قصه ولادتى بحبيب قلب مامى محمد

[mai mohamed]

هههههه واخيرا هاحكى قصه ولادتى بعد ماكنت بقرا كل القصص واقول امتى اولد بقى واخلص وحاسه بكل اللى منتظر ولادتو يارب سهل عليكم جميعا

ندخل بقى على قصة الولاده

بدا التعب عندى يوم الاتنين الفجر كان يوم 7 شوال وكنت لوحدى طبعا ف الشقه لان جوزى مسافر وانا نزلت اولد ف بلدى عند امى بس ف اليوم دا روحت شقتى وقولت شكلى هاكمل الشهر للاخرو ومكنتش حاسه انى هولد غير بعد ما التاسع يخلص
وسبحان الله يومها الساعه اربعه الفجر حسيت بمغص قمت قولت دا الحمام وانو طبيعى ودخلت الحمام ورجعت نمت عشر دقايق ولقيت المغص رجعلى تانى قمت اتمشيت شويه ف الشقه والفجر اذن صليت الفجر وكلت تمر وكلت معلقة عسل ورجعت نمت تانى وهكذا الم ومغص يروح ويجى لحد 7 الصبح وماصدقت النهار طلع واتصلت باامى وحكت لها قالتلى دى مغص ولاده هاتى شنطتك وتعالى وانا فرحت مع ان الالم كان شديد بس طبعا انا مش فاهمه حادجه وان دا ميجيش حاجه ف الالم اللى قبل الولاده بالنسبه ليا بكريه فدا بالنسبه لى الم صعب المهم فرحت بقى انى خلاص هولد واخيرا وقبل ما شهرى يخلص بيومين حمدت ربنا وقولت الحمدلله
ودعيت ربنا يسهل عليا وقولت يارب بكرا زى دلوقت اكون خلصت من كل حاجه
المهم روحت عند مامتى واتصلت بالدكتوره قالتلى خدى حبوب مسكنه للالم عشان تساعد الرحم يفتح وكمان نعرف اذا كان مغص ولاده فعلا ولا لا
خدت حبيتين مسكن والمغص اشتدت عليا ونزل عليا افرازات بنى ماما قالتلى دى علامه الولاده
اتصلت تانى ع الدكتوره قالت لما يبقى بين الطلقه والطلقه 5 دقايق تيجى انا طبعا مش متحمله ومستعجله وقولت اروحلها تعملى اى حاجه تسرع الولاده المهم روحتلها وكان فيا الطلق قالتلى لسه الرحم مفتحش قدام 12 ساعه كلى عنب وسكرياتا وتعالى بعد 12 ساعه لما الالم مش تتحملى تقفى منو وانا بقى روحت احبطت جدا وحسيت الالم خف جات على 12 بالليل والالم زاد جدا ومبقتش متحمله اصعب بكتييير وبين الطلقه والطلقه 5 دقايق قعدت لحد 2 بالليل وروحتلها صدمتنى قالتلى فاتح بس 2 سم قدامك 8 ساعات قولتلها مش متحمله هاتيلى طلق صناعى قالتلى هاسيبك ساعتين وارجعلك وانا ميته من التعب ورجعت بعد 2 ساعتين لسه مفتحش بردو غير 2 سم قالتلى هاسيبك كمان ساعتين وارجعلك المهم رجعت الصبح الساعه 7 علقت لى محاليل وعملت حقنه طلق صناعى وقتها بقى شوفت الموووووووووووووت قالتلى قدامك ساعه وتولدى وكل شويه تيجيلى تقولى فتح شويه فتح كمان وفتحت كيس الميه وكنت بصوت وماما جنبى ماسكه ايدى تعيط وانا مش قادره واقول يااارب لحد ماموتت قالتلها طلقه كمان ودخليها العمليات ودخلت بقى على اوضه الولاده يالهوووووووووووووى موت موت بجد الم لا يتخيله بشر انا مكنتش متخيله ان امهاتنا تعبو اوى كدا ربنا يخليهم يارب ويجازينا خير عن كل الم قعدت بقى الطلقه تيجى وانا ادفع بكل قوتى وطبعا فتحتلى من تحت حته عشان توسع والاخر نزل محمد حبيبى ولما نزل وسمعت صوتو حسيت ان الالم كلو زاااااااااال وانى خلاص ولدت وقعدت الدكتوره تنضف فيا وانا اقول للمرضه ابعدى شويه لما اشوف شكلو هاتى اشوفو وبعدين خيطتلى وانا مش حاسه بالم بس حسيت بالخياطه بس وعدت ع خير ورحت بقى وكان احلى يووووم وربنا يخلى محمد ليا ولابوه ويقوم كل ام بالسلامه