زوجي مسؤول عن خواته!!

[تحب زوجها]

سلام عليكم يا حوامل ..


انا من اول ما حملت دخلت هالمنتدى و ظليت أتابع أخبار الحوامل ..
و الحين صرت بالشهر السابع ... بقى لي كم يوم وأدخل الثامن بإذن واحد أحد ..


مشكلتي باختصار اني من أول ما تقدم لي عرفت ان عنده ثلاث أخوات يتامى .. الأب متوفي و أمه كبيرة بالسن وما ترضى على بناتها و كل شي يسوونه تشوفه صح .. و هي للأمانة طيبة ونيتها دووم بيضا ولا تظن السوء بأحد .. لكن ما ترضى بالصراحة خصوصا اذا على بناتها
تزوجت ومن أول شهر حملت ولله الحمد والمنة... و تعرفون تغير المزاج... رغم اني مو عصبية وايد بس صرت مزاجية... و حمواتي الثلاث كلهم مراهقات
وحدة عمرها 16 والثانية 14 والثالثة 11
اخوان زوجي الكبار.. اثنين متزوجين وساكنين بنفس البيت بس بالطابق الثاني كل واحد بشقته و شايلين يدهم من البيت مو معورين روسهم.. والثالث طالع بشقة.. والرابع خاطب توة وما يقعد بالبيت الا للنومة وخطيبته ما تتدخل نهائي
زوجي يقول هو المسؤول وما بيشيل يده عن خواته ... لكن مراهقاااات .. و مشاكلهم أكبر منهم
الي تكلم شباب بالتلفون بالخش والي تحط صورها بالنت وتعرضها... ما عدا الصغيرة ما عندها غير دراستها

عجزت وانا اكلمهم ما منهم فايدة واذا زوجي كلمهم يبينون الطاعة والندم وكل شي لكن يرجعون من تحت لتحت... وانا حياتى تعتفس بسببهم لأنه يكون متضايق من تصرفاتهم رغم انه يحاول ما يعكر مزاجه بالغرفة معاي لكن ما يقدر يسيطر على أفكاره

و زوجي يقول لي يتامى و تحمليهم و تابعي حاجاتهم.. و انا الحمدلله ماني مقصرة .. كل شي يبونه أحاول قدر الامكان أوفره لهم وأطلعهم و كل شي
لكن مشاكلهم صارت كبيرة وانا ما ابي اتدخل .. ودي أشيل يدي من البيت نفس زوجات حمياني .. و الله أريح لراسي و لحياتي مع زوجي

خايفة على هالجنين الي ببطني لا تصيده اعصاب من زود اعصابي الفلتانة من حركاتهم و بلاويهم ... و ادري زوجي مستحيل يطلع من هالبيت



وش الشور عندكم ...