المساعد الشخصي الرقمي

مشاهدة النسخة كاملة : الحمل و الخبيث و الوسواس ..!!

Wasan,
10-19-2013, 02:05 PM
السلام عليكم حبيباتي ...


مشكلتي و"الوسواس" بكل شي ... اول مره فتحت موضوع عن شكي ف جنس جنيني رغم انهم اكدولي ...


هالمره ..

انا تزوجة صارلي اكثر من 7 سنوات جبت فيهم بنتين الله يخليهم لي ولأبوهم ... من اربع سنوات ونص تقريباً لما كنت حامل في بنتي الثانيه كان بطني يكبر وتحت بطني كان ورم صغير يكبر حجمه مع الحمل وما يعورني .. مجرد حبه تكبر حجمها كانت بحجم العنبه صارت مع مرور الوقت حجمها مثل ثمرة "المانجا" ... الدكتوره قالتلي بعد الولاده ب5 شهور رح يعملولي جراحه يشلون الورم عشان يتأكدون شنو هذا " كيس دهني او ورم حميد او خبيث" .... ونجبت وسويت الجراحه وفحصوا العينه وسويت الاشعه والفحوصات الازمه وطلع .... "خبيث" يعني سرطان ... الله يبعدكم عنه .... وكان بأوله وعندي منتشر داخل جسمي في 3 مناطق فقط ولازم اعالجها بالكيماوي ...


رضعت بنتي تقريباً 7 اشهر وفطمتها عشان لازم اكمل علاج بالكيماوي ويأثر الكيماوي عليها .. طبعاً ... مرت حياتي تعب وارهاق ومرض .. وإحباط مره وامل مره مع الكيماوي والمرض لين تعود جسمي عليه ... والحمد لله شفيت خلال 8 اشهر طلع من جسمي الخبيث .. ووقفت كيماوي ...

الحين بس مراجعات وفحوصات روتينيه مع الدكتور ... وقبل لا ابدأ كيماوي عطوني ورقه اوقعها لان احتمال الكيماوي يأثر على الرحم ويسبب عقم ... بس الحمد لله خلال 4 سنوات ونص الحين حملت وفرحانه كثيرررر على هالنعمه واشكر ربي ليل نهار لان رحمي سليم ....


بس موسوسه كالعاده .. رغم ان مرة فتره طويله على توقفي من جرعات الكيماوي واكدلي الدكتور انها طلعت من جسمي بس بصراحه بنات ... خايفه ان لا سمح الله تكون في نسب بسيطه من الكيماوي بجسمي اثرت على جنيني وسببت له شيء لا سمح الله ... مع اني شفته بسونار الحمد لله قلبه وأعضاءه سليمه ... بس يمكن لا سمح الله سببت تشوه أو اثرت على نمو عقله او شيء لا سمح الله ...


ادري رح تستغربوا مني بس الوسواس يذبحني بكل شيء خاصه هالحمل صرت حساسه وابسط شي يشككني ويعور قلبي ... والدكتور طمني قالي الكيماوي يبيله سنه يطلع من جسمج وانتي لج اكثر من 4 سنوات .. وزوجي دايما يطمني ويقولي ذكري ربج هو شفاج من المرض وهو اللي رزقج بهالحمل وهو رح يحفظه ...



يااا ريت بنات لا تبخلوا عليّ بالدعاء ...

واتمنى اذا لا سمح الله في احد من الحوامل مرت بمثل تجربتي ويا "السرطان" تقولي وطمني اذا جابت عيال بعد رحلة علاجها للمرض وكيف كان طفلها وكيف نموه.. ؟


دمتم بود أخواتي العزيزات ...
حبك صالحني
10-19-2013, 02:56 PM
ياختي اتكلي ع الله وربي لو كاتب شي بيسير وانشالله ما قدامك الا كل خير يارب يرزقك بشوفة ضناك سليم معافا ويمتعك بالصحه والعافيه وتربيهم احسن تربيه
منااير
10-19-2013, 04:38 PM
اول شي انا ما الومك لو صار عندك وسواس لانه اللي صار فيك شي مو قليل الحمدلله على سلامتك وصحتك وعافيتك
وترا موعيب كلنا نوسوس يووو لو تشوفي اسالة الينات مو بس بهالمنتدى بكل المنتديات على اقل شي نسال ونستفسر
وسبحان الله كل الحوامل تلاقين عندنا خوف وشك ونخاف على صحة البيبي كمان الحمل ياثر علينا نصير حساسين
لكن مانخلي الخوف يصيطر علينا ويصير عندنا هوس لازم نتوكل على رب العالمين ونثق فيه
وانشالله تجيبين ولد سليم معافا وتفرحي فيه و الحمدلله الدكتور طمنك اللي يفهم اكثر مننا يعني مافي شي انشالله
انتي ارتاحي واشغلي نفسك باي شي يخليك ماتفكري وكلها كم شهر يكون ولدك بحضنك انشالله
رؤوم
10-19-2013, 09:12 PM
الحمدالله على سلامتك
ومبروك الحمل و الله يتمم على خير و تفرحي بشوفة ضناك

طبيعةالحامل تكون حساسة و توسوس كثير حتى من غير حمل

لا توسوسي كثير وانا جربت الوسواس و عانيت منه وربي لطف
حتى اني ما اهتميت لبيتي و زوجي و ولدي

بس الشيطان شاطر ، يجيك من جميع الجهات
لا تستسلمي و قولي بصوت عالي انا بخير و البيبي بخير
ودائماً ابتسمي و ابدءي اخرجي و قضي مقاضي للبيبي
وخلي نظرتك للحياه تفاؤليه

والدكتور طمنك على البيبي و اوضاعة سليمة
اذاً تطمني و ارتاحي
و احمدي الله على نعمة ربي انه رزقك بحمل

الله يتمملك على خير و بشرينا بولادتك^^
زهرة البنفسجي
10-19-2013, 10:07 PM
الله يحفضلك جنينك من كل شر ويكون حسن الخلق والخلقه وشيلي الوسواس وتوكلي على الله
ملكة القلم
10-19-2013, 10:18 PM
الله يحفظك انتي وجنينك ويتمملك بصحة وسلامة يارب
Wasan,
10-19-2013, 11:43 PM
رؤوم : اشكرج اختي على الدعوه والله وان شاء الله بحاول اتغلب على مخاوفي الله يبعد الشيطان عنا اعوذُ بالله منه.... والله يسهل عليج وعلي الولاده وان شاء الله رح ابشركم لما يطلع النونو بصحه وعافيه ... تسلمييي اختي ...


زهرة البنفسجي : فديتج اختي ودعوتج بالدنيا ... والحمد لله وكلت امري له وهو الحافظ والرازق .. دمتي بسلام ...

ملكة القلم : تسلمي حبيبتي على الدعوة ولك بالمثل ...
Wasan,
10-19-2013, 11:48 PM
اول شي انا ما الومك لو صار عندك وسواس لانه اللي صار فيك شي مو قليل الحمدلله على سلامتك وصحتك وعافيتك
وترا موعيب كلنا نوسوس يووو لو تشوفي اسالة الينات مو بس بهالمنتدى بكل المنتديات على اقل شي نسال ونستفسر
وسبحان الله كل الحوامل تلاقين عندنا خوف وشك ونخاف على صحة البيبي كمان الحمل ياثر علينا نصير حساسين
لكن مانخلي الخوف يصيطر علينا ويصير عندنا هوس لازم نتوكل على رب العالمين ونثق فيه
وانشالله تجيبين ولد سليم معافا وتفرحي فيه و الحمدلله الدكتور طمنك اللي يفهم اكثر مننا يعني مافي شي انشالله
انتي ارتاحي واشغلي نفسك باي شي يخليك ماتفكري وكلها كم شهر يكون ولدك بحضنك انشالله

اشكرج اختي ع الدعوه وع النصايح فديتج يا عسى ما نحرم من طيبتكم ... الحمد الله وكلت امري له ...
Wasan,
10-19-2013, 11:50 PM
ياختي اتكلي ع الله وربي لو كاتب شي بيسير وانشالله ما قدامك الا كل خير يارب يرزقك بشوفة ضناك سليم معافا ويمتعك بالصحه والعافيه وتربيهم احسن تربيه

اللهم آميييين ... ولك بالمثل اختي واشكرج على الرد وعلى الدعوه والحمدلله على كل حاال
تمأإرآا
10-20-2013, 10:32 AM
الحمدلله ع سلامتك قلبي
جبيبتي انتي اتكلي ع الله ولا توسوسي كثير وربي حافظه
وطبعا لك4 سنين مخلصه كماوي فاكيد مافيك ولا شي يعني خلي الوسواس وستودعي نفسك وجنينك
وعيشي حياتك حبي

دعواتك لي
شيخة 27
10-20-2013, 03:11 PM
سبحان الله ،،، الله يحفظ لج حنينج ويحفظج يارب انتي معذوره تري بس مثل ماخليتي املج بربنا كبير توكلي ع الله وتاكدي ان الله بيوقف معاج
Nouf12
10-20-2013, 07:40 PM
الححمممممدلله ان المرض راح منك الله يبعد عننا الامراض ويشفي كل مريض يارب
اكثر حل اقدر اقولك هوا تقومي الليل وتصلي وتدعي وف السجود لاتنسي طفلك من الدعاء , ادري والله ان غصب عنك تفكري بس حاولي مثلا تقولي لزوجك انك توسوسي خليه يخرجك من البيت كثير مشي ايامك كذا لين تولدي وتشوفيه سليم ان شاء الله
واستغفري كثيرر رطبي لسانك بالاستغفار فهو مفتاح الفرج
وتصدقي لو كل اسبوع مره
لان الوسوسه ذي من الشيطان وصدقيني كل ما تقربتي لربي كل ما الشيطان حيوسوس لك اكثر عشان تبعدي عن ربنآ
وتأكدي بأن اللي شافكِ من المرض وخلاكي تحملي رغم انو كان ممكن ما تحملي
قااااااددر على كل شي سبحانه فهو الوحيد اللي تقدري تطلبي منه يجي طفلك بخير وصحه وسلامه يارب
ودام الدكتور طمنك بأنه سليم فبإذن الله سليم لان الطب تطور ويقدرو يعرفو لو في شي لا سمح الله
وتقدري تسوي التصوير الثلاثي والرباعي اذا ما سويتيه يبين لك كل شي عشان تطمني اكثر
Wasan,
10-20-2013, 11:15 PM
تمارااا .. حبيتي تسلمي على مشاعرج الطيبه .. استودعت ربي فهو خير حافظ .. والله يتمم عليج بالخير ويسهل ولادتج

شيخه .. متكله على ربي هو الرازق وهو الحافظ وهو اللي يعطي من غير حساب وعوذ بالله من الشيطان الرجيم ، تسلمي على مرورك العطر

نووف .. حبيبتي والله نصائحج ثمينه وانا احتاج مثل هالنصائح .. رحمة الله واسعه والحمدلله على عطاياه واعوذ من الشيطان الرجيم .. تسلمي والله يعطيج الصحه والعافيه ..
شغووفه
11-04-2013, 04:43 AM
الحمدلله ربي شفاك ورزقك والله يخلي لك ماعطاك ويقرر عينك فيهم واتشوفينهم عروسات
اسمعي حبيبتي الفكره تجذب نفسها دائما خلك ايجابيه وادحري الوسواس وكوني متفائله ركزي علا جذب كل شي ايجابي. لانو حتي الي ماعمره مرض اذا وسوس يمرض فعلا
جريحة المحبه
11-04-2013, 11:47 PM
الله يفرج همك

عليك بالبقره وانفثي ع بطنك واشربي زمزم وادعي ربك مع حسن الظن بالاستجابه

الله يقومك وجنينك بالسلامه
Wasan,
11-05-2013, 12:14 AM
شغووفه تسلمي اختي على ردك ان شاء الله الوسواس ابعده عني قاعده اشغل نفسي ولا اهتم ... الله يعطيج العافيه حبيبتي

جريحة المحبه تسلمين اختي ع النصائح .. ان شاء الله وعسى خيرر ... استودعت ربي نفسي وجنيني ... الله يسهل عليج وعليّ وتعدي ايام الحمل بسهوله ويسر يااا رب ...