قصتي ومقبلة على طفل الانابيب ساعدوني

[leemona]

بسم الله الرحمن الرحيم
انا صديقة جديدة شاركت بالمنتدى خصوصي بهالقسم وان شاءلله الخطوة اللي بعدها انتقل لقسم الحوامل بتمنى انكن تقبلوني وتساعدوني
ماشاء الله المنتدى كامل ومتكامل وانشالله بستفيد منكم
قصتي متزوجة من اربع سنوات و3 اشهر ولم يحصل حمل بدأت معاناتي بعد 4 اشهر من الزواج كون زوجي وحيد لاهلو وبدن طفل امو مستعجلة...
رحت يمكن ل6 اطباء وعملت 5 مرات تحاليل لانه كل دكتور مايثق بتحاليل غير تحاليل مخبره فارجع اعيد التحاليل كلها والتكاليف مكفلة جدا
كل التحاليل اثبتت اني سليمة وتحاليلي طبيعية وزوجي عمل 3 تحاليل كمان ممتازة وكل مرة الدكتور يقلو تحليلك بيرفكت.......الحمدلله
طول هالسنين من دكتور لدكتورة وكلن يقلولي ممتاز وضعك واكتر من بويضة والاخصاب جيد ومافي التهابات ابدا حتى الدكتورة قالتلي رحمك مجليي جليي ماشاء الله وانا قلتها ايه بستخدم فيري ههههه اوعكن تصدقو وتستخدموه المهم من كتر مايقلولي اموري ممتازة وبحكو كتير فانا حطيت الولد بجيبتي يعني يصير عندي امل وبالنهاية انصدم وابكيييييييييييي
ضليت فترة منعزلة عالعالم الخارجي وماحب التقي بالناس لانه لما بشوفوني دغري بيسالوني ماخبيتيلنا شي وليش لهلا ياكسلانين تقولي الشغلة شطارة وبيد الواحد كلو بيد الله وبهداك الوقت بتشاطر كل واحد وبدلني على افضل دكتور وانه رح تروحي تجيبي تؤام عنده وانا اصدق واروح كلن متل بعضن وبعتقد كل اللي تأخر حملهن متلي نفس هالموال
طبعا عملت الصورة الظليلة للرحم (اشعة الصبغة) وكورسات الكلوميد وقبل سنة تقريبا عملت تلقيح صناعي (حقن نطاف داخل الرحم) تجربتي فيا انه كلو تمام وواستجاب جسمي للمنشطات بشكل مثالي عقولة الممرضة ولما بدن يحقنوني بعينة زوجي جهزتني الممرضة عالسرير وبتفاجأ انه دكتور بفوت وبقعد بين رجليي وانا خجلت وغمضت عيوني وسديت ادني مافي دقيقتين بس حسيتا 10 ساعات وصار يقلي واو امورك روعة ويلا يلا رح نخلص وكلو تمام وكنت لحالي رفضو دخول زوجي معي وانا لما طلعت كذبت على زوجي واهلي واهلو وقلت الممرضة حطتتلي العينة من خجلي ولما فشلت صار معي جفاف تام وتشنج وكل مانام مع زوجي وابكي واتوجع بعتقد صار معي حالة نفسية ضليت 5 اشهر مامشي الحال لاماء ولازيوت ولا كريمات وزوجي فكر انه حالتي النفسية سيئة لانه فشل التلقيح ونا بقلبي بعرف انه السبب انه دكتور اجرالي ياها وانا كتمت هالموضوع... لانه عرفت انه فشلت من اول جماع حصل بعد 4ايام من حقن النطف نزفت لحتى اجت الدورة يعني ضليت اسبوع ونصف كل يوم انزف ومالازم لاني عمباخد حب تثبيت فعرفت انه مانجحت وكنت مهيئة نفسيا لهالموضوع...
المهم عندي خبرة يعني انشالله ماتحتاجوني بس اللي بدو يسالني عن شي انا جاهزة بس طبعا اللي متل حالتي مابعرف شي عن التكيس او ارتفاع هرمون الحليب لانه الحمدلله ماصار معي هالشي
هلا الشهر الجاي قررت اعمل طفل الانابيب انا مابعرف شي عن هالموضوع واستغربت لما سمعت انه في برامج (برنامج طويل وبرنامج قصير )وبتمنى لكل وحدة ساوتها انه تنصحني شو اعمل وانا رح اكتب تجربتي اول باول ياريت تساعدوني لانه عرفت انه في اغلاط كتير ساويتا بالتلقيح الصناعي ويمكن لو سمعت اراء غيري كنت تلافيتا ونجحت بس قدر الله وماشاء فعل
انا رح ساويها بمشفى الشرق في الشام للدكتور مروان الحلبي لسا الشهر الجاي
بدي ساويها بقى رجاءا اي معلومة ونصائح مجربة لانه الدكتور بقلك شي والمجربة بتقلك شي اخر وانا صرت اثق فين اكتر من الدكتور
ممكن تفيديني وشكرا طولت عليكن
وانشالله كون ضيفة خفيفة ومهضومة وتقبلوني....

[عاشقة الأمل]

أختي أهلا وسهلا فيك معنا نحنا هون كلنا أخوات منورة وإن شاء الله تجدين كل الأجوبة عند الأخوات
أسأل الله أن يوفقك وينجح العملية وينور بصيرتكم ويسخر لكم أولاد الحلال في كل خطوة تقومون بها

[أمنيتي كلمة ماما]

اهلا حبيبتي والله انا ماعندي فكرة

الله يرزقك قريبا ياااااااااارب

[نيرال]

ياهلا فيك حبيبتي والله يوفقك يارب
انا تقريبا حالتي مثل حالتك تحاليلي سليمه وتحاليل زوجي ايضا واول زواجي جلست سنه وشوي وبعدها حملت طبيعي وبعدين اخذت مانع سنتين وتركتو وماربي كتب لي حمل للحين ابني صار عمرو 9سنوات
وكل مابروح دكتور يقولي كل شي سليم وانتي عندك بويضات حق اربع حريم زياده ماشاء الله خخخخخخخخخخخخخخ

واخذت مرتين كورس تنشيط وماصار شي والحين انا مقبله على التلقيح الصناعي بكرى راح اسويه دعواتكم حبيباتي

[حنان الامومه]

هلا فيكي اختي اناعملت عمليه اطفال الانابيب عند الدكتور مروان الحلبي في مشفى الشرق وكان برنامج طويل يعني اخذت حبوب منع الحمل 21يوم ثم انتظرت نزول الدوره ثم عملت تحاليل كامله ثاني يوم الدوره لللهرمونات هو الدكتور يطلبها عللى ضوء هذي التحاليل بيحدد نوع الابر المنشطه الي بيعطيكياها لان لما كنت بروح اخذ الابر بيكونو معي بنات تختلف الابر تبعهم يعني كل وحده وحالتها بقيت اخذ الابر وهو الدكتور مروان بيتابع التبويض من يوم 8للدوره الى ان قال لي خلص بنعملك عمليه سحب البيوض يوم13من الدوره تحت البنج العام سحبلي 9 بيوض واخذو عينه من زوجي بعد انقطاع 5 ايام من الجماع وقالولي كلمينا على هذا الرقم بنعطيكي موعد الترجيع فكلمتهم في اليوم الثاني من سحب البيوض فقالولي تلقحت عنك 4 بيوض من ال5 3اجنه درجه اولى 1جنين درجه ثانيه فحمدت الله وذهبت في اليوم الثالث للسحب لترجيع الاجنه وبنفس الطريقه الي تكلمتي عنها في اتلقيح الاصطناعي م احس بالم جسدي لكن نفسي للعلم دكتور مروان بيحسسك بالامان لان كلامه بيطمن وبيقره الادعيه واليات عند دخولو العمليه الله الشاهد على كلامي بعدالترجيع ب14يوم عملت التحليل فطلعت نسبه حمل ضعيفه جدا يعني فشلت العمليه ونزلت علي الدوره بعد يومين من التحليل لكن بحب اخبرك هذي العمليه الاولى الي اعملها بعد3سنوات زواج وانا الان صار على زواجي 5سنوات يعني صار سنتين للعمليه ولم اراجع اي دكتور بعد العمليه كان عندي هرمون الحليب وماده في الرحم الي تساعد الجنين على الالتصاق كانت غير موجوده عندي هذا كلام الدكتور مروان لكن صديقتي عملت العمليه بنفس المشفى وكانت مثلك ماعندها شي وحملت وجابت توم بنت وولد وبعدماولدتهم بسنتين حملت طبيعي بدون اي علاج وولدت ولد وبنت خالي بعد5عمليات انابيب عملت بنفس المشفى الشرق وحملت بتوم بنت وولد وبعدسنتين حملت طبيعي بدون اي علاج وجابت بنت وانتي توكلي على الله واعملي العمليه وربنا يرزقك بالذريه الصالحه بس ودي اسالك انتي ليه الجماع بعد العمليه هو اول شي بيوصي فيه الدكتور بعد الانابيب او التلقيح يمنع الجماع والحركه وحتى الاستحمام في الدوش ارجو من تعملي العمليه تلتزمي بالتعليمات وانشالله يكون النجاح حليفك يارب

[حنان الامومه]

ممكن اسالك هل الدكتور مروان موجود في الشام وبيعمل عمليات ؟انا سمعت انو مسافر نسيت اقلك صديقتي عملت معي عمليه في مشفى الشرق عند الدكتور مروان لكن بالمره الاولى لم تنجح وكان عندها اجنه مجمده بعدسنه من فشل العمليه الاولى راحت رجعت الاجنه المجمده وماشاء الله الان هي حامل في الشهر الثامن بتوم بنات يارب الله يوفقك وتبشرينا يارب

[leemona]

شكرا للجميع عالتواصل المميز...
شكرا لك حنان الامومة على هالمعلومات القيمة انا بامس الحاجة اليها وعطيتني امل كتر خيرك انا حكيت مع المشفى وطلبت الدكتور ورد السكرتير عالتلفون وقالي تعي ومنستقبلك معناتا هو بالشام مو مسافر.خليني اتاكد لكااا..وكنت محتارة بينه وبين الدكتور معاذ عثمان في المشفى الشامي ...بس عميقلولو انه مشفى الشرق متخصص لهالموضوع طفل الانابيب
انا رح اوضحلك عملت تلقيح صناعي(حقن نطاف داخل الرحم) بعد الحقن قال لي الدكتور مارسي حياتك بشكل طبيعي وسال زوجي الدكتور عن الجماع قالو عادي ومافي ضرر استنى فقط 24 ساعة بس يلتئم الجرح لانه نزفت شوي فانا مشالله طلعت من عندو مشي عالبيت يقلي زوجي اخدلك تكسي وانا قول حابة اتمشى ونزل حسيت كل شي قصدي حسيت بالعينة اللي حطولي ياها نزلت مني بس بقولو الحيوانات المنوية لاتسقط مابعرف وبعد 4 ايام صار جماع ونزفت كتيرضل ليوم الدورة مع العلم اني كنت اخد حبوب التثبيت فعرفت انه فشلت..
طفل الانابيب هي اول مرة وخايفة ومكلفة جدا ومفلسة صراحة انا يعني عندي هالفرصة الوحيدة وانشالله تنجح ادعولي
كلامك طمني ورح خبرك بالمستجدات انشالله شكرا واي معلومة تذكرتيا خبريني وقليلي شو لازم ساوي واللي ممنوع وليش الحمام ممنوع اول مرة بسمع هالمعلومة شكرا جدا

[leemona]

تسلمي حبيبتي نيرال انشالله بتنجح وبتجيبي احلى توائم
نصيحتي الك الراحة التامة وعدم الجماع لاتردي عالدكتور ازا قلك مابيأثر....
انا عندي كتير صديقات عندن مية علة ومشكلة بتأخر الحمل ومشالله بيحملو بسرعة ... والعالم مابتصدقني وقت بقولو تحاليلي انا وزوجي سليمة بقلولي معقول كل هالسنين وسليمة؟؟! حتى تمنيت انه يكون عندي مشكلة ولما كنت ساوي التحاليل ويقلي زوجي سليمة ابكي ..اقله بدي يكون في سبب لاعرف وعالجه ...سبحان الله رزقة وانشالله الله يرزقني ويرزق كل مشتهي يارب

[سيدة العمر]

اااااه ياحبيبة البى زكرتينى بحالى وبخجلى من الاطباء... انا لما كنت اروح لعند الطبيب اروح ابكى ومنهارة مش متخيلة كيف طبيب يكشفنى ويلمسنى غير زوجي... زوجي يلا يلا اتحملو وكمان ولله بخجل منه ومغلباه....... حتى لما احكيلو عن مشاعرى من الاطباء بيقولى عادي شو يعنى؟ ماهو بيشوف الف وحدة متلك... لا تفكرى حالك لحالك
مبين انك حساسة كتير وبتفكرى كتير...
انا زيك ما كان عندي مشاكل ولا شي وكل امورى تمام بس من كتر ما بفكر وكنت اشرب مرمية كتير طلعلى كيس مائي على المبيض وعملت عملية وسحبت الكيس...
وزوجي عنده ضعف...
وعملنا تلقيح صناعي وفشلت لانو كان دكتور غبي...
وحاليا هينى زرعت وعملت اطفال انابيب وهينى بستنى بالنتيجة ... بس كلام الاخت حناان الامومة احبطنى خايفة يطلع عندى الحمل ضعيف وينزل!!!

ربنا يتمملنا ع خير يااااااارب
نصيحتى الك لا تضيعى عمرك واعمليها

[leemona]

سيدة العمر طمنينا عنك واحكيلنا عن تجربتك بطفل الانابيب انا كتير بحب اسمع منك حاسة حالتنا متطابقة انا وانتي بكل شي ..الله يبشرك بالطفل المعافى ويرزقك