكم طمنوني لأن المستشفى اللي رحت له قبل كان الحبيب العليا بالرياض و زحمه المواعيد وسوو لي تحليل هرموني هذا كان قبل شهر تقريبا

[احبك بلا حدود]

حبيبتي تسير في مستوصف عادي ياقلبي بس عشان يطّلع التحليل يأخذ ساعتين او ثلاث او اذا عندكم مختبرات في الرياض زي مختبر البرج الي عندنا بجده فاضي وماياخذ وقت معاكي

[أسيرة الصمت]

مثل ماقالوا البنات اعملي تحليل دم رقمي اذا حمل اكيد راح يبان
وان شاء الله تكوني حااامل وتجي تبشرينا

[الأموووره]

اميييين يارب ..♡♡
ان شاءالله بروح بس خايفة لأني حللت دم تحليل هرموني قبل 3 اسابيع ومابين شي سالب :(
وقبل يومين حللت تحليل منزلي برضو خط واحد والمشكله زوجي متأمل يكون حمل
. والله حالتي صعبه مره افرح اقول حامل ومره اهدي نفسي واقول لاأتأمل كثير ..لكن أملي بالله كبير
وان شاء الله ابشركم قريب يااااااارب ))دعواتكم

[besan1]

ربي يفررح قلبك وتطلعي حااامل ان شا الله

[رونـــق!!]

..

وعليكم السلام ورحمة الله وبركاته ,,

حللي رقمي عشان تعرفي حامل أولا ,,

وربنا يكرمك قادر على كل شيء..

[عروسة هشام]

الله يعينك .. انا اخت زوجي نفسك .. متاخرة شهر ونص وماتدري شنو السالفة,, حللت وطلع سلبي

انا قرأت في مواقع ثانية ان احتمال يكون تكيسات على المبايض

بس انشاء الله يكون حمل .. بشرينا بالنتيجة

[شوق العين]

يارب تكونين حامل تأملي خير

[الأموووره]

امييين يارب الله يسعدكم ويحقق امانيكم ♡♡
اليوم الصباح حللت تحليل منزلي مره ثانيه وسالب
وفيني ضيييقه احس ودي بس اصيح .صار لها متأخره شهر وعشرين يوم
الحمد لله على كل حال )
. وزوجي شاف التحليل وماتحمس نروح نسوي تحليل دم :(

[الأموووره]

اختي عروسة هشام ..
انا سويت اشعه قبل 3 اسابيع علشان نشوف اذا فيه كيس حمل او تكيسات او اي سبب
قالت لي الدكتوره فيك تكيس صغيييير مره مايضر تقول هالنوع يروح مع الدوره
.
.
الله يسعدكم بالنسبة للدم اللي يكون علامة تعشيش البويضه بعده بكم يوم يبين الحمل
ومتى تبدأ الاعراض
انا ابدا مامعي اعراض واضحه ..:( بس الم بسيط بصدري ويجيني بعض اللحظات ماأتوازن كأني راكبه سفينه لما اكون جالسه فتره طويله واوقف
ولما مشيت بالسوق كأن فيه حجر ببطني او شي احسه مشدوود

[التائبة لله(ام محمد باذن الله)]

حبيبتي فوضي امرك لله و الله يطمنك و تطلعي حامل و تجي تبشرينا
الله يرزقك الذرية الصالحة يا رب

[jojo 123456]

الله يرزقك يااااااااااااااارب

[ملامح حاليه]

اسأل الله رب العرش العظيم ان يبشرك بالحمل السليم عاجل غير اجل