كيف تقبلتم الوضع .. ؟؟

[Micorazon]

اعشق جنونك انتي نفس حالتي الاولى بالضبط

لما قالولي اني مفتوحه اربعه سانتي مع انو ماكان نازل دم ولا ماي

والله من الخوف والفزع اللي اصابني ابني قام يركل بشكل ما حسيته قبل كانه حاس بخوفي وانا ابكي واحط ايدي على بطني واقول معليش ياماما يارب اشوفك بالجنه

موقف صعب والاصعب لما اجهضت من كم يوم

السستر كانت تتافف وزهقانه تبي اجهض بسرعه وانا انوح مو ابكي واقول لهم مو مره ثانيه ليلحين ماتحرك حرام عليكم وهم يضحكون علي كانهم يشوفون مسرحيه

وقتها تمنيت امي يمي تمسح على راسي وتواسيني .. بس ماكان عندي غير ربي يمسح على قلبي والهمني وانا بالم الطلق اقول اللهم اجرني في مصيبتي انا لله وانا اليه راجعون ياربي راضيه بحكمك واحبك نفس ماتحبني يارب عوضني

حبيبتي ما اقول الاالا بذكر الله تطمئن القلوب

[loola]

صار لي شهر من الاجهاض ومعاي ٤ حوامل صديقات غربة ووحدة منهم ولدت تؤام الله يخليهم .. اول ماصار الشي استغفر الله كنت اتسائل ليش ؟ اللهم لااعتراض
و اللي ولدت كانت بتنقل لسكن جديد و رحت لها وساعدتها وانا صار لي اسبوع من الحمل
و كنت اروح لها لما ولدت واتحرك وايد .. و مو قادرة انسى لما قلت الها انا حامل قالت : شفيييييكم على الحمال ؟؟؟
كل البنات اللي هني كل يوم وحدة تحمل ؟ كانه الحمل صاير عدوى ؟ .. حز بخاطري كلامها .. لاني اعتبرتها اقرب وحده لي هنا .. و ماسألت عني لما قلت الها اجهضت *ـ* انصدمت و حسيت الدنيا ضايقة فيني و حتى ماابي اطلع مكان و طلعت من المعهد وو قفت دراستي .. وللحين دايم افكر وابجي وانا واثقة بالله انه راح يعوضني و يعوض كل فاقدة وكل محرومه بالذرية الصالحة

والحمدلله على كل حال =)

[سمر الليل]

هلا من شاف مصيبتي غيرة هانت علية مصيبتها
انا زوجي راسل لي رسالة في العيد كاتب ان شااء الله السنة الجاية تلبسيني علاوي ولدنا
والله كتب لي الحمل توقيت ولادتي في العيد بس الله ماكتب لي مات في بطني في الشهر الرابع
تاثرت كثير مر العيد علي وشفت الرسالة وجلست ابكي وبعدين قلت الله له حكمة
وحملت وهم مات في بطني وحملت مرة ثالثة مات في بطني وتاثرت كثيرة لان تعبت نساه وصابني نزيف
بعدها تاخرت ماحملت سنة وسبعة اشهر وحملت بعدها وهم مات في بطني والان من اجهضت لي 20 يوم
بس ارجع واقول الله رحيم بعبادة وراح يرزقنا
وطبعا بدون سبب طبي يم توقف نمو الجنين

[Micorazon]

لولا حبيبتي اللي سويتيه يدل على اصلك وطيبكواللي هي قالته وسوته يدل على اصلهاوسوء اخلاقها.. ورغم هاذا الله يعطيها وحرمك لحكمه لا تحسبي هالشي عقاب يمكن زيادة محبه من الله وحب يسمع صوتك تدعينه

ربي يعوصج خير وتوأم حلوين باذن الله



سمر الليل انتي 90٪ اللي يصير لك بسبب الاجسام المضاده الدم مايوصل للبيبي ويموت

روحي سوي فحص الاجسام المضاده واللوبوس وشوفي شنو فيك علشان لو جذي راح يعطونج بيبي اسبرين من والى نهاية الحمل

والحمد للهعندج كم طير في الجنه يشوفونج وينتظرونج تدخلين معهم

ربي يعوضكم واياي خير

[عشرينية]

موضوع جميل اختي ام غلا
الله يجزاك خير خليتينا نطلع شي محصور في قلوبنا واحيانا الكتابة تكون معبرة اكثر من الحكي
انا قصتي يمكن شوي مختلفة عنكم
انا فرحتي بالحمل كانت اكثر بكثير من حزني على فقدانه
لاني وصلت لدرجة اني أيأس من انه يكون داخل رحمي طفل احس فيه واشوف صورته بالسونار
اختي الكبيرة لها 17 سنة متزوجة وربي ماكتب لها انها تحمل
ماخلت ولا مكان الا وراحت تعالجت فيه بس مالها نصيب
لما تزوجت جلست سنة ماحملت
جاني خوف وصرت اوسوس اني مثل اختي مارح احمل
رحت عند الدكتورة صلحت لي تحاليل وقالت لي تحاليلك سليمة بس يمكن زيادة الوزن لها سبب في منع الحمل
وجلست بعدها سنتين اصلح رجيم لين ماصار وزني مثالي على طولي
رحت عند دكتورة ثانية اسمها لمياء خليل في مستشفى دلة
صلحت لي تحاليل وقالت لي سليمة
طيب ليش ماحملت وانا حتى الوزن نزلته
وصلح زوجي تحاليل وكمان كانت سليمة
عطتني كلوميد وقالت لي هالشهر استخدميها وان مافادتك مقدر اصلح لك شي ثاني غير التلقيح الصناعي
هنا جتني الصدمة
تلقيح صناعي وانا سليمة
طيب عطيني ابر منشطة اقوى من الكلوميد وتدرجي معي في العلاج
قالت هذا اللي عندي واذا مو عاجبك لعد تجيني
طلعت من عندها ابكي ومقهورة على عمري
زوجي قال لي اهم شي اننا سليمين وماعليك من شي
اذا ربي اراد لنا بطفل بيرزقنا
استخدمت الكلوميد شهر شوال
وانا نفسيتي تعبانة وكلام الدكتورة جدا اتعبني
خلتني افقد الامل بشكل مو طبيعي
طبعا جتني الدورة في ذو القعدة وعرفت انه الكلوميد ما جاب نتيجة
وبعدها جتني دورة 3 الحج والتهيت بالجامعة وبالاختبارات والبحوث وسبحان الله شهر الحج ماصلحت جدول التبويض وطنشت موضوع الحمل
والجماع ما صار الا يمكن 3 ايام في ذاك الشهر لانه اغلب الوقت كنت عند اهلي واشغالي بالجامعة نساني كل شي
وشهر محرم تاخرت علي الدورة وكانت تجيني الامها وصدري تحجر وانتظرها تنزل مانزلت
قالت لي صديقتي صلحي تحليل منزلي يمكن حامل
قمت اضحك عليها اقول لها من جدك اي حمل اصلن الدورة اعراضها عندي
قالت حللي وش خسرانة
طلعت من الجامعة ومريت صيدلية ورجعت البيت سويت التحليل وخليته ع المغسلة
ورحت توضيت وصليت ظهر وانا مو مهتمة لانه ماعندي امل
بعد ماصليت رجعت للحمام اشوف التحليل
طلعت يابنات خطين واضحة وضوح الشمس
مو عارفة كيف اوصف لكم شعوري
بعد 4 سنين اشوف خطين عمري ماحلمت اني اشوفهم
جلست انتفض
كلمت زوجي وقلت له طالع لي خطين
قال لي يمكن تتوهمين وانه الخطين مو باينة
قمت صورتها له وارسلتها وقلت شوف بعيونك
رجع على طول من دوامه واخذني ورحت صلحت تحليل حمل
الممرضة تقول لي مبروك مدام حامل
وتعطيني الورقة اطالع فيها وابكي مو مصدقة انه انا انسانة طبيعية احمل مثل ما باقي الحريم يحملون واني بحس باحساس الامومة
وربي كنت امشي في سيب المستشفى والورقة بيدي واحس اني ملكة
دقيت على امي ابشرها وصوتي مو طالع من البكا
لدرجة حتى الوحم والتعب اللي تعبته فيه كنت مبسوطة فيه
احس اني صدق حامل
وجلس البيبي عايش في بطني 12 اسبوع وبعدها توقف النبض
حزنت عليه انه مات وبكيت لكن الحين صاير عندي امل وانه ربي بيرزقني مثل مارزقني اول مره
واحمد ربي اني حسيت ولو شهرين باحساس الامومة
وصورة اول سونار لسه محتفظة فيها مارميتها
كل يوم اطالع لها واحس انه شي ملكي وخاص فيني
وربي يابنات اذا شفت صورة الكيس اللي طالع بالسونار شي في بطني يتحرك وجسمي يقشعر
احس بشي حلو
الحمدلله على كل حال
لله ما اخذ وله ما اعطى
وربي ياجرنا في مصيبتنا ويعوضنا خير منها
وانا حاليا استخدم اسبرين وفوليك اسيد
والدكتورة نصحتني اقعد شهرين بدون حمل
وانا الان لي 25 يوم من عملية الاجهاض وانتظر اول دورة تنزل
يمكن طولتت عليكم بكلامي بس بجد الموضوع خلاني اطلع حاجات كثير انا ماقلتها لاحد

[سمر الليل]

للاسف انا استخدمة الاسبرين والابرة الكلكسان بس مانفع معي

[Micorazon]

عشرينيه يحياتي والله الحمد لله اللي اطعمج نعمة الحمل وربي يطعمج نعمة تمام الحمل امين

سمر الليل حبيبتي شلون وضحي شكثر صارلج تاخذين البيبي اسبرين

[عشرينية]

الله يعوض علينا جميع
اختي سمر الليل
عادة اول اجهاض الاطباء مايلتفتون له
ويشوفون انه طبيعي
ومايشدون حيلهم ويبحثون في الاسباب الا اذا تكررت المأساة وصار عندك هيستوري يعني تاريخ طبي
ولكن الان صاروا يعطون اي وحدة تجهض بيبي اسبرين
لانه الغالبية العظمى اشكاليتهم التجلط والاجسام المضادة
فاذا مانفع اكيد يكون فيه اشكالية ثانية
ولكن مايعتبر دائما علاج قطعي
والله يكتب لنا كل خير

[Um Ghala]

لووورا .. حبيبتي والله قلبي تقطع على قصتك =( و بكيييييت .. الله يعوض صبري و صبرك خير يآرب .. و ان شالله بضيفك في البلاك بيري ..


دفا الكون و حنانه .. الله يتمم حملك على خير يآرب و تبشرينا بولادتكـ ..


المتأملة خير .. ان شالله يآرب الله يسمع منك و شكرا على الدعوة الطيبه ..


ام عبدالاله .. الله يجعله طير من طيور الجنه يآرب .. والله أنا مثلك ما اقارن نفسي و اصبر نفسي .. بس استغفر الله تيني ايام فترات احس بالحزن كله يرجع من أول و يديد و تبدا الافكار .. الحمدلله على كل حال يااااارب ..


Micorazon .. حبيبتي والله .. الله يعوضك بالحمل السليم الثابت لـ 9 شهور و توأم سالمين و معافين يآرب .. ربي معاك ان شالله ..


manou .. والله حتى أنا الخوف موجود =( .. بس موكله امري لـ رب العالمين .. تدرين أنا بالنسبالي شو كان اصعب موقف .. اللي يشتغلون بالمستسفى ما يعرفون موضوعي و كل حد يسألني وين البيبي .. وين البيبي .. ؟؟ في العنايه .. ؟؟ و قلبي يتقطع و اقولهم مات .. الحمدلله يأرب اللهم لا اعتراض ..


اعشق جنونك .. حتى أنا والله =( لآخر لحظه بنتي تلعب في بطني .. الحمدلله يااااااااارب .. الله يعوضني و يعوضك بالحمل السليم الثابت لـ 9 شهور .. ربنا كريم و ارحم الراحمين .. عليك بـ الربط في الحمل الثاني و ان شالله تعدين الـ 9 شهور على خير ..

loola .. الله يهديها صاحبتك .. الناس ما يقولون خير ابدا .. الله يعوضك يارب ..

سمر الليل .. أنا للحين عندي بطاقة زوجي كاتب فيها لما بشرته بالحمل .. ان شالله نفرح بالبيبي و الف مبروك .. و عندي صور السونار و حطيتهم كلهم في البوم .. و الحمدلله يآرب .. و تابعي موضوعك عشان تعرفين سبب الاجهاض و الله يعوضك بالحمل السليم يآرب ..

عشرينية .. الحمدلله مثل ما ربي رزقك اول مره راح يرزقك ثاني و ثالث مره و ان شالله بيكون حمل سليم و ثابت لـ 9 شهور و تبشرينا يآرب .. و تكلمي و خذي راحتك الموضوع موضوعك و صح نحن محتاجين نتكلم و نتكلم و نطلع اللي في قلبنا .. الدكتوره كانت تقولي بتبكين ابكي عشان ترتاحين .. الحمدلله