تجمع سيدات وبنات فلسطين الغاليات..

[yasmin jamal]

يسعد صباحكم صبايا

[حواء مثالية]

صباح الفل

وينكم لا حس ولا خبر

[نور العمر]

صباح الخيرررر

كيفكم وشو اخباركم

[نور العمر]

وينكم

مختفين

اشتقنا للحكي معكم

hwaml15بدكم ضربhwaml17hwaml79
\
\
\

[لولو حمادة]

مرحبا
كيفك نور؟
كل مافوت الصفحة ما بلاقي حدا زهقت

[لولو حمادة]

أشهد ان لا إله الا الله وأشهد ان سيدنا محمد رسول الله (http://www.google.ae/url?sa=t&rct=j&q=&esrc=s&source=web&cd=1&cad=rja&ved=0CCgQFjAA&url=http%3A%2F%2Far-ar.facebook.com%2Fpages%2Fashhd-an-la-alh-ala-allh-washhd-an-sydna-mhmd-rswl-allh%2F148533828498479&ei=Aob3UuafKMeRhQeL84CgDQ&usg=AFQjCNHp33FE4J9u66qOzmuIxNIGSmaV9A&bvm=bv.60983673,d.ZG4)

[fafini]

سلام يا بنات بلادي

[دموع الليل]

مساااااالخير

ووووووينكم ماحدا مبين؟؟؟؟؟؟؟؟؟؟؟؟؟

[لولو حمادة]

مساء الخير
مش معقول؟ كل هدول بنات فلسطين كل فتره بتختفي وحدة عدنا نقرضنا
( جارة -حواء-غموض -ميساءعودة -رشا -ام عزمي-بيبو-هبة-مسك-عيون المها-احساس انثى -ام جودي-انبثاقة امل -سما الدنيا -ام عمرغادة -فوفو-ام اسيد-لولو الفلسطينية -حلا الماس -بينك روز -عسولة فلسطين -كبرياء انثى-دموع الليل -نور العمر- ياسمين جمال - fafini -بسمة امل
صحيح انا مش دائما بفوت بس مابترك المنتدي وكل فترة بطل

[حواء مثالية]

اخ يا بنات

اسمعو الي ما بدها تفوت براحتها خلص يا نور ولولو والحكي للبنات الي بفوتو هون

ما رح نسال عن حدا الي بكون هون بحكي باي شي بدو الي عندو سؤال او اي شي

لانه الي برجع للصفحات بلاقي ثلاث ارباعها سوال عن البنات الي مو فارقه عندهم التجمع

لهيك الي بتفوت بنرحب فيها وبندردش معها والي ما بدها تفوت يسعد اوقاتها وبراحتها

الحكي للجميع عشان يكون تجمعنا حلو مثل التجمعات التانيه وفي شي مفيد مو كله وينكم ومختفييين ومن هالحكي

يالله نبلش من هالليلة

الله يسعد مسى الموجودين ويارب كلكم يا بنات تكونو بخير


قربت الاعراس هلا من نهاية الشهر الجاي في عندنا اعراس كثير بالعيلة

[دموع الليل]

معك حق ياحواء

كيفك ياعسل؟؟وكيف اولادك؟

[لولو حمادة]

حواء ودمو ع يسعد مساكم
قربت الاعراس وقرايبي كثير خاطبين بس حتروح علي

[دموع الليل]

هلا لولو
حاولى انك تنزلى غزه بتغيرى جووو

[لولو حمادة]

دموع
نفسي انزل بس المعبر عليه زحمه
وكمان شغل زوجي

[دموع الليل]

الله يكون بعونك

شو صار بتحليلك ا ن شاءالله خير

[لولو حمادة]

هههههههههههه
اللي 20 يوم عاملة التحاليل ولسى ماطلعت النتيجة زهقوني

لمن تطلع بحكيلكم

[دموع الليل]

الله يطمنك حبيبتى

بدها طوله بال ههه

[حواء مثالية]

اسفه طولت عليكم

كنت انيم بزوزو

الحمدلله اموري تمام واولادي بخير نشكر الله

الله يديم الافراح يا لولو نحنا كمان في اعراس كثير عرس اخي واختي واولاد عمي اربعة

[نور العمر]

صباح النور

كيفكم هلء صحيت من النوم وأنا واولادي كانو نهار ههههه

بكره الصبح رح تكون قاطعه الكهرباا بشوفكم ان شاء الله المسا ع ال2

حواء معك حق بكلامك وهيك المفروض نعمل ...

[لولو الفلسطينية]

مرحبااااااا
شو اخباركم ؟؟
لولو
ربنا يطمنك و تكون فحوصاتك منيحة يا رب
كبرياء
لولوليش هههه الف مبروك السنونات
بسمة امل
اهلا فيكي ... ممم بخصوص ابرة الضهر ... انا ولدت بالهلال بس دكتوري ما رضي بعطيني الابرة لانها صحيح بتخفف الوجع بس الها تأثيرات بعدين ... انا ترجيته رجا يعطيني اياها و ما وافق
بس الاهلي و الله ما بعرف بيعطوها و الا كيف بس بتوقع موجودة ... الله يقومك بالسلامة
حواء
عقبال ولادك يا رب
انا عرس سلفي يوم الجمعة هاي ... ممم مشغولبن هالفترة ... انا تقريبا جهزت كلشي
باقي الصبايا يسعد اوقاتكم
الصبايا الجداد منورين

[كبريآء أنثى ـآ]

صباااااااااااااااح الخير
والله اشتقتلكم كتييييييييييير
معلش ما بفوت كتير بس صدقوني بتكوني الكهربا جاية وانا بكون بشتغل
ولما اخلص بتقطع لانه الماتور مافيه سولار
وانا اشتقتلكم والله طمنوني عنكم

[حواء مثالية]

هلالالالالالالالا صبايا منورات

كيفك لولو الف مبرووووك العرس

[لولو حمادة]

صباح الخير
كبرياء كيفك؟؟
لولو مبروك العرس عقبال لبنوتك
نور وحواء يسعد صباحكم

[كبريآء أنثى ـآ]

هلا صبايا
أنا الحمد لله منيحة وبنتي بخير الحمد لله
كيفك حواء ولولو حمادة ؟؟
ألف مبرووك لولو .. هههه زبطي حالك على الآخر ..
ممممم أنا لسا عرس سلفي ع الصيف وفي كمان فرح عم زوجي كمان شهرين

[نور العمر]

مسااااء الخيررر

كيفكم

لولو مبروك العرس وعقبال عند بنوتك...

[دموع الليل]

يسعد مساكم

كيفكم؟؟

[نور العمر]

مسااا الخيررر

مين هووووووون....؟

[لولو حمادة]

صباح الخير

[نور العمر]

هلا صباح النور لولو

كيفك وكيف اولادك

شو طابخين اليوم

[fafini]

صباح الخير صبايا كيفكوا انا بعدن ولادي مرضى اجاهن كريب قوي كتير وبنفس الشهر كربو مرتين الكريب الاول قعدوا فيه 12 يوم بعد 3 ايام رجعوا مرضوا. الله هلاك وانا وجوزي كمان عدونا وعم بعمل سناني وحالتي حاله

[نور العمر]

سلامتهم وديري بالك عليهم ...

ربنا يحفظهم ومايشوفو شر ...

[لولو حمادة]

نور
الحمد الله انا والاولاد بخير
اليوم ماطبخت عندي اكل من امبارح
fafini
سلامة اولادك

[حواء مثالية]

نهاررررررررررررررركم فل عكس نهاري

انا منكده كثير اليووووووم ومضغوطه

[بينك روز]

مسا الخير
كيفكم
مابعرف ازا في بنات هون بيعرفوني ولا لأ
انا قديمه هون بس الي فتره كبيره مابفوووت
على العموم انا ام رهف من غزة

[Snowwhite-90]

يسعد مساكم صبايا ،، كيفكم حبيباتي ؟؟ اعذروني والله الفترة الماضية كنت من شغلة لشغلة ...

اول شي حمود كان مريض وغلبني كتييير وبعدها انا مرضت والدورة اجتني اول مرة بعد الولادة وكتييير تعبت منها ،،، وبعدها طعم جودي :(

طمنوني عنكم ،،، شو اخباركم ؟؟؟

[Snowwhite-90]

هلاااااااا هلااااااااا بينك روز حبيبتي شو اخبارك ؟؟ زمان عنك والله ،، كيف رهوفة الحلوة ؟؟ حبيبتي انا ام جودي اذا فاكراني :)

طمنينا عنك ؟؟؟

[بينك روز]

هلا ام جودي كيفك شو اخبارك
طمنيني عنك ياعسل والله مشتقالكم كلكم

[دموع الليل]

يسعد مساكم

هلا ام جودى كيفك ؟؟

ام رهف هلا فيك بينا

حواء سلامتك ليش منكده؟؟

[بينك روز]

هلا فيكي دموع الليل
عرفيني ع حضرتك

[دموع الليل]

انا من غزه متزوجه وعندى ولدين الله يحفظهم

وانتى؟؟

[بينك روز]

هلا فيكي دموع تشرفنا
وانا من غزة متزوجه وعندي بنت اسمها رهف
وهلا حامل باخر الشهر الرابع

[Snowwhite-90]

حبيبتي ام رهوووفة ربي يسعدك يا قمر انا الحمدلله تمااام ومشتقالك كتيييير والله

اخباري متل ما انا باقيلي سنة بالجامعة واخلص ان شاء الله :) ،، هلا صار عندي جودي وعمرها 4 شهور ونص ،، وحمود صار يتسلى معها هههههه

والحمدلله مبسوووطة كتير :)

شو اخبار رهوفة ؟؟ كام صار عمرها هلأ ؟؟ ولساتك بتشتغلي ؟؟

هلاااا دمووووع حبيبتي كيفك ؟؟ وكيف اماميرك ؟؟ مشتقاااااالك حبيبتي ،،،

حواء حبيبتي مالك يا قمر ؟؟ من شو مضغوطة ؟؟ تعي ندردش سوا

[Snowwhite-90]

ما شاء الله تبارك الله ،، حبيبتي ربي يتمملك على خير ويقومك بالسلامة وتشوفي البيبي سليم معافي بين ايديكي ،، والله زماااااان عنك

[دموع الليل]

ام رهف الله يتمم الك على خير

ام جودى انا الحمدلله بخير

ليش طولتى الغيبه؟؟

[Snowwhite-90]

حبيبتي دموع معلش حبيبتي والله كنت مشغولة بمرض حمود وطعم جودي وانا كمان كنت مريضة :(

بس كنت افوت من الموبايل واطمن عليكم من فترة لفترة

[بينك روز]

هلا ام جودي
مبارك البنوته تتربى بعزك
انا بطلت اشتغل من لما كا عمر رهف شهرين هلا عمرها سنة ونص
مجنناني وشيبه
احكيلي لسه حمودي بسهر ولا راق شوي

[Snowwhite-90]

هههههه لا الحمدلله زمان بطل سهر هلا اول ما احكيله يلا نام بيغمض عيونه وبينام :) ،، هلا جودي الي بتسهر بس مو دايما ايام هيك وايام هيك

[Snowwhite-90]

الله يبارك فيكي حبيبتي :)

[دموع الليل]

سلامتك ام جودى وسلامه اولادك

ام رهف شو بتشتغلى؟

[Snowwhite-90]

الله يسلمك حبيبتي دموع ،،، كيف اولادك ؟؟ كيف كان نهارك ؟؟

[دموع الليل]

الحمدلله

ابنى الصغير مرشح مش عارفه شو اعمله

قطع قلبى عليه

[بينك روز]

الله يخليلك اياهم ام جودي
دموع الليل كنت اشتغل محاسبة في شركة خاصة

[كبريآء أنثى ـآ]

مساء الخير على الجميع
أهلا وسهلا بالصبايا
كيفكن ؟ طمنوني عنكن ؟
أنا الحمد لله منيحة وبنوتي ما شاء الله عنها
ممم أسنانها بينوا كلهم مع بعض فوق وتحت ههههه بس بتزن ومنكدة طول الوقت
اليوم أجتني الدورة والله تعبانة كتيييير من المغص
ممم حواء شو مالك حبيبتي متنكدة .. ألف سلآمة عليكي يااارب ان شاء الله عدوينك حبيبة ألبي
كيف برلنت وعزوز ؟؟
مممم نور العمر كيفك ي عسل . وكيف أولادك ؟
دموع الليل كيفك وكيف ابنك صار ان شاء الله أحسن ؟
هلا ب بينك روز وسنو وايت منورات يا أمامير

[لولو حمادة]

مساء الخير
بيننك روز وام جودي نور المنتدى
دموع سلامة ابنك

[Snowwhite-90]

يسعد صباحكم حبيباتي،، كيفكم اليوم ؟؟

لولو حمادة الله يسعدك حبيبتي اكييييد منور بوجودك ووجود الصبايا يا قمر ،،، كيفك انتي طمنيني عنك ؟؟ وكيف محمد واحمد ؟؟ وشو صار بتحاليلك ؟؟

الف سلامة عليه ابنك دموع الليل ،، ما يشوف شر حبيبتي ،، والله جودي حبيبتي صحيت مرشحة وبتتنفس بالعافية :( :(

مييييين هووون ؟؟

[Snowwhite-90]

تسلميلي كبرياء :) ،، حبيبتي النور نورك

[Snowwhite-90]

ليه هيك التجمع كل يومين صفحة واقل حتى :( ،،، التجمعات التانية انشط منا

[كبريآء أنثى ـآ]

انا جيييييييييييييييييت بس متأخرة أكيد ما في حدا

[حواء مثالية]

يسعد صباحكم ونهاركم فل


جمعتكم مباركه

[حواء مثالية]

بينك روز اشرقت الانوار

يا هلا وغلا نورت

ام جودي الحمدلله على سلامتكم ونورتي ياقلبي

[حواء مثالية]

كبرياء الله يحميها منى ومبروك سنوناتها
اولادي بخير الله يسعدك مجننيني

[كبريآء أنثى ـآ]

الله يبارك فيكي حبيبتي
ههههه والله ززززززززن 24 ساعة بتصدعني ههههه
اليوم فرح سلفها لـ لولو الفلسطينية ان شاء الله تكون زبطت حالها ومبسوطة ألف مبرووووووك عقبال فرحتك في أولادك يا لولو
الله يفرح كل الناس يا رب

[نور العمر]

مساااء الخيررر

كيفكم

وجمعه مباركه عليكم


مين هووون

[حواء مثالية]

الله يعينا عليهم يارب

مساكم عسللللللللللل

[نور العمر]

منوره حواء

كيفك وكيف اولادك..؟

[نور العمر]

كيفكم ياصبايا

مين هووون

[حواء مثالية]

يسعد مساكم والله من يوم ما اصحيت وانا على نفس واحد بين لولاد والبيت كنت مضيوفه اليوم قبل نص ساعة روحو ضيوفي وهلا عزوز وبرلنت ناموووووووووووووووووووووو

كيفكم

[نور العمر]

مسااا الخير

كيفكم اليوم

مين هون ندردش...؟

[لولو الفلسطينية]

مسا الخيييييير
بينك روز
اشتقتلك ... الله يخليلك رهوفة و يتمملك حملك على خير
كل الصبايا اشتقتلكم
مممم طبعا اتجوز سلفي هقبال ولادكم و بناتكم يا رب
و الحمد لله كلو تمام
كبرياء
ههه طبعا زبطت حالي .. الله وكيلك الكل بحكيلي طالعو احلى و اشيك من العروسة هههه ... هي امورة كمان
و انتو كلكم شو اخباركم ؟
يسعد مساكم

[نور العمر]

منوره لولو كيفك

ومبروك لسلفك ... هاي اول سلفه ...؟؟

[حواء مثالية]

الف الف مبروك لسلفك يا لولو

مساكم فل

بنات الدورة مخربطه الدنيا عندي الشهر الماضي قدمت عشر ايام وهلا ماخره ايام بالكم مع الرضاعة ولا في مشكله انا رحت على الدكتورالشهر الماضي لاني اكلت هوى منها واجت قويه عمره ما صار معي هيك

[كبريآء أنثى ـآ]

لولو
ألف مبرووووك يا عسل وعقبال عوضك يااارب
حواء الف سلامة عليكي والله ما عندي فكرة
أنا الحمد لله برضع ودورتي منتظمة أنا اليوم يا بكرة آخر يوم بالدورة

[نور العمر]

مرحباااا

منورين حواء وكبرياء

حواء اعتقد من الرضاعه ...

[كبريآء أنثى ـآ]

يسعد مساكي نور
كيفك ؟
كيف هالمطر ؟؟ هههه ولو انه خفيف

[نور العمر]

هلا كبرياء انا الحمد لله بخيررر

انتي كيفك وكيف منوشه وكيفك مع دار حماكي

[نور العمر]

https://fbcdn-sphotos-f-a.akamaihd.net/hphotos-ak-ash3/t1/p370x247/1920547_639208549450411_856251489_n.png

[نور العمر]

https://fbcdn-sphotos-f-a.akamaihd.net/hphotos-ak-prn1/t1/s403x403/1940011_639011319470134_400831051_n.png

[كبريآء أنثى ـآ]

ههههههههههههههههههههههههههه حلوة منك يا نور
أنا وبنتي مناح الحمد لله
وانا منيحة مع دار حماي بس عارفة نفسيتي تعبت كتيييير
من ضغط شغل البيت وبطلت أطلع زي الخلق خلص ما بتهنى صرت بالطلعة
واذا بدي أطلع بدي أخلص شغل البيت بعدين أطلع بجد قرفت
بس يلا كرمال جوزي بمشي

[كبريآء أنثى ـآ]

يلا عدها قطعت الكهربا
بشوفكم بكرة ان شاء الله
تصبحوا على خير
باي صبايا

[لولو الفلسطينية]

الله يبارك فيكم .. عقبال ولادكم يا رب
نور
هههه اول سلفة و اخر سلفة

[لولو حمادة]

صباح الخير

عمات التحاليل وطلعت الحمد الله سليمة ماعدا عندي الاتهاب عادي في البول الله يعزكم
وفي نتيجة ماطلعت لانو المادة المستخدمة في التحليل مش موجودة في المستشفى
المهم شفت التبويض وطلع كويس وان شاء الله احمل بتؤام هدا الشهر

[حواء مثالية]

مساكم فل
كيفكم اليووووووم

الحمدلله يا لولو ما عندك مشكله بالفحص ان شاء الله ربنا يعطيكي الي بدك

هاتو شي نبرم فييييييي

[دموع الليل]

يسعد مساكم

كيفكم صبايا

لولو الحمدلله انه طلعت تحاليل سليمه

الله يرزقك باللى تتمنيه

[حواء مثالية]

مساكم فل

كيفكم يا حلووووووووووووووين

اليوم طعمت برلنت طعم السنة ونص اليوم اخر طعم الها والله ميكله هوى مسكينه سخنت واجرها مو قادرة تمشي

[نور العمر]

مسااا الخير

كيفكم وشو اخباركم ...؟

لولو الحمدالله انه النتائج طلعت سليمه وربنا يكرمك الحمل هالشهر

حواء سلامتها برلنت هاي الابره بتغلب انا يامن كان مايمشي ليومين .. اعمليلها كمادات مي ..

[حواء مثالية]

هيني عملتلها ان شاء الله تخف بسرعه

شو اخبارك طمنيني عنك وعن اولادك

[لولو حمادة]

مساء الخير
تسلموا صبايا وان شاء الله احمل هدا الشهر

حواء سلامتها عمليلها كمادات
زكرتيني لمن طعمت ابني لسنة ونص والثاني لشهرين بنفس اليوم كانت حفلة صباحي وكنت بغزة وسهرت بيت عمي معي ههههه

[نور العمر]

صباح الخير

كيفكم اليوم

حواء انا الحمد لله بخير و اولادي جننوني هههههههه ربنا يحفظهم يااارب

بس صايبني احباط وملل من قعدة البيت ... نفسي ترجع ايام الجامعه ههههه روقان كانت وحلووه ... وهلءصحباتي الكل ملتهي بحاله خخخخخ

فشة خلق على الصبح ههههههه

المهم شو ناوين تطبخو اليوم

انا احتمال مقالي

[حواء مثالية]

والله ببحكي شو جابرهم على وجع الابر والطعم الله يعينهم

لسه زوزو الو حفلة الاسبوع الجاي الو حفلة طعم الست شهور الله يعينو ويارب يكون خفيف علي

نور الله يخليلك اياهم اولادك ويضلو مغلبينك

نحنا اليوم كنا معزومين عند حماتي على مفتووووووووووول

[حواء مثالية]

هل من احد بالمنزل لنتبادل اطراف الحديث

[كبريآء أنثى ـآ]

انا هوووووون يلا تعو نحكي

[حواء مثالية]

يسعد مساااااااااااااااااااااااااااااكم

[نور العمر]

مسا الخير

كيفكم ...

فيه حدا هوووون

[كبريآء أنثى ـآ]

مساء الخير
كيفك نور ؟ كيف أولادك ؟
شو طبختي ؟ وشو ناوية تطبخي بكرة ؟

[كبريآء أنثى ـآ]

وينكم صبايا ؟؟
اذا طولت وما رديت بكون زوجي روح من الشغل وبدي أجهزله يآكل

[حواء مثالية]

منورات صبايااااااااااااااااا

اليوم عملت حواضر بكرا عامله قدرة

[نور العمر]

مرحبااا

انا اليوم اتغديت برا ومن اشوي رجعنا طلعنا غيرنا جواا

[fafini]

سلام كيفكوا صبايا انشالله بخير

[بسمة أمل 111]

مرحبااااااا
شو اخباركم ؟؟
لولو
ربنا يطمنك و تكون فحوصاتك منيحة يا رب
كبرياء
لولوليش هههه الف مبروك السنونات
بسمة امل
اهلا فيكي ... ممم بخصوص ابرة الضهر ... انا ولدت بالهلال بس دكتوري ما رضي بعطيني الابرة لانها صحيح بتخفف الوجع بس الها تأثيرات بعدين ... انا ترجيته رجا يعطيني اياها و ما وافق
بس الاهلي و الله ما بعرف بيعطوها و الا كيف بس بتوقع موجودة ... الله يقومك بالسلامة
حواء
عقبال ولادك يا رب
انا عرس سلفي يوم الجمعة هاي ... ممم مشغولبن هالفترة ... انا تقريبا جهزت كلشي
باقي الصبايا يسعد اوقاتكم
الصبايا الجداد منورين

شكرا حبيبتي على ردك بس انتي امتا اولدتي يعني قبل قديش؟لانو بنت اخت مرت عمي ولدت في الهلال تقريبا قبل سنة ونص واخدتها

[بسمة أمل 111]

صباح الورد صبايا ان شاء الله اتكونو بخير ....والله انا تعبانة من الحمل ونفسي اولد ملييييييييت وكل ما اروح على الدكتورة بتعقدني بكلامها مرة الجنين ساحل لتحت ومرة حجمو صغير وكل مرة اشي شكل .....بس عنجد الحق عليي انا هاي اخر مرة براجع فيها في الحمل كل شهر بدي المرة الجاي اعمل متل المرتين السابقات ما بدي اراجع طول الحمل الا مرة او مرتين بعرف جنس البيبي وبترك كل شي على البركة هادا احسن شي والله كلام الدكاترة ابيعمل ازمة نفسية للوحدة ........انتو شو رأيكم؟؟؟

[بسمة أمل 111]

اليوم الجو بجنن نحنا طالعين شمة هوا بعد شوي مع دار سلفي تعالوووووووووو معنا
بس ان شاء الله ننبسط وما انقضيها حل مشاكل بين الاولاد ههههه

[نور العمر]

صباح الخيرررر

بسمة امل ضحكتيني وذكرتيني بحالي هيك بصير بكل مشوار بنقضي اغلب الوقت حل مشاكل للصغار .. ربنا يحفظهم .. ويهنيكم بالمشوااار ...

نحنا امبارح طلعنا واليوم كمان ناوين نطلع مع العصر... لانه الجو ما بتفوت

باقي الصبايا كيفكم وشو اخباركم....

[بسمة أمل 111]

مسا الورد صبايا احنا ارجعنا هلأ الحمد لله انبسطنا كتير انتو شو عاملين؟؟؟؟

[حواء مثالية]

يبسعد مساكم

تتهنو بطلعاتكم والله الجو حلو كثير

بسمة انا عكسك بحب اتابع كل شهر لانه لازم الواحد يتطمن مرات كثير بكون في مشاكل بدها متابعه بالحمل

[دموع الليل]

يسعد مساكم
كيفكم؟

[بسمة أمل 111]

مساء الورد صبايا

[كبريآء أنثى ـآ]

هلا مساء الفل
كيفك بسمة أمل ؟

[كبريآء أنثى ـآ]

اليوم على العشا عملت معجنات وحبيت أفرجيكم الصور
http://forum.hwaml.com/imgcache2/hwaml.com_1393026560_574.jpg (http://arabsh.com)

http://forum.hwaml.com/imgcache2/hwaml.com_1393026558_526.jpg (http://arabsh.com)

http://forum.hwaml.com/imgcache2/hwaml.com_1393026554_184.jpg (http://arabsh.com)

http://forum.hwaml.com/imgcache2/hwaml.com_1393026547_269.jpg (http://arabsh.com)

http://forum.hwaml.com/imgcache2/hwaml.com_1393026556_252.jpg (http://arabsh.com)

[كبريآء أنثى ـآ]

احكولي رأيكم يا صبايا ؟؟

[نور العمر]

صباح الخيرررر

كيفكم جميعاا

شو هاالعمايل يا كبرياء تسلم ايديكي كتير بشهو ومرتبين ...

[بسمة أمل 111]

صباح الورد صبايا كيفكم
شو هادا يا كبرياء والله انك فنانة يسلمو ايديكي شكلهم بشهي متل الجاهز
هادول عاملتيهم بعجينة العشر دقائق؟؟ وكلو محشي جبنة ولا في اكتر من حشوة؟

[دموع الليل]

ييسعد مساكم

كبرياء يسلموو ايديكى شكلهم بيشهوا

[بسمة أمل 111]

صباح الورد صبايا كيفكم؟

[نور العمر]

هلا صباح النور بسمة امل

كيفك وكيف الحمل معك

[بسمة أمل 111]

اهلين حبيبتي نور العمر انا منيحة الحمد لله
صحيح اني تعبانة من الحمل بس حلاوة الحمل هي تعبو ههههههه
لانو بتحسي الكل ابيسأل عنك وبدللك امك ابوكي اخوتك زوجك حتى ابنائك
انتي شو اخبارك؟؟؟ من اي مدينة ؟ كم طفل عندك؟؟؟

[ميوووش محمد]

مسالخير ....

كيفكم ... انا مي من غزة

[نور العمر]

ربنا يقومك بالسلامه بسمة امل

انا من غزه وعندي ولد عمره 3 سنوات و10 شهور وبنت عمرها 10 شهور

هلا ميوش منوره ...كيفك وشو اخر اخبارك...؟؟

[دموع الليل]

يسعد مساكم

كيفكم صبايا؟؟

[حواء مثالية]

يسعد اوقاتكم ياربك

كيفكم اليوم

ممممممممممممممم منورات صبايا

كبرياء ريتو صحة وهنا ويسلمو دياتك

[كبريآء أنثى ـآ]

انا اجيييييييييييييييييييت
سوري طولت عليكم والله مشغولة طول اليوم شغل شغل والله زهقت هههه
حماتي عاملة عملية وما بتقدر تشتغل وانا الشغل كله فوق راسي ..
المهم انا طولت عليكي يا بسمة أمل
بدي أكتبلك مقادير العجينة :
طبعا قبل كل شي العجينة بتنعجن على مرحلتين
وأول مرحلة بتعملي الآتي : بتجيبي الوعاء اللي بدك تعجني فيه وبتحطي الآتي :
2 كأس دقيق ـ معلقتين كبار خميرة ـ رشة ملح ـ فنجان قهوة سكر ـ ومعلقتين كبار حليب بودرة ـ كوبين ماء دافئ
وبتخلطيهم مع بعض بالمضرب اليدوي وبتتركيهم من 10 ـ 15 دقيقة وبس يخلصوا الدقايق بتجيبي ربع كأس زيت و3 كاسات دقيق وبتعجني واذا احتجتي دقيق بتحطي وسر نجاحها بكتر عجنها يعني اعجنيها لمدة ربع ساعة وبتدهني الوعاء زيت وبتحطي العجينة فيه وبتغطيها بنايلون لـ 10 دقايق وبعدين بلشي اشتغلي فيها
ممممم اللي صورته كان محشي بالجبنة الفيتا بس أنا كنت عاملة كمان حشوة جبنة مثلثات وشوكلاتة

[بسمة أمل 111]

الله يسعد صباكو صبايا
شو اخباركو اليوم؟ ان شاء الله تمام
كبرياء يسلمو حبيبتي على المقادير انا بعملها تقريبا نفس الشي بس ما بحط الحليب بدي اجربها مع الحليب وبدي اعجنها فترة طويلة متلك يسلمو كمان مرة يا عسل

[بسمة أمل 111]

كبرياء انثى الحمد لله على سلامة حماتك والله يكون بعونك على الشغل الله لا يحرمك الاجر

[بسمة أمل 111]

نور العمر الله يخليلك الامامير الحلوين ويسعدهم ويجعل ايامهم احسن من ايامنا
وهلا فيكي وبكل اهل غزة حبايبنا.........

[بسمة أمل 111]

بنات شو رأيكم كل وحدة ابتدخل تقترحلي اسم حلو لبنوتي
انا حطيت موضوع في المنتدى والصبايا ما قصرو بس حسيت انو في دول الخليج والمغرب العربي الاسماء يلي متداولة عندهم غير عنا وبما انو الكل هون فلسطينيات بدي اشوف شو رح تعطوني اسم جديد ودارج عنا هالايام

[دموع الليل]

يسعد مساكم

كبرياء
الف سلامه على حماتك
بدى اجرب طريقتك واعجنها مده طويله

بسمه امل فى ااسماء حلوه مثل

غزل..ريماس..ليان..ريتاج..ألاء...مرح..فرح..لينا..نغ م..جنى..حلا

هى الاسماء كتير مشهوره عنا فى غزه

الله يقومك بالسلامه

نور العمر كيفك وكيف اولادك؟
حواء ولولو حماده يسعد مساكم وين ما كنتواا

[بسمة أمل 111]

تسلميلي دموع الليل اسمائك كتير حلوة

[لولو الفلسطينية]

شكرا حبيبتي على ردك بس انتي امتا اولدتي يعني قبل قديش؟لانو بنت اخت مرت عمي ولدت في الهلال تقريبا قبل سنة ونص واخدتها

الي تمن شهور تفريبا والدة ... مممم هم بيعطوها في الهلال بس لانه دكتوري الي ولدني صاحبنا اصلا عشان هيك ما نصحني فيها و ما رضي يعطيني اياها .... و الا بالعادة ما بتفرق معهم الي بطلبها بعطوه اياها ....
إن شاء الله خير
اللع يقومك بالسلامة

[لولو الفلسطينية]

مساء الورد صبايا
كيفكم ؟
اشتقتلكم كتييبير

[نور العمر]

مسااا الخيررر كيفكم ...؟

بسمة امل تسلمي وربي يحفظلك اولادك وتقومي بالسلامه

دموع انا الحمد لله بخير و اولادي بخير ...... انتي كيفك ..؟

[ميوووش محمد]

ربنا يقومك بالسلامه بسمة امل

انا من غزه وعندي ولد عمره 3 سنوات و10 شهور وبنت عمرها 10 شهور

هلا ميوش منوره ...كيفك وشو اخر اخبارك...؟؟


اهلين فيكي يااا بطة

اممممم انا بخير الحمد لله
ادعولي ربنا يكملي ع خير .. اليوم عملت عملية ارجاع اجنه ,, ( اطفال انابيب )

ادعولي

[بسمة أمل 111]

اهلين فيكي يااا بطة

اممممم انا بخير الحمد لله
ادعولي ربنا يكملي ع خير .. اليوم عملت عملية ارجاع اجنه ,, ( اطفال انابيب )

ادعولي

خبيبتي ان شاء الله بتضلي منيحة وابيكمل الحمل معك على خير وبتجيبي توأم زي القمر لا اتخافي بس انتي ضلي استغفري وربي يجيبلك يلي فيه الخير

[بسمة أمل 111]

الي تمن شهور تفريبا والدة ... مممم هم بيعطوها في الهلال بس لانه دكتوري الي ولدني صاحبنا اصلا عشان هيك ما نصحني فيها و ما رضي يعطيني اياها .... و الا بالعادة ما بتفرق معهم الي بطلبها بعطوه اياها ....
إن شاء الله خير
اللع يقومك بالسلامة

والله خوفتينا منها الله يعديلي هالولادة على خير انا جبت ابني وكان عمري 20 وهلأ صرت 27 يعني صارلي فترة طويلة ما حملت عشان هيك كتير خايفة ....انا اخدت وصفات كتير لتسهيل الولادة من المنتدى هون بس يمكن ساعة الولادة ما اعمل شي منهم ههههه
شكرا مرة تانية حبيبتي

[نور العمر]

اهلين فيكي يااا بطة

اممممم انا بخير الحمد لله
ادعولي ربنا يكملي ع خير .. اليوم عملت عملية ارجاع اجنه ,, ( اطفال انابيب )

ادعولي

ربنا يتمملك على خير وتنجح العمليه يرزقك بالذريه الصالحه ...

طمنينا شو بصير معك...

[لولو حمادة]

مساء الخير
كبرياء سلامة حماتك وتسلم ايديكي بتجنن المعجنات
بسمة امل ان شاء الله بتقومي بالسلامة
الاسماء كثير
غيداء -جودي-بسنت- روند-ساندي-بيلسان-نيرة-سيدرا-سدين-الين-ليان

ميوش ان شاء الله يتحقق حلمك وتجيبي توم صحيح كم جنين رجعوا
نور العمر ودموع وحواء ولولو يسعد مساكم

[~{{ DoDo }}~]

صباح الخير صبايا كيفكم

فيه كتير صبايا جداد. منورين

اشتقت للجميع انشالله كلكم اموركم تمام واطفالكم بخير

قرات انه فيه صبية سالت عن ابرة الضهر

انا اخدتها بس انا عايشة بالامارات والي اعطاني اياها بروفيسور تخدير مش دكتور عادي
لانه بدها شطارة

ونصيحة لو واثقة بالدكتور الي رح يعطيكي اياها
خديها وانتي مغمضة
ازا ربنا خلا الانسان يوصل بالعلم لهيك نوع من تخفيف الالم
ليش ما نستغله ،،،، جد جد ابرة الضهر رحمة من رب العالمين

اتزكرت حيفا وغموض وعسولة وعيون المها
كتير كتير اشتقتلهم

[لولو الفلسطينية]

يسعد صباحكم
بسمة امل
توكلي على الله و ربنا يسهلها
ميوش
ربنا بتمملك على خير و تجيبي بيبي زي القمر
بدي اسألك عملتي تحاليل عشان تعرفي سبب الاجهاض ؟ حبيت اتطمن لأنك مرة سألتينا شي بخصوص تحاليل الاجهاض و الا مش انتي !!
ربنا يتتملك على خير و يسهل امورك
يسعد صباحكم جميعا
كبرباء
بدي اسألك .. منوشة بلشت تحبي ههه ؟ شو اخبارها الزعرة شو بتعمل حركات جديدة

[لولو الفلسطينية]

هلا دودو
كيفك و كيغو عمورة ؟؟ وين وصل الباشا ؟ ههه

[كبريآء أنثى ـآ]

صبااااااااااااااح الخير
كيفكم صبايا ؟
بسمة أمل، دموع الليل .. جربوها واحكولي شو بصير معكم
ميوش .. حبيبتي الله يتمملك على خير وتحملي وتشوفيهم بحضنك يااااارب
لولو .. حبيبة ألبي والله بنتي بتحبي بس اشي بسيط لأنه أنا ما برضى أخليها هههه
يعني هلأ بتكون قاعدة وبقف وراها على طول بتلف حالها علية وهية قاعدة وكمان بوقفها على كرسي عشان تشد حالها
وبصير أمشيها وهية ماسكة الكرسي وبخليها تقفة على حافة التخت وحماي وسلافي بصيروا يمشوها
مممم وطبعا الكلام اللي مش مفهوم ههههه بلشت تحكيه وصارت تحكي وبصوت عالي يعني بتصحي اللي بالبيت بصوتها وهية بتحكي

[كبريآء أنثى ـآ]

اليوم أنا عاملة معكرونة بالباشميل مين بحبها ؟؟
يمي يمي يمي شوو بموووت فيها أنااااااا

[نور العمر]

انا بحبهاا ابعتيلك صحن

انا عامله ملوخيه ورز

كيفك كبرياء وكيف حماتك صارت وعملية شو عامله ...؟

[بسمة أمل 111]

مسا الورد بنات
كبرياء انا كمان بحبها بس ما بعملها كتير عشان زوجي ما بحبها
اعزميني عندك هههههههههه

[بسمة أمل 111]

نور العمر شو اخبارك ؟
انا كمان بحب الملوخية وبطبخها كتير زوجي واولادي بحبوها
بس اليوم معزومة عند اهلي والله يسامحو جوزي لهلأ ما اجا ياخدني يا الله ما اصعب انو الواحد يستنا

[حواء مثالية]

هايااااااات بالكوميات عليكم

دموع ولولو حمادة الله يسعد قلبكم

منورات صبايا

[حواء مثالية]

بسمة امل انا اخذت ابرة الظهر كثير بتخفف يعني عشان اوصلك التعبير بتكوني بالنار بتصيري بالجنه وهي اصلا ما بعطيها اي دكتور انا كمان اعطاني اياها اخصائي تخدير

[بسمة أمل 111]

الله يسعدك حواء طمنتيني ...كمان كل يلي اخدها ابيمدحها كتير
انتي من اي مدينة؟؟؟...ولما صار معك توسع كم سانتي اعطوكي اياها؟

[كبريآء أنثى ـآ]

انا بحبهاا ابعتيلك صحن

انا عامله ملوخيه ورز

كيفك كبرياء وكيف حماتك صارت وعملية شو عامله ...؟

مممممم بحبها الملوخية أنا كمااان ... أحلا صحن لعيونك حبيبتي
عملية ضغط أعصاب بإيدها
مسا الورد بنات
كبرياء انا كمان بحبها بس ما بعملها كتير عشان زوجي ما بحبها
اعزميني عندك هههههههههه
مرحبابك ولووووو أهلا وسهلا فيكي
لكن بدي أسألك إنتي إلك 7 سنين مو مخلفة بعد البطن الأول .. شو كنتي حاطة مانع ؟ وليش هالفترة الكبيرة ما خلفتي ؟؟ انتي سكان وين ؟

[كبريآء أنثى ـآ]

وينكن يا صبايا ؟؟؟؟؟؟

[لولو حمادة]

صباح الخير
كيفكم
اليوم مابدي اطبخ عندي اكل من امبارح

[بسمة أمل 111]

مسا الورد احلى صبايا
كبرياء انا من الخليل
صارلي 7 سنين ما حملت من بعد البطن التاني مش الاول
جبت بنوتي على 18 وابني على 20
انا كنت في الجامعة واتخرجت هادا الفصل بس الجامعة مش هي سبب تأجيل الحمل
لاني خلصت دراستي ب 3 سنين ونص يعني انا سجلت من الزهئ والملل كانو اولادي كبار
بس زوجي ما بدو اطفال بضل يحكيلي عنا بنت وعنا ولد بس المهم انربيهم احسن تربية مش مهم العدد
انا لو تركتو على راحتو ما كنت حامل هلأ لاني وقفت الحبوب من غير ما احكيلو هههههه والله اشتقت للصغار
كنت حاطة لولب 5 سنين وبعدها شلتو واستعملت حبوب منع الحمل وكل واحد منهم الو فوائد ومضار بنفس الوقت

[سما الدنيا]

كيفكم صبايا وكيف احوالكم.....
حواء ولولو وباقي الصباياان شاء الله اتكونو بالف خير
حواء ابرة الظهر اسمعت الها مضار وانا طلبتها بولادتي الولى ما رضيو واتحملنا الوجع ...
انا الحمد لله منيحه بس حملي متعبني من بداية الشهر التاني وانا معي هبوط ضغط وقلة شهية ووزني نزل وهيني فتت بالتالت وبلش مع قلة الاكل مراجعه كل يوم الله يعيني واخلص اشهر الوحام عخير يا ربي......

[كبريآء أنثى ـآ]

بسمة أمل
ما شاء الله الله يخليلك اياهم ياااااا رب .. أنا زوجي على فكرة نفس زوجك بس أنا عندي بنت وحدة وحتى بقلي مفكر نجيب البطن التاني كمان شي 4 سنين هههههه

[بسمة أمل 111]

يعني طلع في حد متل زوجي هههههههه فكرتو فريد من نوعو
كمان هو كان بدو اياني ما احمل على طول بعد بنتي والله حملت في ابني مع انو كنا نعمل عزل
وانجن لما عرف اني حامل....وبعد ما جبت ابني خلاني على الاربعين احط اللولب
انا كمان مع فكرة تنظيم النسل بس مش لهاي الدرجة يعني انا جاييتني بنوتة بس بينها وبين اختها 8 سنين ونص
يعني ولا كأنهم خوات يمكن لما يكبرو ما ببين الفرق ما بعرف ....
لحد اربع سنين معقول بس برأيي جيبي كمان بيبي بعدين خدي راحة
لانو كل طفل بدو حدا يلعب معو .......والله لما ابعت حد من اولادي ينام عند اهلي بحس التاني زي الحزين لا ابيعرف ياكل ولا يلعب
مع انهم طول انهار متل توم وجيري ههههه بس سبحان الله هاي المشاكل بين الاخوة هيي احلى شي في الطفولة

[نبض قلب]

كيفكم صبايا
حللت اول مبارح اختبار منزلي طلع خط خفيف
المهم بكون حامل؟؟
ومعي وجع الدودو موتني كتير بمغص
انا عندي ولد وبنت

[حواء مثالية]

يسعد مساكم يا بنات

سماالله يتمملك على خير يارب ويريح بالك كله بهون وباجره

بنات انا لهلا ما اجتني الدورة الاسبوع الجاي بدي اروح على الدكتور اشوف شو القصه يعني لو كانت تروح بالرضاعة قبل المره معي بحكي بس اول مره بتعملها وكمان الي ست شهور برضع ما غابت ولا شهر لي صارت تخربط هيك

انا زوجي عكس العالم بموت باشي اسمو اطفال لو يصحلو كل سنه بخليني اخلف

[بسمة أمل 111]

مسا الورد بنات
نبض قلب
مادام طلع معك خط حتى لو خفيف اكيد حامل بإذن الله

حواء مثالية
انتي اكيد رح تعرفي حالك ازا حامل ولا لأ
لانو ازا ابتستخدمي مانع بكون التأخير طبيعي مع الرضاعة
اما اذا ما ابتستخدمي فبكون الحمل طبيعي مع الرضاعة هههههههههه

[نبض قلب]

ربنا يسهل ولادتك يا بسمة امل

[بسمة أمل 111]

الله يسعدك حبيبتي تسلميلي نبض امل ......زانتي متلي هادا حملك التالت كم اعمار اولادك؟

[نبض قلب]

بنتي 3 سنوات

وابني سنة و 10 شهور

[سما الدنيا]

نبض ان شاء الله بتطلعي حامل...
تسلمي حواء ..وانتي ان شاء الله تطلعي حامل اذا حابه بس حرام عصحتك لسا اولادك اصغار ..الله يكتبلك كل خير

[نبض قلب]

كيفك سما وكيفو ابنك

انتي خلفتي غيرو؟؟

ااااااااااخخخخ بطني يؤلمني كالعادة

غششوني شو اطبخ بكرة

[بسمة أمل 111]

نبض قلب بكرة الخميس اعملي اكلة خفيفة لانو اكيد على الجمعة رح تطبخي اكلة دسمة
ما بعرف ازا الكل متل الخلايلة احنا الاغلب يوم الجمعة ابنعمل مقلوبة

[لولو حمادة]

مرحبا
نبض ان شاء الله تكوني حامل
حواء رجعي الدكتورة يمكن خربطة هرمونات
سما الله يعينك على الوحم كيف عمورة
بسمة يسعدمساكي
باقي لدورة اسبوع يارب اكون حامل
عندي مرار بتمي من امبارح وبدوخ كثير وحاسة بارهاق وتعب من اول ماصحى

[دموع الليل]

يسعد مساكم
كيفكم
لولو و نبض ان شاءالله تكونو حوامل

حواء الف سلامه عليكى
باقى الصبايا منورين

[بسمة أمل 111]

يسعد مساكي لولو
ان شاء الله بتكوني حامل يا ااااااااااارب مرت اخي قبل موعد الدورة بعشر ايام بتبلش اتدوخ وتستفرغ وراسها يوجعها يمكن انتي متلها
دموع الليل
منورين بوجودك يا حلوة...انتي شو اخبارك حامل ولا ابتستني الحمل ولا والدة جديد ولا شو؟؟

[حواء مثالية]

يسعد اوقاتكن ياررررب

الله يسلمكم يا رب

بسمة امل الله يبشرك بالخير هههههههههههههه

[بسمة أمل 111]

تصبحو على خير صبايا
جوزي عازمني على العشا يا دوبي اروح البس
بشوفكو بكرا...والله صايرة احب هالتجمع وما يعدي ساعة الا ادخل

[كبريآء أنثى ـآ]

يسعد مساكن يا صبايا ... متجمعات عند النبي يااااارب
مممم حبيت أمسي لأنه عدها قطعت الكهربا ع 10 وبتيجي ع 6 الصبح أوووووووف والله بزهق حالي ي
ممممم إن شاء الله بتكونوا حوامل لولو ،، نبض قلب وطمنونا عنكم
ألف سلآمة عليكي حواء
الله يقومك بالسلامة يا بسمة
يسعد مساكي دموع

[بسمة أمل 111]

صباح الورد جميعا
كبرياء ليش ابتقطع الكهربا عندك انتي من غزة؟

[نور العمر]

صباح النور

كيفكم اليوم ...؟

كيفك بسمة امل ..؟

[بسمة أمل 111]

الله يسعدك نور العمر انا تمام انتي كيفك؟
والله صبحت نعسانة بعد ما راحو الاولاد على المدرسة رجعت نمت وهلأ صحيت
يللا بستغل الفرصة هالايام وبنام زيادة بكرة البيبي ابيحرمني النوم
ان شاء الله يكون هادي
باقي الصبايا وينكو كيف صبحتو؟؟؟؟

[حنون فلسطين]

السلام عليكم ورحمة الله وبركاته
أنا عضوه قديمه بالمنتدى بس للأسف اليوم أول مره بعرف بالتجمع وكان صدفه وشفت إنه أكتر من تجمع تسكر ما شاء الله لأنه عم بتعدوا عدد صفحات كتير
حابب أنضم لإلكم لأني فلسطينيه وإلي كل الفخر

[حواء مثالية]

نهاركم فل ورايق ومعطر بقرنفل الكوووووووووووووون

صبحت مشتاق لا امي الله يطول عمرها

[نور العمر]

مساااء النووور

حنون فلسطين منوره واهلا وسهلا فيكي .... عرفينا عنك اكتر ...

حواء ربنا يخليلك امك ويحفظهااا

بسمة امل انسي النوم مع البيبي هههههههه ... ربنا يقومك بالسلامه

[دموع الليل]

يسعد مساكي لولو
ان شاء الله بتكوني حامل يا ااااااااااارب مرت اخي قبل موعد الدورة بعشر ايام بتبلش اتدوخ وتستفرغ وراسها يوجعها يمكن انتي متلها
دموع الليل
منورين بوجودك يا حلوة...انتي شو اخبارك حامل ولا ابتستني الحمل ولا والدة جديد ولا شو؟؟

هلا بسمه امل

انا عندى ولد عمره ..كمان شهرين بيكمل 4 سنوات

وعندى ولد عمره 7 شهور الله يحفظهم

[دموع الليل]

حنون فلسطين هلا وسهلا فيك

نور كيفك؟وكيف اولادك؟

[حواء مثالية]

حنون نورتي ياقمره واهلا وسهلا فيكي

[بسمة أمل 111]

مسا الورد بنات
حنون فلسطين
اهلا وسهلا فيكي ... انا كمان انضميت جديد للتجمع بس والله البنات هون زي العسل
حواء مثالية
الله يخليلك امك يا رب روحي زوريها ...ولا هي بعيدة عنك كتير؟
نور العمر
معك حق مع البيبي ما في نوم بس انا صارلي سبع سنين نايمة بكفيني هههههه
دموع الليل
الله يخليلك اولادك يا رب واتشوفيهم بأعلى المراتب...بس عندي سؤال الك اذا لقيتيه فضول ما اتجاوبي...انتي ليش اسمك المستعار فيه كتير تشاؤم ؟؟

[دموع الليل]

دموع الليل
الله يخليلك اولادك يا رب واتشوفيهم بأعلى المراتب...بس عندي سؤال الك اذا لقيتيه فضول ما اتجاوبي...انتي ليش اسمك المستعار فيه كتير تشاؤم ؟؟

بسمه امل كتير بنات هون سالونى نفس السؤال

رح احكيلك

بعد ابنى البكر الله رزقنى ببنوته متل القمر بس للاسف عاشت شهر وبعدها توفت وكنت دايما ابكى عليها خاصه فى الليل واتخيلها تكون بحضنى الله يرحمها ويجعلها شفيعه لى ولابوها يارب ماحدا يشوف اللى المعاناه اللى مريت فيها...
والحمدلله ربنا رزقنى بعدها بعبود الله يخليه لى هو واخوه لهيك سميت دموع الليل

[حواء مثالية]

حبيبتي دموع وبسمة الله يسعدكم

ماما مو بعيدة عني نص ساعة بالسيارة بكون عندها بكرا ان شاء الله طالعة بكير راح افطر عندهم واتغدى واتعشى واروح

وبدي اروح على الدكتور اشوف شو قصتي كمان حاسه حالي تعبانه

[بسمة أمل 111]

دموع الليل حبيبتي انا اسفة كتير ذكرتك في بنوتك الله يرحمها ..........الله يجعلها شفيعة الك يوم القيامة ويحفظلك اخوتها
حواء مثالية سلامتك حبيبتي بروح عنك الشر ...انتي بس اتروحي عند امك ابتنسي الوجع كلو وما ابتحتاجي للدكتور

[بسمة أمل 111]

صباح الورد صبايا
كيف صبحتو؟؟؟؟؟؟؟

[دموع الليل]

يسعد مسااااااااكم

جمعه مباركه

[نور العمر]

كيفكم اليوم ...؟

جمعه مباركه عليكم ...

شو طبختو اليوم..

[كبريآء أنثى ـآ]

اليوم عملت مقلوبة يمي يمي يمي بتشهي

[بسمة أمل 111]

مسا الورد صبايا

[دموع الليل]

اليوم عملت دجاج بالفرن

[كبريآء أنثى ـآ]

والله اليوم انهلكت لسا دوبني بقعد وحتى اتمددت لأنه ظهرني أجعني
طول اليوم شغل شغل .. ضيف جاي وضيف طالع وشطف وترتيب وجلي وضيافة
اوووووه والله تعبت

[نور العمر]

يعطيكي الف عافيه ياكبرياء ... كلو اجر وثواب وبتلاقيه في اولادك

ليش الضيوف رايحين جايين.... خخخخخخ فضوليه

[بسمة أمل 111]

الله يعطيكي العافية كبرياء ........الله لا يحرمك الاجر يا رب والله شكلك معدلة وشلشة
نور العمر
اكيد الضيوف جايين عشان حماتها ل كبرياء

[كبريآء أنثى ـآ]

الله يعافيكن صبايا
ممممم إي متل ما حكتلك بسمة عشآن حماتي

[نور العمر]

صباح الخيررررر

كيفكم اليوم

كبرياء سلامة حماتك وربنا يشفيها

صحيح متى عرس سلفك..؟

وشو طابخين اليوم ...

دموع الليل طعمتي ابنك الكبير بالعياده ...؟؟

[بسمة أمل 111]

صباح الورد نور العمر
كيفك اليوم؟؟؟
انا بدي اطبخ صينية كفته ان شاء الله
انتي خبرينا شو طابخة

[نور العمر]

منوره بسمة شو اخبارك

انا عامله فتة حمص ...

[نور العمر]

وينكم اليوم...........؟

[بسمة أمل 111]

مسا الورد بنات
انا اليوم كنت مشغولة لانو امبارح فكيت البرادي وغسلتهم واليوم غسلت الشبابيك يعني بحضر الدار قبل ميلادي ويوم الخميس بدخل شهري ان شاء الله

[دموع الليل]

دموع الليل طعمتي ابنك الكبير بالعياده ...؟؟

هلا نور
طعمت ابنى من يومين والله تعب منها كتير وقعد 3 ايام ما يمشى منها بس الحمدلله هلأ احسن

انتى طعمتى ابنك؟؟؟

كبرياء وبسمه امل يسعد مساكم

[بسمة أمل 111]

صباح الورد بنات

[دموع الليل]

يسعد مساكم

[نور العمر]

مسااء الخيرر

كيفكم

بسمة يعطيكي الف عافيه والله يقومك بالسلامه

دموع الليل انا طعمت ابني الخميس يلي فات غلبني اول يوم وتاني يوم الصبح بعدين مع المسا صار يمشي ع خفيف مع انه عملتلو كمادات من وقت ما روحت من العياده

باقي صبايا وينكم اليوم ...؟

[بسمة أمل 111]

الله يسعد صباحهم الحلوات
اليوم عندي موعد عند الدكتورة بس ارجع ان شاء الله بحكيلكو شو قالتلي

[نور العمر]

صباح النور

كيفكم ... ووين مختفين ...؟

بسمة امل ربنا يسهلك مشوارك وتكون كل امورك بخير

........

[نور العمر]

مين هووووووووووووون

[حواء مثالية]

يسعد مساااااااااااااااااااااااااااكم كيفكم مشتاقلكم

[Heba T]

صباح الخير

شو اخبارك ؟

[نور العمر]

صباح النور

كيفكم ...؟

منوره هبه كيفك...؟

[لولو حمادة]

مساءالخير
كيفكم؟
انا زعلانة نزلت الدورة
وكمان في مشاكل على البيت قال المستثمر ناصب على مالك البيت و بدهم بفسخوا العقد والفلوس تروح وادا بدنا نجدد معوا بيزيد الاجاار شفتو كيف الهم

[حواء مثالية]

يسعد اوقاتكم

منورة هبة شو اخباااااااارك

لولو حمادة عسى ان تكرهوا شيئا وهو خير لكم

اذا ما بناسبكم شوفو بيت تاني يارب كل الامور تزبط معكوووووووووو\


الكو عندي خبرية توقعوووووووووووووووووووووو اش يالله اشوف مين الشاطر الي راح تعرف

[نور العمر]

مرحبااا صبايا

لولو ربنا يعوض عليكي يااارب وتحملي الشهر الجاي... وان شاء الله تنحل اموركم بالسكن

حواء منوره

انا تقريبا حزرت ..... يمكن حامل ...!!
....

[نور العمر]

مين هوووووووووووووووووووووون

[بسمة أمل 111]

صباح الورد بنات
حبيبتي ما تزعلي وكتري من الاستغفار والله يجيبلكم يلي فيه الخير
حواء مثالية خبرينا شو هي الخبرية........ليكون في تلجة هههههه

[لولو الفلسطينية]

مسا الورد
ممممم انا و سوسو قاعدين نتشمس هههه
امتحاناتي الأسبوع الجاي و زهئت دراسة ..
لولو
ولا تزعلي حالك .. كلشي بوقتو حلو ... ان شاء الله ااشهر الجاي ما بتشوفيها ياااا رب
حواااااء
هههه انا العصفورة حكتلي إنك حامل ..... الف مبروك و ربنا يتمملك على خير يا رب و يهون الايام الجاية عليكي بس بدي اسألك
كنتي عاملة عزل شي و الا هئة ؟؟ ههه
باقي الصبايا كلكم بدون استثناء اشتئتلكم كتيييييييير ♥
في حد هون و الا لااااا ؟

[بسمة أمل 111]

مسا الورد بنات
لولو الفلسطينية الله يعينك على الدراسة ويوفقك
انا صارلي اقل من شهرين متخرجة والله الدراسة مع البيت معاناااااااااااااااااة بمعنى الكلمة وما بحس فيها الا اللي مر بنفس التجربة بالذات لما يكون في اطفال عنجد بدعيلك من كل قلبي الله يوفقك وينجحك.........صدقيني كنت احس حالي مضغوطة لدرجة بدي انفجر بالذات لما يكون عندي غسيل وجلي وطبيخ وبنوتي عندها امتحان وانا عندي امتحان وابني سخنان وجوزي بدو يجي بعد ساعة ياكل وعازم امو وتجي وحدة من سلفاتي بدها تشرب قهوة ............دماااااار ........
بس الحمد لله عدت هالايام لسة لهلأ حاسة حالي بحلم
ان شاء الله اتكون ظروفك اهون مني .......بالذات لاني كنت ادرس رياضيات يعني الصفحة الوحدة بدها ساعتين حل لحد ما تنفهم والحمد لله اتخرجت بتقدير جيد جدا وكانلي 6 سنين مخلصة توجيهي لما سجلت جامعة........وطبعا التوجيهي كمان كان معاناة بس ما كان في اطفال كنت لسة عروس وحامل في بنوتي يعني اهون شوي
انتي شو ابتدرسي؟؟ وكم سنة خلصتي؟؟

[كبريآء أنثى ـآ]

يسعد مسااااااااااااااااكم
مين هون بدها تسهر ؟؟

[كبريآء أنثى ـآ]

صبايا هلأ وانا بعمل تحديث للصفحة فتح موقع اباحي .... هما لليوم ما حلو المشكلة ؟؟

[بسمة أمل 111]

الله يسعد مساكي كبرياء
انا كمان صارلي يومين كل ما اعمل تحديث ابيجيني موقع اباحي
هاي المشكلة كانت من زمان بس اختفت من اكتر من شهر بس شكلها رجعت

[نور العمر]

مساااء الخيررر

كيفكم ...؟

حواء وينك شو صار بالخبريه ... بدنا نعرف صبرنا نفذ خخخخخخخ

[دموع الليل]

يسعد مساكم

كيفكم صبايا

[لولو حمادة]

جمعة مباركة
يسعد مساكم
حواء شوالخبرية الحلوة ؟

[لولو حمادة]

مساء الخير
وينكم من قبل امس ماحدا فات ؟

[ميوووش محمد]

مسالخير


اممممم ويين الصبايا الهم اكم يوم مش مبينات ؟؟!!

[نور العمر]

هلا ميوش كيفك وشو اخبارك ...؟

البنات عطول هيك اوقات بختفو واوقات لا .... المهم يكونو بخيررر

[بسمة أمل 111]

صباح الورد بنات
الحمد لله واخيرا دخلت التاسع
بنات شو رأيكم في اسم بسمة هادا اسم ماما وحابة اسمي بنوتة هيك
بس خايفة من ردة فعل بيت حماي مع انو هادا الاقتراح هو اقتراح جوزي
انتو احكولي شو رأيكم بالاسم ........واحكولي اذا انتو مستعدين اتسمو على اسم مامتكو ولا لأ؟؟؟؟؟

[نور العمر]

صباح النور

كيفك بسمة امل

مبروك دخولك التاسع وان شاء الله تقومي بالسلامه...

الاسم حلوو وناعم ....بس فيه اسماء جديده كتيرر

وانا عن نفسي بعيدا عن المشاكل لا بسمي لا اسم ماما ولا غيرو حتى ماحدا يزعل

بس اذا بيت حماكي متقبلين الوضع عادي ... انتو حاولو تعطوهم فكره من هلء حتى مايتفاجئو ويزعلو يعني يكونو شوي شوي خدو على الموضوع وتقبلوه ... اتمنى تكوني فهمتي قصدي

باقي صبايا كيفكم ...

حواء شو الخبريه ... شو صار معك اختفيتي ان شاء الله تكوني بخير..

[بسمة أمل 111]

تسلميلي نور الله يبارك فيكي
شكرا كتير على رأيك ..... انا لسة بفكر في الموضوع وما استقريت مزبوط
وان شاء الله رح اصلي الاستخارة ......والله يجيب يلي فيه الخير
انتي شو أخبارك؟؟؟؟؟؟؟؟؟

[نور العمر]

ان شاء الله خير

انا الحمد لله بخير

كنت بخرط بالملوخيه عامله ملوخيه بلحمه ورز

وانتي شو طابخه ...؟

[دموع الليل]

يسعد مساكم

بسمه امل حلووو كتير هالاسم
ومافيها شى اذا سميتى على اسم ماما
بس لازم تاخدى راى بيت حماكى
واذا ما وافقوا غيرى الاسم تجنبا للمشاكل
الله يقومك بالسلامه
نور العمر كيفك منوررررره
حواء وين اختفيتى ان شاءالله خير

[نور العمر]

مساااء الخيرر

كيفكم اليوم ...؟

مالكم صارلكم فتره مختفين .... طمنونا عنكم ...

معقول مافيه وقت لو تفوتو عشر دقايق !!!!!!

دموع الليل انا الحمد لله بخير واولادي بخير وبنتي صارلها فتره بتزحف وبتوقف الطاوله لثواني بس

انتي شو اخبارك واخبار اولادك ...؟

[دموع الليل]

هلا نور

انا الحمدلله بخير واولادى بخير

التجمع مهجوررررررررر

وينكم صباياااا

[بسمة أمل 111]

عنجد والله التجمع مهجور
وين بتروحو ؟؟؟؟؟؟؟ احنا في تجمع حوامل جمادى التاني والله ما بلحق اقرأ اللي ابيكتبوه البنات اذا اتأخرت 4 او 5 ساعات وما دخلت ليش نايمين هيك
شفتو هالشتا شو حلو برق ورعد اشي بجنن ابني امبارح ضل واقف على الشباك كل ما يشوف البرق ابيحكيلي السما ابتضوي وبصير يصفق
كيف الجو معكو انتو ؟؟؟؟؟؟؟

[دموع الليل]

هلا بسمه
كيفك وكيف اولادك ؟
الجو عندنا برد كتيررر

[كبريآء أنثى ـآ]

مسااااااااااااااااااء الخير
كيفكم ؟؟
صبآيا عرس عم جوزي بنص شهر 6 شوو بتنصحوني ألبس ؟؟
والله بفكر بس مو طالع معي شي ؟؟

[كبريآء أنثى ـآ]

ممممممممممممممم
وينكم يا صبايا ؟؟

[كبريآء أنثى ـآ]

صبآح الخير
شوووخلص هجرتوا التجمع ؟؟

[كبريآء أنثى ـآ]

صحيح يا صبايا
حواء حامل
وأم أسيد كمان حامل

[نور العمر]

مساااا الخيررر

كيفك كبرياء شو اخبارك ...؟

ايا وقت تفوتي فيه ابعتيلي حسابك ع الفيس برساله خاصه

ومبروك لحواء وام اسيد وربنا يتمملهم على خيرر

مع انه زعلانه منهم بطلو يطلو زي قبل ... بس المهم انهم بخيررر

والتجمع اكيد بدو يصير مهجور ما الكل اختفى وبطلو يبينو زي زمان ... بصراحه مش حابه احكي بالموضوع .. العتب كبير لانه بعزهم واعتبرتهم خواتي ... وزي مابحكو العتب على قد المحبه.... وان شاء الله تكونو بخير ...

[كبريآء أنثى ـآ]

هلا نوور
كيفك ؟
كيف اولادك ؟ والله انا معزورة كل شغل البيت فوق راسي وناس طالعة وناس جاية والله بتعب ما بصدق احط حالي ع المخدة

[دموع الليل]

يسعد مساكم صبايا

كبرياء كيفك حبيبتى بطلتى تفوتى متل اول
والتجمع مهجور بدخل وما بلاقى حدا
والف مبروك لحواء وام اسيد الله يتمم لهم على خير بس ليش بطلو يفوتو هووون؟؟!
نور العمر كيفك وكيف اولادك؟
كبرياء ابعتى لى الفيس تاعك برساله انتى ونورر

[لولو حمادة]

مساء الخير
كيفكم ؟؟
مبروك لحواء وام اسيد ربنا يتمملكم على خير
بسمة ولدتي ولا لسى
كبرياء مابعرف كيف عاداتكم بالافراح حتى اقترح عليكي اللبس
ضيفوني على الفيس مع انو مش كثير بفتحوا
اسمي لولو حمادة والصورة عصفور اصفر كناري

[بسمة أمل 111]

صباح الورد بنات
لولو انا لسة ما ولدت والله مليت نفسي اولد وارتاح كتير تعبانة وموجوعة
انتوووووووووو بنات شو اخباركو؟؟؟؟؟

[كبريآء أنثى ـآ]

مرحباااااا
كيفكم ؟؟
شوو بسمة ولدتي ولا لسا ؟؟

[فوفو89]

مرحبا صبايا

كييييييفكم وشو اخباركم

اشتقتلكم كتيييييييير

طمنوني عنكم

[بسمة أمل 111]

مسا الورد
بس حبيت احكيلكو يا صبايا اني ولدت الحمد لله يوم الخميس الماضي 3-4 -2014
وكان نفسي تتأخر ولادتي يوم واحد واولد في 4-4-2014 لانو التاريخ حلو بس بنوتي استعجلت
عقبال عندكو جميعا

[دموع الليل]

الف الف مبروك بسمه
تتربى بعزكم
بس شو سميتها؟

[بسمة أمل 111]

الله يبارك فيكي دموع الليل وعقبال عندك متل ما بتحبي بنوتة او صبي
سميتها بسمة على اسم ماما
ان شاء الله بتدخل البسمة على حياتي وحياة ابوها واخوتها
وبتكون اسم على مسمى

[نور العمر]

الف مبروووووووك بسمه وتتربي بعزكم ياااارب

بدنا اكشن الولاده ...

....

[بسمة أمل 111]

الله يبارك فيكي نور العمر الله يسعدك
وبالنسبة لاكشن الولادة ابتقدري تحكي فيلم رعب مش حابة احكي القصة لحدى عشان ما يتعقد من ولادتي صحيح انو هادا البطن التالت بس والله في بكري ما اتغلبت هيك ...........والحمد لله على كل حال .....الله لا يحرمنا الاجر

انتو بنات شو اخباركو خبروني؟؟؟؟؟؟؟؟؟

[لولو حمادة]

مرحبا
كيفكم صبايا احنا متجمعين على الفيس اغلب البنات
ممكن تنضمو معنا
دموع ونور وبسمة وفوفو
فيسي لولو حمادة ةالصورة عصفور اصفر كناري

[beboo]

مرحبا كيفكم وشو اخباركو

كتييييييير اشتئتلكو طمنونى عليكو


والف مبارك يلى ولدوا ويلى حملو

وجمعة مباركة علينا وعليكم