تجربتي في الولادة بمستشفى اسطون طريق الخبر الدمام

[معالي الوزيره]

تجربتي في الولادة بمستشفى اسطون طريق الخبر الدمام
تجربتي في الولادة بمستشفى اسطون طريق الخبر الدمام




ابشركم يا خواتي ربي رزقني بولد الحين كملت 45 يوم
وبحط لكم تجربتي في مستشفى اسطون طريق الخبر الدمام
للأمانه المستشفى ربحي من الدرجه الأولى
انا كنت اتابع في مستوصف الرأي الطبي في الدمام عند الدكتوره
سونيا انا ارتاح لها واحبها كثير بصراحه وما اتعالج الا عندها
حبوبه وبشوشه وبالها وسيع وتتحمل الأسئله الزايده عن الازم
بعد ما دخلت شهري التاسع عطتني نسخه من ملفي
ورحت فتحت ملف ولاده بمستشفى الروضه
دخلت التاسع في رمضان وتعبت وانا اشرب دارسين
وزنجبيل لحد ما صرت احس ان دمي قلب دارسين
وماخليت شي ما جربته وتعبت من المشي كل يوم
ادور في البيت كني العب الثعلب فات فات وبذيله سبع لفات
كأني دوامه بس امشي تعبت كثير والله كنت اركض وادق رجلي بالأرض بقوه عشان
ابي امشي بقوه ويفتح الرحم واولد خلاص وصلت حدي من التعب
يوم من الايام حسيت بتعب ومو طلق لا تعب
وثقل شديد في بطني احس روحي بتطلع سبحان الله
قلت لزوجي ابي اروح المستشفى
طلعنا بعد العشا وكانت الدمام من الزحمه تحسون ان مافيه احد في بيته
ابد كل الناس برا قلت لزوجي على ما أوصل المستشفى
الا الطلق جاني وولدت بالسياره بعد
خلينا نروح اسطون مع ان هذا المستشفى ابدا
ما كان في حساباتي لأن اختي بكريه ولدوها قيصريه
مع ان وضعها طبيعي وما فيها شي يستدعي القيصريه
بس لأن اختي كانت خايفه الدكتوره قالت لها تبين اولدك قيصريه وما تحسين بشي اختي
لانها بكريه وجهل منها بموضوع القيصريه قالت اوك قيصريه
وهي توها داخله التاسع يعني بدري حتى على ولادتها
المهم رحت كنت سامعه عن دكتوره هنديه
رحت رميه منغير رامي بس ابي اهرب من الزحمه
ومن التعب الي فيني قلت لزوجي نروح اسطون بعيد عن زحمة داخل الدمام
المهم مالكم بالطويله
وصلت اسطون وقلت ابي الدكتوره الهنديه قالو رايحه العمره بتجي الاحد
كان يوم خميس قلت اي دكتوره وخلاص
ودخلت عند نفس دكتورة اختي الي ولدتها ما كان فيه غيرها
اسمها دعاء مصريه
سوت لي سونار قالت الجنين حجمه كبير ووزنه كبيره
وممكن تولدين قيصريه
انا عيالي كلهم اولدهم صغار اكبر واحد فيهم وزنه 2 كيلو
والثانيه كيلو و700 جرام والثالثه كيلو و900جرام هذا تقول لي
3 كيلو و600 جرام
خفت كثير وقالت لازم تولدين قيصريه
قلت اوك ووقعت على العمليه
قالت تعالي السبت وادخلي على طول وعمليتك الساعه 8
وعطتني اوراق الدخول ورحت سجلتها وخلصت وطلعت بيتي
السبت دخلت المستشفى وانا طبعا لازم اكون صايمه من 12 بالليل عشان العمليه
ولطعوني لطعه جامده ليش تأخرتو يا ناس قال ايش
اسمج مو موجود بكشف العمليات ليش وانا مضبطه اوراق الدخول من يوم الخميس
وحاجزه موعد العمليه الساعه 8
المهم جلست لين الساعه 11وبعدين ودوني غرفة انتظار العمليه
وهنا الوضع اسواء من مايكون سردي مردي
رجال رايحه وعمال جايه وانا ضاقت فيني غطيت وجهي بالشرشف
تخيلو الين 12 توهم يدخلوني العمليه
وجا دكتور التخدير وعلى طول ابرة ظهر ما حتى سألوني
تعبت بشكل فضيع العمليه كأنها فلم رعب احس بكل حركه
بس بدون ألم كل شي كنت احس فيه
واسمع قرقعة السكاكين وطاخ وطيخ والدكتوره كان عندها مشكله مع دكتور ثاني وهذره
وقرقره وصراخ وتحلطم
وضع كأني في مقصب والقصابين يتهاوشون
لحد ما خلصت العمليه يوم شفت البيبي
تخيلو صغير مرررره نتفه ووزنه ما وصل 3 كيلو وتقول لي متضخم وكبير
وعطتني تخيل ان الوضع سيء ولا يمكن اولد طبيعي
المهم الحمد لله على كل حال قدر الله ما شاء فعل
القهر ان الدكتوره ولدتني وطلعت اجازه شهر بعد ولادتي على طول يعني بعد غرفة العمليات
الدكتوره لليوم ما شفتها ولا عطتني موعد بعد الولاده
ولا شفت وجهها ابد ورحت لهم بعد الولاده ب اسبوعين
قلت لهم دكتورتكم وينها يعني لازم تكشف على جرح العمليه
وتشوف الوضع وكذا قالت دخلي على اي دكتوره
ودخلت عند الهنديه بصراحه الدكتوره الي ولدتني تعاملها طيب وبشوشه
لكنها تستعجل القيصريه وغلب الي تولدهم قيصريه
واسرع ماعندها وتفتك يمكن الدكتورات الثانيات
افضل لكن الربحيه عند هذي الدكتوره واضحه بلا غبار
ووضع غرفة العمليات وغرفة الانتظار سيء جدا
ما يسكرون عليك ستار والرجال رايحين جايين وانتي بثوب العمليه وما يغطيك الا شرشف
وعمال النظافه رجال رايحين جايين وانتي سبيل
للكل عادي سرداح مرداح هذا اكثر شي ضايقني
في هذا المستشفى والقيصريه صحيح الدكتوره هولت الموضوع
لكن قدر الله ما شاء فعل بس موضوع غرفة الانتظار وابرة الظهر
هذا اكثر شي رفع ضغطي
والبيبي لا كبير ولا متضخم ولا شي
ووزنه في الحمل يعني في بطني كان 3 كيلو وبعد ما ولدته
2 كيلو و800 جرام وكل الفلم ان الدكتوره بتطلع اجازه
وتبي نسبه على راتبها فخذتها من العمليات لانها اكثر من الطبيعي بالقيمه
وقبلي ولدت 3 عمليه وبعدي وحده
هبرتها وسافرت بحفظ الله
الحمدلله على كل حال
ولين اليوم ما احس اني طيبه واحس زي الدبوس يغززني في بطني
وما ادري ليش